MATIYU 12

1Tɔ, ka lala saha maa ka Yisa daa dɔli puri ni n‑gatta, Vuusim dabsiseaa ni. U nyaandɔliba n daa dɔli u, ka kɔm daa mari ba ka ba daa kabri kasana maa n‑ŋɔbra. 2Ka Farisidima daa nya lala, ka yɛli u, “Nyama! I nyaandɔliba wa tumni la puri tuma. Ba galimni zaaligu maa zaŋŋi n‑kyaŋŋi Vuusim Dabsiri wa.” 3Ka Yisa yɛli ba, “Ammi, ya na zi n‑karim NaaDauda yɛla maa? Ni, ŋɔn ni u taaba daa bɛ ni ka kɔm daa gbaai ba, 4ka u daa kpɛ Naawunni gyeeŋŋu zii maa, n‑zaŋŋi boroboro n‑ŋɔbi. Pa boroboro anŋɔ taabu ka ba dooli Naawunni tooni ka a kyisiri ni? Ii! A kyisiri n‑tiri u taaba - halli n‑tiri u mammaŋŋa gba - see maalimaanniba kɔkɔ n ŋɔbri a. 5Bee, ya na zi n‑karim Musa zaaligu yɛla? Ni, maalimaanniba tumni la ba tuma Naawunni Gyeeŋŋu Yiri puuni Vuusim Dabsiri. Ban n tumni la Vuusim Dabsiri maa ka bu deaari taalli di zugu. 6Man yɛtti ya wa, ni, bunseelli n bɛ kpa n‑gaari Gyeeŋŋu Yiri maa. 7Sɔppu la yɛliya, ni, ‘Man Naawunni bu boori ni ya maanni m‑maanni bunkɔbri wa, amaa m boori ya zɔri niriba namboo.’ Ya siri da mi dinŋɔ gbinni, ya naa n‑ku galim niriba ka ba bu niŋi taalli halli beela. 8Dama man Ninsaala Bii n su Vuusim Dabsiri fukumsi gba.”

9Ka Yisa daa bakki bɛni n‑kyaŋŋi nti kpɛ ba la'aŋŋu duu ni. 10Ka dɔsɔ ŋɔn nuu kpi daa bɛ bɛni. Ka ba daa boosi Yisa n‑yɛli, ni, “Ammi, soori bɛ ni ni ba tibi niriba Vuusim Dabsiri maa ni?” - Dama ba daa boori daliiri ni ba galim u. 11Ka Yisa daa labsi n‑yɛli ba, ni, “Ya ninvugsɔ peoo yi ti lu bɔ'azuliŋŋu ni, ka di nyɛ la Vuusim Dabsiri daari, u nin yiisi u na, bee, u nin kyɛ u? 12Ka ninsaala bu gaari peoo? Dizugu soori bɛ ni ni ti tum tunsuma Vuusim Dabsiri daari.” 13Di saha ka u yɛli nukpiiŋŋu daana maa, ni, “Teaam i nuu maa!” Ka u daa teaai ka u nuu maa daa nya tippu n‑leebi hoo kanla. 14Ka Farisidima daa doaai ya'abi, n‑yi duu maa ni nti ŋmeeri taaba saawara m‑boori sɔseaa ba nin nya ni ba ku Yisa.

15Yisa ŋɔn daa ti wum lala, u daa bakki n‑kyaŋŋi mɔ'ari ni, ka niriba pam daa dɔli u. U daa tibi ba baaridima zaa, 16amaa ka daa kpamsi ba, ni, ba di yɛli daadam maa ŋɔn nyɛ sɔa. 17Dinŋɔ daa niŋi ni di kyɛ ka seelikam siri ti niŋi hoo anabi Aizaaya ŋɔn daa pun yɛli seem la: ni#:-

18“Naawunni yɛliya, ni#:-

‘N bii nŋɔa, mani n yiisi u:

N wuri u, ka n sufu laa m‑pɛligi u zugu.

N nin zaŋŋi n Sii Kasi n‑niŋi u ni,

U nin wulisi n sariya karibu yɛla

N‑ti tinsi zaa niriba maa.

19U ku ŋmɛ nangbankpeemni,

Bee, u tasiri pampam.

U ku kyɛ ka ba wum u kukɔri,

Bee, n‑tɔ'asi pampam timpuuni.

20U ku kabi kika'ari kan mari daalimni;

Bee, n‑kpiisi firila gaariga kan bu sakki nyoaari suŋŋa.

