लूकस 15
15
एबस्रका भेन्ड़ो ही जोक्खा ख़ीरी
(मत्ता 18:12-14)
1अक्कु येसुस गुसन ऊज'ऊ आलर अरा नन्ना पपहा आलर ओर्मर आसी कत्थन मेना गे बर'आलियर।#लूक 5:29,30 2फरिसीर अरा नॆग सिखाब'उर, “ईस गा पपहा आलर गने भिड़ाब'अदस अरा आर ही गने ओन्दस मॊख़दस” ब'अरकी कुटमुटर'आ हेलरर।
3ख़ने आस आरिन ई जोक्खा ख़ीरिन तिंगियस। 4“निम्है ती एकअम आलासी ओन सौ भेन्ड़ो र'ई, अबड़ा ती ओन्टा एबस्र'ओ होले, एन्देर आस निनाबे गोटंगन टोडंग नू अम्बोस ती आ एबस्रकन अरगी ख़क्खना गूटी मल बेद्दोस? 5अरा आस अदिन ख़क्खदस ती खुसमारनुम अदिन ख़ेसेर नू चेड़दस। 6अरा आस एड़पा बरदस ती तंग्है संगीरिन अरा अरबर-परबारिन ख़ॊंड़दस अरा ब'अदस, ‘एंग्है गने खुसमार'आ, एन्देरगेका ऎन एंग्है एबस्रका भेन्ड़ोन बिद्दका र'अदन।’ 7ऎन निमन ब'अदन, ई लेक्खम जिया किर्त'अना ही चाड़ मलका निनाबे उजगो आलर गे मेर्ख़ा नू ऎ बग्गे खुसमारना मनो अदिन ती कोड़हे खुसमारना मेर्ख़ा नू मनो इकला ओन्टा पपहा आलस जियन किर्त'अदस।
एबस्रका ढिबा ही जोक्खा ख़ीरी
8ओन्टा मुक्का गुसन दस गोटंग चान्दी ही ढिबा र'ई। अरा आद ओन्टन एबस'ई चि'ई होले, आद बिल्ली दग'ई ती एड़पन इर्री उथरी अरा अदन अरगी ख़क्खना गूटी चिहुंक ती बिद्दी। 9अरा अदिन बिद्दी होले, आद तंग्है संगियारिन अरा अरबर-परबारिन मीख़ी ती तिंगी, ‘एंग्है गने खुसमार'ए एन्देरगेका ऎन एंग्है एबसका ढिबन बिद्दिय'अन।’ 10ऎन निमन ब'अदन, एन्नेम ओन्टा जियन किर्ताचका आलासी पत्त नू धर्मेसी पैकर ही मुन्दहारे रिझी मनी।”
एबस्रका ख़द्दस
11फिन येसुस बाचस, “ओर्त आलासी ऎनोटा ख़द्दर रहचर। 12अबड़र ती सन्निस तम्बासिन बाचस, ‘अना बबा, खुर्जी ती एंग्है बटन एंगा चि'आ।’ ख़ने तम्बस आर गे तम्है खुर्जिन ख़ट्टियस चिच्चस। 13जोक्क उल्ला हूँ मल मंजा, सन्नी ख़द्दस तंग्है उर्मिन जॊगड़स ती गेच्छा राजी केरस। अरा असन मलदौ उज्जना ती तंग्है खुर्जिन नठाबाचस। 14अरा इकला आस उर्मिन मलदौ डहरे ती मुंजा ख़च्चियस, आ राजी नू कोहाँ राजी कीड़ा मंजा अरा आस कीड़ा सार'आ हेलरस। 15औंगे आस आ राजी ता ओर्त आलस गुसन बूता गे केरस। आस आसिन तंग्है ख़ल्ल नू किस्सी ख़ापा तइय्यस। 16आस कीड़ा ही चड्डे किस्सी गुट्ठी मॊख़ालिया आ कुन्डो ती तंग्है कूलन उड़त'आ बिद्दियस। लिकिन नॆ हूँ आस गे एन्द्रा हूँ मल चिच्चर। 17अक्कु आस तंग्है फरीफरी सुरता नू बरचस ती बाचस, ‘एम्बस गुसन बग्गे जॊंख़र र'अनर। आर गे उड़ुच लिंग्ह'आ ओन्ना-मॊख़ना र'ई। लिकिन ऎन इसन कीड़ा ती खे'आलदन। 18ऎन अक्कु इसते अम्बोन ती एम्बस गुसन किर्रोन अरा आसिन ब'ओन, ‘अना बबा, ऎन धर्मेसी अरा निंग्है बिड़दो नू पाप नंजका र'अदन। 19अरा ऎन अक्कु ती निंग्है ख़द्द बारना जॊगे मलकन, निंग्है ओर्त जॊंख़र लेक्खा एंगन उइय्या।’’
