LUK 2

Tumata ti Jisus

(Mat 1:18-25)

1Na aka ata ibɛ ge Sisa Agostos peni atwa cɛnjɛ tu bwa unu maa, ge 'nyeci izeci bụtụ be elele nu utakada.#Luk 3:1 2Aka ga ibɛ shɛ aka ihiiŋ na ee 'nyeci nzeci ma atwa, ti ga Kurinios shɛ ugwomina Siria. 3Ibɛ po atwa elele sanɛ na ashɛpwụ aba maa e 'nyeci nzeci ma aba.

4Go Josɛf beni du nu Nazarɛt na namɛ na cɛnjɛ tu Galili, bee munji Judia, bee ci ụshɛpwụ Devid na ɛɛ hiɛŋ, Bɛtlɛhɛm, iwɛnɛ tu baa shɛ bụtụ bu umwamwa Devid.#Luk 1:27 5Bee zhe maa 'nyata izeci ibwɛ, ni inɛ Meri na boo yingono na kaa gwumwonu tumata. 6Aka na te e ci apata, nazhɛ tumata tu to Meri, 7bee meci yɛu ibwɛ ye eyi ihiiŋ. Bee fwuleji iŋ no tugwuno, bee wecicinji iŋ nu ugbogolo na oo zwonono iyimabiga iyimɛyɛ, iwɛnɛ to ohwolu temi shi aŋ nu umwono wa agaiŋ.

A'iywa-agwụdụ Keeni Atumwa-azuba

8A'iywa-agwụdụ a na namɛ la na cɛnjɛ ta ata tileni nu ugba wa aba aa ngbaracɛ agwụdụ aba nụ ụjita. 9Nazhɛ butumwa ba Agwangwama ba azuba zhaganɛ aŋ, ụjɛrụma wa Agwangwama wa ta woo rungwutwonu aŋ, ibɛ po inyɛsɛ shɛ aŋ duwa.#Luk 1:11 10Nazhɛ butumwa ata ba azuba hiɛŋ aŋ, Ta nda ma inyɛsɛ o. N zhɛ mo hi mbiso unabarɛ ubiye, unaa na atwa kpaaŋ zhɛ a nda unyasa ụ'wụtụ iwɛ ubwa. 11E hi metenji ba Bibicinji na shɛ ga Krast#2:11 na shɛ ga Krast: Kwo kaa Mɛsaya. Kwo kaa bụtụ na ee dudugeni manɛbɛ. na shɛ Agwangwama nụ ụshɛpwụ Devid nụ ụjita go. 12Iyi nɛ zhɛ mo hi mbisono iŋ na, hi zhɛ hia kwụba yɛu ɛtɛ ishenje te e fwuleji iŋ no tugwuno, ee wecicinji iŋ nu ugbogolo na oo zwonono iyimabiga iyimɛyɛ.

13Eshigiri, unyama wa atwa azuba zhaganɛ butumwa ata ba azuba, aa shɛtana Agwatana, ɛɛ hiɛŋ:

14Ga a shɛtana Agwatana na namɛ na azuba na hwuri kpaaŋ,

ga amɛ-olom nama na atwa na o lomicingo bu amɛ tebiye.#Luk 19:38

15Aka na ta atumwa ata azuba beni no olugwo aba, ee gwuri na azuba, nazhɛ a'iywa-agwụdụ mama hiaŋnụ, Hwure tu sanɛ ma Bitilɛhɛm, maa tu kwubɛ ma iyi nɛ teni apata, inɛɛ nɛ Agwangwama iti mbishi. 16Aa sanɛ ga kakayɛ, ee zhe aa kwụbɛ Meri, no Josɛf ti yɛu ɛtɛ ishenje, ti yee weci nu ugbogolo na oo zwonono iyimabiga iyimɛyɛ. 17Aka na ta a kwụbɛ iŋ, ee enengeni atwamwa maa e mepi iwɛ yɛu ɛtɛ nɛ ee mbishi aŋ iwɛ ibɛ. 18Ibɛ po iwɛ ɛtɛ dama atwa elele na hwụjɛ iwɛ nɛ a'iywa-agwụdụ mbishi aŋ. 19Ama ge Meri untanganɛ iwɛ ɛtɛ kpaaŋ baa haŋsa iŋ na amɛ ubwa.#Luk 2:51 20Nazhɛ a'iywa ata agwụdụ gwuleneni, aa pana Agwatana ụjɛrụma, aa shɛtangana bụ, iwɛ iyi elele nɛ aa ga hwụjɛ, aa kwụbɛ du kaa nu gana na te e ge mbishi aŋ.

