LUK 17
17
Iwɛwɛ
(Mat 18:6,7,21,22; Mak 9:42)
1Ge Jisus hiɛŋ eseshi-iyi ubwa, Iyi ukwurishi#17:1 Iyi ukwurishi: Tɛjɛshɛrɛga tu ko ti hiɛŋ, Iyi nɛ zhɛ ya ana atwa iwɛwɛ tɛnda. Kwo kaa, Utayɛ udukwutwa. Kwo kaa tumanga maa bụtụ njɛ iwɛwɛ. zha shɛ yo ngwulo tizhajɛ kwukwuŋ. Ama bụtụ na iyi ukwurishi dure no olugwo ubwa bi zhɛ ba nda hwuŋ adangboo! #1 Kor 8:12 2I debeji maa o to bu inɛnɛ ni i'ilu ibwɛ maa e shepi bu ee keri ni itekwu, uhwuri maa nda okwo yɛu ike ticwɛŋ ukwurishi maa laya. 3Na nda ma pece!
Yaa shɛ yɛu-bino bu ɛbɛ njɛ iwɛwɛ, tazhɛgana bụ. Yaa shɛ baa jɛshɛrɛjɛ-ahaŋsa, gangana bụ.#Mat 18:15 4Yaa shɛ baa bɛ njɛ iwɛwɛ kpalụ cenje jitoo ko, nazhɛ bee gwure pụ bụ kpalụ cenje ata jita ata uko, bɛɛ hiɛŋ, N jɛshɛrɛjɛ-ahaŋsa, bɛ shɛ ba gangana bụ.#Mat 18:15
Rishe-tɛtɛtana
5Nazhɛ atumwa hiɛŋ Agwangwama, Kaana rishe ru tu tɛtɛtana ugombo.
6Agwangwama jishijɛ aŋ, bɛɛ hiɛŋ, Yaa shɛ ahiɛ 'yajɛ rishe-tɛtɛtana gana bụzagwụ bu mustad, hi ge eri hiɛ hiɛŋ udurumi ga, Mushingwo maa mama shɛrɛ ni itekwu, u gɛ zhɛ wa hwuga-unu hiŋ.
Ugondu Yɛu-ugondu
7Gaaba na ashashɛ hiŋ 'yajɛ yɛu nɛ ya hwanga bu itimɛ, kwo kaa nɛ ya ngbaraka agwụdụ ne ehilo. Aka na yɛu ɛtɛ jiye ehilo, bɛɛ zhɛ bɛ hiɛŋ bụ, Zhajɛ maa yɛ iyimɛyɛ gunu ataa? 8Awo, bi zhɛ bɛ hiɛŋ bụ, Urugono i'wɛŋnɛ bu hwungbɛ maa n ndanɛ tugwo iyimɛyɛ mi ụrụmɛ, maa aka na Ngaa yɛ hwayɛ inee mi hwɛɛ, nazhɛ ɛbi zhɛ ba ya inɛɛ bu.#1 Shɛgwu 17:13 9Bi zhɛ suu ba nda ugwoje yɛu-ugondu ɛtɛ iwɛnɛ tu baa njɛ iyi nɛ bee ge peni bu unu ibɛ? N heŋshi shi o. 10Gabata du yaa hi shanɛ, okwo ahi nduwa iyi elele nɛ ee hi eni, hiɛŋ ma, Tu ta shɛ waa miaụŋ-mu-ugondu mu na mi te shi eshe, iwɛnɛ ti yaa shɛ iyi nɛ ee ti eni kiri atɛ njɛ.
Ge Jisus Nɛnjɛ Atwa Ụngwụ-uwaŋna Umpwa
11Ti ge Jisus to uhwaŋna tahaŋnụ tu bwa tu Jɛrusalɛm, bee keshici tugwungwu tu Samaria keeni Galili.#Luk 9:51; 13:22; 19:11 12Aka na ti bee teni ụshɛpwụ uko, ibɛ atwa ụngwụ-uwaŋna oko umpwa twa nu bwa. Ee shikeni taa dụlụ, #Liv 13:45,46 13ee shepi rụhwụŋ na azuba, ɛɛ hiɛŋ, Jisus, Agwuma-ihwɛ, kwụba inyɛmɛnyɛmɛ tu.#Luk 5:5; 8:24,45; 9:33,49
14Aka na ti ge Jisus kwụbɛ aŋ, bɛɛ hiɛŋ aŋ, Zhaga meme mbiseni ma onongbo. Aka na tɛ ɛ zhɛ, aa zhɛmananɛ aa namɛ shɛshɛshɛ.#Liv 14:2-32; Mat 8:4; Mak 1:44; Luk 5:14
15Aka na ta bụtụ bu ko na ashashɛ aba kwụbɛ maa bu zhɛmananɛ ụngwụ ubwa, bee gwure bee zhemonjino Agwatana na rụhwụŋ rụ 'wụtụ. 16Bee leyi ni ivwunɛ Jisus, baa njɛ ugwoje nu bwa. Bụtụ ata kaa shɛ Busamaria! 17Ge Jisus heŋteni iheŋtene, bɛɛ hiɛŋ, Shɛ atwa umpwa maa aa ga nɛnjɛ? Cee tuba atwa vwɛ ecinjishi namɛɛ? 18I zasa suu bụtụ zhɛ be gwure maa pana Agwatana ụjɛrụma, semi bugaiŋ ga hŋ kiri? 19Bɛɛ hiɛŋ bụtụ ata, Ishijɛ hwuri, rishe rụ bụ tɛtɛtana rụ bụ nɛnjɛ.#Mat 9:22; Mak 5:34; Luk 8:48; 18:42
Tizhajɛ ta Cɛnjɛ-ta-tugwama ta Agwatana
(Mat 24:23-28,37-41)
20Afarisi heŋteni Jisus, ɛɛ hiɛŋ, Aka na kwuŋ Cɛnjɛ-ta-tugwwama ta Agwatana ti zhɛ ta zhajɛɛ? #Luk 19:11; 21:7; Ugo 1:6
Ge Jisus jishijɛ aŋ, bɛɛ hiɛŋ, Tizhajɛ ta Cɛnjɛ-ta-tugwama ta Agwatana tɛ shɛ shɛ iyi nɛ eshe atwa zhɛ a ngbaraka ti te e ci o. 21A zha shɛ ɛ hiɛŋ, Kwụba ma taa na tu namɛ epe! Kwo kaa, Tee ye tu namɛ peye o! Cɛnjɛ-ta-tugwama ta Agwatana tu namwawaŋ na ashashɛ hiŋ.
