JON 8

Biyikwo na Aa 'Imɛ tu baa Nda Tuwɛle

1Ama ge Jisus munji Ishɛmɛ Buta. 2Ti iyi heri ge Jisus zhajɛ sasana nu Umwono wa Agwatana nu uvwungwa dididi, nazhɛ atwa kpaaŋ zhe pu bwa, baa jɛjɛ boo mbisogono aŋ iyi. 3Embisegeni Undwa keeni Afarisi shapɛ biyikwo bu ko na aa 'imɛ tu baa nda tuwɛle. Ee shikicinji bu na ashashɛ. 4Ɛɛ hiɛŋ Jisus, E-Bimbisegeni, ti imɛ biyikwo ga tu baa nda tuwɛle ne butubwenyi bu ko. 5Go Moses kaa iti mbishi nu Undwa maa bụtụ gana ga bɛ shɛ aa tagana atayɛ. Imbe tuba ɛbi hiɛŋ inɛɛ bụụ? #Liv 20:10; Undwa 22:22-24 6A jɛmɛ iwɛ gɛ maa e menji Jisus, iwɛ maa a 'yaga iyi nɛ ɛɛ zhɛ a untangana bụ.

Ama ge Jisus hiri, baa 'nyata iyi ike na cɛnjɛ na buvwa bwa.

7Ama gana na ta a uranjɛ bụ ni iheŋtene, bee hirinje, bɛɛ hiɛŋ aŋ, Ga bụtụ na zasa iwɛwɛ na ashashɛ hiŋ shepi utayɛ maa ta bụ hiiŋ. 8Ge Jisus hileneni, bee 'nyeci iyi ike na cɛnjɛ.

9Ama aka na ta a hwụjɛ iwɛ ɛtɛ, ibɛ po n-nyarɛ ma aba mu kwuni tubananga atwa oko oko, ee genji Jisus bwooko ne biyikwo ata shikeni na ashashɛ. 10Aka na ti ge Jisus hirinje, bee heŋteni biyikwo ata, bɛɛ hiɛŋ, Cee atwa ata namɛ yaa? I zasa suu bụtụ ubu peni n-ndumwa-tụwụma?

11Biyikwo ata jishijɛ Jisus, bɛɛ hiɛŋ, Iyɛri, i zasa o.

Ge Jisus hiɛŋ bụ, M bi peni shi du n-ndumwa-tụwụma o, zhaga hwulo. Ama tuba te kwuni na aka ga, ta nda ya iwɛwɛ o.]#8:11 ta nda ya iwɛwɛ o: Tɛjɛshɛrɛga tu ufwugwo ti hiiŋ tu zasa shiwala shɛ ga o 1-11. Tɛjɛshɛrɛga tu ko kaa ti 'nyeci shu na aba 7:36, kwo kaa na aba 21:25, kwo kaa na aba Luk 21:38 ne ti'nyeci tu tuswoswoswo.

Ge Jisus Ubwa Shɛ Uhioko-uhwaŋna Unyizo

12Nazhɛ ge Jisus mbishi atwa ata, bɛɛ hiɛŋ, Gamba n shɛ uhioko-uhwaŋna unyizo. Bụtụ na n 'wa, zha shɛ na zha ya tahaŋnụ ne tishi kwukwuŋ, ama bi zhɛ ba 'yaga uhioko-uhwaŋna na wa pana bụtụ uraiŋ.#Mat 5:14; Jon 9:5

13Afarisi jishijɛ Jisus, ɛɛ hiɛŋ, Bu mama la tiseyida, tiseyida tụ bụ tɛ shɛ shɛ tiseyida ti tɛkana o.#Jon 5:31

