Lucas 23
23
Pon q'i'n Jesús twitz Pilato
Mateo 27.1-2,11-14; Marcos 15.1-5; Juan 18.28-38
1E jawtzun we' kykyaqil, xi kyi'n Jesús twitz Pilato.
2Ex e ok ten si'mil yol ti'j, ex kyma:
—Aju xjal lu ma knet qu'ne in xitun kynab'l qxjalile. In tma'n tu'n mi'n qchojone te gobierni, ax ikx in tma'n qa ate ju Crist aju at toklen tu'n Dios, ex in tma'n qa axte rey.
3Xitzun tqanin Pilato te Jesús:
—¿Apetzuna rey kye xjal judiy?
Xi ttzaq'we'n Jesús:
—Aqine, ik tza'n ma tmaya.
4Xitzun tma'n Pilato kye nejenel kye pal kyxol judiy ex kye xjal:
—Ma tz'el nnik'e ti'j minti' jun til xjal lu.
5Atzun kye kykyuwsaxix kyib' ex kyma:
—Ate jlu in b'aj ttxalpu'n kynab'l xjal, ex in tq'o'n xnaq'tzb'il kye kykyaqil xjal tuj tx'otx' Judea, tzaj xe't tu'n tuj tx'otx' Galilea ax ikx ma tzul tzalu.
Pon q'i'n Jesús twitz Herodes
6Tejtzun tb'inte Pilato jlu, xi tqanin kye qa aj Galilea te Jesús. 7Tejtzun tb'inte Pilato qa aj Galilea te Jesús, xi t-sama'n tuk'il Herodes, porke ate Herodes toktoq te gobernador tuj Galilea ex otoq tzul tuj Jerusalén tuj q'ij lu. 8Tej tke'yinte Herodes twitz Jesús, nimxix o tzalaj; tu'nju otoq tz'el q'ij o tajb'e tu'n tke'yinte; tu'nju otoq tb'i nimku tqanil ti'j Jesús, ex o tajb'e tu'n tke'yinte jun señ in tb'incha'n. 9Ex xi t-xjelin Herodes nimku te, ex minti' jun xi ttzaq'we'n Jesús. 10Ex e pon qe nejenel kye pal kyxol xjal judiy kyuk'ix qe xnaq'tzal ti'j ley, in che si'min yol ti'j kyuwxix. 11Atzunte Herodes kyuk'ix qe t-soldad el kyik'un, ex e ok ten xmayil ti'j, ok kyq'o'n jun t-xb'alun tb'anilxix; ex ajtz t-sama'n Herodes juntl maj Jesús tuk'il Pilato. 12Ex ok kyamiwin kyib' Pilato tuk'il Herodes tujx ju q'ij lu; atzun nej kyajq'ojtoq kyib'.
Kub' t-sentens Jesús tu'n tkyim
Mateo 27.15-26; Marcos 15.6-15; Juan 18.39—19.16
13E b'ajtzun tchmo'n Pilato qe nejenel kye pal kyxol xjal judiy kyuk'ix qe aj sanjelal kyuk'ix qe xjal, 14ex xi tma'n kye:
—Ma tzul kyi'ne aju xinaq lu nwitze, in kyma'ne qa noq in xitun kynab'l xjal; ex tej sok tuj xjel wu'ne kywitze, minti' ma knet jun til xjal lu wu'ne ti'j tkyaqilju in kyma'ne ti'j. 15Ax ikx te Herodes minti' ma knet jun til xjal lu tu'n, porke ma tz'ajtz t-sama'n juntl maj quk'il. Matzun kyile minti' jun mya b'a'n ma tb'incha xinaq lu tu'n tkyim. 16Kb'ajel asyalit ex te tib'ajxi kxel ntzoqpi'ne, chi Pilato xi tma'n kye.
17[Ex tkub'toq jun ley kyu'n tu'n tetz ttzoqpi'n Pilato jun pres tuj teyle junjun Xjan Q'ij.] 18Ex kykyaqil xjal e jaw sch'in junx ex kyma:
—Aju xjal lu b'a'n tu'n tkyim, atzun te Barrabás tzoqpi'mexa, che chi.
19Ate Barrabás presintoq kyu'n tu'n tlaj ok ten q'ojlel ti'j gobierni tuj tnam, ex tu'nju otoq kub' jun xjal tu'n. 20Ex o yolin Pilato juntl maj kyuk'il, porke o tajb'e tu'n t-xi tzoqpi'n Jesús tu'n. 21Atzun kye xjal mas e jaw sch'in juntl maj:
—E tjaw twitz crus. E tjaw twitz crus, che chi.
