LUK 11
11
Imbisegeni iwɛ Adua
(Mat 6:9-13; 7:7-11)
1Jitoo ko ti ge Jisus ba nda adua no ofwo oko. Aka na ti bee hwuwi, biseshi-bi-iyi bu bwa bu ko hiɛŋ bụ, Agwangwama, iti mbisegeni adua tɛnda gana na ga Jon mbisegeni du eseshi-iyi ubwa.#Mak 1:35; Luk 3:21; 5:16; 6:12; 9:18,28
2Ge Jisus hiɛŋ aŋ, Aka na ahia nda adua, hiɛŋ ma:
Bishi,#11:2 Bishi: Tɛjɛshɛrɛga tu ko ti hiɛŋ, Bishi tu na namɛ na azuba. Gana na tu Mat 6:9 jɛmɛ. ge izeci bu jirimi,
ga Cɛnjɛ-ta-tugwama tụ bụ ti zhɛ.
3Na tu pana iyimɛyɛ nɛ itu to ukekeshi iyi-heri.#11:3 iyi-heri: Kwo kaa iwɛ hwayɛ ga, kwo kaa iwɛ beyi.
4Na tu gangana tu'wanganga tu tu,
iwɛnɛ ata gangana du atwa elele na ma tu
'wangana.#11:4 ma tu 'wangana: Kwo kaa, bụtụ be elele na ɛtɛ yɛ utashɛ.
To no tu tocingo na tumanga o.#Mat 18:35; Mak 11:25
5Nazhɛ ge Jisus hiɛŋ eseshi-iyi ubwa, Gaaba na ashashɛ hiŋ 'yajɛ biyejilo, na zhɛ ba zhagana biyejilo ata ubwa nụ ụjita tudwonu, na zhɛ hiɛŋ bụ, E-biyejilo mi, n unɛnjɛ kaa mbrad mụ tatụ. 6Iwɛnɛ te biyejilo mi bu ko na zhɛ tahaŋnụ zhajɛ pi mi, Gamba kaa N zasa iyimɛyɛ ye elele maa ma pana bu maa ya o.
7Nazhɛ biyejilo ata ubwa na namɛ na amɛ umwono zhɛ bɛ jishijɛ bụ, bɛɛ hiɛŋ, Ta ma zuga o! O kopwo odubo cebe, Ngoo wotowo na miaụŋ mi mi no ogodo. N eri shi mɛ ishijɛ ya maa ma bu pana iyi nɛ aba jala o. 8Mo hi mbiso maa okwo tu baa ga zha shɛ bɛ ishijɛ maa pana biyejilo ata ubwa iyi nɛ baa jala. Ama gana na te biyejilo ata ubwa uranjɛ bụ tụlụpa zawa ezuye,#11:8 zawa ezuye: Kwo kaa ne eshe-hwoo. bi zhɛ bɛ ishijɛ ya maa pana bụ iyi elele nɛ go to bu ukekeshi.
9Gabata du Omo hi mbiso maa, Na lụpa ma, ɛ zhɛ ma hi pana, na jalakaka ma, hi zhɛ hia ta ugbe, na pa ma ukpa iyi, ɛ zhɛ ma hiɛ kapɛshɛngana.#Mat 18:19; 21:22; Mak 11:24; Jon 15:7; 16:23,24; Jem 1:5-8; 1 Jon 5:14,15 10Bụtụ be elele na ba lụpa, ɛ zhɛ a pana bụ, bụtụ be elele na kaa ba jalakaka, bi zhɛ ba ta ugbe, bụtụ na kaa ba pa ukpa iyi, ɛ zhɛ a kapɛshɛngana bụ. 11Bishi aba na shashɛ hiŋ i shɛ maa yɛu ibwɛ lụpɛ bụ bijana, maa pana bụ uhwaa? 12Okwo yaa shɛ rɛnjɛ baa lụpɛ bụ, maa pana bụ anaa? 13Ahiɛba na hiɛ shɛ atwa awɛ, yaa shɛ ehi mepi gana na i shɛ maa hi na pana miaụŋ mi hiŋ iyi ibiye, asha Bishi hiŋ na namɛ na azuba, bi zha shɛ suu ba pana atwa na a lụpa bu Mpiala mi Tijilo?
