Chɛ̄nɛ̍se̍ē 49
49
Dīōmndā Che̍kɔ̍pū mɛ̍ɛ̍lū īsɔ̄ɔ̍ a̍ pūa̍a̍ ndūa̍a̍ o̍kɔ̄ɔ̄ la̍ŋ
1O̍ ko̍ŋ kɔ̍ɔ̍lī, mi̍ Che̍kɔ̍pū ve̍e̍lū pūa̍a̍ ndūa̍a̍. Mbo̍ dīmūl nda̍ āā, “Pūa̍a̍ nīa̍a̍, lā hu᷄ŋ chu̍ūŋgi̍āŋ kpo̍u̍ mī lā bālu̍ ya̍, mī chɔ̍m nya̍ mɛ̄ɛ̍ nya̍ chō wā o̍ sīɔ̄dīi̍ lāchīo̍o̍ ni᷄ŋ yɛ̍.
2“Nya̍ pūa̍a̍ Che̍kɔ̍pū wa̍ ki̍nɛ̍i̍, lā chūūŋgi̍āŋ na̍a̍ pi᷅lɛ̍, mī lā ya᷄ŋ nīla̍ŋ.
Lā ya᷄ŋ ni᷅la̍ŋ mī lā tūēī nyɛ̄ I̍sɔ̄lūɛ̄ī fi̍nyā nya̍ cho̍ nya̍ dīmūl lo̍.
3“Nūm Lūbɛ᷅ŋ, nu᷄m cho̍ chūā ni̍ tāso̍o̍ ni̍.
Kpāāya̍ nūu̍ ŋ̄ chō ni̍.
Nu᷄m cho̍ wōlɔ̄ɔ̄ ni̍ īlāŋgba̍a̍ ni̍. Pūa̍a̍ nīa̍a̍ tɛ̄ɛ̄ŋ ki̍nɛ̍i̍, nāa̍ nu̍m ā sīmāa̍ nda̍ hi̍o̍ū kpo̍u̍.
Ndu̍yɛ̍, kpāāyā nu̍mndo̍ hi̍o̍ū kpo̍u̍.
4Mɛ̄ɛ̍ pēē mɛ̄ŋmā īhɛ᷄llo̍ chō nu̍a̍ā lɔ̍ɔ̍ o̍ lɔ̍ɔ̍ kpe̍ŋgēla᷄ŋ kpe̍ŋgēla᷄ŋ yɛ̍, le̍nde̍ ŋ̄ chō ni̍.
Kɛ̍ ndu̍yɛ̍, le̍ bɛ̄ɛ̄la̍ ŋ̄ tɛ̄ɛ̄mbu̍u̍ ya̍ fi̍nyā nūm,
mi̍ lā wā nya̍ la̍nɔ̍ hi̍o̍ū ya̍ kɔ̄ɔ̄lī wo̍ yɛ̍,
a̍ ve̍ lɛ̍ ni̍ŋ pɔ̍mbūāā nūmnda̍ kpo̍u̍ la̍chi̍ le̍.
5“Li̍va̍ī nda̍ Si̍mīɔ̄ŋ, pɔ̄mbɔ̄ɔ̍ a̍ bɛ̄ndōo̍
a̍ nɛ̍ī a̍ kpūndɛ̍ mālɔ̄ɔ̄ a̍ mɔ̄ɔ̄ŋ nda᷄ŋ fāŋndo̍ŋ te̍ wa̍.
6Le̍la̍ŋ, I̍ sɔ̍ɔ̍ŋgūū nda̍ chōo̍ o̍ sɔ̄ɔ̍ŋ ndāāŋ sɔ̍ɔ̍ sɔ̍ɔ̍ wo̍ŋ ni᷄ŋ te̍.
Bā nī cho̍ o̍ kɛ̄ɛ̄sīāālā ndāla̍ kɔ̄l vēsɛ̍i̍la̍ŋ ni᷄ŋ te̍.
Tē ā tūūlu̍ kɔ̄l pɛ̍, wāŋndā chīe̍e̍ya̍ nda̍ dīū ni̍.
