Chɛ̄nɛ̍se̍ē 40
40
Chōo̍sɛ̍ tɛ̄ɛ̄si̍a̍a̍ lɔ̄mā sɔ̄la᷄ŋ o̍ chīɛ̄ī mānyūmndo̍ ni᷄ŋ
1Mɛ̄ɛ̍ te̍le̍ŋnda̍ ti̍ŋ lā hīōū, mi̍ māsā bɛ̍ndōo̍ le̍ lɛ̄ŋndē I̍chi̍pīle̍ŋ, wānāā ndūa̍a̍ wa̍lla̍ nda̍ ŋi̍ɔ̍ɔ̍ŋ ā tōsā īsɔ̄ɔ̍, 2mi̍ ī tɛ̄ɛ̄mbūū ndu̍ kɔ̄l, wāna̍ ndɔ̄ ta̍lāā māmūɛ̄īyo̍ a̍ wāna̍ ndɔ̄ lu̍a̍māā bēe̍dīi̍yo̍. O̍ ko̍ŋ, mi̍ māsāa̍ dūāānu᷄ŋ tu̍mbe̍ a̍ wānāā ndūa̍a̍ wa̍li̍a̍a̍ ŋi̍ɔ̍ɔ̍ŋnda̍ ha̍ā. 3Mbo̍ yɔ̄ŋgū nda̍ o̍ bīyɔ̄ɔ̍ ni᷄ŋ, so̍vɛ̄i̍ya̍a̍ ma̍ndā ndu̍ wa̍, wāna̍ cho̍ nda̍ chīla̍ŋ ndo̍, o̍ chīɛ̄ī ndɔ̄ɔ̍. Ma̍ dūāū nda̍ chīɛ̄ī ni̍ŋ nāa̍ Chōo̍sɛ̍ wa̍ ō bīyāā wa̍. 4Dɔ̄wɔ̄ɔ̍ wānāā sɛ̄nɛ̄īya̍ ha̍ā lo̍ŋ, mi̍ wānā bɛ̍ndū so̍vɛ̄i̍ya̍ ō chūā nda̍ mbo̍ yɔ̄ŋgū Chōo̍sɛ̍ le̍ mbō wa̍ nda̍ mālāa̍. Ma̍ lō o̍ chīɛ̄ī mānyūmndo̍ ni᷄ŋ le̍ te̍le̍ŋ ti̍ŋ.
5Nyūmmā pīlɛ̍, mi̍ wāna̍ ta̍lāl ma̍sā bɛ̍ndōo̍ mūɛ̄īya̍ŋ ndo̍, a̍ wāna̍ lu᷅m ndu̍ bēe̍dīi̍yo̍ wo̍ ā sɔ̄l lūa̍a̍ŋ vēllāa̍ vēllē. Lɔ̄mā nda̍ sɔ᷄l nda̍ ŋi̍ɔ̍ɔ̍ŋ nda̍ŋ mā wa̍ yɛ̍ yɛ̍. Tɛ̄ɛ̄sīāālā lɔ̄mā kāla᷄ŋ bɛ̍ɛ̍ lā wa̍ yɛ̍ yɛ̍. 6Mɛ̄ɛ̍ Chōo̍sɛ̍ hi᷅ŋ nāa̍ nda̍ chūā īdīi̍yo̍, mbo̍ sāālu᷄ŋ māā kɔ̄lta̍ŋ lā chō nda̍ lā tāmbɛ̍i̍. 7Mi̍ Chōo̍sɛ̍ lō o̍ ko̍ŋ mbo̍ nyūnā wānāā wa̍li̍a̍a̍ ŋi̍ɔ̍ɔ̍ŋāā māsā bɛ̍ndōo̍ dɔ̄ū ha̍ā o̍ chīɛ̄ī mānyūmndo̍ ni᷄ŋ, ma̍ wā lo̍ŋ nda̍ nda̍ā wa̍ āā, “Vɛ᷅ mi̍ hɔ̄lla̍ ā wā nya̍ hāū a̍ ta̍mbɛ̍i̍ nu̍a̍ā pɛ̍?”
8Ma̍ dīmūl ndu̍ āā, “Lūa̍a̍ŋ na̍a̍ ŋ̄ sɔ᷄l vēllāa̍ vēllē ni̍. Kɛ̍, wānā bɛ̍ɛ̍ cho̍ mbō tɛ̄ɛ̄si̍a̍l na̍a̍ ma̍ŋ te̍.” Mi̍ Chōo̍sɛ̍ dīmūl nda̍ āā, “Mɛ̄lɛ̄ka̍ ndu̍ ke᷅ wa᷅na̍ chi̍o̍o̍ kpāāyāa̍ le̍ lɔ̄mā sɔ̄la᷄ŋ tɛ̄ɛ̄sīa̍a̍ ni̍. Lā chɔ᷄m ya̍ lɔ̄mā nyāma̍ sɔ̍la᷄ŋ.”
