MATIYU 16

1Di saha ka Farisii dimseeba, ni Saddusii dima daa ti kyɛ u saani na. Ba daa boori la ba bɛri u, lala zugu ka ba daa yɛli u, ni, u niŋma makkri tumni ka ba nya, ka di wulisi, ni, Naawunni mi u yɛla. 2Ka Yisa daa labsi n‑yɛli ba, ni, “Ya bu nya? - zaanoori saha ka ya gɔsiri saazugu n‑yɛtti, ni, sangbana moaaya, saa bu ya mi: 3asusuba muna ka ya yɛtti, ni, saa ku n‑sɔbgi vilim, saa nin mi. Tɔ - sangbana gɔsibu ŋɔn nyɛ seem ka ya mi suŋŋa, ka mun na zi pampaŋŋɔ saha ŋɔn wulisiri makkri yɛla seem. Ka wula nla? 4Zuna niriba wa n nyɛ ninvugbeeri ban boori zina. Ba kur bɛ la alahazibu nyaabu ni ba ti baŋŋi yɛla, amaa ba ku ti nya sɛseelli m‑paasi la anabi Gyoona alahazibu yɛla maa.” Ka u daa bakki ka kyɛ ba.

5Di saha ka ba daa kpɛ nyariŋŋu maa ni ni ba ti lɔŋŋi mɔ'ari maa, ka u nyaandɔliba maa daa tam ka bu mari boroboro. 6Ka Yisa daa yɛli ba, ni, “Ya gbaam ya mansi suŋŋa zaŋŋi n‑kyaŋŋi Farisii dima dabina la, ni Saddusii dima dinni gba.” 7Ka ba daa piili n‑tɔ'asiri ni taaba, ni, “U yɛtti la lala tin ka boroboro la zugu!” 8Ka Yisa daa mi ban tɔ'asiri seelli maa, ka dizugu u daa yɛli, ni, “Ya yɛddakɔŋŋniba wa! Wula ka ya tɔ'asiri taaba, ni, yan ka boroboro zugu? 9Ya na bu mi, bee, bu laa n‑teaai boroboro anu an tɔri n‑ti niriba tusa anu la yɛla? Ka an daa kpalim la peeri ala ka ya daa vaai? 10Ka boroboro ayɔpɔi n‑tisi niriba tusa anaasi la yɛla muna, peeri ala ka ya daa vaai, an daa kpalim la? 11Tɔ: ka dinŋɔna wula zugu ka ya bu mi, ni, pa boroboro yɛla ka n tɔ'asi ka yɛli, ni, ya gbaam ya mansi suŋŋa zaŋŋi n‑kyaŋŋi Farisii dima dabina la, ni Saddusii dima dinni gba?” 12Ka lala saha maa ka ba daa baŋŋi, ni, pa boroboro dabina yɛla ka u tɔ'asiri n‑tiri ba, amaa wulisigu yɛla, Farisii dima ni Saddusii dima ban daa wulisiri seem la, ka u tɔ'asira.

13Ka Yisa daa kyaŋŋi nti paai tinkpanseesi an pɔri Filipi Sizarii la ni. Ka u daa boosi u nyaandɔliba maa, ni, “Niriba maa yɛtti, ni, man Ninsaala Bii maa nyɛ la ŋɔni?” 14Ka ba yɛli u, ni, “Baseeba ban yɛtti, ni, Gyɔni Kɔsuura n nyɛ i; seeba mun yɛtti, ni, Ilaygya; ka seeba mun yɛtti, ni, Gyɛrimaaya, bee, kurimbuni sa anabisɔa.” 15Ka u daa yɛli ba, ni, “Ka yarima muna? Ya yɛtti la wula?” 16Ka Saimoon Piita daa labsiya, ni, “I nyɛ la Masiiya Kirisita, sɔ Naawunni ŋɔn tumni na nti tiligi ti: Naawunni ŋɔn nyɛ Nyɔvuri Daana Bii n nyɛ i.” 17Ka Yisa daa labsi n‑yɛli u, ni, “Mboo! Zugsuŋŋu bɛ ni n‑ti nyini, Saimoon, nyin Gyoona bii wa! Dama pa ninsaala n wulisi i lala maa, amaa m Ba ŋɔn bɛ la arizana ni maa - ŋɔna n wulisi i. 18Man mun yɛtti i wa, ni, i yuuri boonni la Piita, ka di gbinni nyɛ la ‘tampiiya’: tɔ, n niriba nin la'am n‑tɔm tampii wa zugu, ka Sintaani suulinsi ku toaai n‑zabi ba n‑nyaŋŋi. 19N nin zaŋŋi Arizana naam saafibiisi n‑ti i, ka nyin kpari bunseelli duniya wa ni, lala bunni nin ti kpari arizana ni gba, halli ka nyin kparigi bunseelli duniya wa ni, lala bunni nin ti kparigi arizana ni gba.” 20Di saha maa ka u daa kpaam ba, ni, ba di yɛli sɔa, ni, ŋɔna n nyɛ Masiiya maa.

21Ka lala saha maa zaŋŋi n‑kyɛnna ka Yisa Kirisita Masiiya daa piili n‑wulisiri u nyaandɔliba maa, ni, u nin namsi pam kpamma maa nuusi ni, ban ni zaaligu karimbadima ni gyeeŋŋu toondaandima zaa. Ni, ba nin ku u, amaa dabsa ata daari u nin yisigi n‑labi u nyɔvuri ni. 22Ka Piita daa mari u n‑labi kpaŋŋa m‑piili n‑kpaamni u, ni, “Ay, n dugma! Di ku toaai n‑niŋi i lala!” 23Yisa mun daa ŋmaligi n‑yɛli Piita, ni, “Bakkma ka kyɛ ma, nyin Sintaani wa! I ta'ari la n soori.”, ni, “I teesa wa bu yi Naawunni saani na, amaa a kur nyɛ la ninsaala teesa.”

24Tɔ; ka Yisa daa yɛli u nyaandɔliba maa zaa, ni, “Ŋɔnkam boori u kyɛ n saani na, see ka u za'asi u mammaŋŋa, ka kpikki u kum dɔpulli n‑dɔli ma. 25Ŋɔnkam zaa yi boori u nyɔvuri maa nin kɔŋŋi ka; ŋɔn mun yi sakki ni u kɔŋŋi u nyɔvuri, mani zugu, ŋɔna n nyɛ sɔ ŋɔn nin nya nyɔvuri. 26Ninvugsɔ yi ti deaai duniya wa zaasa ka kɔŋŋi u nyɔvuri, nyɔbɔ ka u nya? Seelli mun ka ni ka ninsaala nin zaŋŋi u nyɔvuri n‑takki ka. 27Ya bu nya? - Ninsaala Bii maa siri nin zaŋŋi u Ba Naawunni gyirima ka kyɛ ka Naawunni malaakadima dɔli u ka u kyɛ na: lala saha maa ka u nin yɔ sɔkam samni hoo di daama tuma ŋɔn daa bɛ seem la.” 28Ni, “Yɛlimaŋni ka n yɛtti ya wa, ninvugseeba m bɛ kpa, ban ku kpi halli ka ti nya ka Ninsaala Bii maa kyɛ na ni u naam yiiko.”

Právě zvoleno:

MATIYU 16: maw

Zvýraznění

Sdílet

Kopírovat