Ɛ Hiɛŋ maa Uhiu-ibiri Namɛ na Amɛ Jisus
(Mat 12:22-30; Mak 3:20-27)
14Aka na ti ge Jisus becinji butumwa-bi-ibiri na shɛ igwureni na amɛ bụtụ bu ko. Aka na ta butumwa ata bi ibiri beni, nazhɛ igwureni ɛtɛ dumanɛ iwɛ, yaa dama atwa ofwugwo ata. 15Ama atwa oko na ashashɛ aba hiɛŋ, Tedure nu ukpahiŋ uhiu-ibiri, ibɛ bụtụ ga ba bacɛnga butumwa-bi-ibiri.#Mat 9:34; 10:25 16Ama anya atwa na ashashɛ aba a manga Jisus, ɛɛ hiɛŋ a jalakaka useyida na banɛ na azuba no olugwo ubwa.#Mat 12:38; 16:1; Mak 8:11
17Ama ti ge Jisus mepi shihaŋsa sha aba, bɛɛ hiɛŋ, Cɛnjɛ-ta-tugwama te elele tu momo bogotogwu maa tu na mama sukakanụ, ti zhɛ ta sha ụshɛka. Okwo atwa ihwɛ elele nɛ momo bogotogwu maa a na mama sukakanụ, ihwɛ ɛtɛ zhɛ yo hwuŋzwo. 18Yaa shɛ ge Setan momo bogotogwu maa mama sukakana, asha gana naa cɛnjɛ-ta-tugwama tu bwa ti zhɛ to shikonoo? Iwɛnɛ ɛhi hiɛŋ maa tedure nu ukpahiŋ uhiu-ibiri Ama bacɛnga atumwa-ibiri. 19Yaa shɛ tedure nu ukpahiŋ uhiu-ibiri Ama bacɛnga atumwa-ibiri, asha ni izeci aba tubaa miaụŋ mi hiŋ mi zhɛ ma bacɛnga mụụ? Iwɛbɛ po miaụŋ ma ata mi hiŋ mi zhɛ ma sha ajɛmɛ-ụshɛrɛya hiŋ. 20Ama yaa shɛ Ama bacɛnga atumwa-ibiri na buvwa ba Agwatana, asha Cɛnjɛ-ta-tugwama ta Agwatana ti hi zhaganɛ ga gom.
21Aka na bụtụ na 'yajɛ ikɛnyi mama 'imɛ ni i'wɛŋnɛ ujasa, baa 'yaka ukpogwu ubwa, i'wɛŋnɛ ibwɛ zhɛ yo tulono lapiya. 22Ama aka na ta bụtụ na hwuri bu ikɛnyi zhajɛ baa sukakanɛ bụ, baa lasụ bụ, nazhɛ bɛɛ zhɛ bo sugo i'wɛŋnɛ ibwɛ ujasa elele nɛ baa ga tɛtanɛ-rishe, nazhɛ bo dwotwogonu ya iyi nɛ bee suje na atwa ubwa. 23Bụtụ be elele na zasa ne mi, asha bu ma n sukakana, bụtụ be elele na kaa m mbiyeni shi tusutono, asha ba garataga.#Mak 9:40; Luk 9:50
Mpiala mụ Wɛ mu Gwuri ni Ihwɛ muba
(Mat 12:43-45)
24Aka na mpiala mụ wɛ mu banɛ na amɛ bụtụ, mee zhe no ofwo elele na zasa meni, maa jalakaka ofwo na maa mu to ụhinjanụ. Ama gana na tu maa kwụbɛ shɛ, nazhɛ mɛɛ hiɛŋ, N zhɛ ugwulwo ni ihwɛ mi nɛ Ngaa banɛ la. 25Aka na ti mee gwure apata, maa kwụbɛ maa e suji iŋ shɛshɛshɛ, aa njɛ iŋ du tisemberi. 26Nazhɛ mee zhe mee suje mpiala mụ wɛ minya mi cenje mu na mu wụmanjɛ mu hwuri mi ne ebe, mee zhe mee teni apata maa jɛjɛ. Nazhɛ bụtụ ata wụmanjɛ ya na aka umɛwɛɛ uhwuri aka ihiiŋ.
