LUKA 8

Waka awa weremnughieghe Jesu

1Konyuma Jesu ukamara-mara mizinyi mibaa na mitini ukichila na kueresha Ilagho Jiboie ja Wuzuri ghwa Mlungu, na waja wanughi ikumi na wawi werekoghe aeni. 2Wokoni waka wamu weremnughieghe, awa wereboisiroghe na kuwingwa pepo rizamie na makongo mazima, nawo ni Maria uwangwagha Magdaleni uhu orewingiloghe pepo mfungade,#Mat. 27.55-56; Mk. 15.40-41; Lk. 23.49 3na Joana mkake Kuza, m'baa wa kazi wa Herode, na Susana, na wazima wengi werekufunyireghe kumdumikia kwa mali rawo.

Mfwano ghwa muwi mbeu

(Mat. 13.1-9; Mk. 4.1-9)

4Nao iji izungu ja wandu wifumie kula muzi wameria kumchea, ukawighoria mfwano ughu: 5“Muwi mbeu orefumieghe kwenda kuwa mbeu, hata iji orekoghe ukiwa, rimu rikapotokia chienyi rikawadilwa ni wandu na nyonyi rikarija. 6Zima rikapotokia maghonyi kusewadie ndoe nyingi, hata iji rabuka, kwa kukaia ndekorekoghe na kimeru chingi rikaoma. 7Zima rikapotokia minjonyi, nayo ikizoghuanya chiaimweri naro, iyo minjwa ikaribwagha. 8Na rimu rikapotokia ndoe iwurue, rikazoghua na kuva ighana ighana.” Nao Jesu ukameria ukighamba, “Uo uko na madu ghesikira ndesikire.”

Makusudi gha mifwano

(Mat. 13.10-17; Mk. 4.10-12)

9Nao wanughi wikamkotia kutambua kwaro mfwano ugho, 10nao ukawizera, “Inyo mwanekelo kurimanya ngasu ra Wuzuri ghwa Mlungu, ela kwa wazima radaghorwa kwa mifwano, wikizighana wisewone, sena wikisikira wisetambukilo.#Isa. 6.9-10

Jesu kuwitambuya mfwano ghwa muwi mbeu

(Mat. 13.18-23; Mk. 4.13-20)

11“Mfwano ugho kutambua kwaro niko uku: Mbeu ni ilagho ja Mlungu. 12Mbeu iri rerepotokieghe chienyi ni sa wandu wijisikiragha ijo ilagho, konyuma Mmbiwi wacha na kujiinja ngolonyi kwawo, wisechejirumiria na kukia. 13Iri rerepotokieghe maghonyi, ni sa wandu wijisikiragha ilagho na kujiwusa kwa kuboilwa, ela kwa kukaia wisewadie miri ingi, ngelo ya matimo wadawuya nyuma. 14Iri rerepotokieghe minjonyi, ni sa wandu wijisikiragha ilagho, ela wikighenda woruwu wachulwa ni maghesho na bea ra mali na maseko gha irangi iji, nao ndewiwurushagha matunda ghangi anduangi. 15Na iri ripotokie ndoe iwurue, ni sa wandu wijisikiragha ilagho na kujiwadia kwa ngolo ndicha esikira, nawo wadava matunda kwa kurumaghia.

Taa ifinikiro

(Mk. 4.21-25)

16“Ndekuwadie mndungi ukoragha taa na kuifinikira, angu kuiwika wusolowenyi; ela wadaiwika kilambonyi cha ighu wandu wose wingiagha wighuwone mwengere.#Mat. 5.15; Lk. 11.33 17Angu ndekuwadie kilambo chingi chiviswagha, chisechaamanyika na kuredwa mwengerenyi anduangi.#Mat. 10.26; Lk. 12.2 18Kwa huwu, mkumanye seji msikiragha, angu uo uko nacho uchanekwa, sena uchachurilwa, ela uo usewadie, uchasokwa hata icho uririkanyagha oko nacho.”#Mat. 25.29; Lk. 19.26

Mae Jesu na waruna

(Mat. 12.46-50; Mk. 3.31-35)

19Nao mae na waruna Jesu wikamchea, ela kwa wundu ghwa wandu kukaia wengi, ndeweredimieghe kummbona anduangi. 20Ukaghorelwa, “Mayo na wanyinyu weko shighadi wawuyakulola wikunde kukuwona.” 21Ela uo ukawizera, “Mao na wanidu ni waja wijisikiragha ilagho ja Mlungu na kujibonya.”

Jesu kunyamirisha kiremba

(Mat. 8.23-27; Mk. 4.35-41)

22Nao ituku jimu, Jesu ukangia mashuonyi andwamweri na wanughi wake, ukawizera, “Diruwuke kimonu cha ndiwa.” Wikazoya kuruwuka. 23Nawo wikighenda woruwu ukawadwa ni dilo. Nao kiremba kibaa chikawichea aja ndiwenyi, wikakaia ndengonyi angu machi gherezoeghe kungia andenyi mashuonyi. 24Wanughi wikamghendia Jesu wikammbusira wikighamba, “Bwana, Bwana diamba ditote!” Jesu ukawuka ukaikania ija mbeo na ija mivo-mivo ya machi ikasia, kukakaia kuhoa kubaa. 25Nao ukawizera, “Welee, irumirio jenyu jeko hao?” Nawo wikaobua na kuzerana, “Welee, uhu nani ulaghiragha hata mbeo na machi, navo vamsikira!”

