WƖAA DƖ-SUOMUŊ 25
25
Abɩraham sʋba
1Abɩraham bɩra jaa haala dɔŋɔ, ʋ yɩrɩŋ nɛ Ketura. 2Ʋ dɩ Abɩraham nɛ lʋl biiriŋ deemba: Ziraŋ, Jokisaŋ, Medaŋ, Midiaŋ, Isibak arɩ Sʋa. 3Jokisaŋ ma lʋl Sɛba arɩ Dɛdaŋ, Dɛdaŋ doho nɩaa nɛ Asu tɩŋŋaa, Letusi tɩŋŋaa arɩ Lumi tɩŋŋaa. 4Midiaŋ ma hambolibiisiŋ nɛ: Ɛfa, Ɛfɛ, Hanɔk, Abɩda arɩ Ɛlɩdaa. Nɩaa deemba kala ŋaa Ketura doho nɩaa nɛ.
5Abɩraham joŋ kʋŋkala ʋ sɩ kɛnɛ a hɛ Aɩzɩk nɩsɩŋ lɛ nɛ. 6Abɩraham fa ha sɩ hɛ ʋ mɩɩsɩŋ lɛ, ʋ joŋ kɩaa a pɩ ʋ haala-la dɔnsʋŋ ʋ sɩ bile aŋ bɩ jaa biiriŋ ma nɛ, aŋ leŋ ba lɩɩ a mʋ hɛ wɩɩpɔsʋŋ dɩɩrɩŋ, aŋ ka Aɩzɩk.
7Abɩraham fa sɩ hɛ ʋ mɩɩsɩŋ lɛ ʋ ŋaa jɩsɩŋ zɔlɔ arɩ mahɩŋ batori arɩ fii arɩ banɔŋ nɛ. 8Ʋ fa hɩɛsa nɛ woruŋ aŋ-na sʋʋ. 9Ʋ biiriŋ Aɩzɩk arɩ Ɩsɩmɛl nɛ joŋu a hugi Makɩpɛla bʋ-bʋa-la sɩ kpagɛ Mamɩrɛ leriŋ. Zɔha bie Ɛfʋrɔŋ, Hiti tɩɩna-la nɛ fa tɩɩ ŋmaŋkaa-la. 10Abɩraham fa yɔɔ ŋmaŋkaa-la Hiti tɩŋŋaa teeŋ nɛ, nɩmɛ nɛ ba hugi ʋ dɩ ʋ haala Sara kala. 11Abɩraham sɩ sʋba, Wɩa pɛ ʋ bie Aɩzɩk lɛ woruŋ. Bʋa-la lɛ dɩ ʋ hɔnɔ kpagɛ lɩɩ-bulo-la ba sɩɩ yɩrɛ Bɛɛ-Lahaɩ-Roi lɛ.
Ɩsɩmɛl hambolibiisiŋ
12Ijipiti tɩŋŋaa tolo Haga arɩ Abɩraham nɛ lʋl Ɩsɩmɛl. Haga ŋaa Sara ketiiŋ nɛ ʋ joŋo pɩ ʋ bala Abɩraham. Ɩsɩmɛl doho nɩaa nɛ ŋ-la.
13Ɩsɩmɛl hambolibiisiŋ yɩraa a chɩŋ ʋ bii-hɩaŋ lɛ a kaa tuu nɛ: Nɛbayɔf, Kɛda, Adɩbɛɛl, Mibisam, 14Mɩsɩma, Duma, Masa, 15Hadad, Tɛma, Jetuu, Nafɩs arɩ Kɛdɛma. 16Ɩsɩmɛl hambolibiisiŋ yɩraa nɛ ŋɩɩ, ba kʋ ŋaa doho doho fii arɩ balɩa nɛ a hɔŋ hɔŋ arɩ ba nɩhɩasɩŋ. 17Ɩsɩmɛl fa ŋaa jɩsɩŋ zɔlɔ arɩ mara arɩ fii arɩ balɩpɛ nɛ aŋ sʋʋ. Ba joŋu hugi ʋ nɩaa tʋɔŋ. 18Ʋ doho nɩaa hɔŋ Havɩla lɛ a saa ŋɩɩ mʋ yi Suu a kpagɛ Ijipiti tinteeŋ bʋa dɩ ŋ nɩɩ mʋ Asiiria tinteeŋ. Ba fa tɛrɛ nɛ woruŋ ba naambiiriŋ teeŋ.
Ba lʋl Jekɔb arɩ Ɛsɔ
19Abɩraham nanʋala Aɩzɩk mɩɩsɩŋ lɛ wɩaa nɛ ŋ-la: Abɩraham nɛ fa ŋaa Aɩzɩk nyɩmma. 20Aɩzɩk fa ŋaa jɩsɩŋ mahɩŋ balɩa nɛ aŋ jaa Rɩbɛka. Rɩbɛka fa ŋaa Bɛtʋɛl tolo nɛ. Bɛtʋɛl ŋaa Siiria tɩɩna nɛ a lɩɩ Mesopotemia tinteeŋ. Rɩbɛka dɩbaala ma nɛ fa Labaŋ sɩ ŋaa Siiria tɩɩna.
