Chɛ̄nɛ̍se̍ē 22
22
A̍ mɛ̄ɛ̍ Mɛ̄lɛ̄ka̍ tɔ̄ɔ̄nda̍ŋ E̍bīlāha᷅m yɛ̍ o̍kɔ̄ɔ̄
1Mɛ̄ɛ̍ te̍le̍ŋnda̍ ti̍ŋ lā hīōū, mi̍ Mɛ̄lɛ̄ka̍ tɔ̄ɔ̄nda᷄ŋ E̍bīlāha᷅m. Mbo̍ vēēlū ndu̍ āā, “E̍bīlāha᷅m.” Mi̍ E̍bīlāha᷅m chɛ᷅l āā, “Ēe̍, mi̍ che᷄ŋ ya̍.”
2Mi̍ Mɛ̄lɛ̄ka̍ dīmūl ndu̍ āā, “Chu̍a̍ po̍ nu̍m pīlɔ̍ɔ̍ ho̍ō, ndu̍ yɔ̍nūŋ māā Āa̍se̍ ni̍, ō ŋ̄ kāāla̍ ho̍ō ta̍u̍ wo̍, mā kūɛ̄ a̍ ndu̍ o̍ lɛ̄ŋndē Mo̍līāāle̍ŋ ni᷄ŋ, mā kɔ̍ yɔ̍ŋgū ndu̍ nāa̍ ya̍ I̍ chu̍a̍ māā sa̍lā lūāmāā o̍ pēmbīī ya̍ cho̍ nu̍m chɔ̄m nde̍ chōo̍.”
3O̍ ko̍ŋ kɔ̍ɔ̍lī, mi̍ E̍bīlāha᷅m pe̍nā chɔ̄nɔ᷄ŋ i̍di̍i̍yo̍ pu̍u̍ŋ, mbo̍ bɛ̄ɛ̄ndīa̍ŋ le̍ kɔ̄la̍ŋ sa̍lā Mɛ̄lɛ̄ka̍ dīmu̍l ndu̍ wo̍ sōlīo̍o̍. Mbo̍ kīlī yɔ̄mnde̍, mbo̍ tɛ̄ɛ̄ndīāā, mbo̍ hāndū sōfɛ̍lɔ̍ɔ̍ o̍ kɔ̄ɔ̄, mbo̍ yīī. Mbo̍ chūā bu̍ɛ̍i̍yāa̍ cho̍ ndu̍ o̍ bā chīɛ̄ī ni̍ŋ nda̍ ā ŋīɔ̍ɔ̍ŋ, a̍ Āa̍se̍ po̍ ndɔ̄, ma̍ cha᷄ŋ kɔ᷅la̍ŋ o̍ fo̍ndāŋ Mɛ̄lɛ̄ka̍ dīmu̍l ndu̍ wo̍. 4Mɛ̄ɛ̍ nda̍ kūɛ̄ le̍ pālɛ̍i̍ ī ŋīi̍ŋ o̍ yāa̍ ndɔ̄ɔ̍, mɛ̄ɛ̍ E̍bīlāha᷅m chu̍a̍ hɔ̄lla̍, mbo̍ chā fo̍ndāŋ Mɛ̄lɛ̄ka̍ dīmu̍l ndu̍ wo̍ lāchī pɔ̍. 5Mi̍ E̍bīlāha᷅m di̍mūl bu̍ɛ̍i̍yāā ndūāā ŋi̍ɔ̍ɔ̍ŋnda̍ āā, “Lā chu᷄m na̍a̍ pɔ̍ɔ̍ na̍nu᷄ŋ a̍ sōfɛ̍lɔ̍ɔ̍. Ŋ̄ chō la̍ŋ nda̍, na̍a̍ pōo̍mbɔ̄ɔ̍, mī ŋ̄ kɔ̍ so̍o̍lūū Mɛ̄lɛ̄ka̍ lo̍ŋ. Tē ŋ̄ chīi̍ pɛ̍, ŋ̄ chō mīīŋgū na̍nu᷄ŋ nāa̍ nya̍ chūā.”
6Mi̍ E̍bīlāha᷅m chu̍ā yɔ̄mnde̍ le̍ sa̍lāa̍ lōmɔ̄ɔ̍, mbo̍ hāndū Āa̍se̍ po̍ ndɔ̄ o̍ lēbōl, mi̍ ndu̍ pi̍la̍ bi̍ī yīŋnde̍ŋ o̍ bā, a̍ mūɛ̍i̍. Ma̍ hīāū lāchī a̍ kɔ̄la̍ŋ nda̍ ŋi̍ɔ̍ɔ̍ŋ. 7Kɔ̄la̍ŋ ha̍a̍a̍, mi̍ Āa̍se̍ ve̍e̍lū fi̍nyā ndɔ̍ āā, “Kɛ̄kɛ̍.”
Mi̍ E̍bīlāha᷅m chɛ᷅l āā, “Ēe̍, po̍ nūu̍.”
