Chɛ̄nɛ̍se̍ē 46
46
Che̍kɔ̍pū ku̍ɛ̄ I̍chi̍pī nda̍ yu̍ŋgu̍ ndɔ̄ɔ̍
1O̍ ko̍ŋ kɔ̍ɔ̍lī, mi̍ Che̍kɔ̍pū do̍vī wōlɔ̄ɔ̄ o̍ wōlɔ̄ɔ̄ o̍ nɔ̍ ma̍ kūā Bīɛ̄ɛ̄si̍ɛ̍bā. Mɛ̄ɛ̍ nda̍ fūūlu̍u̍ Bīāsi̍ɛ̍bā, mbo̍ sōlī sa̍lāla̍ŋ o̍ Mɛ̄lɛ̄ka̍ lo̍, ō Āa̍se̍ fi̍nyā ndɔ̄ ndu̍ o̍o̍ pi̍ɛ̍ī yo̍. 2Īchɔ̄l kōŋ, mi̍ Mɛ̄lɛ̄ka̍ sūāā nāa̍ Che̍kɔ̍pū chu̍a̍ o̍ yi̍lāŋndo̍ ni᷄ŋ. Mi̍ Mɛ̄lɛ̄ka̍ vēēlū ndu̍ āā, “Che̍kɔ̍pū, Che̍kɔ̍pū.”
Mi̍ Che̍kɔ̍pū chɛ᷅l āā, “Ēe̍.”
3Mi̍ Mɛ̄lɛ̄ka̍ dīmūl ndu̍ āā, “Ya̍ cho̍ Mɛ̄lɛ̄ka̍ ni̍, Mɛ̄lɛ̄ka̍ fi̍nyā nūm ndu̍ o̍o̍ pi̍ɛ̍ī yo̍. Yɔ᷅ŋ īsīōōŋ le̍ kɔ̄la̍ŋ I̍chi̍pī le̍. I̍ cho̍ tōsā mī chūāūwāā nūm a̍ ma̍māa̍ ā sīmnu᷄ŋ ka̍a̍le̍ bɛ̍ndū. 4I̍ cho̍ lākɔ̄ a̍ nūm I̍chi̍pī, ndu̍yɛ̍, I̍ cho̍ vɛ̄lɛ̄ mīīŋgū a̍ chūāūwāā nūmnda̍ na̍nu᷄ŋ. Ndu̍yɛ̍ Chōo̍sɛ̍ cho̍ nu̍m kūmbɔ̄ɔ̄ ni̍.”
5O̍ ko̍ŋ kɔ̍ɔ̍lī, mi̍ Che̍kɔ̍pū ma᷅l Bīɛ̄ɛ̄si̍ɛ̍bā. Mi̍ pūa̍a̍ ndūa̍a̍ wōū ndu̍ o̍ nyɛ̄lā nyāāna᷄ŋnda̍ māsā bɛ̍ndōo̍ I̍chi̍pī yɔ̍ŋ le̍ kɔ̄la̍ŋ a̍ ndu̍ la̍ŋ ni᷄ŋ. Ma̍ wōū chūāūwāā ndāā pɔ̍mbūa̍a̍ lēni᷄ŋ, a̍ lāāndāā ndāa̍. 6Ma̍ chūā chɔ̄lūāā ndāa̍ a̍ nyɛ̄m ndāa̍ŋ nda̍ sɔ̄la̍ o̍ lɛ̄ŋndē Ke̍nāŋnde̍ŋ ni᷄ŋ ndo̍ŋ, ma̍ kūā lɛ̄ŋndē I̍chi̍pīle̍ŋ. Mi̍ Che̍kɔ̍pū ku̍ā a̍ yu̍ŋgu̍ ndɔ̄ɔ̍ kpo̍u̍ I̍chi̍pī. 7Pūa̍a̍ ndūa̍a̍ ni̍, a̍ chūāūwāā ndūāā la̍a̍ndūa̍a̍, a̍ chūāūwāā ndūāā ma̍māa̍ kpo̍u̍. Nda̍ kpo̍u̍ mbo̍ kūā a̍ nda̍ I̍chi̍pī.
