ໂຢຮັນ 1
1
ພຣະທຳແຫ່ງຊີວິດ
1ເມື່ອຕົ້ນເດີມນັ້ນ ພຣະທຳຊົງເປັນຢູ່ແລ້ວ ພຣະທຳນັ້ນຊົງສະຖິດຢູ່ກັບພຣະເຈົ້າ ແລະພຣະທຳນັ້ນແຫຼະ ຊົງເປັນພຣະເຈົ້າ. 2ແຕ່ຕົ້ນເດີມນັ້ນ ພຣະທຳຊົງສະຖິດຢູ່ກັບພຣະເຈົ້າ. 3ພຣະເຈົ້າໄດ້ຊົງສ້າງທຸກສິ່ງຂຶ້ນໂດຍທາງພຣະທຳ ໃນບັນດາສິ່ງທີ່ເປັນມານັ້ນ ບໍ່ມີສິ່ງໜຶ່ງສິ່ງໃດທີ່ເປັນມາໂດຍນອກຈາກພຣະທຳ. 4ພຣະທຳນັ້ນ ຊົງມີຊີວິດຢູ່ໃນພຣະອົງເອງ ແລະຊີວິດນັ້ນເປັນຄວາມສະຫວ່າງຂອງມະນຸດ. 5ຄວາມສະຫວ່າງສ່ອງເຂົ້າມາໃນຄວາມມືດ ແລະຄວາມມືດນັ້ນ ກໍເອົາຊະນະຄວາມສະຫວ່າງບໍ່ໄດ້ຈັກເທື່ອ.
6ພຣະເຈົ້າໄດ້ໃຊ້ຜູ້ໜຶ່ງມາ ຊື່ວ່າ, “ໂຢຮັນ” 7ເພິ່ນໄດ້ມາເພື່ອເປັນພະຍານເຖິງຄວາມສະຫວ່າງ ເພື່ອວ່າຄົນທັງປວງຈະໄດ້ເຊື່ອຍ້ອນຖ້ອຍຄຳທີ່ເພິ່ນກ່າວນັ້ນ. 8ເພິ່ນເອງບໍ່ແມ່ນຄວາມສະຫວ່າງ ເພິ່ນໄດ້ມາເພື່ອເປັນພະຍານເລື່ອງຄວາມສະຫວ່າງ. 9ນີ້ແມ່ນຄວາມສະຫວ່າງອັນແທ້ຈິງ ຄືຄວາມສະຫວ່າງທີ່ເຂົ້າມາໃນໂລກ ແລະສ່ອງແກ່ຄົນທັງປວງ.
10ພຣະອົງໄດ້ສະຖິດຢູ່ໃນໂລກ, ຊຶ່ງພຣະເຈົ້າໄດ້ສ້າງຂຶ້ນໂດຍທາງພຣະອົງ ແຕ່ໂລກບໍ່ໄດ້ຮູ້ຈັກພຣະອົງ. 11ພຣະອົງໄດ້ມາສູ່ບ້ານເມືອງທີ່ເປັນຂອງພຣະອົງເອງ ແຕ່ຄົນໃນບ້ານເມືອງຂອງພຣະອົງບໍ່ໄດ້ຕ້ອນຮັບພຣະອົງ. 12ແຕ່ສ່ວນບັນດາຜູ້ທີ່ຕ້ອນຮັບພຣະອົງ ຄືຜູ້ທີ່ເຊື່ອໃນພຣະນາມຂອງພຣະອົງ ພຣະອົງກໍຊົງປະທານສິດໃຫ້ກາຍເປັນບຸດຂອງພຣະເຈົ້າ. 13ຊຶ່ງບໍ່ໄດ້ເກີດຈາກເລືອດເນື້ອ ຫລືກາມ ຫລືຄວາມຕ້ອງການຂອງມະນຸດ ແຕ່ເກີດຈາກພຣະເຈົ້າ.
14ພຣະທຳໄດ້ຊົງບັງເກີດເປັນມະນຸດ ແລະອາໄສຢູ່ທ່າມກາງເຮົາທັງຫລາຍ ບໍຣິບູນດ້ວຍພຣະຄຸນແລະຄວາມຈິງ ເຮົາທັງຫລາຍໄດ້ເຫັນສະຫງ່າຣາສີຂອງພຣະອົງ ຄືສະຫງ່າຣາສີທີ່ພຣະອົງໄດ້ຮັບ ໃນຖານະທີ່ເປັນພຣະບຸດອົງດຽວຂອງພຣະບິດາເຈົ້າ. 15ໂຢຮັນໄດ້ເປັນພະຍານເຖິງເລື່ອງຂອງພຣະອົງ ເພິ່ນໄດ້ຮ້ອງປະກາດວ່າ, “ຜູ້ນີ້ແຫຼະ ຄືຜູ້ທີ່ເຮົາໄດ້ກ່າວເຖິງວ່າ ຜູ້ທີ່ມາພາຍຫລັງເຮົາກໍຍິ່ງໃຫຍ່ກວ່າເຮົາ ເພາະພຣະອົງເປັນຢູ່ກ່ອນເຮົາແລ້ວ.”