20तहाँ आस अम्बियस ती तम्बस गुसन बरचस। लिकिन आस गेच्छम रहचस ख़नेम तम्बस आसिन ईरियस अरा सोग्गे ईरियस ती बुंगनुम केरस ती आसिन ख़िंवच्चियस अरा चुंखियस। 21तंग्दस आसिन बाचस, ‘अना बबा, ऎन धर्मेसी अरा निंग्है बिड़दो नू पाप नंजका र'अदन। ऎन अक्कु ती निंग्है ख़द्द बारना जॊगे मलकन।’ 22लिकिन तम्बस तंग्है जॊंख़ारिन बाचस, ‘चाँड़हे बॆस ती बॆस किचरी गुट्ठिन ओन्द्र'आ अरा आसिन अत्त'आ, अरा आसी ख़ेक्खा नू मुद्दी अत्त'आ, अरा ख़ेड्डे नू जुता अत्त'आ। 23अरा डढरका बछरन ओन्द्र'आ अरा एड़बा, अन्ति नाम ओनोत दरा रिरयार'ओत। 24ई एंग्दस केचका बेसे रहचस, लिकिन आस अक्कु उज्जालदस, अरा एबस्रका रहचस, लिकिन अक्कु ख़क्खरस।’ ख़ने आर रिरयार'आ हेलरर।
25लिकिन आसी कोहाँ ख़द्दस ख़ल्ल नू रहचस। आस एड़पा हेद्दे अंड़सियस ख़ने, अस्सना पाड़नन अरा नलनन मेंजस। 26अन्ति आस ओन्टा जॊंख़ासिन मीख़ियस ती मेंजस, ‘एन्देर मना लगी?’ 27जॊंख़स आसिन बाचस, ‘निंग्ड़ीस बरचकादस, निम्बस डढरका बछरन इड़बियस, एन्देरगेका आस कोड़ेम किर्रियस।’ 28कोहाँ ख़द्दस कैरारस केरस, अरा भितरी कोर'आ मल बिद्दियस। ख़ने तम्बस उरखस ती आसिन गोहरारस। 29लिकिन आस तम्बासिन आनाकिर्ताचस, ‘ऎरा, ऎन इवंदा चाँन ती निंग्है नलख नन्दन अरा इकला हूँ निंग्है पॆसकन मल चाड़कन। अन्नु हूँ नीन एंगा गे इकला हूँ ओन्टा बोकड़न एंग्है संगियर गने रिरयार'आ गे मल चिच्कय। 30लिकिन ई निंग्दस भड़वा नलख ती निंग्है उर्मी खुर्जिन मुंजियस ती बरचस। नीन आस गे डढरका बछरन इड़बका र'अदय।’ 31तम्बस आसिन बाचस, ‘अना बेटा, नीन गा सगरो एंग्है गने र'अदय, अरा एंग्है उर्मी निंग्है दिम हिके। 32लिकिन अक्कु नमा रिरयारना अरा रिझ्रना चाड़ र'ई। एन्देरगेका ईद एन्ने बेसे का निंग्ड़िस केचका रहचस, लिकिन अक्कु उज्जदस, अरा एबस्रका रहचस, लिकिन अक्कु ख़क्खरस।’”
Právě zvoleno:
लूकस 15: KURUXBSI
Zvýraznění
Sdílet
Kopírovat
Chceš mít své zvýrazněné verše uložené na všech zařízeních? Zaregistruj se nebo se přihlas
Kurux NT - पुना गच्छरना NT
Copyright © Bible Society of India, 2014.
Used by permission. All rights reserved worldwide.