Le̍ pīsu̍lta̍ŋ nde̍ŋ nāūwa̍ pēlo᷄ŋ yīmīo̍o̍.
7Sēndi̍o̍o̍ chō o̍ kɔ̄l ndā tu̍ūwo̍ chōo̍, kāni̍ fu̍u̍le̍ ō wɔ̄u̍ fāŋgā.
Ndu̍yɛ̍, sēndi̍o̍o̍ chō o̍ yōlɛ̄i̍ ndɛ̄i̍ chōo̍, kāni̍ fu̍u̍le̍, kɔ̄l vēsɛ̍i̍yo̍ chō lēni᷄ŋ.
Le̍la̍ŋ, I̍ cho̍ nda̍ pīɔ̄ū pīɔ̄ū ndi̍a̍ā ndāā pi̍lla̍ tɛ̄ɛ̄ŋ.
I̍ cho̍ nda̍ sɛ̄ŋī wāŋnda̍ I̍sɔ̄lūɛ̄ī tɛ̍ɛ̄ŋ kpo̍u̍.
8“Chu̍dā, pɔ̄mbūāā nūmnda̍ ā yɔ̄ŋgū ni̍ŋ Sa̍ŋgālāa̍ o̍ nūm ndo̍.
Ndu̍yɛ̍, nūm Chu̍dā, ā chō hūnɔ̄ɔ̄ ya̍a̍mɔ̍ɔ̍wa̍a̍ nu̍mnda̍ bo̍lōla̍ŋ sāā mɔ̍ɔ̍su̍.
Pūa̍a̍ fi̍nyā nūmnda̍ ā tūndūŋ ni̍ŋ nu̍m o̍ lābɛ̄ŋgu̍ ni̍ŋ.
9Chu̍dā, ā chō ko̍ mɛ̄ɛ̍ kpɔ̍kūŋ fɔ̍ŋndɔ̍ɔ̍ ō bīī nu̍a̍ā vīsīo̍o̍,
mbō kūɛ̄ a̍ ndu̍ o̍ būūlu̍ ndɔ̄ɔ̍ ni᷄ŋ yɛ̍.
Tē ō dē pɛ̍ mbō hīni̍ pɛ̄ŋgīo̍o̍,
ō nɛ̄ɛ̍nɛ̍ bi̍ī yɛ̍ kɔ̄llo̍ mbō kɔ̍ kpe̍ŋā ndu̍?
10Māsāle̍ŋ le̍ pi̍u̍ū ni̍ŋ o̍ yu̍ŋgu̍ Chu̍dā wo̍ chōo̍ le̍.
Pūlāle̍ ndɔ̄le̍ŋ lē hīāū ni̍ŋ la̍chi̍ a̍ wāa̍ māsāa̍ ha̍a̍a̍
mbō lo̍ o̍ ko̍ŋ mī wāna̍ māsāle̍ le̍ŋ lē chō le̍ ndu̍ wo̍ ō hīŋ,
ō wāŋnda̍ kpo̍u̍ a̍ tu̍ɛ̍ī ni̍ŋ di̍o̍m ndo̍.
11Ō bāā ni̍ŋ sōfɛ̍lɛ̍ ndɔ̄ɔ̍ o̍ yɔ̄m kīle̍pīi̍yo̍.
O̍ lɛ̄ūvīī kūāmɛ̄ī bɛ̄ndūe̍i̍ kpe̍e̍kpe̍i̍ o̍ ba̍ā ni̍ŋ ndu̍ ni̍.
O̍ mūɛ̄īya̍ŋ ni᷄ŋ o̍ tu̍a̍ā ni̍ŋ do᷅māla̍ ndɔ̄la̍ŋ̄ ni̍.
12Hɔ̄lta̍ŋ lā dīūū ni̍ŋ ndu̍ pɛ᷅ŋ a̍ mūɛ̄īya̍ŋ,
mī chīŋndo̍ŋ ŋ̄ dēndū ndu̍ fo̍fo̍ a̍ mɛ̄ɛ̄mā chɔ̄lu̍a̍ŋ.
