Chɛ̄nɛ̍se̍ē 44
44
A̍ lō tāāla̍ wānā bɛ̍ndōo̍ ō lo᷄ wo̍ o̍kɔ̄ɔ̄
1Mɛ̄ɛ̍ Chōo̍sɛ̍ bɛ̄ndāā ndūa̍a̍ ā bɛ̄ɛ̄ndi̍a̍ŋ le̍ kɔ̄la̍ŋ, mi̍ Chōo̍sɛ̍ dīmūl bu̍ɛ̍i̍ ndɔ̍ wa̍ chīɛ̄ī ndɔ̄ɔ̍ chīla̍ŋ ndo̍ āā, “Do̍u̍lu̍l wāŋnda̍ ha̍ā nyɛ̄ dīa̍a̍ o̍ bɔ̄lɔ̄la̍ ndāla̍ŋ ni᷄ŋ mā pe̍i̍ cha̍ cha̍, mɛ̄ɛ̍ kpɛ̍ nda̍ nɔ̄lā mā chu̍a̍ yɛ̍. A̍ do̍vi̍ pɛ̍, a̍ chu̍a̍ nyɛ̄ sɔ̄lāā nda̍ hīŋ ndo̍, a̍ mi̍ŋgi̍ wōū o̍ bɔ̄lɔ̄la̍ ndāla̍ŋ ni᷄ŋ kpɛ̍ kpɛ̍. 2O̍ ko̍ŋ kɔ̍ɔ̍lī, mā chu̍a̍ tāāla̍ ni̍ ka̍ni̍i̍ hu̍mbōo̍ mā wo̍u̍ o̍ bɔ̄lɔ̍ pɔ̄mbɔ̄ ndā lu᷅mndo̍ ni᷄ŋ. Ndu̍ bɛ̍ɛ̍, mā mi̍ŋgi̍ ka̍ni̍ŋ o̍ hi᷅ŋ nyɛ̄ dīa̍a̍ pīōndɔ̄ɔ̍ wo̍ŋ o̍ bɔ̄lɔ̍ ndɔ̄ɔ̍ ni᷄ŋ.” O̍ ko̍ŋ kɔ̍ɔ̍lī, mi̍ lāŋu̍nɔ̄ bu̍ɛ̍īyo̍ tōsā mɛ̄ɛ̍ Chōo̍sɛ̍ dīmu̍l ndu̍ yɛ̍. 3Mɛ̄ɛ̍ pāa̍le̍ŋ lē sɛ̄ īdīi̍yo̍ pu̍u̍ŋ, mā chūā nyɛ̄ ndā di̍a̍a̍ ma̍ hēēlū sōfɛ̍li̍a̍a̍ o̍ lākɔ̄ɔ̄ ma̍ cha᷄ŋ mi̍i̍ŋgōo̍. 4-5Mɛ̄ɛ̍ nda̍ ma᷄l dɔ̍ɔ̍ chi̍o̍o̍ ma̍ kūā ti᷄ŋ si̍ī, mi̍ Chōo̍sɛ̍ dīmūl dɔ̍ɔ̍ bu̍ɛ̍ī ndɔ̄ ko̍ŋ āā, “To̍l wa̍nāā kāŋ kɔ̄ɔ̄lī chɔ̍ chɔ̍. Tē a̍ be̍nda̍l nda̍ pɛ̍, a̍ nyu̍na̍ nda̍ āā vɛ̄ɛ̄, ‘Tē wāŋndo̍ tōsa̍l nya̍ dɛ̍nɛ̍ kɛ̍ndɔ̄ɔ̍ pɛ̍ lā mīī wānā ko̍ŋ ī wɔ̄ɔ̍ŋnde̍ tōsa᷄l?’ Nyu̍na̍ nda̍ āā, ‘Tāāla̍ ka̍ni̍i̍ hu̍mbū māsānɔ̍ nūu̍ kōl le̍ni̍ŋ, ndu̍yɛ̍ mbō mālā vɛ̍lɛ̄ ndu̍ le̍ sɔ̄ɔ̍ŋ wa᷅ hu̍nɔ̄ɔ̄ yɔ̄nɔ᷄ŋndo̍ wo̍ŋ sīnāa̍ wo̍, lā vɛ᷅ mi̍ lā chīīmbūū tāālā ko̍ŋ?’ Di̍mu̍l nda̍ māā sūɛ̍i̍ wɔ̍ɔ̍ŋīī bɛ̄ndūe̍i̍ nda̍ tōsa̍ ke̍ŋ ni̍.”