14Ge Jisus jishijɛ aŋ, bɛɛ hiɛŋ, Okwo Ngee meme le tiseyida, asha tiseyida ti mi tɛ shɛ tiseyida ti tɛkana, iwɛnɛ ti Ngee mepi olugwo na Ngaa banɛ, Ngee mepi du kaa ofwo na Ngɛɛ zhɛ. Ama hi mepi shi olugwo na Ngaa banɛ, hi mepi shi du kaa ofwo na Ngɛɛ zhɛ. 15Ahiɛba hia duma ụshɛrɛya gana na tu usunda-tu'waba namɛ, ama N jɛmɛ shɛ ụshɛrɛya bụtụ be elele o. 16Okwo yaa shɛ maa Ma duma ụshɛrɛya, ụshɛrɛya mu ụ shɛ ụshɛrɛya tɛkana, iwɛnɛ ti yaa shɛ shɛ Ngooko ma duma uŋ ama atubana ne Bishi mi na n tumwanɛ. 17E 'nyeci nu Undwa hiŋ, ɛɛ hiɛŋ, Tiseyida tu na atwa eyebi le asha tɛ shɛ tiseyida ti tɛkana.#Undwa 19:15 18M mama la tiseyida, Bishi mi na n tumwanɛ ma n la du tiseyida.

19Ee heŋteni bu, ɛɛ hiɛŋ, Cee kwuŋ Bishi ata bu namɛɛ?

Ge Jisus jishijɛ aŋ, bɛɛ hiɛŋ, Hi m mepi shi, hi mepi shi du kaa Bishi mi o. Yaa shɛ ehi ge me m mepi, hi gɛ zhɛ du hia mapa Bishi mi. 20Ge Jisus jɛmɛ n-ndumwa mu ga na aka na tu boo mbisogono aŋ iyi nu umwono ukwuribi na namɛ na amɛ Umwono wa Agwatana. Ama i zasa kaa bụtụ na 'imɛ bụ o, iwɛnɛ ta aka ubwa te ci shi.

Ofwo na Ngɛɛ Zhɛ Hi Eri Shi Hio To

21Nazhɛ ge Jisus hiɛŋ aŋ sasana, N zhɛ mo hwulo, hi zhɛ hi na ma jalakaka, hi eri shi kaa hio to ofwo na Ngɛɛ zhɛ o. Ama hi zhɛ kaa hio 'wo ni iwɛwɛ hiŋ.

22Eju hiɛŋ, Tumama kwụna suu bɛɛ zhɛ upo bɛɛ hiɛŋ, Hi eri shi hio to ofwo na Ngɛɛ zhɛ?

23Ge Jisus jishijɛ aŋ, bɛɛ hiɛŋ, Nu unyizo ahi banɛ, Ngaa banɛ tuba na azuba. Atwa unyizo ga ahiɛ shɛ, N shɛ shɛ tuba bụtụ bu unyizo ga o. 24Ibɛ po Ngɛɛ hi hiɛŋ, Hi zhɛ hio 'wo ni iwɛwɛ hiŋ, iwɛ-tɛkana maa yaa shɛ ahiɛ tɛtanɛ shɛ rishe maa Gamba na, asha hi zhɛ hio 'wo ga ni iwɛwɛ hiŋ.

25Nazhɛ atwa ata heŋteni Jisus, ɛɛ hiɛŋ, Gaaba kwuŋ abɛ shɛɛ?

Ge Jisus jishijɛ aŋ, bɛɛ hiɛŋ, Gamba n shɛ bụtụ ata Omo hi mbiso iwɛ ubwa taa nu umozhigo. 26N 'yajɛ iwɛ ifwugwo maa ma duma iwɛ hiŋ medenji inɛɛ nɛ maa ma hi pana n-ndumwa-tụwụma iwɛ ibɛ. Ama bụtụ na n tumwanɛ ubwa shɛ bụtụ tɛkana, Mo mbiso atwa unyizo iwɛ nɛ Ngɛɛ hwujɛ no olugwo ubwa.

27Ama e eshiciji shi maa ge Jisus bo mbiso aŋ iwɛ Bishi o. 28Ge Jisus hiɛŋ aŋ, Aka na ɛhi zhɛ hia shapa Yɛu Bụtụ na azuba, nazhɛ ɛhi zhɛ hia mapa maa Gamba na, maa kaa du N njɛ shɛ iyi elele ni ikɛnyi mi o, ama gana na te Bishi mi m mbisegeni, gabata du Omo hi mbiso. 29Bụtụ na n tumwanɛ ba nama ne mi, bu n genji shi Ngooko, iwɛnɛ ta Ama nda iyi nɛ ya kwulana bụ aka elele.

30Ti ge Jisus jɛmɛ iwɛ gɛ, nazhɛ atwa ofwugwo a na hwụjɛ iwɛ ubwa tɛtanɛ bụ rishe.