13“Sɛ̍bu̍lɔ̄ŋ ndu̍ o̍ pēē mɛ̄ŋmā īhɛ᷄llo̍ kɔ̄ŋgɔ̍ o̍ cha᷅l ni̍ŋ ni̍.
Ndu̍ cho̍ sīmnɔ᷄ŋ fo̍ndāŋ dɛ̄ndɛ̄la̍ bɛ̍ndūla̍ŋ ku̍ā o̍ mɛ̄ŋnda̍ŋ chōo̍ la̍ŋ, lā sīm ndo̍ ni̍.
Pɛ̄ŋgu̍la̍ lɛ̄ŋndē ndɔ̄le̍ŋ lā kūā ni̍ŋ a̍ Sa̍i̍dɔ̄ŋ chi̍e̍e̍ di̍.
14“I̍sa̍a̍kā ndu̍ cho̍ māchūāā sōfɛ̍lɛ̍ dīāllūŋ kālāa̍
ō nda̍ pɛ̄mbī a̍ wōlɔ̄ɔ̄la̍ŋ vēllāa̍ vēllē, mbō hīni̍ le̍bɛ̍ŋgu̍ wo̍.
15Tē I̍sa̍a̍kā o̍ sa̍a̍lu̍ŋ pɛ̍ mɛ̄ɛ̍ fo̍ndāŋ o̍ cha̍l lo̍
ō chō fo̍ndāŋ nāŋāā nyɛ̄ yɛ̍,
ō chō bōlle̍ŋ wōū o̍ wōlɔ̄ɔ̄ lūsu̍lɛ̍i̍yo̍ bɛ̄ŋgu̍,
mbō sīmnu᷄ŋ chɛ᷅ wa̍llo̍.
16“Da᷅ŋ wa᷅ ni̍ŋ ma̍sāa̍ wānāā ndūa̍a̍ chōo̍,
māā yu̍ŋgu̍la̍ŋ lā pīlɛ̍ la̍ŋ I̍sɔ̄lūɛ̄ī.
17Da᷅ŋ wa᷅ ni̍ŋ ma̍wa̍ā māā kɛ̄ūwo̍ o̍ nɛ̄īyo̍ da̍ŋga̍la̍.
Mɛ̄ɛ̍ hɔ̄ɔ̄lɔ̍ɔ̍ hīnīŋ nu̍a̍ā o̍ nɛ̄i̍ yōndōo̍ yɛ̍, le̍nde̍ o̍ wa᷅ ni̍ŋ ni̍.
Tē ō lɔ̄wa̍ So̍o̍ tɔ̄ndīī kɔ̄ɔ̄līe̍i̍ pɛ̍ chɔ᷅,
so̍o̍ bɛ̄va̍, wāna̍ wa᷅ kɔ᷅la̍ŋ lēchōo̍ wo̍ de᷄l māchāli̍ ke̍ye᷄ŋ.
18“O̍o̍ Mɛ̄lɛ̄ka̍ Ya̍a̍wɛ̄ɛ̄, I̍ cho̍ chūm mbō lo̍ o̍ ko̍ŋ mā pi̍ŋi̍ ya̍.
19“Vīīyāā ku̍ndāa̍ ā dēl ni̍ŋ Ka̍a̍dī chōo̍.
Kɛ̍ ndu̍yɛ̍, ō chō nda̍ yōmɔ̄ɔ̄, mbō kūɛ̄ a̍ nda̍ tōūwɔ̄ɔ̍ kɛ᷅.
20“Nyɛ̄m dīāŋ kɛ̄ndɔ᷄ŋ ŋ̄ wā ni̍ŋ bɔ̍ɔ̍ o̍ būŋgɛ̄i̍ A̍sīɛ̄ɛ̄ve̍ ni᷄ŋ.
Nyɛ̄m dīāŋ lēmāsa᷄ŋ kpo̍so̍ŋ ŋ̍ wa᷅ ni̍ŋ ndo̍ŋ ni̍.