22Xitzun tma'n Pilato toxmaji'n kye:
—¿Tiqu'n? ¿Alkyetzun mya b'a'n ma tb'incha xjal lu? Minti' jun til ma knet wu'ne tu'n tkyim; kyja'tzun, kb'ajel asyalin, ex jurat kxel ntzoqpi'ne, chi Pilato.
23Atzun kye kukx e jaw sch'in wen, xi kyqanin tu'n tjaw q'o'n Jesús twitz crus. Kub'tzun ti'j tnab'l Pilato kyu'n xjal [ex kyu'n qe nejenel kye pal kyxol xjal judiy,] tu'nju in jaw tq'ajq'ajel kywi' nimxix. 24Xitzun tma'n Pilato tu'n tb'ant aju in kyqanin; 25kyja'tzun tten etz tzoqpi'n Barrabás tu'n Pilato, aju xi kyqanin tu'n tetz tzoqpi'n, porke tokx Barrabás tuj pres tu'n tlaj o q'ojin ti'j gobierni ex tu'n tlaj jun xjal kub' tu'n; xitzun q'o'n Jesús tuj kyq'ab' xjal tu'n Pilato tu'n kyb'inchante ti'j noq alkye kyajb'il.
Jaw q'o'n Jesús twitz crus
Mateo 27.32-44; Marcos 15.21-32; Juan 19.17-27
26Xitzun q'i'n Jesús kyu'n, ex tzaj kytzyu'n jun xjal aj Sirene, Simón tb'i, tzajni tuj kojb'il, ex xi kyq'o'n crus te tu'n t-xi tiqan ex lepchix tu'n t-xi' ti'j Jesús.
27Ex nim xjal e je'x lpe' ti'j Jesús, kyuk'ix nimku xu'j in che oq' ti'j ex in che wu'yin. 28Ajtztzun tke'yin Jesús kywitz ex xi tma'n kye:
—Aqeye xu'j aj Jerusalén, mi'n che oq'e wi'je, o'kx che oq'e kyi'jxe ex kyi'j qe kyale. 29Porke tzul q'ij ok kyma' xjal: Mas b'a'n kye xu'j mib'an che alin, ex mas b'a'n kye xu'j minti' tzaj kyal ex minti' o ch'u'n kyal kyi'j. 30Oktzun kxel kyma'n xjal kye witz: Kytzaj tz'aqe qib'aje; ex kxel kyma'n kye tal witz: Qo kyewan kub'e, che chilo. 31Ex qa in kyb'incha'n jlu tuj tq'ijlalil cha'x tze', ¿yajtzun tuj tq'ijlalil tzqij tze', titzun kb'ajel? Chi Jesús.
32Ax ikx xi kyi'n kab'etl xjal b'inchal mya b'a'n qe tu'n kykub' b'yo'n junx tuk'il Jesús. 33Tejtzun kykanun tuj lugar Tb'aqil Wib'aj tb'i, atzun jaw q'o'n Jesús twitz crus, ex kyuk'ix qeju xjal b'inchal mya b'a'n e jaw q'o'n twitz crus, jun tuj tb'anq'ab' Jesús, ex juntl tuj tnayaj. 34Tejtzun tjaw q'o'n Jesús twitz crus o na'n Dios ex tma:
—Tat, najsama kyil xjal lu, porke minti' nne'l kynik' ti'j ju in kyb'incha'n.
Ex jaw kyi'n soldad swert ti'j t-xb'alun Jesús alkye tu'n t-xi ti'n junjun, ex b'aj kysipan kyxolx. 35Ex qe xjal in che ke'yintoq, kyuk'ix qe aj sanjelal, in che xmayintoq ti'j ex in kyma'n:
—Qe txqantl xjal e klet tu'n; klomtzun tib' ja'lo qa ax tok ate ju Crist aju sk'o'maj tu'n Dios.
36Ax ikx qe soldad in che xmayintoq ti'j, e je'x laq'e' ttxlaj ex ok kyo'yin vinagre te, 37ex xi kyma'n te:
—Qa aya rey kye xjal judiy, klom tib'a.
38Ax at jun yol tz'ib'an [tuj yol griego ex tuj latín ex tuj hebreo,] jax kyq'o'n twitz crus, in tma'n: Ate jlu Rey kye xjal judiy.