8Pūa̍a̍ Che̍kɔ̍pū wa̍ a̍ chūāūwāā ndūāā ma̍māa̍ a̍ ku̍ɛ̄ I̍chi̍pī wa̍ cho̍ ha̍ā ni̍. Po̍ ndɔ̍ tāso̍o̍ Lūbɛ᷅ŋ, 9a̍ pūa̍a̍ ndūa̍a̍ Ha̍nɔ̍chī, a̍ Pa̍lu̍, a̍ Hɛ̍si̍lɔ̄ŋ, a̍ Ka̍a̍mī. 10Si̍mīɔ̄ŋ a̍ pūa̍a̍ ndūa̍a̍. Chɛ̄mu̍ɛ̄l, a̍ Cha̍mīŋ, a̍ Ōha̍dī, a̍ Cha̍chīŋ, a̍ So̍hāā, a̍ Si̍a̍yūl, ō Si̍mīɔ̄ŋ ve̍lū nda̍ chūā Ke̍na̍na̍i̍tīi̍nɔ̍ɔ̍ wo̍. 11Li̍va̍ī a̍ pūa̍a̍ ndūa̍a̍. Kāāsi̍ɔ̄ŋ, a̍ Ko̍ha̍tī, a̍ Mɛ̄lu̍a̍lūī. 12Chu̍dā a̍ pūa̍a̍ ndūa̍a̍. Si̍ɛ̍lā, a̍ Pɛ̍lu̍ɛ̍sī, a̍ Sɛ̍lūā. (Chu̍dā ndu̍ o̍o̍ nɔ̍ pūa̍a̍ ŋi̍ɔ̍ɔ̍ŋāā chēle̍ŋ, Ɛ̍ɛ̄ nda̍ O̍nāŋ, kɛ̍ nda̍ nda̍ ma̍ wū Ke̍nāŋ.) Pɛ̍lu̍ɛ̍sī ndu̍ pūa̍a̍ ndūa̍a̍ cho̍ Hɛ̍si̍lɔ̄ŋ ni̍ a̍ Ha̍mūl. 13I̍sa̍a̍kā a̍ pūa̍a̍ ndūa̍a̍. To̍lā, a̍ Pu̍a̍ā, a̍ Chāsi̍u̍bī, a̍ Si̍mi̍lɔ̄ŋ. 14Sɛ̍bu̍lɔ̄ŋ a̍ pūa̍a̍ ndūa̍a̍. Sɛ̍lu̍ɛ̍dī, a̍ Ɛ̍lɔ̄ŋ, a̍ Cha̍a̍līī. 15Pūa̍a̍ Li̍yā nda̍ Che̍kɔ̍pū a̍ ve̍lū o̍ būŋgɛ̄ī Mɛ̄sōpōte̍e̍mīāāve̍ ni᷄ŋ nda̍ cho̍ ka̍ŋ ni̍. O̍ nda̍ kɔ̍ɔ̍lī, ma̍ vīālū wānā la̍nɔ̍ɔ̍ dīōla̍ŋ āā, Da̍i̍nā. Mɛ̄ɛ̍ fa̍ū fa̍ū chūāūwāā nda̍ vēlū nda̍ Li̍yā wa̍ a̍ chūāūwāā māmāa̍ kpo̍u̍ ā chō ŋ̄wāŋ be̍le̍-ya̍a̍ a̍ wānāā yāa̍.
16Ka̍a̍dī a̍ chūāūwāā ndūa̍a̍, Sɛ̍fɔ̄ŋ, a̍ Hāki̍kī, a̍ Si̍u̍nī, a̍ Ɛ̍si̍bɔ̄ŋ, a̍ E̍lūī, a̍ A̍lɔ̍dī, a̍ A̍lu̍ɛ̍lī. 17A̍sīɛ̄ɛ̄ a̍ pūa̍a̍ ndūa̍a̍. I̍mi̍nā, a̍ I̍si̍vāā, a̍ I̍si̍vī, a̍ Bɛ̄lu̍i̍yā, a̍ Se̍lūā ye̍mā nda̍. Bɛ̄lu̍a̍yā ndu̍ pūa̍a̍ ndūa̍a̍ wa̍ Hɛ̍bā nda̍ Ma̍li̍kīɛ̄l ni̍. 18Ŋ̄wāŋ tɔ̍ a̍ wānāā ŋɔ᷄mpu᷅mndā ha̍ā Che̍kɔ̍pū ve̍lū nda̍ Si̍li̍pāā ni̍, chūāāmbɔ̄ chɛ̄ Le̍bāŋ ndu̍ o̍o̍ ke̍ Li̍yā chu̍a̍ ndɔ̄ wo̍.