6Mɛ̄ɛ̍ o̍ be̍nda̍l nda̍, mbō tōmbōlā nu̍a̍ā kpo̍lo̍to̍to̍ mɛ̄ɛ̍ māsānɔ̍ ndɔ̄ɔ̍ dīmu̍l ndu̍ yɛ̍. 7Ma̍ lō o̍ ko̍ŋ ma̍ dīmūl ndu̍ āā, “Kpo̍o̍ fāllo̍, ō yɛ̄ɛ̍nɛ̍ ŋ̄ chō yɛ̄ ho̍ō na̍a̍ dīmūllo̍? Ŋ̄ cho̍ wa̍nāa̍ to̍sa̍ sūɛ̍i̍ wa̍ā le̍nde̍ kpo̍so̍ŋ te̍ na̍a̍ ŋ̄ chō le̍. 8Ŋ̄ nɔ̄la̍ wɔ̄ nyɛ̄ sɔ̄lāā na̍a̍ ŋ̄ sāālu̍ŋ o̍ bɔ̄lɔ̄la̍ nāāla̍ŋ ni᷄ŋ ndo̍, mi̍ ŋ̄ cha᷄ŋ a̍ ndu̍ o̍ lɛ̄ŋndē Ke̍nāŋnde̍ŋ ni᷄ŋ pɔ̍, mi̍ ŋ̄ hu᷄ŋ ke᷅ nu̍m. Ɔ̍ɔ̄ le̍ sa̍bū na̍a̍ ŋ̄ chīīmbūū ka̍ni̍i̍ hu̍mbūe̍i̍ kɛ̄lɛ̄ŋgāā ko̍o̍līi̍ye̍ o̍ māsānɔ̄ nu̍mndo̍ lo̍ chi̍ɛ̍ī ni̍ŋ ndo̍? 9Na̍a̍ ki̍nɛ̍i̍, wānā o̍ wānā ŋ̄ sāālu̍ŋ ta̍a̍lā ko̍ŋ o̍ bā pɛ̍, lā dīi̍ wa̍nā ko̍ŋ, o̍ ko̍ŋ kɔ̍ɔ̍lī, na̍a̍ tūa̍a̍ kpo̍u̍ mī ŋ̄ sīmnu᷄ŋ chi̍a̍ā māsānɔ̍ nu̍mndo̍.”
10Mi̍ fi̍nyāa̍ dīmī āā, “Mɛ̄ɛ̍ nya̍ dīmi̍ yɛ̍, le̍nde̍ i̍ cho̍ wa̍ ni̍. Wānā o̍ wāna̍ ya̍ I̍ sa̍a̍lu̍ŋ a̍ ndu̍ pɛ̍, wānā ko̍ŋ ndu̍ si̍mnu᷄ŋ chɛ᷅ nī, ā tūa̍a̍ nda̍, mī ma̍l nda̍ sūɛ̍i̍ ve᷅ nda̍ le̍.” 11Mɛ̄ɛ̍ nda̍ chō fa̍ū mā tūsī bɔ̄lɔ̄la̍ ndāla̍ŋ lɛ̄ŋ, ma̍ kūūmbūū. 12Mi̍ fi̍nyāa̍ kāndū nūūvīa̍a̍ o̍ bɔ̄lɔ̄la̍ ndāla̍ŋ ni᷄ŋ. Kāndɔ̄ɔ̍ a̍ bɛ̄ ndā bɛ̍ndōo̍ mbo̍ mɛ̄ɛ̄lū a̍ lūm ndāa̍. Mbo̍ sāālu᷄ŋ ta̍a̍lāa̍ o̍ bɔ̄lɔ̍ Bɛ̍ŋnja̍mīŋndo̍ ni᷄ŋ. 13Mɛ̄ɛ̍ nda̍ sāālu̍ŋ ta̍a̍lāa̍ ho̍ō o̍ bɔ̄lɔ̍ pɔ̄mbɔ̄ ndāa̍ ni᷄ŋ nda̍ pi̍la̍, ma̍ tāmbū kɔ̄l a̍ nyɛ̍ yɔ̍nu̍ŋ ndo̍, ma̍ sɛ̄ɛ̄sīa̍ŋ nyɛ᷅la̍ŋ lēkɔ̄ɔ̍. Nda̍ fa̍ū ma̍ mīŋgī wōlɔ̄ɔ̄lā ndāla̍ŋ dōvī sōfɛ̍li̍a̍a̍ o̍ lākɔ̄ɔ̄, ma̍ mīīŋgū chi̍e̍e̍ kpɔ̍lɔ̍ kpɔ̄lɔ̄ nda̍ nda̍ā.