21“Nāfi̍ta̍lī cho̍ māchūāā māā, kīa̍l wa̍nūŋ ho̍ō yōndōo̍ ni᷄ŋ o̍ bā ndɔ̄ɔ̍ chōo̍
mbō kūām chu̍a̍u̍wāā kɛ̄ndīa̍a̍ wo̍.
22“Chōo̍sɛ̍ chō māchūāā mɛ̄ɛ̍ yɔ̄m nda̍ tūāl o̍ pīo̍o̍ kɔ̄ŋgɔ̍ mbō kūām lɔ᷅pī lɔ᷅pi̍ bɛ̍ndū wo̍ ō chō yɛ̍.
Yɔ̄m wāā le̍ndo̍o̍ ō he᷄l pɛ̍ ō pɛ̄ŋgɛ̍la̍ lɛ̄ūwo̍ŋ, ō yɔ̄ŋgu̍ wūndu̍a̍ŋ o̍ kpākīo̍o̍ chōo̍.
23Mi̍ ya̍a̍mɔ̍ɔ̍wa̍ ā dēl Chōo̍sɛ̍ chōo̍, a̍ chīɔ̄ūlā ndāla̍ŋ.
Ā vɛ̄ ndu̍ le̍ mā yɔ̄ŋu̍l ndu̍.
24Kɛ̍ ndu̍yɛ̍, tɛ̄ndɛ̄lāa̍ pi̍la̍ o̍ tɛ̍ndɛ̄lā a̍ chīɔ̄ū ndɔ̄ɔ̍ ni̍.
Bālā ndɔ̄la̍ŋ lā sɔ̄la̍ kpāāyāa̍.
Mɛ̄lɛ̄ka̍ nɔ̍ kpāāyāa̍ wo̍, ō Che̍kɔ̍pū pi̍ɛ̍ī yo̍, ndu̍ ke᷅ ndu̍ dīāllūŋ kāla᷄ŋ ni̍.
Wānā ma̍ndāā lāsāa̍, wāna̍ ma̍ndā I̍sɔ̄lūɛ̄ī yo̍, ndu̍ lu̍e̍i̍ ndu̍ kpāāyāa̍ ni̍.
25Mɛ̄lɛ̄ka̍ ō fi̍nyā nūm pi̍ɛ̍īyo̍ chō nu̍m mālā Chōo̍sɛ̍.
Mɛ̄lɛ̄ka̍ kpu̍lu̍ŋgūma̍ bɛ̄ndōo̍, ndu̍ ke᷅ nu̍m pīɔ̍ɔ̍ fūlāa̍ chōo̍ cho̍o̍
mbō ke̍ nu̍m mɛ̄ŋma̍ cha᷅ŋ lɛ᷅ŋ di̍ di̍ wa̍ŋ ni̍.
Ō chō nu̍m chɔ̄lūa̍a̍ kē, o̍ ko̍ŋ kɔ̍ɔ̍lī,
mbō ke̍ nu̍m chūāūwa̍ cha̍po̍o̍li̍.
26Sa̍lālā fi̍nyā nūm du̍a̍ū nu̍m nda̍ŋ lā hīōū
a̍ nyɛ̄m kɛ̄ndɛ᷄ŋ fu̍lā o̍ pēmbūŋ māsīndɛ̄ si̍ndɔ᷄ŋ ndo̍ŋ po̍lo̍ŋ.
Lā hīōū nyɛ̄m kɛ̄ndɛ᷄ŋ fu̍lā o̍ pēmbūŋ fɛ̍ɛ̍ŋ fɛ̍ɛ̍ŋndo̍ŋ chōo̍ wo̍ŋ.
Mbɔ̄ nūm nda̍ fāŋa̍ ho̍ō bɛ̄ndāā nūmnda̍ tɛ̄ɛ̄ŋ ndo̍, sa̍lāla̍ŋ nda᷅ŋ kpo̍u̍ lā wa̍ nu̍m chōo̍ fɔ̍.
27“Bɛ̍ŋnja̍mīŋ cho̍ māchūāā mɛ̄ɛ̍ vīsī bīyāa̍ chō yɛ̍,
ō bīī i̍pa̍la̍, ō bīī i̍chɔ̍l, ō dīī pɛ̍ ō dē.”