19Mi̍ Che̍kɔ̍pū vi̍a̍lū pūa̍a̍ ā ŋīɔ̍ɔ̍ŋ nda̍ Lu̍e̍chɛ̄l la̍a̍ndɔ̄. Chōo̍sɛ̍ nda̍ Bɛ̍ŋnja̍mīŋ. 20Mi̍ Chōo̍sɛ̍ vi̍a̍lū pūa̍a̍ ā ŋīɔ̍ɔ̍ŋ I̍chi̍pī nda̍ A̍si̍na̍tī, chu̍a̍ Pɔ̄tīfɛ̍lūā wo̍, ō wa̍ wānā so̍līāā lāsa̍lāa̍ Hɛ̍līo̍o̍po̍līī chi̍e̍e̍ wo̍. Dīōlā pūa̍a̍ ka̍ŋ la̍ cho̍ la᷅ŋ ni̍, Mānāa̍sē nda̍ E̍fi̍lūēm. 21Bɛ̍ŋnja̍mīŋ ndu̍ pūa̍a̍ ndūa̍a̍ cho̍ ha̍ā ni̍. Bɛ̍lā, a̍ Bɛ̍chā, a̍ A̍si̍bɛ̄ɛ̄l, a̍ Kɛ̍lūā, a̍ Na̍a̍māŋ, a̍ Ɛ̍hī, a̍ Lɔ̍sī, Mu̍pīm, a̍ Hu̍pīm, a̍ A̍a̍dī. 22Ŋ̄wāŋ tɔ̍ a̍ wānāā hīɔ̍ɔ̍lu̍a̍a̍ ha̍ā fu̍la̍ o̍ pūlāle̍ Che̍kɔ̍pūle̍ŋ chōo̍ nda̍ Lu̍e̍chɛ̄l ni̍.
23Da᷅ŋ, nda̍ po᷄ ndɔ̄ɔ̍ Hu̍sīm. 24Nāfi̍ta̍lī a̍ pūa̍a̍ ndūa̍a̍. Cha̍a̍sīī, a̍ Ku̍nī, a̍ Chɛ̍sā, a̍ Si̍i̍lɛ̄m. 25Wānāā ŋɔ̍mmɛ̍ūwāā kāŋ nda̍ fu̍la̍ o̍ pūlāle̍ Che̍kɔ̍pūle̍ŋ chōo̍ nda̍ Bi̍li̍hāā ni̍, chūāāmbɔ̄ chɛ̄ Le̍bāŋ ndu̍ o̍o̍ ke̍ Lu̍e̍chɛ̄l chu̍a̍ ndɔ̄ wo̍.
26Mɛ̄ɛ̍ fa̍ū fa̍ū, wānāa̍ fu̍la̍ o̍ pūlāle̍ Che̍kɔ̍pūle̍ŋ chōo̍ ma̍ hūŋ I̍chi̍pī wa̍, ā wa̍ ŋ̄wāŋ be̍le̍-ŋɔ̍mpu᷅m a̍ wānāā ŋɔ᷄mpu᷅m. Lāāndāā pūa̍a̍ ndūa̍a̍ cho̍ le̍ cho̍o̍ le̍. 27Tē pūa̍a̍ ŋi̍ɔ̍ɔ̍ŋāā Chōo̍sɛ̍ ve̍lū I̍chi̍pī wa̍ ā de᷄l lēchōo̍ pɛ̍, mɛ̄ɛ̍ yu̍ŋgu̍ Che̍kɔ̍pūwo̍ a̍ wa̍ I̍chi̍pī o̍ hūnɔ̄ɔ̄ ndāa̍ wo̍, ā wa̍ be̍le̍-ŋɔ̍mmɛ̍ū.
