LUK 19

Ge Jisus na Zakios

1Ti ge Jisus teni Jɛriko, ti bɛɛ zhɛ ba kashɛka ụshɛpwụ ata.#Mak 10:46 2Bụtụ bu ko namba ɛɛ hiɛŋ izeci ibwɛ ga Zakios. Bɛ shɛ uhiu we ele-ụdalụ, baa shɛ kaa bɛzhɛgba. 3Ba jalakaka maa kwụba Jisus maa mapa bụtụ na baa shɛ. Ama bi eri shi ba kwụba bụ, iwɛnɛ tu baa shɛ ikezhere, atwa ofwugwo ta kaa namɛ. 4Ibɛ po bee gezhiji geri bu umbe, bee munji ụ'wụ'wụ udurumi iwɛ maa kwụba bụ, iwɛnɛ ti ge Jisus zhɛ ba kashɛka nu uhwaŋna ata.

5Aka na ti ge Jisus ci apata, baa mbiyanɛ azuba baa kwụbɛ bụ, bɛɛ hiɛŋ bụ, A-Zakios, kezhe kakayɛ. N zhɛ ma gɛga hwayɛ ga ni ihwɛ bu tilɛɛ.

6Ga Zakios kezhe ga kakayɛ, bee le Jisus nu unyasa.

7Aka na ta atwamwa kwụbɛ iŋ, ee kwuni tungwulongongo kpaaŋ aba, ɛɛ hiɛŋ, Ge Jisus hwulwo maa sha bugaiŋ ba bụtụ-bi-iwɛwɛ.#Luk 5:29,30; 15:1,2

8Ama ga Zakios shikeni apata, bɛɛ hiɛŋ Agwangwama, Iyɛri, N zhɛ ma pana okofwo ashashɛ i'wɛŋnɛ mi. Yaa shɛ kaa Ngee leshiji la iyi elele no olugwo bụtụ be elele no tuhwulo, N zhɛ ma tụpanana bụ kpalụ neshi ya.#Ụban 22:1; Liv 6:5; Tɛrɛ 5:6,7; Luk 3:14

9Ge Jisus hiɛŋ bụ, Ubino teni hwayɛ ga ni ihwɛ gɛ iwɛnɛ abɛ shɛ du yɛu Abraham.#Luk 3:8; 13:16; Rom 4:16 10Iwɛnɛ ti Yɛu Bụtụ zhajɛ maa jalakaka, maa bicingo du atwa na 'inɛ. (Mat 18:11.)

N-ndumwa Tumanganjɛ iwɛ Apamu Umpwa

(Mat 25:14-30)

11Aka na ta atwa ata hwụjɛ iwɛ ɛtɛ, ge Jisus keeni aŋ n-ndumwa tumanganganɛ iwɛnɛ tu boo gwumwonu nu Jɛrusalɛm, keeni iwɛnɛ te e heŋshi du maa gunu ata ibɛ Cɛnjɛ-ta-tugwama ta Agwatana ti zhɛ ta banɛ.#Mat 25:14-30; Luk 9:51; 13:22; 17:11; 18:31 12Ge Jisus hiɛŋ aŋ, Uzhɛgba wa agwuma uko zhe na cɛnjɛ tu ko tu dụlụmɛ maa lɛshijɛ ụhwada tugwama tiya maa gwure.#Mak 13:34 13Baa suyanɛ miaụŋ-mu-ugondu ubwa umpwa, bee peni aŋ ukwuribi#19:13 bee peni aŋ ukwuribi: Tɛjɛshɛrɛga tu ko ti hiɛŋ, apamụ umpwa. Apamụ ga umpwa, a nangwụ na alubashɛ na aa tụpa la anjɛ-ugondu na amɛ ipiɛnɛ itɛtu cala. bɛɛ hiɛŋ aŋ, Na nda ma tihinya uuwa i ci aka na Ngɛɛ zhɛ me gwure.

14Ama atwa cɛnjɛ tu bwa a na to bu ni i'ime tumwanɛ eseci-i'ɛlɛ maa a 'wa bụ, ɛɛ hiɛŋ, Ti jeri shi maa bụtụ ga shɛ agwuma tu o.

15Aka na ti bɛɛ lɛshijɛ cɛnjɛ ta ata, bee gwure, baa tumwanɛ maa ga suyananɛ bu miaụŋ-mu-ugondu mu na bee peni la ukwuribi, maa kwụba gana na ta bụtụ bụtụ teni na tihinya tu bwa.