O Po Jisus Izeci

21Aka na ti ge Jisus ulwa ijitɛ itindɛtu te e meci bu, ee zhe maa e jeji bu teleyi, oo po bu izeci ti ge Jisus, inɛɛ nɛ butumwa ba Agwatana ba azuba go powo bu nazhɛ ee le ofubo ubwa.#Liv 12:3; Mat 1:25; Luk 1:31

E Shepi Jisus nu Umwono wa Agwatana

22Aka na ta aka ci maa a mama njɛ shɛshɛshɛ gana na tu Undwa Moses jɛmɛ, aa shapɛ Jisus nu Jɛrusalɛm maa a shɛkanɛ bụ Agwangwama, #Liv 12:1-4 23(gana na ti yoo 'nywotwo nu Undwa wa Agwangwama, yɛɛ hiɛŋ, Yɛu-ye-eyi ye elele nɛ banjɛ a'aŋbụ bino bwa hiiŋ, ɛ zhɛ o shilono bu AGWANGWAMA swooŋ.) #Ụban 13:1,2,12; Tɛrɛ 8:17 24Ɛ zhɛ du a ta ụrụpɛ iwɛ ubwa gana na tu Undwa wa Agwangwama jɛmɛ maa, nkwucimo mi yebi kwo kaa oywoywo olukwukwu eyebi.#Liv 12:6-8

25Bụtụ bu ko namba nu Jɛrusalɛm na aka ata, ɛɛ hiɛŋ izeci ibwɛ ge Simion. Bɛ shɛ bụtụ bi tiririri, na meme shileni Agwatana, na kaa ba nda ashɛlatụ aka na ɛɛ zhɛ o bicingo atwa Isrɛl, Mpiala mi Tijilo kaa mu namɛ nu bwa.#Luk 2:38 26Ibɛ po Mpiala mi Tijilo mi mbishi bu maa, Bu ta zha shɛ bo 'wo kwukwuŋ semi aka na abụ kwụbɛ Krast ata shɛ Agwangwama tugwo. 27Nazhɛ ukpahiŋ Mpiala ma ata mi Tijilo mi zeriji bu bee zhe nu Umwono wa Agwatana, aka na ta atwa na meci Jisus shapɛ bu maa a njɛ iwɛ ubwa gana na ti yee 'nyeci nu Undwa. 28Nazhɛ ge Simion leshiji Jisus baa 'waŋnɛ ni i'ɛlɛ ibwɛ, boo zhemonjino Agwatana, bɛɛ hiɛŋ.

29Oo Agwangwama, bu untanganɛ unu bu tishilo tutu uce, bi eri ba ganga ya yɛu-ugondu gɛ bu

maa hwulo na amɛ-olom.

30Iwɛnɛ tu Ngaa kwụbwa ya ubino bu #Ayiz 52:10; Luk 3:6

31na abu imwangwa ne eshe atwa kpaaŋ.

32Uhioko-uhwaŋna na wa kapɛshɛnga eshe atwa na shɛ shɛ Eju,

na kaa shɛ iwɛ ụjɛrụma wa atwa bu Isrɛl.#Ayiz 42:6; 49:6; 52:10; Ugo 13:47; 26:23

33Iwɛ ɛtɛ ge Simion ba duma, dama bishi Jisus to bino bwa. 34Ge Simion peni aŋ du uwebiye, bɛɛ hiɛŋ bino Jisus ge Meri, Hioko, e shiri yɛu gɛ iwɛ maa sha ti'ilono keeni tibicingo ta atwa ofwugwo ni Isrɛl. Ubwa kaa zhɛ ba sha du useyida wa Agwatana, na atwa ofwugwo zhɛ a sukakana, #Ayiz 8:14,16 35iwɛ maa vwɛ tuhaŋsa ta atwa ofwugwo uvwi. Inɛɛ bu shɛ, bi zhɛ ba 'yaga amɛ-tụhaŋtụ duwa gana bụtụ na ee sepi utokwobi no ohwulu.