Che̍kɔ̍pū nda̍ yu̍ŋgu̍ ndɔ̄ɔ̍ ā fūūlu̍u̍ I̍chi̍pī
28O̍ ko̍ŋ kɔ̍ɔ̍lī, mi̍ Che̍kɔ̍pū vi̍ām Chu̍dā lāchī le̍ mī Chōo̍sɛ̍ ndu̍ o̍o̍ hi᷅ŋ nda̍ lāchī o̍ būŋgɛ̄ī Ku̍u̍sīɛ̄ŋnde̍ ni᷄ŋ. Mɛ̄ɛ̍ nda̍ fūūlu̍u̍ o̍ būŋgɛ̄ī Ku̍u̍sīɛ̄ŋnde̍ ni᷄ŋ, 29mi̍ Chōo̍sɛ̍ bɛ̍ɛ̍ndīāā nyɛ̄ ndɔ̄ nya̍a̍na᷄ŋndo̍, mbo̍ kūā fi̍nyā ndɔ̍ bɔ̄ŋā o̍ būŋgɛ̄ī Ku̍u̍sīɛ̄ŋnde̍ ni᷄ŋ. Mɛ̄ɛ̍ Chōo̍sɛ̍ chē fi̍nyā ndɔ̍, mbo̍ kūā, mbo̍ kɔ̍ kɔ̍ma᷄ŋ ndu̍. Le̍ te̍le̍ŋ vi̍lɛ̄ī Chōo̍sɛ̍ wa̍ cha᷄ŋndo̍, ō kɔ̄ma᷄ŋ fi̍nyā ndɔ̍ le̍nde̍. 30O̍ ko̍ŋ kɔ̍ɔ̍lī, mi̍ Che̍kɔ̍pū di̍mūl Chōo̍sɛ̍ po̍ ndɔ̄ āā, “Mɛ̄ɛ̍ ya̍ I̍ che᷅ ni᷅ŋ nu̍m nu̍a̍ā, mi̍ si̍nā māā ā chō yōōmū yɛ̍, I̍ cho̍ ni᷅ŋ ō bɛ̄ɛ̄ndīa̍ŋ le̍ mī vi᷅.”
31Mi̍ Chōo̍sɛ̍ lo᷅ o̍ ko̍ŋ mbo̍ dīmūl bɛ̄ndāā ndūa̍a̍ a̍ yu̍ŋgu̍ fi̍nyā ndɔ̄ hi᷅ŋ ndo̍ kpo̍u̍ āā, “I̍ ku̍ā wɔ̍ mī kɔ̍ do̍o̍nu᷄ŋ māsā bɛ̍ndōo̍ ko̍na̍ māā bɛ̄ndāā nīa̍a̍ a̍ yu̍ŋgu̍ fi̍nyā nūu̍ fa̍ū, a̍ wa̍ lɛ̄ŋndē Ke̍nāŋnde̍ŋ nda̍ ā hīŋ ya̍ o̍ bɛ̄ŋgu̍ chōo̍. 32I̍ cho̍ lākɔ̄ ndu̍ dīmūl māā wa̍li̍ ma̍ndāā lāchɔ̄lōo̍ nya̍ tōsā ni̍. Wānāā māndāā lāsāa̍ nya̍ chō ni̍. I̍ cho̍ ndu̍ dīmūl māā lā hīŋ a̍ sāa̍ nyāa̍, a̍ nāūwāā nyāa̍, a̍ nyɛ̄ o̍ nyɛ̄ nya̍ nɔ̄. 33Le̍la̍ŋ, tē māsā bɛ̍ndōo̍ ō vēēlu̍ nya̍ pɛ̍ mbō nyūna̍ nya̍ le̍ wa̍li̍ nya̍ tōsā wo̍, 34lā dīmu̍l ndu̍ āā, ‘Chɔ̄lūa̍a̍ na̍a̍ ŋ̄ māndā kāni̍ bɛ̍ɛ̍ ni̍.’ Māā ‘Fi̍nyāā nāā ma̍māa̍ bɛ̍ɛ̍ chɔ̄lūa̍a̍ nda̍ a̍a̍ ma̍ndā ni̍.’ Tē lā dīmi̍ le̍nde̍ pɛ̍, ko̍ŋ to̍sā mbō ke̍ nya̍ būŋgɛ̄ī Ku̍u̍sīɛ̄ŋnde̍, mī lā cha᷄l lo̍ŋ. Kāni̍ fu̍u̍le̍, I̍chi̍pīa̍a̍ ā chɛ᷅l mā wa̍ nāa̍ pi᷅lɛ̍ nda̍ wānāa̍ ma̍ndā lāsa̍a̍ wa̍ le̍.”
Právě zvoleno:
Chɛ̄nɛ̍se̍ē 46: YM
Zvýraznění
Sdílet
Kopírovat
Chceš mít své zvýrazněné verše uložené na všech zařízeních? Zaregistruj se nebo se přihlas
Kisi Bible © Bible Society in Liberia, 2015.