Lucas 10
10
E je'x t-sama'n Jesús 70 t-xnaq'tzb'en
1Tb'ajlenxitzun jlu, e jaw t-sk'o'n Qajaw 72#10.1 in tma'n 72. At junjun ttxuylal yol in kyma'n 70. t-xnaq'tzb'entl, e je'x t-sama'n tu'n kyxi' nej twitz, te kab'chaq kyb'et, e je'x t-sama'n kyuj kykyaqil tnam ex lugar jatum attoq tponel. 2Ex xi tma'n kye:
—Ax tok, nimxix twitz awal at, atzun qe aq'nal mya nim; kyja'tzun, che kub'sane twitz Tajaw awal tu'n kyxi t-sama'n aq'nal tu'n tjaw chmet twitz awal. 3Kyxi'ye; che xel nsama'ne ex ik che okele ik tza'n qe tal ẍne'l kyxol xo'j. 4Mi'n txi kyi'ne ch'u'ẍ, mi pa, mi xjab'; ex mi'n che we'ye tuj b'e tu'n kyq'olb'ene kye xjal. 5Ok kyokxe tuj jun ja, tnejel kyq'onxe jun q'olb'eb'l: Che tenwt xjal tuj tzalajb'il tuj ja lu, che chikuye. 6Qatzun b'a'n kyten xjal tuj ja lu, che teltzun tuj tzalajb'il ik tza'n kxel kyma'ne; qatzun mya b'a'n kyten xjal, mlay tz'ajb'en aju q'olb'eb'l otoq txi kyq'o'ne. 7Ax che tenkje jatum ktzajel q'o'n kyposadiye; kywa'nxe ex kyk'anxe aju ktzajel q'o'n kyeye; porke il ti'j tu'n tchjet twi tk'u'j aq'nal. Mi'n che ik'e jyol kyposadiye tuj juntl ja. 8Ok kypone tuj jun tnam, qa ma che k'monjtze kyu'n xjal, kywa'nxe aju kb'el q'o'n kywitze; 9ex qeju yab' ate' tuj tnam lu che b'anix kyu'ne, ex kymanxe kye xjal: Ma tzul laq'e' tkawb'il Dios kyuk'ile, che chikuye. 10Ex qa at jun tnam ma che pone tuj ex minti' ma che k'monjtze kyu'n xjal, kyexe tuj cay ex kymanxe: 11Axju tpujil kytanmiye, aju ma tz'ok lak'e' ti'j qqane, k'elel qchto'ne te jun yek'b'il kyi'je qa mya b'a'n qeye. Ex tz'elx kynik'e ti'j, aju tkawb'il Dios ma tzul laq'e' kyuk'ile, che chikuye. 12Kxel nma'ne kyeye: Mas nim tcastiw tnam lu kb'el twitz tcastiw tnam Sodoma tuj tq'ijlalil ok tul jwisi.
Qe tnam minti' xi kyniman tyol Jesús
Mateo 11.20-24
13B'ek'b'il kywitze aj Corazín. B'ek'b'il kywitze aj Betsaida. Ex noqwit tuj tnam Tiro ex tuj tnam Sidón o che b'inchanjtz qe b'inchb'en nim kyipumal ik tza'n ma nb'inchaye kyxole, b'i'xwitlo ajtz ti'j kyanmi ojtxi, owtlo tz'ok kyq'o'n kyxb'alun ch'i'x twitz ex owtlo che kub' qe' tuj tza'j, te jun techal qa otoq tz'ajtz ti'j kyanmi. 14Kyja'tzun, tuj tq'ijlalil jwisi mas nim kyeye kycastiw kb'el ik tza'n te tnam Tiro ex tnam Sidón. 15Ex aqeye aj Capernaum, ¿maj che japunele tuj kya'j? Mlay, max che b'elponele tuj kynajb'il kyimni.