36Bigesere bu ko bo o namba ɛɛ hiɛŋ izeci ibwɛ ga Ana, yɛu Fanuɛl, ata shɛ ụlamụ Ashɛ. Bɛ injɛ ya duwa, bɛ cɛnɛ bwolo bwa shiywa shi cenje gba, tu baa ta shɛ owo ibɛ bwolo bwa 'wi. 37Baa shɛ ya bululo shiywa dupu-nu-talacɛ-na-shɛba-shi-neshi (84). Bu beni shi kwukwuŋ nu Umwono wa Agwatana o, ama ba zhɛba Agwatana, tụ ụjita tu uwaŋna, baa nda ezumi#2:37 ezumi: Kwụba ti 'eshicigono tu Mat 4:2 baa nda adua. 38Baa zhajɛ na aka ata, baa shɛtanɛ Agwatana, baa njɛ ugwoje ubwa, bee mbishi atwa elele na ga nda ashɛlatụ tibicingo tu na Agwatana zhɛ o bicingo atwa Jɛrusalɛm iwɛ ubwa.

Ata Josɛf ne Meri Gwuleneni nu Nazarɛt

39Aka na te e hwuwi iyi elele tɛnda gana na tu Undwa wa Agwangwama jɛmɛ, ee ji nu Nazarɛt na shɛ ihwɛ ya aba na cɛnjɛ tu Galili.#Mat 2:23 40Ibɛ yɛu ɛtɛ ya waŋna, yaa 'yajɛ ukpahiŋ, bɛ incɛ tebiye, tulubo-ti-biye ta Agwatana kaa tu namɛ nu bwa.#Ajɛmɛ 13:24; 1 Sam 2:26

Ge Jisus nu Umwono wa Agwatana, na Aka Tiyɛu tu Bwa

41Atwa na meci Jisus a zha Jɛrusalɛm uywa uywa na aka Isene Tɛkashɛka.#Ụban 23:15; Undwa 16:1-8 42Aka na ti ge Jisus ulwa shiywa umpwa-na-shɛba-shi-yebi te e meci bu, ibɛ atwa na meci bu munji ee zhe Jɛrusalɛm, gana na ta a shana aa nda na aka Isene Tɛkashɛka. 43Aka na ti isene ɛtɛ hwuwowu, ee hwure ujiyo, ama yɛu ɛtɛ ge Jisus tuba kwu nu Jɛrusalɛm, atwa na meci bu kaa mepi shi. 44Ama e ge heŋshi maa bu namɛ na ashashɛ atwa na ee ge zhe na aba, ee rinji bu jitoo ko mudu na ashashɛ atwa aba a na ee mepi. 45Aka na te e te shi bu ugbe, ee gwuri nu Jɛrusalɛm maa a jalakacɛ bụ. 46Na aba na te e jelekeci bu ijitɛ itɛtu, nazhɛ oo to bu ugbe, nu Umwono wa Agwatana, tu baa jɛjɛ na ashashɛ embisegeni, baa shɛlaga iwɛ ya aba, boo hoŋtongono aŋ du iheŋtene. 47Iwɛ ubwa kaa dama atwa elele na shɛlajɛ n-ndumwa mu bwa, ni iyi nɛ bee eshiciji keeni ajɛshɛgwa na baa pana aŋ. 48Yaa dama ya du atwa na meci bu na aka na ta a kwụbɛ bụ. Bino bwa hiɛŋ bụ, Ɛ-yɛu mi, iwembe po abɛ tɛ njɛ gana gaa? Hioko ta ata bu jalakaka na amɛ-tụhaŋtụ, ti ge shibi tu Gamba.

49Ge Jisus jishijɛ aŋ, bɛɛ hiɛŋ, Iwembe po ahi ma n jalakakaa? Hi mepi shi suu maa i shɛ tilɛɛ maa Ma nama nu umwono Bishi mi?#2:49 maa Ma nama nu umwono Bishi mi? Kwo kaa maa Ma nda ugondu Bishi mi? 50Ama e eshiciji shi iwɛ ɛtɛ bee mbishi aŋ o. 51Ama ge Jisus zhagajɛ na aba ee jiye nu Nazarɛt, bee meme shileni ụhwada wa aba. Ama bino bwa tuba shiyeni iwɛ ɛtɛ kpaaŋ eshe na amɛ ubwa.#1 Sam 2:26; Eshi 3:4; Luk 2:19 52Ge Jisus ba waŋna, baa kaana ti'inta keeni tulubo-ti-biye no ofwo Agwatana keeni no ofwo atwa du.#Luk 1:80; 2:40

Právě zvoleno:

LUK 2: RBT

Zvýraznění

Sdílet

Kopírovat