14Mi̍ Chu̍dā nda̍ pɔ̄mbūāā ndūa̍a̍ ā kūa̍ o̍ chīɛ̍i̍ Chōo̍si̍ɔ̍ɔ̍, ndu̍yɛ̍ Chōo̍sɛ̍ wa̍ wɔ̄ lo̍ŋ. Mɛ̄ɛ̍ nda̍ hīŋ, ma̍ dēlī lɛ̄ŋ Chōo̍sɛ̍ o̍ lābɛ̄ŋgu̍ ni̍ŋ. 15Mi̍ Chōo̍sɛ̍ nyu̍nā nda̍ āā, “Lā vɛ᷅ tōsāa̍ nu̍a̍ā? Lā si̍nā nu̍a̍ā māā le̍ wāŋndo̍ wāa̍ o̍ fo̍ndāŋ ya̍ I̍ cho̍ ho̍ō wo̍, māā wānā wa̍ā le̍nde̍ ō nɔ̄ nɛ̄īla̍ o̍ cha᷅ sɔ̍ɔ̍ŋ wa᷅ hu̍nɔ̄ɔ̄ yɔ̄nɔ᷄ŋndo̍ wo̍ŋ te̍?”
16Mi̍ Chu̍dā di̍mī āā, “Mī vɛ̄ɛ̄ kpe̍e̍kpe̍i̍ na̍a̍ ŋ̄ dīmu̍l lɛ̍ nu̍m o̍ he̍ī ni᷄ŋ, Māsānɔ̄ɔ̍? Le̍ nyɛ̄ na̍a̍ dīmūl nu̍m kpe̍e̍kpe̍i̍ yo̍ ō cho̍ le̍. Nɛ̄ī o̍ nɛ̄i̍ na̍a̍ ŋ̄ kɔ̄ɔ̄sā mī ŋ̄ fūla̍ o̍ sūɛ̍i̍ he̍ī ni᷄ŋ ō cho̍ le̍. Mɛ̄lɛ̄ka̍ pi̍la̍ chi̍i̍ na̍a̍ chɔ̄ɔ̄mūū. Le̍la̍ŋ, na̍a̍ ni̍, wāna̍ nda̍ bīī a̍ tāālāa̍ wo̍ ni̍, ŋ̄ wā chi̍a̍ā nūmnda̍.”
17Kɛ̍ mi̍ Chōo̍sɛ̍ di̍mī āā, “Sāko̍. Ya̍ I̍ to̍sā i̍ wa̍ā le̍nde̍ kpo̍so̍ŋ te̍. Wāna̍ nda̍ sāālu̍ŋ ta̍a̍lāa̍ o̍ bā wo̍, ndu̍ cho̍ sīmnɔ᷄ŋ chɛ̍ nūu̍ ni̍. Nya̍ wānāā tūa̍a̍ lā kɔ̄ŋnu̍ŋ nāa̍ fi̍nyā nyā chu̍a̍. I̍sɔ̄ɔ̍ o̍ īsɔ̄ɔ̍ cho̍ nya̍ le̍.”