16Bụtụ bi hiiŋ zhajɛ, bɛɛ hiɛŋ bụ, Iyɛri, ukwuribi ata ebu m peni la, N teni du kpalụ umpwa.

17Bɛɛ hiɛŋ bụ, Okwu nu ugondu, bɛ shɛ yɛu-ugondu ibiye. Bu meme mbiseni maa bɛ shɛ yɛu-ugondu tɛcara ni iyi ticwɛŋ. 'Yaga ụhwada ashɛpwụ umpwa du.#Luk 16:10

18Bu na bi yebi zhajɛ du, bɛɛ hiɛŋ bụ, Iyɛri, ukwuribi ata ebu m peni la, N teni du kpalụ ta.

19Bɛɛ hiɛŋ bụ, 'Yaga du ụhwada ashɛpwụ a ta.

20Bụtụ bu tatụ zhajɛ, bɛɛ hiɛŋ bụ, Iyɛri, ukwuribi bu na Ngee kwungwuri la no tugwuno Ngaa intanɛ. 21Iwɛnɛ tu Ngaa njɛ inyɛsɛ bu, iwɛnɛ ta abɛ shɛ bụtụ na hweteni. Inɛɛ nɛ ebi shiri shi, ibɛ aba shapa, ofwo na kaa abu bɛrɛ shɛ apata obo gwubo.

22Ibɛ po agwuma-ihwɛ ibwɛ jishijɛ bụ, bɛɛ hiɛŋ, Gabụ yɛu-ugondu iwɛ, nu n-ndumwa mu unu bu Ngɛɛ zhɛ ma duma ụshɛrɛya bụ. Bi ge mepi hŋ maa Ma shapa inɛɛ nɛ Ngee shiri shi, maa Mo gwubo kaa inɛɛ nɛ Ngaa bɛrɛ shɛ? 23Iwembe po ebu zweni shi ukwuribi mu nu umwono-ukwuribi, maa aka na Ngee gwure, maa ma lashɛga uŋ keeni titeni tu bwaa?

24Bɛɛ hiɛŋ atwa na shikekeni apata, Lashɛga ma ukwuribi ata ni i'ɛlɛ ibwɛ, maa hi peni bụtụ ata ge teni kpalụ umpwa.

25Atwa ata hiɛŋ bụ, Iyɛri, bi 'yagawa kaa kpalụ umpwaa.

26Bɛɛ jishijɛ aŋ, bɛɛ hiɛŋ, Mo hi mbiso maa, bụtụ na 'yajɛ iyi, ubwa ɛɛ zhɛ a kaana, ama bụtụ na zasa iyi, okwo inɛɛ nɛ baa ga 'yajɛ, ɛ zhɛ a lashɛga iŋ ni i'ɛlɛ ibwɛ.#Mat 13:12; Mak 4:25; Luk 8:18 27Ama iwɛ atwa i'ime mi, a na jeri shi la maa ma sha agwuma aba, suje aŋ ma epe, maa hiɛ kwụnɛ aŋ ne eshe mi.

Ge Jisus Teni Jɛrusalɛm

(Mat 21:1-13; Mak 11:1-11; Jon 12:12-19)

28Aka na ti ge Jisus jɛmɛ inɛ gɛ, bee hwuleni aŋ umbe ti bɛɛ zhɛ umungwo Jɛrusalɛm.#Mak 10:32 29Aka na tu boo gwumwonu ni Bɛtifagi keeni Bɛtani, na namɛ ni Ishɛmɛ Buta. Baa tumwanɛ eseshi-iyi ubwa eyebi utumwa. 30Bɛɛ hiɛŋ eseshi-iyi ata ubwa, Zhaga ma nu ụshɛpwụ ga namɛ geri-be-eshe hiŋ, gunu na ohio tono uŋ, hi zhɛ hia kwụba biywoywo bi izhinyɛci bu ko na ee umpi, na bụtụ be elele ta sụcɛ shɛ kwukwuŋ. Tufwurinje bu ma, hi zhajɛ nu bwa. 31Yaa shɛ bụtụ be elele ihi heŋteni hwayɛ, bɛɛ hiɛŋ, Iwembe po ohio tufwurungo buu? Hiɛŋ bu ma, Agwangwama#19:31 Agwangwama: Kwo kaa Agwuma-iyi, kwo kaa Agwuma-ihwɛ. ubwa 'yajɛ uhwugwa nu bwa.