Atwa na Mama 'Yajɛ, na Atwa na Shɛ Ajama

31Nazhɛ ge Jisus hiɛŋ Eju a na tɛtanɛ bụ rishe, Yaa shɛ ahia hwuga-unu n-ndumwa mi mi, nazhɛ ɛhi zhɛ hia sha eseshi-iyi mi tugom.

32Nazhɛ ɛhi zhɛ hia mapa iwɛ-tɛkana ata, nazhɛ iwɛ-tɛkana ata zhɛ ya nda maa hi mama 'yaga.

33Ɛɛ jishijɛ Jisus, ɛɛ hiɛŋ, Ajalalo Abraham#8:33 ajalalo Abraham: Kwo kaa, izɛgwu Abraham, keeni buwala bu 37. atɛ shɛ, tu ta shɛ shɛ ajama bụtụ be elele kwukwuŋ. Iwembe po ɛbi hiɛŋ maa hi zhɛ hi mama 'yagaa? #Mat 3:9; Luk 3:8

34Ge Jisus jishijɛ aŋ, bɛɛ hiɛŋ, Iwɛ-tɛkana Omo hi mbiso maa, bụtụ be elele na ba nda iwɛwɛ, bɛ shɛ bujama bi iwɛwɛ. 35Bujama kaa shiyeni shi ni ihwɛ unyizo-nom, ama yɛu umamata ibɛ yo shiyono ni ihwɛ unyizo-nom. 36Yaa shɛ Yɛu zhɛ ya nda maa hi mama 'yaga, asha nazhɛ ɛhi zhɛ hi mama 'yaga gom. 37M mepi maa hiɛ shɛ ajalalo Abraham, ama hia jala kaa maa hi n kwụnɛ, iwɛnɛ tu n-ndumwa mi mi mu gwushiji shi ohwolu na shɛmɛ shi hiŋ.

38Ma duma inɛɛ nɛ Ngaa kwụbwa no ofwo Bishi mi, ahia duma du inɛɛ nɛ ahi kwụbwa no ofwo bishi hiŋ.

39Ɛɛ jishijɛ bụ, ɛɛ hiɛŋ, Ga Abraham kaa shɛ bishi tu.

Ge Jisus jishijɛ aŋ, bɛɛ hiɛŋ, Yaa shɛ ahi ga shɛ miaụŋ ma Abraham, hi gɛ zhɛ hi na nda ugondu na ga Abraham njɛ la. 40Gamba ebe n hi mbishi iwɛ-tɛkana na Ngɛɛ hwujɛ no olugwo Agwatana, Gamba kaa ahia jala ya tụkwụna. Ga Abraham kaa njɛ shɛ la gana ga ahia nda o. 41Ugondu bishi hiŋ bana ahia nda. Ɛɛ jishijɛ Jisus, ɛɛ hiɛŋ, Shɛ nɛ tuwɛle ee ti meci o, Bishi bu ko gba ati 'yajɛ, ubwa shɛ Agwatana.

Miaụŋ mi Ibiri

42Ge Jisus hiɛŋ aŋ, Yaa ga shɛ Agwatana shɛ Bishi hiŋ, hi gɛ zhɛ hi mo n lubo, no olugwo Agwatana kaa Ngaa banɛ nazhɛ Ngaa zhajɛ epe. N zhe shi kaa nu ukpahiŋ mu o, ama ubwa kaa n tumwanɛ. 43Imbe po tuba ehi eshiciji shi ya n-ndumwa mi mii? Asha iwɛnɛ te ehi eri shi hia hwuga iwe mi. 44Hiɛ shɛ miaụŋ me bishi ata hiŋ na shɛ Ibiri, ahaŋsa ata awɛ bishi hiŋ 'yajɛ, aba du ahia jala maa hi 'wa. Ubwa kaa shɛ bụkwụnɛ ba atwa taa nu umozhigo, bi shikeni shi ni iwɛ-tɛkana o, iwɛnɛ ti iwɛ-tɛkana zasaba na amɛ ubwa. Aka elele bee jwe ụzagwụ, asha bu jwe uŋ nu ukpahiŋ ubwa. Bujwe-bụ-ụzagwụ baa shɛ, ubwa du kaa shɛ uhiu ụzagwụ hwɛɛ. 45Ama iwɛnɛ Omo hi mbiso iwɛ-tɛkana, ibɛ po ahiɛ n tɛtanɛ shɛ rishe. 46Gaaba eri mɛ n vwɛ uvwi ni iwɛwɛ na ashashɛ hiiŋ? Yaa shɛ Ama duma iwɛ-tɛkana, asha iwembe po ahiɛ n tɛtanɛ shɛ rishee? 47Bụtụ na shɛ bụtụ ba Agwatana, ubwa ba hwuga n-ndumwa ma Agwatana. Ecilo no po ahiɛ hwụjɛ shɛ, i shɛ iwɛnɛ ahiɛ shɛ shɛ atwa Agwatana.