Chu̍dā nyɔ̍ɔ̍lu̍ le̍ Bɛ̍ŋnja̍mīŋ
18O̍ ko̍ŋ kɔ̍ɔ̍lī, mi̍ Chu̍dā ku̍ā nāa̍ Chōo̍sɛ̍ chu̍a̍, mbo̍ dīmūl ndu̍ āā, “Māsānɔ̄ɔ̍, yāndi̍i̍ I̍ su̍a̍ā wɔ̍ dīōm pɔ̄mbɔ̄ nāa̍ nūm chu̍a̍. A̍ yāndi̍i̍ fāllo̍, du̍a̍a̍nu᷄ŋ tu̍mbe̍ a̍ ya̍ le̍, kāni̍ fu̍u̍le̍ mɛ̄ɛ̍ māsā bɛ̍ndōo̍ I̍chi̍pī o̍ cho̍ yɛ̍ ko̍ni̍ ŋ̄ chō ni̍. 19Māsānɔ̄ɔ̍, nu᷄m nyu̍na̍ na̍a̍ ni̍ māā tē ŋ̄ nɔ̄ pɛ̍ fi̍nyāa̍ kɛ̄lɛ̄ŋgāā pɔ̄mbɔ̄ chēle̍ŋ. 20Mi̍ ŋ̄ dīmūl nu̍m māā ŋ̄ nɔ̄ fi̍nyāa̍, kɛ̍ ō chō ni᷅ŋ ō yu̍wɛ̍i̍. Mi̍ ŋ̄ dīmī māā ŋ̄ nɔ̄ pɔ̄mbɔ̄ɔ̍ ō fi̍nyā nāa̍ mɛ̄ɛ̄lu̍ vīōlɔ̄ɔ̄ o̍ yu̍wɛ̍i̍ ndūɛ̍i̍ ni᷄ŋ ndo̍. Mi̍ ŋ̄ chɔ̄m nu̍m māā pɔ̄mbɔ̄ nāā ko̍ŋ bɛ̄ ndɔ̄ ndu̍ vi᷅, māā ndu̍ pīlɛ̍ kpe̍ lo̍ ni᷅ŋ chūā mākālā ni̍, ndu̍yɛ̍ mi̍ fi̍nyā nāa̍ kāālā ndu̍ kāālāa̍ pi̍la̍. 21O̍ ko̍ŋ, ma̍ dīmūl na̍a̍ āā, ‘Lā kɔ̍ hu᷅ŋ a̍ ndu̍ mī hu̍ŋ chɔ᷅ ndu̍.’ 22Mi̍ ŋ̄ dīmūl nu̍m Māsānɔ̄ɔ̍, māā pōo̍mbɔ̄ kōŋ ō mɛ̍ī fi̍nyā ndɔ̍ mbō kūɛ̄ īnɛ̍ le̍. Tē ō fāŋa̍ŋ ndu̍ īkɛ̄i̍ pɛ̍, fāl kōŋ vī a̍ kɔ̄l tāmbɛ̍i̍yo̍. 23Kɛ̍ ma̍ dīmūl na̍a̍ āā, ‘Tē lā hi᷄ŋ a̍ pɔ̄mbɔ̄ nyā lu᷅mndo̍ le̍, mɛ̄ɛ̍ I̍ cha᷅ lɛ̄ nya̍ na̍nu᷄ŋ kpo̍so̍ŋ te̍.’
24“Mɛ̄ɛ̍ na̍a̍ ŋ̄ mīīŋgu̍ nāa̍ kɛ̄kɛ̍ nāa̍ chūa̍, mi̍ ŋ̄ dōōnu᷄ŋ ndu̍ ko̍na̍ mɛ̄ɛ̍ ŋ̄ dīmu̍l na̍a̍ yɛ̍. 25Le̍ he̍ī, mɛ̄ɛ̍ o̍ di̍mu̍l na̍a̍ māā ŋ̄ hu᷄ŋ vɛ̍lɛ̄ mī ŋ̄ hu᷄ŋ pi̍o̍ndū nyɛ̄ dīāā pɔ̄mbɔ̄, 26mi̍ ŋ̄ dīmūl ndu̍ māā ŋ̄ nɔ̍lā lɛ̍ mī ŋ̄ hīŋ na̍nu᷄ŋ te̍. Mi̍ ŋ̄ dīmūl ndu̍ māā nyɛ᷄ to̍sā mī ŋ̄ mīīŋgu̍ wo̍, mɛ̄ɛ̍ mī kūɛ̄ a̍ pɔ̄mbɔ̄ nāa̍, māā tē ŋ̄ ku̍e̍ a̍ ndu̍ le̍, fi̍nyā kōŋ dīmi̍ māā ō cha᷅ lɛ̄ na̍a̍ le̍. 