Mateo 15
15
Zimbokezi za iwanhu
1Baho Mafariseo hamonga na wana-Nzuma walawa Yerusalemu, wamgendela Yesu walonga, 2“Habali wanahina zako wozibananga mbila za wahenga, kilumbo hawanawa mikono kikomo cha kuja mandiya?”
3Kedika kawalongela, “Habali mweye moibananga mbila ya Mulungu mzimbokezi zenu? 4Kilumbo Mulungu kalonga: Wahulike tata wako na mamaako, na Yomuliga tataake bule mamaake, kodanganika. 5Bali mweye molonga, Yondayamulongele tataake bule mamaake, chochose kikunogele kutazwa na niye, acho cha Mulungu, 6avo sekeyamtaze tata wake hebu mamaake. Na mweye mwibeza ndagizo ya Mulungu muna zimbokezi zenu. 7Mweye wazenzeleganyi! Vinoga viyalagule Yesaya kumwenu yolonga:
8Wanhu wano wonhogola mmilomo,
komu miyoyo yawo yakutali na niye.
9Na hewo wonhambikila yamba,
wolanguliza malangulizo gali ndagizi za wanhu.”
Vilawaga mmulomo vyene uchapalisi
10Kawakema matinghanilo kawalongela, “Tegelezeni, mvimanye! 11Si kija kimwingila munhu mumlomo, kimgelaga uchapalisi, bali kija kilawaga mumlomo kicho kimgela munhu uchapalisi.”
12Baho wanahina zake wamgendela, wamulongela, “Kuvitanga kamba Mafariseo vuwahulike mbuli ija, wehilwa?” 13Kedika kalonga, “Ndigwa haihandile Tata wangu wa kuulanga, yongʼoligwa. 14Walekeni vivo, awo vimbugumbugu wolongoza vimbugumbugu; kamba kimbugumbugu yahamulongoza kimbugumbugu miyage, wokwingila mkolongo wose wabili.” 15Baho Petro yedike yomulongela, “Tupetele hala hijo!” 16Yesu kalonga, “Mwemwe na mweye tanhu mwabule lutondo? 17Hamvitanga kamba kinhu kihengila mumlomo, chobita mmunda, chogenda kwasigwa kucholo? 18Bali vilawaga mumlomo, volawa mmoyo; hivovivo vimgelaga munhu uchapalisi. 19Kilumbo muna umoyo molawa ngelegeza zihile, kukoma, ugoni, ufutuzi wa watwanzi, ubavi, ukalangama wa uvwizi, na maligo. 20Ago gago gamgelaga munhu uchapalisi; kamba ukuja na dikwe mmikono hunanawa, hakumgela munhu uchapalisi.”
Mtwanzi mkananeo
21Yesu kakulawa hiko, kagenda lwenza lwa Tiro na Sidoni. 22Baho mtwanzi Mkananeo yali muiisi ija kalawilila, kamtowela lwangi yolonga, “Umbonele bazi, Mndewa mwanage Daudi. Biti wangu kavagalwa nghani na mizuka.” 23Bali Yesu hamwidike mbuli. Na wanahina zake wamgendela, wampula wolonga, “Muleke yachole, kilumbo kotudesela kukisogo chetu.” 24Kedika kalonga, “Sigaligwe hengine komu muna iwanghondolo wagile wali mngʼanda ya Israeli.” 25Ija mtwanzi keza kamfugamila mavindi yolonga, “Mndewa, nhaza!” 26Kedika kalonga, “Havinogile kusola mandiya ga iwana na kuwasila ngʼangʼa.” 27Kalonga, “Ona Mndewa, bali mpaka ngʼangʼa wajaga upakapaka ulagale mkiya cha bwana wawo.” 28Baho Yesu yedike yomulongela, “Mama, kutogola kwako kukulu! Na viwe kumwako kamba vulonda.” Kahona biti wake lulawile ikimilo kikija.
Watamu kiyeka kiyeka wahona
29Yesu kakulawa hiko, kavika hangwazo ha ibahali ya Galilea, kakwena hakigongo, kakala hasi. 30Wamgendela matinghanilo bwando, wamgalila vimbetembete, vimbugumbugu, mibubuwi, wabanangike na wayagwe wayagwe bwando, waweka hamigulu yake, kawahonya. 31Uja umtinghanilo wakanganya vuwawene mibubuwi yolonga, wabanangike wogalamka wagima, vimbetembete wochola na vimbugumbugu wolola, wamtuniza Mulungu wa Israeli.
Wanhu elfu ne weguta
32Yesu kawakema wanahina wake kalonga, “Nowonela bazi matinghanilo, kilumbo dopata siku jekadatu wokala ha-monga na niye, na hewo wabule kinhu cha ukuja; komu kuwapoza wasindile na inzala ndema, sikuweze wasindukile mnzila.” 33Wanahina wamulongela, “Toipata halihi migate bwando hano haluwala, tuweguse mtinghano mkulu kamba uno?” 34Yesu kawauza, “Migate mingahi yumuli nayo?” Walonga, “Saba, na visomba vidododo.” 35Kawalagiza wanhu wakale hasi. 36Kaisola ija imigate saba na vija visomba vidododo, kamtogola Mulungu, kavimega kawengha wanahina zake, na hewo iwanahina wawengha matinghanilo. 37Waja wose weguta; walundiza visigale vya imigate, vigelo saba vimema. 38Awo wadile wakala wambigalo elfu ne, uhaleka kupeta watwanzi na iwana.
39Kawapoza madala, kengila mngalawa, kagenda umwambu wa Magadani.
Právě zvoleno:
Mateo 15: ZAM75
Zvýraznění
Sdílet
Kopírovat
Chceš mít své zvýrazněné verše uložené na všech zařízeních? Zaregistruj se nebo se přihlas
New Testament in Zaramo © United Bible Societies, 1975.