16Alkye ma kub' b'inte kyyole, weye nyole in kub' tb'i'n: ex alkye ma tz'el ik'un te kyeye, aqine in chin el tik'un; ex alkye ma tz'el ik'un te weye, nne'l ik'un Dios tu'n, aju tzaj samante weye, chi Jesús kye.
Tej kyul meltz'aj qeju 70 t-xnaq'tzb'en Jesús
17E ultzun meltz'aj qeju 70 t-xnaq'tzb'en Jesús in che tzalaj, ex xi kyma'n te:
—Tat, ikx qe ju'ẍ in qo'x nimane kyu'n noq tu'n tipumal tb'iya.
18Xi tma'n Jesús kye:
—Ax tok ma wile Satanás ma ku'tz tz'aq twitz kya'j ik tza'n tqan q'ankyoq. 19Xi nq'o'ne kyoklene tu'n tkub' kywab'ane qe lob'aj ex qe si'nin ex tu'n tkub' ti'j tkyaqil tipumal aj q'oj kyu'ne. Ex minti' jun tu'n tb'aj kyi'je. 20Ex mi'n che jaw tzalaje tu'nju in che nimanjtze kyu'n ju'ẍ, o'kx che tzalajxe tu'nju tz'ib'an kyb'iye tuj kya'j.
O tzalaj Jesús
Mateo 11.25-27; 13.16-17
21Ax or jaw tzalaj Jesús tu'n Xewb'aj Xjan ex tma:
—Kxel nq'one chjonte teya, Tat, aya Tajaw kya'j ex tx'otx', tu'nju ma kub' tewana tkyaqil jlu kywitz qe xjal at kynab'l ex kywitz qe xjal b'a'nxix kyu'n, ex ma tzaj tyek'una kye qe xjal ch'in kyoklen. Ma tb'inchaya ikju, Tat, tu'nju b'a'n ela tuj twitza, chi Jesús tuj tna'j Dios.
22Ax ikx tma Jesús kye xjal: Tkyaqil ma tzaj q'o'n weye tu'n Nmane. Ex minti' jun xjal ojtzqilte alkye qine, o'kx Nmane ojtzqilte, porke aqine Tk'wa'l; ex minti' jun xjal ojtzqilte alkye Nmane, o'kx aqine ojtzqilte, porke aqine Tk'wa'l; ex alkye jun xjal waje tu'n t-xi nyek'une Nmane te k'eleltzun tnik' xjal ti'j Nmane, porke aqine Tk'wa'l, chi Jesús kye.
23Ajtz meltz'aj twitz Jesús kyuk'il t-xnaq'tzb'en, ex xi tma'n o'kxku kye:
—At tzalajb'il kye xjal in kyke'yin tkyaqilju in kyile; 24ex kxel nma'ne kyeye, nimku t-sanjel Dios ex nimku rey o kyajb'e tu'n kylonte aju in kyile, pero minti' o kyil; ex o kyajb'e tu'n kyb'inte aju in kyb'i'ne, pero minti' o kyb'i, chi Jesús kye t-xnaq'tzb'en.
Jun xjal aj Samaria b'a'n tmod
25Ex at jun chik'b'al ti'j ley ul laq'e' tu'n tok Jesús tuj joyb'il ti'j tu'n, ex xi tma'n te:
—Xnaq'tzal, ¿ti ok nb'incha'ye tu'n tten nchwinqlale te jumajx?
26Xi tma'n Jesús te:
—¿Alkye tz'ib'an tuj ley? ¿Chi tok tu'n ok in jaw t-sch'ina?
27Xi ttzaq'we'n xnaq'tzal ti'j ley:
—Aju tz'ib'an tuj ley in tma'n kyja': Kyk'ujlame Qman Dios tu'n tkyaqil kyanmiye, tu'n tkyaqil kyk'u'je, tu'n tkyaqil kyipumale ex tu'n tkyaqil kynab'le; ex kyk'ujlame qe kyuk'ile ik tza'n kyeye in kyk'ujlan kyib'e, chi tuj Tu'jil.
28Xitzun tma'n Jesús te:
—B'a'n ma tmaya; qa ma tb'inchaya jlu kteltzun tchwinqlala.
