Luka 9
9
Yesu watuma alondeshi ikumi na yaili
(Mt 10:5-15; Mk 6:7-13)
1Nga wayita yaya ikumi na yaili, wayapa ukulu na maka uku fiwa fyoshi nu kuposha imbombo. 2Wayatuma yume imbila ya wene-wi-Leesa, nu kuposha alwale. 3Wayanena, wati: “Mutachisenda chimwi icha kusila yiyo, intuwa nanti kwende, nanti unkate, nanti impia, nanti umwi pali mwemwe atawa ni nkanjo shili. 4Ni ng'anda yoshi yino mwingila wikalini mwenemo, fika na lino mulufuma nu kupita. 5Na yano yatamupokelile, pano mulufuma um-nsi uo, mukung'unte ni nkungu ya ku mulu yino, ukuwa ushuta kuno yali.” 6Nga yafuma, yapitana um-mizi, nu kusunda iswi-isipe, nu kuposha antu poshi poshi.
Masima yi Yelodi
(Mt 14:1-12; Mk 6:14-29)
7Ngu umwene Yelodi, pano wapulika amaswi ya ifintu vi fyonsi fino fyaombeka, asima kuno antu tupu yaatile, Yoane watatutuluka uku yafwi. 8Na yamwi yaati: “Elia wataloleka.” Na yamwi yaati: “Umwi apa malau ya kali watatutuluka.” 9Leelo Yelodi ati: “Yoane namputwile untwe; nga uwini wi wino ndupulika ifintu vi kuli wenewe?” Asita ukunnola.
Yesu wapa antu ielfu shisano ifyakulya
(Mt 14:13-21; Mk 6:30-44; Yn 6:1-14)
10Nga imitume iyo pano yawela, yanndandile ifintu fyonsi fino yaombike. Nga wayasenda wapita nayo yonga yaya uku nsi umwi uno yakuluti: Betsaida. 11Walangi maumba yachimanya, yalondela; nawe wayapokelela wafwanga nayo amaswi ya wene-wi-Leesa, aposha yano yakasime ukuposhiwa.
12Na pano lîla, yaya ikumi na yaili yaya kunali, yannena, yaati: “Ulambalike iumba, ukuti yapite um-misi num-fyalo fya pipi, yasite apa kulala ni fyakulya, kuno apantu pa pano tuli inyika ntupu.” 13Wayanena, waati: “Yapini mwemwe ichakulya.” Nayo yaati: “Tuli ni mikate yisano niswi shili sile, ngi tutaile tukayakalile antu ya yoshi ifyakulya.” 14Kuno ayonsi yano yali penepo palumwi yali elfu shisano. Wayanena alondeshi yaakwe, waati: “Tekini antu um-mitantali, untantali onga antu amakumi yasano.” 15Yachita fiyo kwene, yayikalisha yoshi. 16Watola imikate isano ilye ninswi shili, walolekesha umwiyulu, wafipepelela, wafikunyola, wapa alondeshi yaakwe kuti yape iumba. 17Yalya yikuta yoshi, uku fikunyolwa fino fyashalile, yakonganika iviyo ikumi na viili.
Petlo wataka fino Yesu i Klisto
(Mt 16:13-19; Mk 8:27-29)
18Walangi pano alusalika wenga, walondeshi yaakwe yali pipi nawe; ayatondosha, ati: “Chene! amaumba ya yakuluti nene wini?” 19Yannena, yaati: “ ‘We Yoane Kabatisha,’ leelo yamwi yaati: ‘We Elia.’ na yamwi yaati: ‘We umwi apa malau ya kali watatutuluka.’ ” 20Wayanena, waati: “Nemwe muluti nene wini?” Petlo wannena, waati: “Wewe uli Klisto wi Leesa.” 21Wayasunda nu kuyalesha, kuti yatalandila untu nanti umwi ichintu chiyo. 22Wafwanga ukuti: “Chilungime uMwana-ntu kusanwa na machulo tupu nu kukanwa na akombe na ikolo iyakapela na yakaandika, nu kumolwa; nu wanda wa utatu alututuluka.”
23Ayanena yoshi, wati: “Untu wensi wino alusita ukundondela, aukane wenga, autwike unsalaba waakwe manda yoshi, andondele. 24Kuno untu wino alushita ukuufyusya upuma wakwe, aluulofya; nuntu wino walofya upuma waakwe ukwishina lyane, aluufyusha. 25Kuno chingamwaswa chani untu ndi wapata fyoshi ifya kuno ukushi, ndi waumola nanti akuulofya unkola? 26Ichino fiyo wensi wino wacha wandolela insoni nene na maswi yane, uMwana-ntu alunndolela insoni untu wiyo, pano wacha wisa um-ukulu wakwe, nu wi Tata nu wi yamalaika yaswepe. 27Umwenemo namunena, pali yamwi muli yano imilile pa, yatalulola infwa nanti uche, yalutangula ukulola uwene-wi-Leesa.”
