UMOZHIGO 4
4
Upwaŋ na ge Ken ne Ebɛl Peni Agwatana
1Nazhɛ ga Adam weci ne biyikwo bwa ge Ivi, bee le ofubo, bee meci yɛu-ye-eyi. Bɛɛ hiɛŋ AGWANGWAMA m mbiyeni Ngaa 'yajɛ yɛu-ye-eyi, boo po iŋ izeci ti ge Ken#4:1 Ken: Egini te Ken i shɛ, ti'yaga. 2Bee meci sasana buhongwu bwa ge Ebɛl. Ge Ebɛl shɛ bɛbɛjɛ ba agwụdụ, ge Ken tuba shɛ buhwɛŋ bi itimɛ. 3Ti yee ilegeji fwalaa, ge Ken peni AGWANGWAMA upwaŋ iyimɛyɛ nɛ bee jwe. 4Ge Ebɛl du shapɛ yɛu nɛ ụgwụdụ ubwa meci hiiŋ baa kwụnɛ, baa mụnɛ upada na 'yajɛ manɛbɛ bee peni AGWANGWAMA. Ibɛ po amɛ AGWANGWAMA lemi ne Ebɛl keeni upwaŋ ubwa. 5Ama bu mbiyanɛ shɛ Ken okwo kaa upwaŋ ubwa o. Ibɛ po ge Ken kwuni isɛbwɛ tɛnda tebiye, bee heshigeni eshe. 6Ibɛ po AGWANGWAMA hiɛŋ Ken, Iwɛmbe po aba nda isɛbwɛ, ebi heshigeni eshee? 7Yaa shɛ abu ga njɛ ta zhɛmɛ, a ga zha shɛ a lashɛga suu inɛɛ bụ du? Ama iwɛnɛ abɛ njɛ shɛ ta zhɛmɛ, ibɛ po iwɛwɛ ya jala maa ibu lasụ, ama gabụ kaa bɛ shɛ ba lasụ iŋ.
Ge Ken Kwụnɛ Ebɛl
8Ge Ken hiɛŋ buhongwu bwa ge Ebɛl, Mizha ti zhe ne ehilo. Aka na ta a namɛ ne ehilo, ge Ken ishijɛ baa sukakanɛ buhongwu bwa ge Ebɛl, baa kwụnɛ bụ.#Mat 23:35; Luk 11:51; 1 Jon 3:12
9Nazhɛ AGWANGWAMA heŋteni Ken, bɛɛ hiɛŋ, Cee buhongwu bu ge Ebɛl namɛɛ?
Bɛɛ jishijɛ bụ, bɛɛ hiɛŋ, M mepi shi o, Gamba suu n shɛ bi'iywa bo buhongwu mi?
10Nazhɛ AGWANGWAMA hiɛŋ bụ, Imbe nɛ abɛ njɛɛ? Hioko te mehieŋ mo buhongwu bu mi tileni na cɛnjɛ maa ma n kala n'ungwa.#Ehib 12:24 11E bi keleni-unu na banɛ na cɛnjɛ tu na ti kepishinji unu tu swe mehieŋ mo buhongwu bu ni i'ɛlɛ bụ. 12Te kwuni na aka ga okwo aba hwaŋ itimɛ, cɛnjɛ ti zha shɛ ta bụ zhɛmana ya iyimɛyɛ tebiye o, bi zha shɛ kaa ba 'yaga ya urubwo, ama bi zhɛ bu no rungo gbom na cɛnjɛ tu unyizo.
13Ge Ken hiɛŋ AGWANGWAMA, Ulwapɛ mu hwuri ugombo, N eri shi ma 'waŋna uŋ o. 14Ebu n unzhi hwayɛ ga maa ma bana na cɛnjɛ tu ga, N zhɛ ma bu swakana, N zha shɛ ma 'yaga ya urubwo, N zhɛ ma sha bụtụ na bo rungo gbom na cɛnjɛ tu unyizo, bụtụ be elele na kaa n kwụbɛ bi zhɛ ma n kwụna.
15Nazhɛ AGWANGWAMA hiɛŋ bụ, Bụtụ be elele ụbụ kwụnɛ, N zhɛ ma tụpana tụlụkpashɛ tụ bụ kpalụ cenje. Ibɛ po AGWANGWAMA njɛ Ken useyida iwɛ maa bụtụ be elele na kwụbɛ bụ kede ba kwụna bụ o. 16Nazhɛ ge Ken beni na agba AGWANGWAMA, bee zhe baa jɛjɛ na cɛnjɛ tu Nod#4:16 Nod: Egini Nod i shɛ, turungo gbom. geri bu uwaŋna-banụ bi Idɛn.
Miaụŋ mi Ken Na
17Ge Ken weci ne biyikwo bwa, bee le ofubo, bee meci Inok. Ge Ken jwe ụshɛpwụ uko, boo po uŋ izeci yɛu ɛtɛ ibwɛ ta Inok. 18Ge Inok meci Irad, ga Irad meci Mɛhujaɛl, gɛ Mɛhujaɛl meci Mɛtushaɛl, gɛ Mɛtushaɛl meci Lamɛk.
19Ga Lamɛk zeni eyikwo eyebi, ɛ hiɛŋ izeci bu na bu ko ga Ada, ɛɛ hiɛŋ izeci bu na bi yebi ge Zila. 20Ga Ada meci Jabɛl, ubwa shɛ bishi ba atwa na jɛjɛ nu udulo tugwuno a na 'yajɛ iyimabiga. 21Ɛ hiɛŋ izeci buhongwu bwa go Jubal, ubwa shɛ bishi ba atwa na a 'nyama aduma keeni ukpasana tuhwulo. 22Ge Zila meci Tubal-ken, ubwa shɛ bugwoni ba alụma i'wɛŋnɛ yɛ ɛtumburɛ keeni ashɛmbɛrɛ. Ɛ hiɛŋ izeci bụngwụfwụ Tubal-ken ge Neama.
23Ga Lamɛk hiɛŋ eyikwo ubwa ga Ada keeni Zila,
Shɛlaga ma iyi nɛ Ngɛɛ zhɛ ma duma,
N kwụnɛ yɛu tisemberi ike iwɛnɛ boo m po iyi baa n gwụcɛnjɛ.
24Yaa shɛ aa njɛ itɛpwɛ Ken kpalụ cenje,
iwɛ-tɛkana asha ɛ zhɛ a tụpana itɛpwɛ mi kpalụ dupu-nu-woshi-ni-bɛ-cenje.
Tumata ti Sɛt
25Ga Adam weci ne biyikwo bwa sasana, bee meci yɛu-ye-eyi, boo po iŋ izeci ti gɛ Sɛt.#4:25 Sɛt: Egini tɛ Sɛt i shɛ, e m peni. Iwɛnɛ po biyikwo ata hiɛŋ, Agwatana m peni yɛu-ye-eyi inyɛ tụlụkpashɛ te Ebɛl, na ge Ken kwụnɛ. 26Gɛ Sɛt meci du yɛu-ye-eyi, boo po iŋ izeci ti ge Inosh. Te kwuni na aka ata nazhɛ atwa kwuni izeci ya AGWANGWAMA tusuyana.
Právě zvoleno:
UMOZHIGO 4: RBT
Zvýraznění
Sdílet
Kopírovat
Chceš mít své zvýrazněné verše uložené na všech zařízeních? Zaregistruj se nebo se přihlas
Rubassa Bible © Bible Society of Nigeria, 2008