16ພວກເຮົາທຸກຄົນໄດ້ຮັບຄວາມຄົບບໍຣິບູນຈາກພຣະອົງ ເປັນພຣະຄຸນຊ້ອນພຣະຄຸນ. 17ພຣະເຈົ້າໄດ້ໃຫ້ກົດບັນຍັດໂດຍທາງໂມເຊ ສ່ວນພຣະຄຸນແລະຄວາມຈິງນັ້ນ ໄດ້ມາໂດຍທາງພຣະເຢຊູຄຣິດເຈົ້າ. 18ບໍ່ມີຜູ້ໃດໄດ້ເຫັນພຣະເຈົ້າຈັກເທື່ອ, ແຕ່ພຣະບຸດອົງດຽວທີ່ເປັນພຣະເຈົ້າ ຊຶ່ງຢູ່ໃນຊວງເອິກຂອງພຣະບິດາເຈົ້າ ພຣະອົງນັ້ນແຫຼະ ໄດ້ເຮັດໃຫ້ພວກເຮົາຮູ້ຈັກພຣະເຈົ້າ.
ຄຳພະຍານຂອງໂຢຮັນບັບຕິສະໂຕ
(ມທ 3:1-12; ມຣກ 1:1-8; ລກ 3:1-18)
19ນີ້ແມ່ນຄຳພະຍານຂອງໂຢຮັນ ໃນເວລາພວກເຈົ້າໜ້າທີ່ຢິວໄດ້ໃຊ້ພວກປະໂຣຫິດ ແລະພວກເລວີບາງຄົນຈາກນະຄອນເຢຣູຊາເລັມ ມາຖາມເພິ່ນວ່າ, “ທ່ານແມ່ນຜູ້ໃດ?”
20ໂຢຮັນກໍບໍ່ໄດ້ປະຕິເສດ ຄືຍອມຮັບວ່າ, “ເຮົາບໍ່ແມ່ນພຣະຄຣິດ.”
21ພວກເຂົາຈຶ່ງຖາມອີກວ່າ, “ຖ້າດັ່ງນັ້ນ ທ່ານແມ່ນຜູ້ໃດ? ທ່ານແມ່ນເອລີຢາບໍ?”
ໂຢຮັນຕອບວ່າ, “ເຮົາບໍ່ແມ່ນເອລີຢາ.”
ພວກເຂົາຖາມວ່າ, “ທ່ານເປັນຜູ້ທຳນວາຍບໍ”?
ໂຢຮັນຕອບວ່າ, “ບໍ່ແມ່ນ.”
22ພວກເຂົາຈຶ່ງຖາມຕື່ມອີກວ່າ, “ຖ້າດັ່ງນັ້ນ ບອກພວກເຮົາແດ່ວ່າ ທ່ານແມ່ນຜູ້ໃດແທ້? ເພື່ອພວກເຮົາຈະໄດ້ນຳເອົາຄຳຕອບໄປບອກຄົນທີ່ໄດ້ໃຊ້ພວກເຮົາມາ, ທ່ານວ່າ ທ່ານເອງເປັນຜູ້ໃດ?”
23ໂຢຮັນຈຶ່ງຕອບວ່າ,
“ຝ່າຍເຮົາເປັນສຽງຂອງຜູ້ທີ່ຮ້ອງປະກາດໃນຖິ່ນແຫ້ງແລ້ງກັນດານວ່າ, ຈົ່ງເຮັດຫົນທາງຂອງອົງພຣະຜູ້ເປັນເຈົ້າໃຫ້ຊື່ໄປ ຕາມທີ່ຜູ້ທຳນວາຍເອຊາຢາໄດ້ກ່າວໄວ້.”
24ພວກທີ່ຖືກໃຊ້ມານັ້ນແມ່ນຄົນໃນພວກຟາຣີຊາຍ 25ພວກເຂົາຖາມໂຢຮັນວ່າ, “ຖ້າທ່ານບໍ່ແມ່ນພຣະຄຣິດ, ບໍ່ແມ່ນເອລີຢາ ແລະບໍ່ແມ່ນຜູ້ທຳນວາຍແລ້ວ, ເປັນຫຍັງທ່ານຈຶ່ງໃຫ້ຮັບບັບຕິສະມາ?”
26ໂຢຮັນຕອບພວກເຂົາວ່າ, “ເຮົາໃຫ້ຮັບບັບຕິສະມາດ້ວຍນໍ້າ ແຕ່ມີຜູ້ໜຶ່ງຢືນຢູ່ທ່າມກາງພວກທ່ານ ທີ່ພວກທ່ານບໍ່ຮູ້ຈັກ. 27ຜູ້ນັ້ນແຫຼະ ມາພາຍຫລັງເຮົາ ເຮົາບໍ່ສົມຄວນຈະແກ້ແມ່ນແຕ່ສາຍຮັດເກີບຂອງເພິ່ນ.”