Yesu wawa um-mwata unnina
(Mt 17:1-8; Mk 9:2-8)
28Ichisila cha maswi yao, yapita amanda nnane, asenda Petlo ya Yoane na Yakobo, akwela uku mwamba ukuyupepa. 29Nga lino alusalika, ichata cha ku maaso yaakwe chasenuka, imyenda yaakwe iwa imitiswe, ilumesa. 30Nga antu yaili yalolike, yalufwanga nawe, nayo i Mose na Elia. 31Pano yalolike um-ukulu, angi yalufwanga isha pa nfwa yaakwe, ino iluloleka uku Yelusalemu. 32Petlo na yaya yano yali ponga nawe yali nutulo, nga pano yalanka, yalola ukulu wakwe, na yaya yaili yano yimilila ponga nawe. 33Nga pano yaatiana pano ali, Petlo wanena Yesu, waati: “Mwene, chasipa ukuti tungawa pa; tuchite ifisansa vitatu, chonga ichako wewe, na chonga ichi Mose na chonga ichi Elia.” Na kuno yatamanyile chino alufwanga. 34Nga pano alufwanga ifintu fi, lisile ipufi liyachitila ichisau; yopa pano yawa umwipu filiyo. 35Iswi lyafuma umwipu filyaati: “Alawi uMwanane, wino nasolola; mpulikini.” 36Ni iswi liyo pano lyasila, Yesu walolike ali wenga. Nayo yatusha, nanti kulandila umwi chimwi ifintu fino yawine amanda yalye.
Yesu waposha umwanche wa chiwa
(Mt 17:14-18; Mk 9:14-27)
37Nu wanda wa uwili pano yatentenka um-mwamba, iumba ikulu yakomana nawe. 38Nga untu umwi umwiumba alaizya ukwiswi, ati: “Kasambilisha, ndukulomba, kuti ulole umwanane, kuno umwanane ali wenga, 39ichiwa chikulunnema, pao kwene awangula, nga chimchita wa ichifumfumi, atuka nitomvu, nga chikulu nkwangolakwangola chatalamana ukufuma munali. 40Napapata alondeshi yako, kuti yachifumye, leelo yapotwa.”
41Yesu annena, ati: “Mwe umpanda usina usumilo wanyongana; namwikala nemwe nu kumutekelela fika na li? Leta umwanako pa.” 42Nga pano alwiza ichiwa champonya apansi, chamchita wa ichifumfumi. Leelo Yesu wachikalipila ichiwa chiipe, wapozya umwanche, amwezya kuli isi. 43Yoshi yazunguka ukulola ukulu wi Leesa.
Yesu walanda kaili apa nfwa yaakwe
(Mt 17:22-23; Mk 9:30-32)
Pano yachilizunguka uku ifintu vyonsi fino wachisile, wene wanenile alondeshi yaakwe, waati: 44“Muleme ningo amaswi ya um-makutwi yino, kuno Mwana-ntu wayutelwa um-makasa ya antu.” 45Leelo yatamanyile iswi liyo, lyafisime uku yakola, yatalimanya; yopa ukumtondosha ngi chili chani iswi liyo.
Uwikolo uwini um-wene-wa-mwiyulu
(Mt 18:1-5; Mk 9:33-37)
46Yatampa ukutondoshana wino aluwa uwikolo apa yanina. 47Leelo Yesu wamanya amelenguzi ya myenso yao, watosile umwanche unnono, wamwika apipi nawe. 48Wayanena, waati: “Wensi wino wacha wapokelela umwanche wi ukwishina lyane, aluwa watampokelela nene; na wensi wino wampokelela nene, alumpokelela wino wantumile. Kuno wino unnono pali mwemwe mwensi, wiyo ali unkulu.”
49Yoane wannena, waati: “Mwene nkulu, twawine untu alufumya iviwa ukwishina lyako; twannesha, kuno asi ponga neswe.” 50Leelo Yesu wannena, waati: “Mutachinnesha, kuno wino atamukanile ali ponga nemwe.”
Asamalia yakana ukupokelela Yesu
51Walangi pano amanda ya kukwela kwakwe umwiyulu yapalamila, alungama ukuya uku Yelusalemu, 52atuma antu yakuti yankolelele. Nayo yapita, yaya yingila umunzi wa aSamalia, kuti yanteyanyishe. 53Leelo akola yatampokelile, kuno amaso yaakwe yalungime ukuya uku Yelusalemu. 54Yakobo na Yoane, alondeshi yaakwe, pano yalola fiyo, yaati: “Mwene, ulusita tunene umoto wike ukufuma umwiyulu uyoche? (ndi fino Elia wachisile?)” 55Leelo wene, ayalesha. (Afwanga, ati: “Mutamanyile ngi umweso wa uli uno muli nao.) 56Kuno Mwana-ntu atisilu umola imyenso ya antu, leelo ukuyifyusha.” Yakatuka ukupita yaya uku nsi unji.
Kulondela Yesu
(Mt 8:19-22)
57Nga pano yapitanga un-nsila, untu wenga wannenile, waati: “Nankulondela konsi kuno ungaya.” 58Yesu wannena, waati: “Yankusa yali na machele, ni fyuni fya mwiyulu vili ni fisanso, leelo Mwana-ntu atakwite nanti apa kulalika untwe.”
59Nga wanena unji, wati: “Ndondela.” Leelo wene wati “Mwene, ntane mpite nkashike tata.” 60Wannena, waati: “Leka afwi yashikane akola; leelo wemwi yanga ukume imbila ya wene-wi-Leesa.”
61Kaili untu unji wannena, waati: “Mwene, nankulondela, leelo ntane nkalambalike antu ya ng'anda umwane.” 62Leelo Yesu annena, ati: “Untu wino alemile nkolo nu kulima, na kuno alulolekesha uku chisila, atasipile um-wene-wi-Leesa.”
Právě zvoleno:
Luka 9: FNT1988
Zvýraznění
Sdílet
Kopírovat
Chceš mít své zvýrazněné verše uložené na všech zařízeních? Zaregistruj se nebo se přihlas
New Testament in Fipa © United Bible Societies, 1988. Bible Society of Tanzania.
