LUKA 12
12
Mawonyero aighu ya kuja-kuwi
(Mat. 10.26-27)
1Ngelo iyo, iji maelfu mengi gha wandu gherekwanyikieghe, hata wikakaia wikiwadiana weni na weni, Jesu ukazoya kuwighoria wanughi wake imbiri ukighamba, “Mkulindie na chachu ya Mafarisayo nayo ni kuja kuwi.#Mat. 16.6; Mk. 8.15 2Angu ndekuwadie kindo chingi chifinikiro, chisechaawoneka worinyi, hata ilagho jingi jivisiro jisechaamanyika anduangi.#Mk. 4.22; Lk. 8.17 3Kwa huwu, ijo jose morejighorieghe kirenyi, jichasikirwa mwengerenyi, na ijo jose jerehohoreloghe vumbenyi va ndenyi, jichachilwa aighu nyumbenyi.
Uo ufwane kuobolwa
(Mat. 10.28-31)
4“Nani namghoria inyo waghenyi wapo, msakewiobua awa wibwaghagha mumbi na nyuma wisedimagha kubonya ilagho jingi izima anduangi. 5Ela nichammbonyera uo ufwane kuobolwa, muobuonyi uo nyuma ya kubwagha, uko nandighi rekumba jehanamunyi, ee namghoria, muobuonyi Uo. 6Welee, mbeumbeu isanu nderiuzwagha kwa magome awi anguwada? Hata huwo, imweri ndeiliwikagha imbiri ya Mlungu anduangi. 7Hata maridia gha vongonyi konyu ghamerie kutalwa putu. Msakeobua, inyo moko na zoghori mbaa kuchumba mbeumbeu nyingi.
Kumrumiria na kumkana Kristo
(Mat. 10.32-33; 12.32; 10.19-20)
8“Nani namghoria loli, angu kula mundu uchaanirumiria ini imbiri ya wandu, Mwana wa Mdamu wori uchamrumiria imbiri ya weke malaika wa Mlungu. 9Ela uo unikanagha imbiri ya wandu, Mwana wa Mdamu wori uchamkana imbiri ya weke malaika wa Mlungu. 10Na uo ose uchaaghora ilagho aighu ya Mwana wa Mdamu uchalekwa, ela uo uchaamsholia Roho Mweli, ndechaalekwa anduangi.#Mat. 12.32; Mk. 3.29 11Nenyo iji wamreda sunagoginyi, na kwa wabaa, na kwa awo wibonyagha nguma, msakesumbuka mchatumbulia wada, angu mchaghora wada;#Mat. 10.19-20; Mk. 13.11; Lk. 21.14-15 12angu Roho Mweli uchamfundisha saa ija cheni seji mchaatumbulia.”
Mfwano ghwa mzuri ukelie
13Nao mndumu andenyi ya jija izungu ukamzera, “Mwalimu, mzere mwanidu diwaghe ifwa jedu.” 14Jesu ukatumbulia, “Ee mundu, nani orenibonyereghe nikaie mtanyi angu mmbaghanyi aghadi konyu?” 15Nao ukawizera, “Manyenyi mkulindie na iriso, angu irangi ja mundu ndejiko andenyi ya ugho wungi ghwa mali uko naro anduangi.” 16Nao ukawighoria mfwano ughu: “Ndoe ya mndumu uko na mali, erevaeghe loli-loli; 17nao ukizoya kupima moni ukaghamba, ‘Nibonya wada nisewadie andu kowika viro vapo?’ 18Ukaghamba, ‘Nichabonya huwu, nicharivuchua nganya rapo, na kuagha zima mbaa andu nichaakumba viro vapo vose, na vilambo vapo. 19Nani nichajizera irangi japo, Ee irangi, koko na vindo vingi viwikilo va miaka mingi, idana hora, kuje, kunyo, kuboilo’ 20Ela Mlungu ukamzera, ‘Ee mkelu, ichi kio cheni, roho yako ichakundwa, na ivo vindo vako kuvibonyere vichawuya vani?’ 21Ni huwo koni kwa uo ukuwikiagha moni mali, useko na mali ingi kwa Mlungu anduangi.”
Mkaie na irumirio kwa Mlungu
(Mat. 6.25-34)
22Nao Jesu ukawizera wanughi wake, “Kwa huwu namzera inyo, msakejisumbukia irangi jenyu, wei mchajaki, angu mimbi yenyu wei mcharwaki. 23Angu irangi jachumba vindo, na mumbi ghwachumba marwao. 24Ririkanyenyi ngorusa nderilimagha, hata nderikuwidagha, hata kukwanya nganyenyi anduangi, na Mlungu wadarilisha. Na inyo ndemko wa zoghori kuchumba iro nyonyi anguwada? 25Nani konyu kwa kusumbukia irangi jake, udimagha kujichuria wulacha mkonu ghumweri? 26Ikakaia msedimagha kukubonyera ijo jiko itini sa iji, kwaki mughisumbukiagha agho mazima? 27Ririkanyenyi mboi iji rizoghuagha, nderibonyagha kazi hata nderilukagha anduangi, nani namzera, hata Solomoni moni kwa wubaa ghwake ghose, ndererushiroghe nicha sa imu ya mboi iro anduangi;#1 Waz. 10.4-7; 2 Mal. 9.3-6 28Idana ikakaia Mlungu warirusha huwu nyasi ra mlambenyi riko idime na kesho raoma, na kukorwa modo, uchachumbaki kumrusha inyo wandu wa irumirio itini. 29Kwa huwu, msakelola mchajaki, angu mchanywaki, hata msakeja wasi. 30Angu mbari rose ra wurumwengu radalola vilambo ivo, ela Ndeyo onyu wamanya angu moko na bea navo. 31Ela lolenyi kande Wuzuri ghwa Mlungu, na vilambo ivo vose uchamneka.
