Jénesii̱s 15
15
Néná índajo̱ ngo ni Abra̱n
1Nguije kamá kui nii̱, Néná jatjokjaá Abra̱n nga akoó ngo ni, kó bi̱ katsoó:
—Abra̱n, ngata̱ ndakínjín má ji, ngatꞌa̱ án boá xi tsꞌénkoón ji. Achichí tsie kjo̱a̱cho̱n xi sꞌe̱ tsjaa.
2-4Sꞌe̱ Abra̱n bi̱ katsoó Néná:
—Ne tsa̱ꞌa̱n, mítsjá ko̱e̱ꞌéní kjo̱a̱cho̱n xi nde ndí kji̱e̱ jmíjínna. Kó nga ko̱ya án, kui moso̱ xi xín chji̱a̱ni xi tsꞌénkonda ndiꞌana kuí xí tsi̱ꞌe̱ ka̱ma ngayeje ni xi tjínna.
Sꞌe̱ Néná bi̱ katsoó:
—Ndí xí tse̱ boá xi tsi̱ꞌe̱ ka̱ma ngayeje ni xi tjiín, jmí tsi tsi̱ꞌe̱ mosóo Eliesee̱r.
5Kó Néná kijíjo̱ Abra̱n ndi̱tsenján, kó bi̱ katsoó:
—Tsitsíjin ji nkꞌaján kó tsitsíjìi̱n ngayeje ńño xi tjiín. A ka̱maxki̱i̱. Jmí bokia. Ja̱ ti̱ nde ka̱maxki̱jiín xikó kjiꞌi kjín ka̱ma xota̱ tji̱e̱e̱ nga.
6-7Kó Abra̱n kisꞌijii̱n ni xi katsó Néná, kó Néná katsꞌénjo̱ꞌo Abra̱n xikoó ngo xota̱ xi kixi̱. Kósꞌe̱ Néná bi̱ katsoó:
—Án boá xi Nèe̱ an, ngatꞌa̱ ꞌnítakínní, kó án boá xi tsꞌaxieé Uu̱r nanguii̱ xota̱ Kaldea̱, tsi̱ꞌe̱ nga ji sa̱ꞌinkꞌasꞌiee̱n kui tꞌananguii̱.
8Kó Abra̱n bi̱ katsoó Néná:
—Ne tsa̱ꞌa̱n, kó kótsꞌén skuie an nga ja̱koxi̱ nga an si̱ꞌinkꞌasꞌínní kuí tꞌananguii̱.
9Sꞌe̱ Néná bi̱ katsoó:
—Ndibéje̱ní ngo ndí cho̱yojo chjo̱on, ko̱jo ngo tindso̱ chjo̱on xi ján noó, ko̱jo ngo cho̱tsa̱nga̱ xi jaꞌatji ndi̱ja̱a̱ xi ján noó, ko̱jo ngo toṉñaa̱ ko̱jo ngo tójo.
10Kó Abra̱n kijíjoo̱ Néná ngayeje kui cho̱o̱, kó jó tjín katsꞌén nga ngo nga ngo, ta̱nga índo ndo̱jo toṉñaa̱ ko̱jo tójoo̱. 11Kó cho̱ xi kjinie yojo siee̱n jatjenjennié kui cho̱ xi je jesoón, ta̱nga Abra̱n tsangajo̱ kui cho̱o̱.
12Nguije makꞌasꞌién má tsꞌueé, kamáńjñaá Abra̱n kó kisꞌifé, kó ngu̱i̱jin ńjñaá xikoó tsi kamájñó ngu̱i̱ndie nínga kisꞌijña, kó achichí katsakjónní. 13Kósꞌe̱ Néná bi̱ katsoó:
«Mejénna nga xche̱ ji nga xota̱ tji̱e̱ tse̱ ngo nangui xi xín ko̱e̱je̱kꞌíndo, kó moso̱ ka̱ma ki̱a̱a̱, kó nijón úchán nó nga ndajín ka̱mataꞌin kui ngu̱i̱ndiee̱. 14Ta̱nga kui na̱xi̱ńdaá ti̱ ánní xi sa̱ꞌinjée̱, kó nguije kjo̱tjo xotaa̱ kui ngu̱i̱ndiee̱, achichí kjo̱a̱cho̱n kjo̱tjojo̱. 15Kó ji nda tsꞌén ka̱maxchá ji, kó xió ko̱ya ji nga kjo̱chó ni̱xtjin, kó ki̱a̱ sꞌi̱nijín ji nínga kjiyojonijín xi xcháa̱. 16Ta̱nga nguije kjo̱chó xi nijón úchán noó, xota̱ tji̱e̱ tse̱ ka̱ma kjo̱e̱ꞌe nguiní kui ngu̱i̱ndiee̱, ngatꞌa̱ kui ni̱xtjinján xota̱ tji̱e̱e̱ Amoo̱r xi ta̱nisién ndajiín sa̱ꞌinkjataxie an kui ngu̱i̱ndiee̱».
17Nguije tsꞌasꞌien tsꞌueé, kó kamájñoó, kamáyá ngo orjno̱ xi tjitjoó ṉdi̱ ko̱jo ngo yá xí tjítokó ngo ndiꞌí xi jaꞌajin ngamasiee̱n kui cho̱ xi jó tjín kiniꞌaán. 18Kui ni̱xtjinján Néná índajo̱ ngo ni Abra̱n, kó bi̱ katsoó:
«Xota̱ tji̱e̱ tse̱ xí tsjàa̱ kui tꞌananguii̱, xi ꞌbítsíyani ndeskande ndejé xi tikón Ejipto̱ ngaskande ndejé je xi ꞌmí Éufratee̱, 19ki̱a̱ nangui nínga síndo ngotꞌe̱ xota̱ Kee̱n, xota̱ Kenaa̱, xota̱ Kadmoo̱n, 20xota̱ Ee̱t, xota̱ Feree̱, xota̱ Refaa̱, 21xota̱ Amoo̱r, xota̱ Kanaa̱n, xota̱ Jirgaa̱ ko̱jo xota̱ Jebuu̱».
Právě zvoleno:
Jénesii̱s 15: MAIX
Zvýraznění
Sdílet
Kopírovat
Chceš mít své zvýrazněné verše uložené na všech zařízeních? Zaregistruj se nebo se přihlas
© Sociedad Bíblica de México, A. C.
Nuevo Testamento en Mazateco de San Pedro Ixcatlán, Oaxaca, México © Sociedad Bíblica de México, A.C. 2014