27O̍ ko̍ŋ kɔ̍ɔ̍lī, mi̍ fi̍nyā nāa̍ dīmūl na̍a̍ māā pūa̍a̍ ā ŋīɔ̍ɔ̍ŋ ko̍ni̍ la̍a̍ ndɔ̄ ve̍lū ni̍, 28māā ō pīlɔ̍ɔ̍ ō mɛ̄i̍ ndu̍. Mbo̍ dīmī māā vīsī bīyāa̍ bīī ndu̍ mbo̍ sɛ̄ɛ̄sīāā ndu̍, māā chɔ̍ŋ a̍ bōōndi̍i̍ ke̍ŋ ō chi̍lɛ̍ ndu̍ le̍. 29Mbo̍ dīmūl na̍a̍ āā, ‘Tē lā bīī ya̍ ho̍ō ni᷅ŋ o̍ bā pɛ̍ mī nyɛ̄ yɔ̄nu̍ŋ a̍ ndu̍, mɛ̄ɛ̍ lā chō tōsā mī vi᷅ a̍ kɔ̄l tāmbɛ̍i̍ ko̍ŋ, ndu̍yɛ̍ lā chē mɛ̄ɛ̍ ya̍ I̍ yu̍wa̍ ni᷅ŋ yɛ̍.’ ”
30-31Mi̍ Chu̍dā hi̍a̍ū lāchī a̍ sūɛ̍i̍, mbo̍ dīmī āā, “Le̍la̍ŋ fāllo̍, tē I̍ mi̍i̍ŋgu̍ kɛ̄kɛ̍ o̍ ībūŋ pɛ̍, mbō chi̍ ya̍ a̍ pōo̍mbɔ̄ɔ̍ ho̍ō le̍, ō chō wu̍ a̍ kɔ̄l tāmbɛ̍i̍ ko̍ŋ. Pōo̍mbɔ̄ɔ̍ ho̍ō ko̍ni̍ nɔ̍ ni᷅ŋ yōōmū ndɔ̄ɔ̍ o̍ bā ni̍. Mɛ̄ɛ̍ o̍ yu̍wa̍ ni᷅ŋ nu̍a̍ā yɛ̍, tē ŋ̄ mīīŋgu̍ a̍ pōo̍mbɔ̄ɔ̍ ho̍ō le̍, mɛ̄ɛ̍ ŋ̄ lūe̍i̍ ndu̍ mɔ̍nɛ̍i̍ nɔ̍lā mī ī dīī ndu̍ ve̍. 32Ndu̍yɛ̍, ya̍ su̍a̍ā ho̍ō wo̍ ya̍ chu̍a̍ būŋgɛ̄i̍ ndu̍ o̍ hɔ̄l le̍ mīīŋgōo̍ a̍ pōo̍mbɔ̄ɔ̍ ho̍ō ni̍. Mi̍ di̍mūl ndu̍ a̍a̍, ‘Tē I̍ mi̍i̍ŋgu̍ a̍ pōo̍mbɔ̄ɔ̍ ho̍ō le̍, dɔ̍u̍ ya̍ tɔ̍ɔ̍ya̍ŋ ko̍ŋ chōo̍ le̍ fɛ̍ɛ̍ŋ a̍ fɛ̍ɛ̍ŋ.’ 33Le̍la̍ŋ, a̍ yāndi̍i̍, Fāllo̍, ya̍ pi̍la̍ I̍ lo᷅ wɔ̍ na̍nu᷄ŋ māā chɛ̄ nūm sɔ̍ŋgɔ̍ pōo̍mbɔ̄ɔ̍ ho̍ō, mā ma̍l ndu̍ mbō mīīŋgu̍ nda̍ bɛ̄ndāā ndūa̍a̍. 34Kāni̍ fo̍ndōle̍, I̍ nɔ̍ mɛ̍ɛ̍ o̍ mɛ̄ɛ̍ ya̍ lo̍o̍kū mi̍i̍ŋgū kɛ̄kɛ̍ o̍ ībūŋ mī mɛ̍i̍ pōo̍mbɔ̄ɔ̍ ho̍ō kpo̍so̍ŋ te̍. I̍ bi̍ī kɔ᷅llo̍ mī nu̍a̍ kɛ̄kɛ̍ o̍ mɔ̍nɛ̍i̍ bīyɔ̄ɔ̍ le̍.”
Právě zvoleno:
Chɛ̄nɛ̍se̍ē 44: YM
Zvýraznění
Sdílet
Kopírovat
Chceš mít své zvýrazněné verše uložené na všech zařízeních? Zaregistruj se nebo se přihlas
Kisi Bible © Bible Society in Liberia, 2015.