Ge Jisus na Abraham

48Eju jishijɛ Jisus, ɛɛ hiɛŋ, shɛ iwɛ-tɛkana hŋ atɛ jɛmɛ, tɛ ɛti hiɛŋ, Busamaria na butumwa-bi-ibiri namɛ na amɛ bụ abɛ shɛ?

49Ge Jisus jishijɛ aŋ, bɛɛ hiɛŋ, N zasa butumwa-bi-ibiri na amɛ mi o, ama Ma muna Bishi mi ụjɛrụma, ama hi m mụnɛ shɛ tuba ụjɛrụma o. 50N jelekeci shi ụjɛrụma uhiuhiu mu o. Ama Bụtụ bu ko namba na ba jalakaka uŋ, ubwa kaa du shɛ bɛjɛmɛ-bụ-ụshɛrɛya. 51Iwɛ-tɛkana Omo hi mbiso maa, bụtụ be elele na ba hwuga-unu n-ndumwa mi mi, bi zha shɛ bo 'wo kwukwuŋ.

52Eju hiɛŋ Jisus, Ti mepi ya hwuwayɛ go maa butumwa-bi-ibiri namɛ ga na amɛ bụ gom. Ga Abraham uwo, egesere du uwo, nazhɛ ɛbi hiɛŋ ya maa, bụtụ be elele na ba hwuga-unu n-ndumwa mụ bụ, asha bi zha shɛ bo 'wo ya kwukwuŋ o. 53Asha gabụ suu bu hwuri ya bishi tu ga Abraham keeni egesere a na uwo? Gaaba kwuŋ abu mama njɛɛ?

54Ge Jisus jishijɛ aŋ, bɛɛ hiɛŋ, Yaa shɛ Ngaa mama muna ụjɛrụma, asha ụjɛrụma ata mu ụ shɛ ụjɛrụma tisashɛ. Bishi ata mi ɛhi hiɛŋ maa ubwa du shɛ Agwatana hiŋ, ubwa kaa ma n muna ụjɛrụma. 55Hi te mepi shi bu o, ama ɛɛhiɛŋ Gamba m mepi bu. Yaa shɛ Ngɛɛ hiɛŋ m mepi shi bu o, asha N zhɛ ma sha bujwe-bụ-ụzagwụ gana hiŋ du. Ama M mepi bu, Ngaa hwụjɛ kaa unu n-ndumwa mu bwa. 56Bishi hiŋ ga Abraham njɛ la unyasa duwa tu baa kwụbɛ aka tizhajɛ ti mi, tu baa kwụbɛ aka ata nazhɛ amɛ ubwa lemi.

57Nazhɛ Eju hiɛŋ bụ, Bi te ci shi okwo shiywa dupu o, bu kwụbɛ la suu Abraham?#8:57 bu kwụbɛ la suu Abraham?: Tɛjɛshɛrɛga tu ko ti hiɛŋ, ga Abraham suu ụbụ kwụbɛ la? 58Ge Jisus jishijɛ aŋ, bɛɛ hiɛŋ, Iwɛ-tɛkana Omo hi mbiso maa, N namwawaŋ nazhɛ ee meci Abraham.

59Ibɛ po ee suji atayɛ maa e tegeni bu, ama ge Jisus mama intanɛ, bee beni nu Umwono ata wa Agwatana bee hwuri.

Právě zvoleno:

JON 8: RBT

Zvýraznění

Sdílet

Kopírovat