21Aɩzɩk haala fa bɩ lʋl, ŋɩɩ nɛ ʋ sʋl Wɩa pʋ. Wɩa laa ʋ sʋla, ʋ haala kɛŋ luoruŋ. 22Ŋɩɩ nɛ hambiisi-la yɩyɩ dɔŋɔ ʋ luoruŋ tʋɔŋ. Ʋ pɩɛsɛ La TƖƖNA, “Bɛɛ nɛ tɩɩ wɩɩŋ deeŋ ŋɩŋaa mɩ lɛ?”
23La TƖƖNA bʋla pʋ, “Biiriŋ balɩa nɛ hɛ ŋ tʋɔŋ, ba jaŋ sii ŋaa tinteyee balɩa, ba bɩ jaŋ suguli dɔŋɔ lɛ, kʋbie nɛ jaŋ dolie kɩɩ kʋhɩaŋ. Kʋhɩaŋ jaŋ tɩma pɩ kʋbie.” 24Bʋa-la sɩ yie dɩ ʋ lʋl, ʋ lʋl daalɩarɩŋ. 25Bile sɩ laa sɩpaaŋ lɩɩ ŋaa bii-fɩaŋ nɛ. Ʋ yaraa kala ŋaa pʋnaa a nagɛ gɛrɩŋ sɩ kɛŋ pʋnaa, ŋɩɩ nɛ ba hɛ ʋ yɩrɩŋ Ɛsɔ. 26Ʋ ŋɩɩ harɩŋ lɛ, lɩa-la tɩɩna kʋ lɩɩ a kɛŋ Ɛsɔ naatilimiŋ lɛ, ŋɩɩ nɛ ba hɛ ʋ yɩrɩŋ Jekɔb. Aɩzɩk fa ŋaa jɩsɩŋ mahɩŋ batori nɛ, ka Rɩbɛka-na lʋl daalɩarɩŋ deemba.
27Ŋɩɩ nɛ biiri-la waa, Ɛsɔ ŋaa nambagɩl-wajɩa a hɛ gɩrɩŋ tʋɔŋ, ka Jekɔb ma ŋaa nɩchɩmchɩm a hɛ dɩa lɛ. 28Aɩzɩk fa cho Ɛsɔ a tɩŋ ʋ sɩ cho baga nammɩa wɩaa, ka Rɩbɛka ma cho Jekɔb.
29Tapʋlɩɩ kʋbala Ɛsɔ lɩɩ gɩrɩŋ kɔ, losuŋ kɛnʋ woruŋ, dɩ Jekɔb ka ŋaa kʋdiilee. 30Ŋɩɩ nɛ Ɛsɔ bʋla pɩ Jekɔb, “Mɩɩ sʋlʋŋ, mɩɩ sʋʋ losuŋ nɛ, ŋaa lɩma a pɩmɛ kʋdiile-la dɩ mɩ dii.” (Ŋɩɩ nɛ tɩɩ ba haa yɩrɛ Ɛsɔ, Ɛdɔm ma.) Ʋ bʋbʋɔŋ nɛ kʋfɩaŋ.
31Ŋɩɩ nɛ Jekɔb sɩ, “Laa sɩpaaŋ joŋ ŋ hɩasɩŋ lenni mɩ hambiiriŋ, ka dɩ mɩ-na pɩŋ kʋdiile-la.”
32Ɛsɔ sɩ, “Bee-na, mɩɩ chɛ dɩ mɩ sʋʋ nɛ arɩ losuŋ, bɛɛ kʋŋ wʋzɔŋ nɛ hɩasɩŋ deeŋ jaŋ ŋaa pɩmɛ?”
33Ŋɩɩ nɛ Jekɔb bʋl, “Ŋmɩɛsa pɩmɛ arɩ ŋ joŋ ŋ hɩasɩŋ lenni mɩ hambiiriŋ nɛ.” Ɛsɔ ŋmɩɛsɛ a joŋ ʋ hɩasɩŋ lenni Jekɔb hambiiriŋ.
34Ŋɩɩ nɛ Jekɔb ŋaa kʋdiile-la arɩ boroboro pʋ. Ʋ dii aŋ nyʋa, aŋ sii viiri. Ɛsɔ sɩ joŋ ʋ hɩasɩŋ lenni hambiiriŋ ŋɩɩ, ʋ muuri ʋ tɩtɩa nɛ.
Právě zvoleno:
WƖAA DƖ-SUOMUŊ 25: SIS
Zvýraznění
Sdílet
Kopírovat
Chceš mít své zvýrazněné verše uložené na všech zařízeních? Zaregistruj se nebo se přihlas
©Ghana Institute of Linguistics Literacy and Bible Translation 1984, 2014