32Nazhɛ atwa ata baa tumwanɛ sanɛ ga, aa kwụbɛ gana na ti bee ge mbishi aŋ. 33Gana na to o tufwurungo biywoywo ata bi izhinyɛci, shɛgwuma shɛ bwa shi hiɛŋ aŋ, Iwembe po ohio tufwurungo biywoywo bi izhinyɛci ɛtɛɛ?

34Ɛɛ jishijɛ aŋ, ɛɛ hiɛŋ, Agwangwama ubwa 'yajɛ uhwugwa nu bwa.

35Nazhɛ aa shapɛ biywoywo ata bi izhinyɛci, ee petengeni otogwo aba na aba izhinyɛci ɛtɛ, nazhɛ ee peteni Jisus na aba ubwa.#Zɛka 9:9 36Tu baa suka bụ bɛɛ zhɛ, ee beri otogwo aba nu uhwaŋna.#2 Shɛgwu 9:13

37Aka na tu boo gwumwonu Ishɛmɛ ɛtɛ Buta tuzwo hwɛɛ, eseshi-iyi ofwugwo kwuni unyasa tɛnda kpaaŋ, aa shɛtana Agwatana na rụhwụŋ rụ 'wụtụ, iwɛ ugondu wa arụhwajɛ ụ'wụtụ elele na aa kwụbwa. 38Ɛɛ hiɛŋ,

Zhemonjino ma Agwuma ata e ci

ni izeci ya Agwangwama!

Ga amɛ-olom nama na azuba

ga Agwatana 'yaga ụjɛrụma ụ'wụtụ 'wụtụ.#Shɛzu 118:26; Luk 13:35; 2:14

39Afarisi oko a na namɛ na ashashɛ ufwugwo ata hiɛŋ bụ, E-Bimbisegeni, tazhɛgana eseshi-iyi bu maa a nama saiiŋ.

40Ge Jisus jishijɛ aŋ, bɛɛ hiɛŋ, Mo hi mbiso maa, yaa shɛ atwa ga namɛ hwayɛ saiiŋ, asha atayɛ ga zhɛ a ugana.

Ge Jisus twanɛ Jɛrusalɛm U'wo

41Aka na ti ge Jisus bo gwumwonu nu ụshɛpwụ ata, baa kwụbɛ uŋ, baa twanɛ uŋ u'wo, bɛɛ hiɛŋ, #Luk 13:33,34 42Yaa shɛ ehi go mopwo hwayɛ ga ni ikɛnyi hiŋ iyi nɛ shɛ amɛ-olom! Ama ihi swakanɛ hwuwayɛ go iwɛ maa kede hiɛ kwụbɛ iŋ ne eshe hiŋ o. 43Aka e ci ba, ta atwa i'ime hiŋ zhɛ ma hi ma ni i'wɛŋnɛ ujasa, ɛ zhɛ ma hi kapa o rungwutwonu geri elele.#Ayiz 29:3; Jɛrɛ 6:6; Izik 4:2; Luk 21:21-24 44Ɛ zhɛ mo hi iricingo hwɛɛ, ta atwa elele na zweni na amɛ na amɛ uba hiŋ. A zha shɛ a ganga utayɛ okwo uko maa u patana na azuba unya o, iwɛnɛ te hi mepi shi aka na Agwatana mo hi bicingo.

Ge Jisus Teni nu Umwono wa Agwatana

(Mat 21:12-17; Mak 11:13-19; Jon 2:13-22)

45Nazhɛ ge Jisus teni nu Umwono wa Agwatana, bee kwuni atwa na a sanga iyi, na atwa na a sa iyi apata tu'unzo, bɛɛ hiɛŋ aŋ, 46E 'nywotwo ɛɛ hiɛŋ, Umwono mu zhɛ wa sha umwono wa adua; ama hia nda uŋ tuba ụpangwụ wa ashɛrɛ.#Ayiz 56:7; Jɛrɛ 7:11

47Iyi-heri iyi-heri ge Jisus bo mbisogono atwa iyi nu Umwono wa Agwatana; ama ehiu onongbo, ne embesegeni Undwa, a jalakaka maa ge ehwurembe aba mbiyeni aŋ maa a kwụnɛ bụ.#Luk 21:37 48Ama a kwụbɛ shɛ kaa iyi nɛ shɛ maa a njɛ bụ, iwɛnɛ ta atwa ata kpaaŋ a shɛlaga iwɛ ubwa tebiye.

Právě zvoleno:

LUK 19: RBT

Zvýraznění

Sdílet

Kopírovat