Mateo 4
4
Yesu kagezwa kuluwala
1Imala Yesu kagaligwa na Loho kuluwala, giladi yagezigwe na Chaumbeya Mgeza-wanhu. 2Kaleka kuja siku milongo mine imisi na ikilo, kimambukizo kona nzala. 3Mwenembago kamwizila kamulongela, “Uhawa gwegwe mwanage Mulungu, galongele gano gamabwe gagalamuke mandiya.” 4Aheyo kamwidika yolonga, “Yandikigwa, Munhu hawa mgima kwa mandiya yeka, bali muna zimbuli zose zilawa mmulomo wa Mulungu.”
5Yomala Mgeza-wanhu kamsola kamgala kudiwambo dingʼalile, kamwika uchana hainhomboti ya dihekalu. 6Kamulongela, “Uhawa gwegwe mwanage Mulungu, patukila hasi, kilumbo yandikigwa:
Kokulagizila malaika zake wakudanghe mmikono mmwawo,
sukuwize kwikwangwala mgulu wako mwidibwe.”
7Yesu kamulongela, “Kabili yandikigwa, Sikuumgeze Mndewa Mulungu wako!”
8Yomala Mwenembago kamsola kamgala kugongo tali nghani, kamulagila ukulu wose wa ulumwengu na unovu wake. 9Kamulongela, “Gano gose nokwingha uhagwa mavindi unhambikile.” 10Baho Yesu hayamulongele, “Goboka chaumbeya gwe, kilumbo yandikigwa, Mgwile mavindi Mndewa Mulungu wako, mtambikile heyo yali yeka!”
11Yomala Mwenembago kamuleka, na lola malaika weza wamsanghanila.
Yesu kavikila Zabuloni na Naftali
12Basi Yesu viyahulike kamba Yohana kafungigwa, kenuka kachola Galilea. 13Kalawa Nazareti, keza kakala Kapernaumu, diwambo dili hiko mhwani mzimbaka zawo Zabuloni na Naftali. 14Giladi divikizwe Longa dilongigwe na mtula-ndagu Yesaya yolonga:
15“Isi ya Zabuloni na isi ya Naftali,
nzila ya mmazi, umwambu wa Yordani,
Galilea ya wamhazi!
16Wanhu waja wakalile mdiziza,
wawona mlangaza mkulu,
na hewo wakalile muiisi ya kimvuli cha wafile,
mulenge uwalawila.”
17Kulawa mazuwa higo Yesu kandusa kupeta na kulonga, “Galukeni, lekeni gehile, kilumbo Undewa wa Kuulanga ukwenhuka!”
Wanahina wasongile
18Na heyo viyakalile yobita mmambwegambwega ga ibahali ya Galilea, kawona ndugu wabili, Simoni yokemigwa Petro, na Andrea ndugu yake, wogela nyavu mbahali, kilumbo wakala wavuvi. 19Kawalongela, “Ngholelezeni, na niye nomtendani muwe wavuwawanhu!” 20Mhunde wazileka zinyavu zawo, wamkoleleza.
21Kagendelela hamwande, kawona wandugu wayagwe wabili, Yakobo mwanage Zebedeo, na Yohana ndugu yake; hiwo wakala mngalawa hamonga na Zebedeo tata wawo, wotenda goya nyavu zawo. Kawakema. 22Mhunde waileka ingalawa na tata wawo, wamkoleleza.
23Na heyo kakala yozunguluka mumo Galilea mose, yowalanguliza mzingʼanda zawo za nhambiko Mulungu, na kupeta usenga unogile wa Undewa, na kuhonya utamu wowose, ne wene udodwa wali bule zimhiko. 24Azo simulizi zake zenela mwisi ya Siria yose; wamgalila watamu wose wagogigwe na utamu wa kiyekakiyeka na kugazwa, wene mizuka na wene vivambo na wene kuholola; kawahonya. 25Na matinghanilo bwando wamkoleleza, wolawa Galilea na Dekapoli na Yerusalemu na Uyuda na umwambu wa Yordani.
Právě zvoleno:
Mateo 4: ZAM75
Zvýraznění
Sdílet
Kopírovat
Chceš mít své zvýrazněné verše uložené na všech zařízeních? Zaregistruj se nebo se přihlas
New Testament in Zaramo © United Bible Societies, 1975.