Unyasa Tugom
27Ti ge Jisus jɛmɛ iwɛ ɛtɛ, nazhɛ biyikwo na namɛ na ashashɛ ofwugwo ata uganɛ, bɛɛ hiɛŋ, Biyikwo na ubu meci, na kaa ebu subi mosubo mu bwa gwoje! #Luk 1:42
28Ge Jisus jishijɛ biyikwo ata, bɛɛ hiɛŋ, Atwa na a hwuga N-ndumwa ma Agwatana, a na kaa a nda gana na tu maa jɛmɛ, aba gwoje uhwuri atwa vwɛ hwɛɛ.#Luk 8:21; Jon 15:14; Jem 1:22-25
Atwa Oko a Jala maa a Kwụbɛ Ụrụhwajɛ
(Mat 12:38-42)
29Aka na ta atwa ofwugwo ụlwatagwụ, ge Jisus hiɛŋ, Atwa aka ga a shɛ atwa awɛ. A jala ụrụhwajɛ, a zha shɛ kaa a ndana aŋ ụrụhwajɛ we elele o, semi ụrụhwajɛ iyi nɛ jiteni la Jona.#Mat 16:4; Mak 8:12; Luk 11:16 30Gana na tu go Jona shanɛ la atwa Ninivɛ iyi ụrụhwajɛ, gabata du Yɛu Bụtụ zhɛ ya shana atwa uwaŋnɛ ga iyi ụrụhwajɛ. 31Agwuma-o-o na namɛ tuta, zhɛ a sukakana hwuŋ atwa uwaŋnɛ ga nụ ụshɛrɛya, bɛɛ zhɛ ba pana aŋ n-ndumwa-tụwụma, iwɛnɛ tu baa banɛ la taa dụlụ, baa zhajɛ maa hwuga iwɛ ti'inta tu Sụlụmụn. Hioko ma, iyi nɛ uhwuri Sụlụmụn na kaa namɛ epe.#1 Shɛgwu 10:1-10; 2 Shɛrụ 9:1-12 32Atwa Ninivɛ zhɛ a sukakana hwuŋ atwa uwaŋnɛ ga nụ ụshɛrɛya, ɛɛ zhɛ a pana aŋ n-ndumwa-tụwụma. Iwɛnɛ tu go Jona enengeni aŋ la utumwa wa Agwatana, aa jɛshɛrɛjɛ-shihaŋsa sha aba. Hioko ma, iyi nɛ uhwuri Jona na kaa namɛ epe.
Ụsụtụla u Tu'waba
(Mat 5:15; 6:22,23)
33I zasa bụtụ zhɛ bo shiyono ụsụtụla ubwa ulwa, maa sho uŋ no ofwo tusweci o, kwo kaa maa urugonu uŋ umudu o. Ama bi zhɛ ba patana uŋ nu uteburu-ụsụtụla, iwɛ maa u no hiokono atwa elele na teni apata uhwaŋna.#Mat 5:15; Mak 4:21; Luk 8:16 34Rishe rụ bụ rụba rɛ shɛ ụsụtụla u tu'waba tụ bụ. Aka na rishe rụ bụ rụ namɛ fwaaŋ, asha tu'waba tụ bụ ti zhɛ ta sha uhioko-uhwaŋna kpaaŋ. Ama aka na te rishe rụ bụ rɛ shɛ rishe rụ wɛ, asha tu'waba tụ bụ ti zhɛ ta sha tishi kpaaŋ. 35Iwɛ ecilo ata na nda ma pece iwɛ maa kede uhioko-uhwaŋna na namɛ na amɛ hiŋ ụ shɛ tishi o. 36Yaa shɛ uhioko-uhwaŋna shini na tu'waba tụ bụ kpaaŋ, taa zasa ofwo elele na shɛ tishi, asha uhioko-uhwaŋna ata gembi tebiye. I zhɛ ya sha gana ụsụtụla na wa ta na ma bu pana uhioko-uhwaŋna.