9O̍ ko̍ŋ, mi̍ wānāa̍ ta̍lāl ma̍sā bɛ̍ndōo̍ mūɛ̄īya̍ŋ nda̍, wānā nda̍ bāna̍ wa̍ ko̍ŋ o̍ bīyɔ̄ɔ̍ ni᷄ŋ ndo̍ ō chɔ̄m Chōo̍sɛ̍ lɔ̄mā ndɔ̄ma̍ sɔ̍la᷄ŋ āā, “O̍ lɔ̄mā nīma̍ sɔ̍la᷄ŋ ni᷄ŋ, mi̍ cha̍nu᷄ŋ yɔ᷅m mākīle̍pīi̍yo̍ ya̍ o̍ hɔ̄l. 10Yɔ̄mndo̍ ho̍ō ndu̍ o̍o̍ nɔ̍ lɛ̄ūwo̍ŋ ŋ̄ ŋgāa̍. Mɛ̄ɛ̍ lɛ̄ūwo̍ŋ mu᷅ŋ ŋ̄ sōli̍ dɔ̍ɔ̍ pēi̍, mi̍ ŋ̄ yāndū, mi̍ ŋ̄ kūām kīle̍pīi̍ya̍ŋ kpɔ̄ŋnjɔ̄la̍ŋ. Mi̍ kīle̍pīi̍ya̍ŋ ma᷅ŋ mā dīū. 11Tāāla̍ māsā bɛ̍ndōo̍ ō kōl mu̍ɛ̍īya̍ŋ ndo̍ ō wa̍ ya̍ o̍ bā. Mi̍ ke̍ndī kīle̍pīi̍ya̍ŋ ma᷅ŋ. Mi̍ wa̍a̍yīāā ma̍ŋ o̍ tāāla̍ ndɔ̄ɔ̍ ni᷄ŋ, mi̍ ke᷅ ndu̍.”
12Mɛ̄ɛ̍ o̍ chɔ̍m Chōo̍sɛ̍, mi̍ Chōo̍sɛ̍ dīmūl ndu̍ āā, “Lɔ̄mā ŋ̄ sɔ᷄l la̍ŋ, tɛ̄ɛ̄sīāā ndɔ̄ɔ̍ cho̍ ho̍ō ni̍. Lɛ̄ūwūŋ ŋgāa̍ wo̍ŋ ŋ̄ si᷄m le̍ pālɛ̍i̍ ī yāa̍. 13O̍ pālɛ̍i̍ ī yāa̍ bɛ̍ŋgu̍ māsā bɛ̍ndōo̍ chō nu̍m sōlī o̍ chīɛ̄ī mānyūmndo̍ ni᷄ŋ, mbō ma᷄l nu̍m le̍ nyɛ̄ ŋ̄ tōsa̍ wo̍, o̍ ko̍ŋ kɔ̍ɔ̍lī, mbō mīŋgi̍ nu̍m o̍ fōōfō nu̍m ŋ̄ tōsa̍ wa̍llo̍ wo̍. Ā chō wā vɛ̄lɛ̄ māsā bɛ̍ndōo̍ mūɛ̄īya̍ŋ tālāllo̍ mā kē ndu̍, māā pāāndū. 14Kɛ̍ ndu̍yɛ̍ tē dɛ̍nɛ̍ hu̍ŋ mi̍ŋgī nu̍m nɛ̄ɛ̄ŋūū pɛ̍, yi̍ya̍ŋ a̍ ya̍, mā sōō le̍ ya̍ o̍ māsā bɛ̍ndōo̍ lo̍, mbō sōli̍ ya̍ o̍ chīɛ̄ī mānyūmndo̍ ho̍ō ni᷄ŋ. 15Hūnɔ̄ɔ̄ nūu̍ I̍chi̍pī na̍nu᷄ŋ, bīyɔ̄ɔ̍ nda̍ bīī ya̍ o̍ lɛ̄ŋndē nāāle̍ Hi̍būlūi̍le̍ŋ ni᷄ŋ ni̍, ma̍ hūŋ a̍ ya̍ na̍nu᷄ŋ. Na̍nu᷄ŋ bɛ̍ɛ̍ dɔ̄wɔ̄ɔ̄ nda̍ dɔ̄ū ya̍ ho̍ō o̍ chīɛ̄ī mānyūmndo̍ ni᷄ŋ ndo̍, ō cho̍ tɛ̍ɛ̍mbūū nī le̍.”