39Ex at jun b'inchal mya b'a'n, aju yob'intoq twitz crus, ok ten xmayil ti'j Jesús chi kyja':
—Qa aya ju Crist aju at toklen tu'n Dios, klom tib'a, ax ikx qeye qo tkloma, chi xjal.
40Atzunte juntl xjal ok tilin tuk'il, ex xi tma'n te:
—¿Maj minti' in xob'a twitz Dios, ex ax tcastiwoya tkub' tuk'il ju xjal lu? 41Ax tok, qe in qo yajlanjtz tuj tumelxix, porke ma qk'am qcastiw tu'n tlaj qb'inchb'en; atzunte xjal lu minti' jun mya b'a'n o tb'incha, chi xjal.
42Ex xi tma'n te Jesús:
—Jesús, b'i'x chin ule ti'j tk'u'ja ok tula tu'n tkawina.
43Atzunte Jesús xi tma'n te:
—Ax tok kxel nma'ne teya: B'i'x ja'lo ktela wuk'ile tuj lugar te nim tzalajb'il Paraíso tb'i.
Tej tkyim Jesús
Mateo 27.45-56; Marcos 15.33-41; Juan 19.28-30
44Ch'ixtoq tpon chilkuq'ij kub' qloljix tkyaqil twitz tx'otx', texi las tres te qale tel spik'e'. 45Ok yupj twitz q'ij, ex aju nintz xb'alun tkub' te maqb'il tuj tmij tja Dios b'i'x kub' sb'it'j tuj tmijil. 46Jawtzun tq'ajq'ajel twi' Jesús kyuwxix ex tma:
—Nman, tuj tq'ab'a kxel woqxenane wanmiye, chi Jesús.
Ex tej tb'aj tma'n jlu, kyimtzun.
47Tejtzun tke'yinte capitán tej tb'aj jlu, jaw tnimsa'n tb'i Dios, ex tma:
—Axix tok, ate xjal lu tz'aqlxix.
48Ex tej kyke'yinte kykyaqil xjal jlu, aqeju otoq b'aj kychmon kyib', e ajtz meltz'aj, ok kyq'ajtza'n ttzi kyxu'k tu'n kyb'is. 49Ex kykyaqil qeju ojtzqi'ntoq Jesús kyu'n, kyuk'ix qe xu'j otoq che ok lpe' ti'j Jesús tzajnix tuj Galilea, e kyaj ten najchaq in che ke'yin ti'j tkyaqil jlu.
Tej tku'x maqu'n Jesús
Mateo 27.57-61; Marcos 15.42-47; Juan 19.38-42
50At jun xinaq José tb'i, aj Arimatea; atzun ta' tnam lu tuj tx'otx' Judea; ate xjal lu ajun kyxol Aj Sanjelal kye xjal judiy. B'a'n te xjal lu ex tz'aqlxix. 51Ate José mya mojl tyol kyuk'il Aj Sanjelal ti'j ju b'aj kynak'u'n ti'j ex ti'j ju kyb'incha, porke in ayontoq ti'j tkawb'il Dios. 52Ultzun José tuk'il Pilato, ex xi tqanin t-ximlal Jesús. 53Tku'tzlenxi ti'n twitz crus, okx tb'alq'i'n tuj jun saq xb'alun, ex okx tq'o'n tuj jun pik laku'maj ik tza'n pantyón, na'nxtoq tokx q'o'n jun kyimni tuj jul lu. 54Ex atzun q'ij tu'n tb'ant kyten xjal tu'n kyojlan tuj q'ij te ojlab'l, aju ch'ixtoq t-xe't.
55Ex aqeju xu'j otoq che tzaj tuk'il Jesús tuj Galilea e je'x lpe' ti'j José, ex o kyil aju pantyón ex tza'n tten okx q'o'n t-ximlal Jesús tuj. 56Tejtzun kyul meltz'aj kyja, b'aj kyb'incha'n perjum ex tk'ok'jal t-sem tib'; ex e ojlan tuj q'ij te ojlab'l ik tza'nx in tma'n mandamyent.
Právě zvoleno:
Lucas 23: MAMNO
Zvýraznění
Sdílet
Kopírovat
Chceš mít své zvýrazněné verše uložené na všech zařízeních? Zaregistruj se nebo se přihlas
Mam de Huehuetenango (ortografía reformada): CHIK'B'AB'L TI'J TU'JIL TYOL DIOS TUJ QYOL © Sociedad Bíblica de Guatemala 2011.