U nin kpalim m‑bɛ lala

Halli ka yɛlimaŋni ti nyaŋŋi zaa.

21Tinsi zaa niriba nin ti wum u yuuri,

Ka zaŋŋi ba tama n‑danni u.’ ”

22Di saha ka ninvugseeba daa zi dɔsɔ ŋɔn nyɛ zooma ka bu toaai n‑tɔ'asiri n‑kyɛ Yisa saani na; doo maa daa bɛ lala dama arizimbeoo daa bɛ u ni. Ka Yisa daa tibi zɔligu wa ka kyɛ la u laa n‑tɔ'asiri ka nyari yaasa. 23Di daa gyɛri zama maa pam, Yisa ŋɔn tum seem maa. Ba daa yɛtti taaba, ni, “Pa NaaDauda ya'aŋŋa maa nŋɔa? - Pa tin guri sɔ kyɛnni na la nla?” 24Amaa Farisii dima maa daa wum lala ka daa yɛli, “U zaŋŋi ArizinNaaba yiiko n‑katti la arizimbeeri maa. Ii! - Biyɛlizibuli n siri mari u.” 25Ka Yisa daa mi ba n daa teesiri seem, ka di zugu u daa yɛli ba, ni, “Tinseelli kam zaa kan timbiisi yi purigi n‑zabri taaba la nin sa'am zaa. Bee, tinseaa, bee, yiriseaa, m bɛ ni kan niriba yi purigi n‑zabri taaba, lala tiŋŋa, bee, yiri, ku toaai n‑zaani. 26Dizugu Sintaani muna, u yi ti katti u mammaŋŋa niriba n‑zabri ba, ŋɔn gba suulinsi ya niŋi la wula n‑zaani? 27Ni, n zaŋŋi la Biyɛlizibuli yiiko n‑katti arizimbeeri maa, ka dinŋɔna ya karimbiseeba ban katti ba la - ba zaŋŋi ŋɔni dinni n‑katti ba? Dizugu ban nin ti di ya yɛttɔ'a wa sariya n‑lusi ya. 28Ka m mun zaŋŋi la Naawunni Siiya n‑katti arizimbeeri n‑yiisiri niriba ni, dinŋɔna Naawunni naam daŋŋi m‑paai ya na. 29Ka ba ya niŋi la wula n‑kpɛ yaa daana yiri n‑zu u neema maa ka di pa la ba daŋŋi n‑lɔ lala yaa daana maa ka naayi nyaŋŋi n‑fa u yiri ni buna zaasa? 30Ka ninvugsɔ ŋɔn ku sakki ni u zɛ n nyaaŋŋa, ŋɔna n za'asi ma n‑yi n nyaaŋŋa; bee sɔ yi ku suŋŋi ma ni ti la'asi bunwurima, u wurimni a m‑basira. 31Dinzugu ka n yɛtti ya maa, niriba yi tum tumbeeri, bee ba yi sa'am Naawunni yuuri, Naawunni nin kyɛ lala ala'akyi taalli zaa m‑pɛŋŋi ba, amaa ba yi ti sa'am Sii maa yuuri, kyɛ-m‑pɛŋŋi ka ni. 32Halli ŋɔn tɔ'asi yɛttɔ'abeeri n‑galim man Ninsaala Bii maa gba, u nin toaai n‑nya kyɛ-m‑pɛŋŋi; amaa ŋɔn mun yɛli seelli n‑galim Sii Kasi maa, di daama ŋɔn kur ku nya u taalli kyɛ-m‑pɛŋŋi, zuna halli ni sahaseelli zaa.”

33Ka Yisa daa laa n‑yɛli ba, “Ya kyɛ ka tiseaa nyɛ tisuŋŋu, ka ka nin wanni walisuma. Di yi pa lala, tibeoo n nyɛ ka, ka ka nin wanni walibeeri. Ba gɔsiri la tii kam zaa wala ni ba ti baŋŋi tii maa ŋɔn bɛ seem. 34Ya bunkyɔ'ama wa! Ya kur ŋmanni la wa'abeeri! Ya ya niŋi la wula n‑yɛtti din veela, ka ya mammansi n nyɛ ninvugbeeri? Dama dinkam bɛ ninsaala sufu ni nti paali ka, dina ka u yiisiri u noori ni na. 35Bunsuma yi bɛ ninvugsuŋŋu puuni m‑paali u, bundaana n nyɛ u, ka u nin yiisiri bunsuma maa na n‑tisira; ka ninvugbeoo ŋɔn mun yi paali ni bumbeeri yiisiri la bumbeeri n‑tisiri na. 36Man yɛtti ya wa, ni, sariya karibu Zaadaari ba nin boosi sɔkam boosa zaŋŋi n‑kyaŋŋi yɛttɔ'ayɔya kam zaa ŋɔn daa tɔ'asi. 37Dama i noori yɛligu zugu ka ba nin yiisi i na, ni, yɛlimaŋni daana; ka i noori yɛligu zugu yaasa ka ba nin lusi i m‑basi.”