Ge Jisus Mbiseji Afarisi ne Embisegeni Undwa N-ndumwa
(Mat 23:1-36; Mak 12:38-40)
37Aka na ti ge Jisus jɛmɛ iwɛ ɛtɛ, nazhɛ Bufarisi bu ko suyanɛ bụ maa ya iyimɛyɛ nu bwa. Ge Jisus teni ga baa jɛjɛ maa ya iyi.#Luk 7:36; 14:1 38Aka na ta Bufarisi ata kwụbɛ ti ge Jisus kwuni iyimɛyɛ tiya uzawa i'ɛlɛ tusukwutwo, yaa dama bụ.#Mak 7:1-5
39Nazhɛ Agwangwama hiɛŋ Bufarisi ata, Ahiɛba Afarisi, hia nyashɛnga aba ukwopi keeni aba ikele shɛshɛshɛ, ama tuhwulo keeni iyi iwɛ kaa shini na shɛmɛ shi hiŋ. 40Ahiɛba shɛlagwụ! Bụtụ ata njɛ aba, shɛ ubwa suu du njɛ amɛ? 41Ama na pana ma okofwo upwaŋ iyi nɛ namɛ na amɛ ugbamgbam,#11:41 iyi nɛ namɛ na amɛ ugbamgbam: Kwo kaa iyi nɛ ahiɛ 'yajɛ. nazhɛ iyi elele zhɛ ma hi namana du shɛshɛshɛ.#Tait 1:15
42Ahiɛba Afarisi, hi zhɛ hia nda hwuŋ adangboo! Iwɛnɛ ahia pana Agwatana iyi-u'umpwa i tugombwo, no ongwoyi, keeni abuba vwɛ kpaaŋ, ama hi 'wa sụ kaa iwɛ ụshɛrɛya u tishiriri keeni tulubo ta Agwatana o. Hi ga shɛ hi na nda inɛ gɛ umɛwɛɛ, hiɛ shɛ shɛ kaa du hia ganga iyi-u'umpwa ata tụpana o.#Liv 27:30; Maik 6:8; Mat 23:23,24
43Ahiɛba Afarisi, hi zhɛ hia nda hwuŋ adangboo! Iwɛnɛ ohio lubo ajɛjɛ ụjɛrụma no shimwono shɛ Tụ'ụlwatagwụ, keeni a'walụ no ofwo udukwo.#Mat 23:6,7; Mak 12:38,39; Luk 20:46
44Ahiɛba Afarisi, hi zhɛ hia nda hwuŋ adangboo! Iwɛnɛ ahiɛ shɛ gana e'uye na atwa o rungo na azuba aba, aa kwụbɛ shɛ amɛ aba maa e mepi iyi nɛ namba.#Mat 23:27
45Ibɛ po bụtụ bu ko na ashashɛ embisegeni Undwa jishijɛ Jisus, bɛɛ hiɛŋ, Aka na aba duma iwɛ gɛnɛ gɛ, asha atuba aba twagaga.
46Ge Jisus jishijɛ bụ, bɛɛ hiɛŋ, Ahiɛba embisegeni Undwa, hi zhɛ du hia nda hwuŋ adangboo! Iwɛnɛ ahia patangana atwa i'wɛŋnɛ nɛ zhineni, hi jeri shi kaa maa hi timengeni iŋ ni ikɛnyi hiŋ okwo na buvwa hiŋ bu ko.#Mat 23:4
47Hi zhɛ hia nda hwuŋ adangboo! Iwɛnɛ ahia ma e'uye egesere na eshi hiŋ kwụnɛ la. 48Asha hi le tiseyida, ehi leni du ugondu ata eshi hiŋ njɛ la na tukwụna tu na aa kwụnɛ la egesere ata, iwɛnɛ ahia ma e'uye aba. 49Agwatana dumwa na ti'inta tu bwa, bɛɛ hiɛŋ, N zhɛ ma tumwananɛ aŋ egesere keeni atumwa, ama hi zhɛ hia kwụna atwa oko na ashashɛ aba, ɛhi zhɛ kaa hia shɛka anya atwa na ashashɛ aba.#1 Kor 1:20-24; Kolo 2:3 50Ɛ zhɛ kaa a tụpana atwa uwaŋnɛ ga tụlụkpashɛ te egesere ata aa kwụnɛ la taa nu umozhigo. 51Te kwuni ne Ebɛl na aa kwụnɛ la uuwa i ci Zɛkaria na aa kwụnɛ la na ashashɛ na namɛ nu utukwu-ụrụpɛ no ohwolu tijilo. Iwɛ-tɛkana Omo hi mbiso maa, atwa uwaŋnɛ ga aba ɛɛ zhɛ a tụpana tụlụkpashɛ ti ijɛ ɛtɛ kpaaŋ.#Umoz 4:8; 2 Shɛrụ 24:20,21; Zɛka 1:1
52Ahiɛba embisegeni Undwa, hi zhɛ hia nda hwuŋ adangboo! Iwɛnɛ ehi shepi i'ilɛ-isɛbwɛ iyi-tumapa, ahiɛba kaa hi teni shi ni ikɛnyi hiŋ o, ahia nda kaa atwa na a jala maa e teni ukwurishi.#Mat 23:13
53Aka na ti ge Jisus beni apata, ibɛ po embisegeni Undwa keeni Afarisi kwuni bu tụlụma, aa suraka bụ ni iheŋtene maa duma iyi ifwugwo. 54Iwɛnɛ te e gwubeji bu maa a 'imɛ bụ hwayɛ ni iwɛ ye elele nɛ bɛɛ zhɛ ba duma.
Právě zvoleno:
LUK 11: RBT
Zvýraznění
Sdílet
Kopírovat
Chceš mít své zvýrazněné verše uložené na všech zařízeních? Zaregistruj se nebo se přihlas
Rubassa Bible © Bible Society of Nigeria, 2008