Mi̍ Āa̍se̍ nyu̍nā ndu̍ āā, “Ŋ̄ nɔ̄ yīŋnde̍ŋ a̍ yɔ̄mnde̍, kɛ̍ ɔ̍ɔ̄ ni̍ko̍ sa̍ā fɔ̍ŋndɔ̍ɔ̍ le̍ sa̍lāa̍?”
8Mi̍ E̍bīlāha᷅m di̍mī āā, “Po̍ nūu̍, Mɛ̄lɛ̄ka̍ pi̍la̍ chō sāā fɔ̍ŋndɔ̍ɔ̍ yɔ̄ŋgū le̍ sa̍lā lūāmāa̍.” Ma̍ hīāū lāchī a̍ kɔ̄la̍ŋ.
9Mɛ̄ɛ̍ nda̍ fūūlu̍u̍ o̍ fo̍ndāŋ Mɛ̄lɛ̄ka̍ dīmu̍l E̍bīlāha᷅m ndo̍, mi̍ E̍bīlāha᷅m ta̍ŋgūl ma̍āŋndo̍ lo̍ŋ le̍ sa̍lāa̍ sōlīo̍o̍ lēcho̍o̍ o̍ Mɛ̄lɛ̄ka̍ lo̍. Mɛ̄ɛ̍ o̍ chi̍i̍ tāŋgūl, mbo̍ yɛ̄ɛ̄mbūū yɔ̄mnde̍ lēchōo̍. Mbo̍ mūli᷄ŋ mbo̍ yīī po̍ ndɔ̄ɔ̍ Āa̍se̍ po᷅ŋ, mbo̍ yāmbū ndu̍ o̍ yɔ̄mīī kēŋ chōo̍ o̍ ma̍āŋndo̍ chōo̍. 10Mɛ̄ɛ̍ o̍ ya̍mbu̍ ndu̍, mbo̍ chūā mūɛ̍i̍ le̍ po̍ ndɔ̄ɔ̍ dīyɔ̄ɔ̍. 11Kɛ̍, mi̍ Mɛ̄lɛ̄ka̍ Ya̍a̍wɛ̄ɛ̄ ki̍i̍la̍nɔ̍ ndɔ̄ɔ̍ ō lō ɛ̄chɛ̍nɛ̄ mbo̍ vēēlū E̍bīlāha᷅m āā, “E̍bīlāha᷅m.”
Mi̍ E̍bīlāha᷅m chɛ᷅l āā, “Ēe̍.”
12Mi̍ ki̍i̍la̍nɔ̍ Mɛ̄lɛ̄ka̍a̍ dīmūl ndu̍ āā, “Yɔ᷅ŋ pōo̍mbɔ̄ɔ̍ nyɛ̄ o̍ nyɛ̄ le̍. I̍ si̍na̍ ni᷅ŋ māā ā chō wāna̍ tu̍e̍ī Mɛ̍lɛ̄ka̍ dīōm, kāni̍ fu̍u̍le̍, a̍ ku̍u̍na̍ŋ po̍ nu̍mndo̍ chōo̍ le̍ Mɛ̄lɛ̄ka̍ le̍.”
13Mi̍ E̍bīlāha᷅m chu̍ā hɔ̄lla̍ mbo̍ mɛ̄ɛ̄ndīa̍ŋ. Mbo̍ chā sāā ko̍ndo̍o̍ ndu̍ kɔ̄ɔ̄lī, lēēla̍ŋ lā wa̍ ndu̍ lā hāūwāā o̍ bɔ̄ɔ̍ ni᷄ŋ. Mi̍ E̍bīlāha᷅m ku̍ā mbo̍ kɔ̍ bi̍ī sāā ko̍ndo̍ ko̍ŋ, mbo̍ sōlī ndu̍ sa̍lā lūāmāa̍ sɔ̍ŋgɔ̍ po̍ ndɔ̄ɔ̍. 14Mi̍ E̍bīlāha᷅m ke᷅ fo̍ndāŋ kōŋ dīōla̍ŋ āā, “Mɛ̄lɛ̄ka̍ Ya̍a̍wɛ̄ɛ̄ cho̍ yɔ̄ŋgū”. A̍ pāa̍le̍ hāūle̍ŋ bɛ̍ɛ̍ wāŋnda̍ chō ndi̍ dīmīo̍o̍ māā tāle̍ āā, “Mɛ̄lɛ̄ka̍ Ya̍a̍wɛ̄ɛ̄ cho̍ yɔ̄ŋgū o̍ pēmbīī ndūɛ̍i̍ chōo̍.”