22Bɛɛ hiɛŋ eseshi-iyi ubwa, Aka zhɛ o to tɛ hi zhɛ hi na jala maa hiɛ kwụbɛ ụjita uko ni ijitɛ Yɛu Bụtụ, ama hi zha shɛ kaa hia kwụba uŋ. 23Atwa zhɛ mɛ hi hiɛŋ, Bweeye! Kwo kaa, Bwaana! Ta zhaga ma o, ta 'wa aŋ ma o.#Mak 13:21 24Iwɛnɛ tu ụjita Yɛu Bụtụ zhɛ wa sha hwuŋ gana na tu ubɛrɛ wa ta te kwune nu uce tụla geri bu ko tutu uce tụla geri yebi.#N-ndu 1:7 25Ama i shɛ tilɛɛ maa bi zhɛ bo hioko tugwo ụbaụta ofwugwo hiiŋ, atwa uwaŋnɛ ga zhɛ a manga bụ, ɛɛ zhɛ a laka bu gana uzhobu.#Luk 9:22
26Gana na ti yaa namɛ la na aka Noa, gobwonu du yɛɛ zhɛ ya nama hwuŋ na aka Yɛu Bụtụ.#Umoz 6:5-8 27A ya la, aa swa, aa zana, aa pana tụmbụla, uuwa i ci ụjita na ga Noa teni nụ ụhaŋtụ ata, ibɛ meni ma ata mu zhagajɛ, mee suji aŋ kpaaŋ.#7:6-24
28Gana ata du yaa namɛ la na aka Lụt, A ya la, aa swa, aa sa, aa sanga, aa bila, aa ma tuma.#Umoz 18:20—19:25 29Ama jita na ga Lụt beni nu Sụdụm, nazhɛ ulwa ne tuwiŋ-tuwaŋna banɛ na azuba wee ngbe, wee hwoŋzhinji aŋ kpaaŋ.
30Gobwonu du yɛɛ zhɛ ya sha hwuŋ nụ ụjita na ɛɛ zhɛ a kapɛshɛnga Yɛu Bụtụ.
31Ụjita ata ci hwuŋ, kede bụtụ na patanɛ no osokwu, okwo i'wɛŋnɛ ibwɛ zweni nu umwono, kezhe maa sugo iŋ o. Kede kaa du bụtụ na namɛ ne ehilo gwure ya o.#Mat 24:17,18; Mak 13:15,16; Luk 21:21 32Ne teyinje ma iwɛ biyikwo Lụt, #Umoz 19:26 33Bụtụ be elele na ba jala maa bicingo uraiŋ ubwa, asha nazhɛ baa inzhɛnga uŋ, ama bụtụ be elele na ba inzhɛnga uraiŋ ubwa, asha nazhɛ bɛɛ zhɛ bo bicingo uŋ maa nama.#Mat 10:37; 16:25; Mak 8:35; Luk 9:24; Jon 12:25 34Mo hi mbiso maa, ụjita ata ci hwuŋ atwa eyebi zhɛ o woto no ogodo oko, ɛ zhɛ a shapa bụtụ bu ko, a ganga bụtụ bi yebi. 35Eyikwo eyebi zhɛ na naka inɛkɛ ni izhɛrɛ, ɛ zhɛ a shapa bu ko a ganga bu na bi yebi. 36[Atwa eyebi zhɛ a nama ne ehilo, ɛ zhɛ a shapa bụtụ bu ko,#17:36 Atwa eyebi. A shapa bụtụ bu ko: Tɛjɛshɛrɛga tu ufwugwo tu zasa n-ndumwa ma buwala ga bu 36, ama tɛjɛshɛrɛga tu ko tụ ngwụshɛ ti 'yajɛ bụ. a ganga bụtụ bi yebi.]
37Nazhɛ eseshi-iyi ubwa heŋteni bu, ɛɛ hiɛŋ, Agwangwama, Ce bwaa?
Bɛɛ jishijɛ aŋ, bɛɛ hiɛŋ, Ofwo na ru'wo ri iyi ru namɛ, apata du ogwulu a ụlwatagwụ.#Mat 24:28
Právě zvoleno:
LUK 17: RBT
Zvýraznění
Sdílet
Kopírovat
Chceš mít své zvýrazněné verše uložené na všech zařízeních? Zaregistruj se nebo se přihlas
Rubassa Bible © Bible Society of Nigeria, 2008
