KA BUKE MUA A MOSE, I KAPA ʻIA KINOHI 14
14
MOKUNA XIV.
1 Ke kaua o nā aliʻi ma Sodoma. 11 Lawe pio ʻia ʻo Lota. 14 Hoʻopakele ʻo ʻAberama iā ia. 18 Kā Melekizedeka hoʻomaikaʻi ʻana iā ia. 20 Hāʻawi ʻAberama i ka hapaʻumi o ka waiwai pio nona. 22 A hoʻihoʻi i ke koena i ke aliʻi o Sodoma.
1¶ I ka manawa iā ʻAmerapela ke aliʻi o Sinara, ʻo ʻArioka ke aliʻi o ʻElasara, ʻo Kedorelaomera ke aliʻi o ʻElama, a ʻo Tidala ke aliʻi o Goima,
2kaua maila lākou me Bera ke aliʻi o Sodoma, me Biresa ke aliʻi o Gomora, me Sinaba ke aliʻi o ʻAdema, me Semebara ke aliʻi o Zeboima, a me ke aliʻi o Bela, ʻo ia hoʻi ʻo Zoara.
3I hoʻākoakoa ʻia kēia poʻe a pau ma ke awāwa ʻo Sidima, kahi ia o ka Moana Paʻakai.
4Hoʻokauā akula lākou na Kedorelaomera i nā makahiki he ʻumikumamālua, a i ka ʻumikumamākolu o ka makahiki, kipi aʻela lākou.
5A i ka makahiki ʻumikumamāhā, hele maila ʻo Kedorelaomera, a me ia pū ua mau aliʻi lā, a hahau maila i kā Repaima ma ʻAseterota Kanaima, me kā Zuzima ma Hama, a me ka ʻEmima ma Sehave ma Kiriataima.
6A me kā Hora ma ko lākou mauna Seira, a hiki i ʻEle Parana ma ka wao akua.
7A hoʻi maila lākou, a hiki maila i ʻEne Misepata, ʻo ia ʻo Kadesa, a hahau aku ia i ko ka ʻāina a pau o kā ʻAmeleka, a me kā ʻAmora i noho lā ma Hazezona Tamara.
8Hele akula ke aliʻi o Sodoma me ke aliʻi o Gomora, me ke aliʻi o ʻAdema, a me ke aliʻi o Zeboima, a me ke aliʻi o Bela, ʻo ia hoʻi ʻo Zoara; a kaua akula lākou me kēlā poʻe ma ke awāwa ʻo Sidima
9me Kedorelaomera ke aliʻi o ʻElama, a me Tidala ke aliʻi o Goima, a me ʻAmerapela ke aliʻi o Sinara, a me ʻArioka ke aliʻi o ʻElasara; ʻo nā aliʻi ʻehā me nā aliʻi ʻelima.
10He nui nā lua bitumena ma ke awāwa ʻo Sidima; heʻe akula nā aliʻi o Sodoma a me Gomora, a hāʻule ihola i laila; a holo akula ka poʻe i koe ma ka mauna.
11Lawe pio akula lākou i ka waiwai a pau o Sodoma a ʻo Gomora, a me kā lākou ʻai a pau, a hele akula.
12Lawe akula hoʻi lākou iā Lota, i noho ai ma Sodoma, ʻo ke keiki a ko ʻAberama kaikuaʻana, a me kāna waiwai, a hoʻi akula.
13¶ Hele maila kekahi o ka poʻe i pakele, a haʻi maila iā ʻAberama ka Hebera; no ka mea, i noho ai ʻo ia ma nā lāʻau ʻoka no Mamere ka ʻAmora, ka hoahānau o ʻEsekola, a ʻo ʻAnera; a ua hoʻolauna pū lākou nei me ʻAberama.
14Lohe aʻela ʻo ʻAberama, ua lawe pio ʻia kona hoahānau, alakaʻi akula ia i kona poʻe kānaka i hoʻomākaukau ʻia ka poʻe i hānau ma kona hale iho, ʻakolu haneri a me kumamāwalu, a alualu akula iā lākou a hiki i Dana.
15Mahele ihola ʻo ia i kona poʻe e kūʻē iā lākou, ʻo ia a me kāna poʻe kauā i ka pō, poʻi pō akula iā lākou, a alualu akula iā lākou a hiki i Hoba, aia ma ka lima hema o Damaseko.
16Hoʻihoʻi maila ia i ka waiwai a pau, a lawe maila hoʻi ʻo ia i kona hoahānau iā Lota, a me kona waiwai, me nā wāhine hoʻi, a me nā kānaka.
17¶ Hele aku ke aliʻi o Sodoma i waho e hālāwai me ʻAberama, ma hope o kona hoʻi hou ʻana mai mai ka luku ʻana iā Kedorelaomera a me nā aliʻi me ia, ma ke awāwa ʻo Save, ʻo ia ke Awāwa o ke Aliʻi.
18A ʻo Melekizedeka ke aliʻi o Salema, lawe maila ia i ka berena a me ka waina, ʻo ia ke kahuna o ke Akua Kiʻekiʻe Loa.
19Hoʻomaikaʻi maila ʻo ia iā ia, ʻī maila,
“E pōmaikaʻi nō ʻo ʻAberama i ke Akua Kiʻekiʻe Loa,
Nona ka lani a me ka honua;
20“E hoʻomaikaʻi ʻia hoʻi ke Akua Kiʻekiʻe Loa,
Nāna i hoʻolilo mai kou poʻe ʻenemi i loko o kou lima.”
A hāʻawi akula ia nāna i ka hapaʻumi o nā mea a pau.
21ʻĪ maila ke aliʻi o Sodoma iā ʻAberama, “ʻO ke kanaka koʻu, a e lawe ʻoe i ka waiwai nou.”
22ʻĪ akula ʻo ʻAberama i ke aliʻi o Sodoma, “Ua hāpai aku nō au i koʻu lima iā Iēhova, i ke Akua Kiʻekiʻe Loa, i ka Mea nona ka lani a me ka honua,
23ʻaʻole au e lawe noʻu i kekahi maʻawe, ʻaʻole hoʻi kekahi mea iki o kāu, o ʻōlelo aʻe ʻoe, ‘Ua waiwai ʻo ʻAberama iaʻu.’
24“ʻO ka mea wale nō a ka poʻe kānaka ʻōpiopio i ʻai ai, a me ka puʻu waiwai pio a ka poʻe kānaka i hele pū ai me aʻu: ʻo ʻAnera, ʻo ʻEsekola a ʻo Mamere; e lawe lākou i ko lākou puʻu.”
Právě zvoleno:
KA BUKE MUA A MOSE, I KAPA ʻIA KINOHI 14: KBH
Zvýraznění
Sdílet
Kopírovat
Chceš mít své zvýrazněné verše uložené na všech zařízeních? Zaregistruj se nebo se přihlas
Ka Baibala Hemolele © Partners Development Foundation, 2018.