Mali ra mlungunyi
(Mat. 6.19-21)
32“Msakeobua inyo chagha kitini, angu yam'boie Ndeyo onyu kumneka ugho wuzuri. 33Uzenyi ivo muko navo, mfunye makuwio, mkubonyere mmbeni vikuchu viserashukagha, mkuwikie mali mlungunyi andu risechaasia jingi, na vitoi viseiwagha, hata soya ingi isenonagha anduangi. 34Angu andu koni mali rako riko, niko koni na ngolo yako ichaakaia wori.
Wazumba wichereshagha
35“Fungenyi viwonu venyu, mkaie nicha, na taa renyu riakeghe,#Mat. 25.1-13 36nenyo mkaie sa wandu wimmbeseragha bwana wawo uwuye kufuma arusinyi; hata iji wacha, na kukongoda mnyango, wimrughuye shwa-shwa.#Mk. 13.34-36 37Warasimilwa awa wadumiki bwana wawo uchaawikua wikicheresha, namghoria loli, uchakufunga uo moni, na kuwisera kidombo mezenyi upate kuwidumikia. 38Ukacha kio ghadi, angu ndoe ikiela na kuwikua huwo, warasimilwa awo wadumiki. 39Ela manyenyi ngera mundu wa nyumba odemanya ni saa iao uchaachelwa ni vitoi, kumangu nderedimagha kuisigha nyumba yake ibaro anduangi.#Mat. 24.43-44 40Nenyo wokoni kaienyi nicha, angu Mwana wa Mdamu uchacha kwa saa mseimanyagha anduangi.”
Mdumiki mloli angu useko mloli
(Mat. 24.45-51)
41Nao Petro ukamzera, “Bwana, mfwano ughu ni kwa wundu ghodu isi, angu ni kwa wandu wose?” 42Bwana ukamzera, “Idana mdumiki mucha na wa akili ni uao, uo Bwana wake uchaammbika aighu ya nyumba yake, uwiwaghie wadumiki wambao vindo vawo, kwa ngelo yaro? 43Warasimilwa uja mdumiki iji bwana wake wacha na kumkua ukibonya wokoni. 44Namghoria loli, uchammbika ukaie m'baa wa vilambo vake vose. 45Ela uja mdumiki ukaghamba moni ngolonyi kwake, Bwana wapo waamuka, nao uzoye kuwikaba wadumiki wambao wa waka na wa womi, na kuja na kunywa na kuwongia, 46bwana wa mdumiki uja uchacha ituku userejisuwirieghe, na saa useimanyagha, nao uchamdumbua vipande vipande na kummbika chiaimweri na awo wiserumiriagha; 47na uja mdumiki orelumanyireghe lukundo lwa bwana wake, nao nderekuwikieghe moni nicha angu kulubonya lukundo lwa bwana wake, uchakabwa na ndighi. 48Ela uo useremanyireghe, na kubonya agho ghimfwanagha ukabo, uchakabwa kutini. Uo unekelo kwa wungi, kwake vichakotelwa kwa wungi; na kwa uo mundu wiwikagha kwa wungi, wichamkotia kwa wungi wokoni.
Jesu, shekeria ya mawaghanyiko
(Mat. 10.34-36)
49“Nachee kukora modo ndoenyi, nani naboilwagha saki ngera ghwadaaka! 50Neko na wubaputizo nibaputizwagha nagho, nani naja wasi saki hata ghukatie!#Mk. 10.38 51Muaghesha necha kureda sere ndoenyi? Hata, siko kungi; ela ni mawaghanyiko! 52Kufuma idana wandu wasanu wa nyumba imweri wichawaghanyika; wadadu kwa wawi, na wawi kwa wadadu witangalanagha. 53Wichawaghanyika na kutangalana, ndee mwana na mdawana wake, mdawana na ndee, muka na mwai wake, mwana wa waka na mae, mkeku na mka-mwanwake, mkamwana na mkekwake.”#Mik. 7.6
Kuimanya ngelo
(Mat. 16.2-3)
54Nao Jesu ukajizera izungu ja wandu sena, “Iji mwajiwona iwingu jikijoka cha magharibi, mwadaghamba shwa wori, ‘Vua iacha;’ nayo loli yadacha. 55Na iji mwasikira mbeo ikiweta kufuma kusinyi, mwadaghamba, ‘Kuchakaia na iruwa jibirie;’ najo loli jadabia. 56Inyo waji-kuwi, mwaichi kutambua vimu kwa kuzighana ndoenyi na mlungunyi, kwaki sena mlemwagha ni kutambua maza ra ngelo iri?”
Patana na m'maiza wako
(Mat. 5.25-26)
57“Kwaki msetanyagha mmbeni agho ghiko gha hachi? 58Iji kwakaghendanya na mshitaki wako kotinyi, tima kupatana nao chienyi, usechekughenja kwa mtanyi, na mtanyi ukughenje kwa asikari, na asikari ukungire kifungonyi. 59Nakughoria loli, ndekuchaafuma aho hata kumerie kulipa senti ya kutua!”
Právě zvoleno:
LUKA 12: TAITA
Zvýraznění
Sdílet
Kopírovat
Chceš mít své zvýrazněné verše uložené na všech zařízeních? Zaregistruj se nebo se přihlas
©Bible Society of Kenya, 1997
All rights reserved.