16O̍ ko̍ŋ, wānāa̍ lu̍ām be̍e̍dīi̍ māsā bɛ̍ndōo̍ wa̍ wānā nda̍ bāna̍ wa̍ o̍ bīyɔ̄ɔ̍ ni᷄ŋ ndo̍, ndu̍ bɛ̍ɛ̍ mɛ̄ɛ̍ o̍ che᷅ māā tɛ̄ɛ̄sīāā lɔ̄mā sɔ̄lāāma̍ chāa̍ŋ ndɔ̄ wa̍ŋ mā na᷄ŋ, mbo̍ dīmūl Chōo̍sɛ̍ āā, “Ya̍ bɛ̍ɛ̍ lɔ̄mā ya̍ sɔ̍l la̍ŋ ma̍ cho̍ ma᷅ŋ ni̍. O̍ lɔ̄mā nīma̍ sɔ̍la᷄ŋ ni᷄ŋ, kāmbɛ̍i̍la̍ du̍a̍u̍wāā lābēe̍dīi̍la̍ŋ lā wa̍ ya̍ o̍ lēbōl lā dēŋgēlāa̍ lā yāa̍. 17Bēe̍di̍la̍ lu̍a̍māālā yɛ̍ yɛ̍la̍ŋ lā wa̍ o̍ kāmbɛ̍i̍ mɛ̍ɛ̍lāa̍ ni᷄ŋ le̍ māsā bɛ̍ndōo̍. Kɛ̍, mi̍ Yōūwa̍ hūŋ, ma̍ wā bēe̍dīi̍yo̍ ho̍ō dīo̍o̍ o̍ kāmbɛ̍i̍yo̍ ni᷄ŋ ya̍ o̍ lēbōl.”
18Mi̍ Chōo̍sɛ̍ lo᷅ o̍ ko̍ŋ mbo̍ mūlūl ndu̍ āā, “Tɛ̄ɛ̄sīa̍a̍ cho̍ ho̍ō le̍ lɔ̄mā nūmma̍ sɔ̍la᷄ŋ ni̍. Kāmbɛ̍i̍la̍ ya̍a̍la̍ŋ lā si᷄m le̍ pālɛ̍i̍ ī yāa̍. 19O̍ pālɛ̍i̍ ī yāa̍ bɛ̍ŋgu̍, māsā bɛ̍ndōo̍ chō nu̍m sōlī o̍ chīɛ̄ī mānyūmndo̍ ni᷄ŋ, mbō kēlū nu̍m bōlle̍ŋ. O̍ ko̍ŋ kɔ̍ɔ̍lī, ō chō dīāllūŋ nūmndo̍ŋ lāndɔ̄ɔ̄ o̍ yɔ̄mndo̍ mī yōūwa̍ dē mu̍ŋ.”
20O̍ ko̍ŋ kɔ̍ɔ̍lī, mi̍ pāa̍le̍ nda̍ lōōnūŋ a̍ vīōlɔ᷄ŋ māsā bɛ̍ndōo̍ I̍chi̍pī le̍ŋ lē fūūlūū, mi̍ lē bīī o̍ pālɛ̍i̍ ya̍a̍ ndūɛ̄ī Chōo̍sɛ̍ di̍mi̍ ve̍ ki̍nɛ̍i̍. O̍ pāa̍le̍ le̍ŋ chōo̍, mi̍ māsā bɛ̄ndōo̍ tōsā du̍nyɛ̍i̍ bɛ̍ndūe̍i̍ le̍ wānāā ndūa̍a̍ wa̍lla̍. O̍ ko̍ŋ, mbo̍ sōlī wānāa̍ ta̍lāl ndu̍ mūɛ̄īya̍ŋ nda̍ wānā nda̍ bānā o̍ dɔ̍ū chīɛ̄ī ni̍ŋ ndo̍, a̍ wānāa̍ lu̍ām be̍e̍dīi̍ ndɔ̄ɔ̍ wa̍ wānā nda̍ bānāa̍. 21Mbo̍ mīŋgī wāna̍ ndɔ̄ ta̍lāā māmūɛ̄īyo̍ o̍ wa̍li̍ ndɔ̄ɔ̍ ni᷄ŋ māā pāāndū. 22Kɛ̍ wāna̍ wa̍ wānāā ndūāā lu̍a̍māā bēe̍dīi̍ya̍ bōlle̍ŋ ndo̍ ndu̍, mbo̍ tōsā ma̍ lāndū ndu̍ mɛ̄ɛ̍ Chōo̍sɛ̍ di̍mu̍l nda̍ māā ī chō yɔ̄nɔ᷄ŋ yɛ̍. 23Kɛ̍ ndu̍yɛ̍, mi̍ wānāa̍ ta̍lāl ma̍sā bɛ̍ndōo̍ mūɛ̄īya̍ŋ nda̍ wānā nda̍ bānā nda̍ sōli̍ chīɛ̄ī ni̍ŋ ndo̍ ō pūɛ̄ɛ̄nu᷄ŋ le̍ yīya᷄ŋndo̍ a̍ Chōo̍sɛ̍.
Právě zvoleno:
Chɛ̄nɛ̍se̍ē 40: YM
Zvýraznění
Sdílet
Kopírovat
Chceš mít své zvýrazněné verše uložené na všech zařízeních? Zaregistruj se nebo se přihlas
Kisi Bible © Bible Society in Liberia, 2015.