28Wānāā yu̍ŋgu̍la̍ tɔ̍ a̍ lā tīɔ̍ɔ̍ŋ nda̍ŋ I̍sɔ̄lūɛ̄ī, a̍ fu̍la̍ o̍ nda̍ ni᷄ŋ nda̍ cho̍ ka̍ŋ ni̍. Ndu̍yɛ̍, sɔ̄ɔ̍ŋ Che̍kɔ̍pū fi̍nyā ndā o̍ di̍mi̍ o̍ nda̍ sa̍lāa̍ dɔ̄wɔ̄ɔ̍ ni᷄ŋ ndo̍ŋ mu̍ŋ cho̍ mu̍ŋ ni̍. Mbo̍ chōŋgu᷄ŋ nda̍ ā pīlɛ̍ŋ pi̍lɛ̍ŋ mɛ̄ɛ̍ nda̍ bɛ̄nda̍ le̍ sɔ̄lāa̍ yɛ̍.
A̍ pīɔ̍m Che̍kɔ̍pū wo̍ o̍kɔ̄ɔ̄
29-30O̍ ko̍ŋ kɔ̍ɔ̍lī, mi̍ Che̍kɔ̍pū di̍mūl pūa̍a̍ ndūa̍a̍ āā, “Te̍le̍ŋ ni̍ pīɔ̍mndo̍ ō fūūlu̍u̍ le̍ mī ku̍ɛ̍ŋnu᷄ŋ nāa̍ wānāā nīa̍a̍ chūā. Tē I̍ vi᷅ pɛ̍, lā kɔ̍ a̍ ya̍ mī lā kɔ̍ chɔ᷅ ya̍ wānāā nīa̍a̍ īkɛ̄i̍ o̍ lɛ̄ŋndē Ke̍nāŋnde̍ŋ o̍ būūlōo̍ le̍ hūnɔ̄ɔ̍ Māchīpɛ̍lā, kūmbū Ma̍mi̍lūē wo̍. E̍fu̍lɔ̄ŋ, po̍ Hāta̍i̍tīi̍nɔ̍ɔ̍, ndu̍ E̍bīlāha᷅m pe̍ndū sīndɛ̄ būūlū ko̍ŋ o̍ bā, a̍ lɛ̄ŋndē būūlū ko̍ŋ chō ni᷄ŋ nde̍ŋ ni̍, le̍ wāŋnda̍ chɔ̄ɔ̍ lēni᷄ŋ. 31O̍ būūlū ko̍ŋ ni᷄ŋ ko̍ni̍ nda̍ chɔ̍ ndu̍ E̍bīlāha᷅m nda̍ Se̍lūā la̍a̍ ndɔ̄ ni̍. Lo̍ŋ ko̍ni̍ nda̍ chɔ̍ vɛ̄lɛ̄ Āa̍se̍ nda̍ Lūībɛ̍kā a̍a̍ ndɔ̄ ni̍. Lo̍ŋ ya̍ I̍ chɔ̍ Li̍yā la̍a̍ nī ni̍. 32Lɛ̄ŋndē būūlōo̍ chō ni᷄ŋ nde̍ŋ ni̍, būūlū ka̍lāa̍ ni̍, Hi̍ta̍i̍tīi̍ya̍ o̍ bā E̍bīlāha᷅m pe̍ndū ni̍. Lo̍ŋ nya̍ chɔ̍ ya̍ ni̍.” 33Mɛ̄ɛ̍ Che̍kɔ̍pū chi̍i̍ pūa̍a̍ ndūa̍a̍ chōŋgɔ᷄ŋnda̍ŋ, mbo̍ mīīŋgū lāhīni̍ o̍ kpēlē. Mbo̍ mālnu᷄ŋ kɔ̍l.
Právě zvoleno:
Chɛ̄nɛ̍se̍ē 49: YM
Zvýraznění
Sdílet
Kopírovat
Chceš mít své zvýrazněné verše uložené na všech zařízeních? Zaregistruj se nebo se přihlas
Kisi Bible © Bible Society in Liberia, 2015.