Jesu kuboisa mundu uko na pepo

(Mat. 8.28-34; Mk. 5.1-20)

26Nao wikavika isanga ja Wagerasini, jiko kulangaya cha Galilaya. 27Jesu uendasea mashuonyi, ukakwana na mundu uko na pepo wafuma mzinyi; na kwa matuku mengi ndererwaeghe nguwo ringi, hata nderekaieghe nyumbenyi anduangi, ela orekoghe ukikaia makaburinyi. 28Nao iji wammbona Jesu, ukakema na kughwa imbiri kwake, na kughamba kwa lwaka lubaa, “Kwakunde kunibonya wada Jesu Mwana wa Mlungu Uo-Uko-Aighu-Nandighi? Nakuvoya kusenitirire.” 29Angu oreilaghirieghe ija pepo ya makakala ifume kwa uja mundu. Angu kalazi koni eremmbwadieghe; na hata ngera saki orewadiloghe na kungirwa kifungonyi, ukifungwa mikonu yake kwa minyororo na pingu, ela ukavidumbua ivo vifungo na kukimbirishwa cha kireti ni iyo pepo. 30Nao Jesu ukamkotia, “Irina jako nani?” Ukatumbulia, “Irina japo ni ‘Ijeshi’” angu orengiriloghe ni pepo nyingi. 31Naro rikamlomba rikimvoya usekerilaghira kughenda kina cha abuso.

32Korekoghe na nguwe nyingi rikilishwa aho mghondinyi; pepo rikamlomba urisighe ringie kwa iro nguwe. Nao ukarirumiria. 33Rija pepo rikamfuma uja mundu na kuringia nguwe, naro rikakimbia na kushorodoka ighambenyi, rikangia ndiwenyi na kutota.

34Nao walisha iji wereriwonieghe iro rerebonyekieghe, wikakimbia cha mzinyi na kuwighoria wandu wa ijo isanga maza iro. 35Na wandu wikafuma wipate kuwona iro rerebonyekieghe; wikacha kwa Jesu na kummbona uja mundu orewingiloghe pepo uko maghunyi kwake warwa nguwo, na akili rake riko nicha, nawo wikangilwa ni wowa. 36Na waja wereriwonieghe maza iro wikawija malagho sa iji uja orekoghe na pepo oreboisiroghe. 37Nao waisanga wose wa Gerasinyi, wikamlomba ufume mzawo; angu werengiriloghe ni wowa m'baa. Jesu ukangia mashuonyi ukawuya. 38Niko uja mundu orefumiloghe ni pepo ukamlomba wighendanye; ela ukamduma ukighamba, 39“Wuya mzinyi kwako, kuchile iro maza mbaa Mlungu ukubonyere.” Nao ukaghenda isanga jose ukichila sa iji Jesu orem'bonyereghe.

Mwai wa Jairo na muka uo oreadadireghe nguwo ya Jesu

(Mat. 9.18-26; Mk. 5.21-43)

40Nao iji Jesu wameria kuwuya, izungu ja wandu wose wikamkaribisha angu wose werekoghe wikimmbeseria. 41Aho ukacha m'baa umu wa sunagogi uwangwagha Jairo, ukaghwa maghunyi kwake Jesu, ukimvoya uche nyumbenyi kwake, 42angu orekoghe na mwai wake umweri wa miaka ikumi na iwi wakaia mkongo kaavui na kufwa.

Nao iji Jesu orekoghe ukighenda wandu wikachuria kumtindiria. 43Na muka umu orekoghe ukifumwa ni bagha kwa miaka ikumi na iwi, nao nderepatireghe kuboiswa ni mndungi anduangi. 44Ukamchea Jesu na nyuma, ukamuadada kidambi cha nguwo yake, nao shwa wori kuja kufumwa ni bagha kwake kukasia. 45Jesu ukaghamba, “Nani waniadada?” Hata iji wose wakana, Petro ukamzera, “Mwalimu, wandu wose waawuyakumaria na kukutindiria!” 46Ela Jesu ukaghamba, “Mndumu waniadada; najimanya ilagho iji angu nafumwa ni ndighi rapo.” 47Nao iji uo muka orewonieghe angu ndedimagha kuvisika, ukamchea ukisughusika, ukaghwa imbiri kwake na kumghoria ghose imbiri ya wandu wose, shekeria ya kumuadada, na seji oreboisiroghe shwa. 48Nao ukamzera, “Mwai, irumirio jako jakuboisa, kwende na sere.”

49Nao iji orekoghe ukideda, ukacha mundu umu kufuma nyumbenyi kwa uja m'baa wa sunagogi, ukamzera, “Mwai wako wameria kufwa, kusesindemjisha Mwalimu wasi.” 50Ela Jesu ukisikira agho ukatumbulia, “Kusakeobua, oho rumiria tu, nao uchaboa.”

51Wiendavika nyumbenyi, ukawighiria wose wisengianye andenyi; ela Petro, Johane, Jakobo, ndee mwana, na mae mwana wiekeri. 52Na wose werekoghe wikikema na kumlilia; ela Jesu ukawizera, “Msakelila, angu mwana ndefue anduangi, ela waalala.” 53Wikamseka loli-loli wikimanya angu wameria kufwa. 54Jesu ukammbwada mkonu ukammbanga ukighamba, “Mwana, wuka.” 55Nao roho yake ikammburia, ukawuka shwa wori. Jesu ukaghamba angu wimneke vindo. 56Wavi wake wikashinika, ela uo ukawilaghira wisakemghoria mndungi agho gherebonyekieghe.

Právě zvoleno:

LUKA 8: TAITA

Zvýraznění

Sdílet

Kopírovat