29Atzunte xjal o tajb'e tu'n mi'n tkub' tz'aq tyol Jesús tib'aj, xi tma'n te:
—¿Alkyetzun ju wuk'ile?
30Xi ttzaq'we'n Jesús:
—At jun xinaq tzaj tuj tnam Jerusalén, kyja' tku'x tuj b'e tu'n tpon tuj tnam Jericó, ex tzyet kyu'n eleq' tuj b'e, el kyi'n tkyaqilju at te tuk'ix t-xb'alun ex b'aj kyb'ju'n, ex e ik'tzun, kyaj kyq'o'n ch'ixtoq tkyim. 31Ex tk'ulb'aku, ku'x jun pal kye judiy tuj b'e, ex tej tlonte pal ju xjal aju otoq b'aj k'ixb'isa'n, ik'x ttxlaj b'e minti' o we'. 32Ax ikx jun aj Leví, tej tkanun tuj lugar jatum ta' xjal aju otoq b'aj k'ixb'isa'n, noq xi'ku tke'yin, ax ikx ik'x ttxlaj b'e minti' o we'. 33Ex at jun xjal aj Samaria kyja' t-xi' tuj b'e, pon laq'e' jatum ta' xjal aju otoq b'aj k'ixb'isa'n, ex tej tlonte, tzaj q'aq'an tk'u'j ti'j. 34Pontzun laq'e' ttxlaj, b'aj tq'anan tk'ixb'len tu'n aseyt ex vin ex ok tpotzin; ex jax tq'o'n tib'aj tchej, xi ti'n tuj mesón, ex ok tkwentin. 35Ex te juntl q'ij tej tik' ju xjal aj Samaria, jatz ti'n kab'e denari pwaq, xi tq'o'n te tajwil mesón ex kyaj tma'n: Kwentin oka ju xjal lu; noq jte'x kb'ajel tnajsa'na ti'j jaku chjet wu'ne ok wule juntl maj, chi aj Samaria. 36¿Chi tok tu'na? ¿Alkyetzun jun kyxol qeju ox xjal lu ok te tuk'il ju xjal aju tzyet kyu'n eleq' tuj b'e?
37Xitzun tma'n xnaq'tzal ti'j ley:
—Aju tzaj q'aq'an tk'u'j ti'j.
Xitzun tma'n Jesús te:
—Txi'ya ex b'inchama ik tza'n jlu.
Pon Jesús tja Marta ex Mariy
38Kyja' t-xi' Jesús tuj b'e, pon tuj jun tal tnam; ex at jun xu'j Marta tb'i o k'met Jesús tu'n tuj tja. 39Ex attoq jun terman Marta, Mariy tb'i, kub' qe' t-xe tqan Jesús ex ok ten b'ilte tyol. 40Atzunte Marta in b'isun kyi'j qe tichaq in b'ant tu'n, pon laq'e' ttxlaj Jesús, ex xi tma'n te:
—Tat, ¿minti'pe nno'k tq'o'na kwent ti'j wermaniye, ma chin kyaj tq'o'n njunalxe ti'j aq'untl? Q'manxa te tu'n tonin wuk'ile.
41Ex xi ttzaq'we'n Jesús:
—Marta, Marta, nimxix in b'isuna ti'j tkyaqil taq'una ex in b'aj tk'u'ja ti'j. 42Pero noq jun mas ilxix ti'j; ex aju mas b'a'n, atzunju ma jaw t-sk'o'n Mariy, ex mlay tz'el q'i'n te.
Právě zvoleno:
Lucas 10: MAMNO
Zvýraznění
Sdílet
Kopírovat
Chceš mít své zvýrazněné verše uložené na všech zařízeních? Zaregistruj se nebo se přihlas
Mam de Huehuetenango (ortografía reformada): CHIK'B'AB'L TI'J TU'JIL TYOL DIOS TUJ QYOL © Sociedad Bíblica de Guatemala 2011.