38Di saha maa ka karimba dimseeba daa tɔ'asi n‑ti u, ni Farisii dimseeba m‑paasi, n‑yɛli, ni, “Ti Karimba, ti boori la i tum alahazibu tunseaa n‑wulisi ti.” 39Ka u daa labsi n‑yɛli ba, ni, “Zuna niriba wa nyɛ la ninvugbeeri ban boori zina. Ba kur bɛ la alahazibu nyaabu ni, ni ba ti baŋŋi yɛla, amaa ba ku ti nya sɛseelli m‑paasi Anabi Gyoona alahazibu yɛla maa. 40Gyoona ŋɔn daa bɛ zintitaari maa puu ni n‑niŋi daba ata ni yunsi ata maa, lala ka man Ninsaala Bii maa gba nin bɛ tingbaŋŋu puuni n‑niŋi daba ata ni yunsi ata bɛni. 41Niniva dima gba daa wum Gyoona wa'azu yiisigu la ka daa kyɛ ba tumbeeri m‑basi ka niŋi tuuba, ka dizugu ba nin doaai n‑galim zuna niriba wa Zaadaari maa, dama ŋɔn gaari anabi Gyoona bɛ la kpa zuna ka ba bu ya wum. 42Pɔ'a-naaba sɔ ŋɔn daa su nudirigu luga tinseaa la daa yi wa'aligu n‑kyɛ na ni u ti wum NaaSulɛmaana yam yɛttɔ'a maa, ka dizugu u nin doaai n‑galim zuna niriba wa Zaadaari maa, dama ŋɔn gaari NaaSulɛmaana bɛ la kpa zuna ka ba bu ya wum.”

43Ka Yisa daa laa n‑yɛli ba, “Tɔ; ka arizimbɛsɔ n daa bɛ ni, ka u daa kpɛ dɔsɔ puuni n‑su u. Ka ba daa yiisi u ŋɔn daa bɛ dɔsɔ puuni maa ni n‑kari m‑basi. Ka u daa yi n‑kyaŋŋi n‑gyinni yoo ni, m‑bɛ kukoo ni m‑boori vuusim ziiya, halli nti gyɛa. 44Di saha maa ka u daa yɛli, ni, ‘See ka n labi n doo maa saani - yiri seaa man daa yi ka kyɛ la ni!’ Ka u daa ti labi na n‑nya ka sɔsɔ ka bɛni ka ba pun pii yiri maa n‑sɛ'asi ka kasikasi ka ka veela; 45ka dizugu u daa labi n‑kyaŋŋi n‑zaŋŋi u arizintaaba ayɔpɔi seeba ban bɛ n‑gaari u mammaŋŋa, ni ba ti paasi u zugu, ka ba daa kpɛ nti bɛ bɛni. Di saha maa ka di daama beesigu daa bɛ pam n‑gaari din daa daŋŋi m‑bɛ seem. Ka di kur bɛ la lala zuna niriba saani.”

46Ka Yisa ŋɔn daa na tɔ'asiri n‑tiri zama maa, u ma ni u tunzɔppa daa paai na n‑zaani samanni, ni, ba boori n‑tɔ'asi yɛttɔ'aseaa n‑ti u. 47Ka ninvugsɔ daa yɛli u, ni, “I ma ni i tunzɔppa bɛ samanni m‑boori n‑tɔ'asi yɛttɔ'aseaa n‑ti i.” 48Ka Yisa daa labsi n‑yɛli u, “M ma n nyɛ ŋɔni? ni, n tunzɔppa n nyɛ bandima?”, 49ka daa teaai u nuu m‑bugsi u nyaandɔliba maa ka daa yɛli, “Nnya ba! M ma ni n tunzɔppa maa nŋɔa! 50Ŋɔnkam zaa tumni m Ba ŋɔn bɛ arizana ni la yuubu nyɛ la n tunzɔa, bee n tunzɔpɔ'a, bee m ma.”

Právě zvoleno:

MATIYU 12: maw

Zvýraznění

Sdílet

Kopírovat