15O̍ ko̍ŋ kɔ̍ɔ̍lī, mi̍ Mɛ̄lɛ̄ka̍ Ya̍a̍wɛ̄ɛ̄ ki̍i̍la̍nɔ̍ ndɔ̄ɔ̍ ō sūāā dīi̍ŋ ndɔ̄ɔ̍ ɛ̄chɛ̍nɛ̄ nāa̍ E̍bīlāha᷅m chu̍a̍ āā, “Mɛ̄lɛ̄ka̍ Ya̍a̍wɛ̄ɛ̄ di̍mi̍ āā, 16‘I̍ me̍na̍ŋ o̍ ya̍ pi̍la̍ po̍ le̍ nyɛ̄ ŋ̄ tōsa̍ ho̍ō wo̍, a̍ ku̍ŋgu̍la̍ŋ po̍ nu̍m pīlɔ̍ɔ̍ chōo̍ le̍ ya̍ le̍, 17I̍ chu̍e̍l nu̍m būŋgɛ̄i̍ māā I̍ cho̍ nu̍m sa̍lā dɔ̄wɔ̄ɔ̄. Wānāa̍ fu̍lā ni̍ŋ o̍ pūlālē nūmnde̍ŋ chōo̍ wa̍, I̍ cho̍ tōsā mā kūi̍i̍ mā wa̍ māā lōo̍ŋ o̍ ha̍la̍, mā wa̍ fāŋgā māā si̍o̍ōŋnde̍ o̍ pēē mɛ̄ŋmā īhɛ᷄llo̍ kɔ̄ŋgɔ̍. Ndu̍yɛ̍, chūāūwāā nūm a̍ ma̍māa̍ ā kūūmbūŋ ni̍ŋ ya̍a̍mɔ̍ɔ̍wa̍a̍ ndāa̍ chōo̍ kpu̍lu̍. 18O̍ sa̍bū chūāā nūm a̍ ma̍māa̍ ni᷄ŋ ya̍ I̍ du̍a̍ū ni̍ŋ lɛ̄ŋnde̍ kpo̍u̍ o̍ chi̍e̍ēŋndo̍ chōo̍ sa̍lā ni̍, kāni̍ fu̍u̍le̍, le̍ mɛ̄ɛ̍ ŋ̄ tōsa̍ nyɛ̄ ya̍ di̍mu̍l nu̍m ndo̍ yɛ̍.’ ” 19O̍ ko̍ŋ kɔ̍ɔ̍lī, mi̍ E̍bīlāha᷅m mi̍i̍ŋgū nda̍ po̍ ndɔ̄ɔ̍ nāa̍ bu̍ɛ̍i̍yāā ndūa̍a̍ chūā. Ma̍ mīīŋgū nda̍ nda̍ā nāa̍ nda̍ wa̍ īchālī Bīɛ̄ɛ̄si̍ɛ̍bā wa̍. Mi̍ E̍bīlāha᷅m cha᷅l Bīɛ̄ɛ̄si̍ɛ̍bā.
Pūlāle̍ Nāhɔ̍ɔ̄le̍ŋ
20Mɛ̄ɛ̍ te̍le̍ŋnda̍ ti̍ŋ lā hīōū, mi̍ E̍bīlāha᷅m tu̍ɛ̍ī māā Nāhɔ̍ɔ̄ pɔ̍mbɔ̄ ndɔ̄ bɛ̍ɛ̍ Mi̍li̍kāā la̍a̍ ndɔ̄ vi̍lu̍l ndu̍ chūāūwa̍ ā ŋɔ̄ma̍a̍, 21-22nda̍ cho̍ ha̍ā ni̍, Po̍ ndɔ̍ tāso̍o̍ cho̍ U̍sī ni̍, a̍ Bu̍u̍sī pɔ̍mbɔ̄ ndɔ̄, a̍ Kɛ̍mūɛ̄l, a̍ Chɛ̍sɛ̍dī, a̍ Ha̍a̍sō, a̍ Pi̍li̍da̍a̍sī, a̍ Chi̍di̍lāā, a̍ Bɛ̄tīhɔ̍ɔ̄. Kɛ̍mīɛ̍l ve̍lū A̍lūām ni̍. 23Bɛ̄tīhɔ̍ɔ̄ ve̍lū Lūībɛ̍kā ni̍. Mɛ̄ɛ̍ pɔ̄mbɔ̄ɔ̍ E̍bīlāha᷅m, Nāhɔ̍ɔ̄, pūa̍a̍ ŋɔ̄ma̍a̍ la̍a̍ ndɔ̄ kpe̍e̍kpe̍i̍yo̍, Mi̍li̍kāā o̍ vi̍lu̍l ndu̍ wa̍ cho̍ ka̍ŋ ni̍. 24Nāhɔ̍ɔ̄ la̍a̍ ndɔ̄ yɔ̍ŋāa̍ dīōla̍ŋ āā, Lūɛ̄yu̍mā, ndu̍ bɛ̍ɛ̍ mbo̍ vīlūl Nāhɔ̍ɔ̄ pūa̍a̍ ā hīɔ̍ɔ̍lu̍, nda̍ cho̍ ha̍ā ni̍. Te̍bāā, a̍ Ka̍hām, a̍ Ta̍ha̍a̍sī, a̍ Ma̍a̍kāā.
Právě zvoleno:
Chɛ̄nɛ̍se̍ē 22: YM
Zvýraznění
Sdílet
Kopírovat
Chceš mít své zvýrazněné verše uložené na všech zařízeních? Zaregistruj se nebo se přihlas
Kisi Bible © Bible Society in Liberia, 2015.