28ເຫດການເຫຼົ່ານີ້ໄດ້ເກີດຂຶ້ນທີ່ບ້ານເບັດທານີ ຟາກແມ່ນໍ້າຈໍແດນທາງທິດຕາເວັນອອກ ບ່ອນທີ່ໂຢຮັນກຳລັງໃຫ້ຮັບບັບຕິສະມາຢູ່.
ລູກແກະຂອງພຣະເຈົ້າ
29ວັນຕໍ່ມາ ໂຢຮັນໄດ້ເຫັນພຣະເຢຊູເຈົ້າກຳລັງຍ່າງມາຫາຕົນ ຈຶ່ງກ່າວຂຶ້ນວ່າ, “ເບິ່ງແມ! ລູກແກະຂອງພຣະເຈົ້າຜູ້ຊົງຮັບເອົາບາບກຳຂອງມະນຸດສະໂລກໄປເສຍ 30ຜູ້ນີ້ແຫຼະ ທີ່ເຮົາໄດ້ບອກວ່າ, ‘ຜູ້ທີ່ມາພາຍຫລັງເຮົາ ກໍຍິ່ງໃຫຍ່ກວ່າເຮົາ ເພາະທ່ານເປັນຢູ່ກ່ອນເຮົາ.’ 31ເຮົາເອງກໍບໍ່ຮູ້ຈັກພຣະອົງ ແຕ່ເພື່ອໃຫ້ທ່ານເປັນທີ່ຮູ້ຈັກແກ່ປະຊາຊົນອິດສະຣາເອນ ເຮົາຈຶ່ງໄດ້ມາໃຫ້ຮັບບັບຕິສະມາໃນນໍ້າ.”
32ຝ່າຍໂຢຮັນໄດ້ໃຫ້ຄຳພະຍານນີ້ວ່າ, “ເຮົາໄດ້ເຫັນພຣະວິນຍານເໝືອນດັ່ງນົກເຂົາລົງມາຈາກທ້ອງຟ້າ ແລະສະຖິດຢູ່ເທິງທ່ານ. 33ເຮົາເອງຍັງບໍ່ຮູ້ຈັກ ແຕ່ຜູ້ທີ່ໄດ້ໃຊ້ເຮົາມາໃຫ້ຮັບບັບຕິສະມາໃນນໍ້າ ໄດ້ກ່າວແກ່ເຮົາວ່າ, ‘ເຈົ້າຈະເຫັນພຣະວິນຍານລົງມາຢູ່ເທິງຄົນໃດ ຄົນນັ້ນແຫຼະ ເປັນຜູ້ໃຫ້ຮັບບັບຕິສະມາດ້ວຍພຣະວິນຍານບໍຣິສຸດເຈົ້າ’ 34ແລະເຮົາກໍໄດ້ເຫັນແລ້ວຈຶ່ງຂໍເປັນພະຍານວ່າ ທ່ານຜູ້ນີ້ແຫຼະ ເປັນພຣະບຸດຂອງພຣະເຈົ້າ.”
ສາວົກໝວດທຳອິດຂອງພຣະເຢຊູເຈົ້າ
35ວັນຕໍ່ມາອີກ ໂຢຮັນໄດ້ຢືນຢູ່ກັບພວກລູກສິດສອງຄົນຂອງຕົນ 36ເມື່ອເພິ່ນໄດ້ເຫັນພຣະເຢຊູເຈົ້າກຳລັງຍ່າງຜ່ານໄປ ຈຶ່ງກ່າວວ່າ, “ຫັ້ນເດ ລູກແກະຂອງພຣະເຈົ້າ.”
37ເມື່ອສິດທັງສອງໄດ້ຍິນໂຢຮັນເວົ້າດັ່ງນັ້ນ ຈຶ່ງໄດ້ຍ່າງຕາມພຣະເຢຊູເຈົ້າໄປ. 38ພຣະເຢຊູເຈົ້າຫລຽວຄືນຫລັງເຫັນສອງຄົນຕິດຕາມມາ ພຣະອົງຈຶ່ງຖາມພວກເພິ່ນວ່າ, “ພວກເຈົ້າຊອກຫາຫຍັງ?”
ພວກເພິ່ນຕອບວ່າ, “ຣັບບີ (ຄຳນີ້ແປວ່າ, ‘ອາຈານ’) ທ່ານພັກຢູ່ທີ່ໃດ?”
39ພຣະອົງຈຶ່ງຕອບພວກເພິ່ນວ່າ, “ເຊີນມາ ແລະເບິ່ງເອົາ.” ພວກເພິ່ນກໍໄປກັບພຣະອົງ ແລະເຫັນບ່ອນທີ່ພຣະອົງພັກໃນວັນນັ້ນ ພວກເພິ່ນກໍໄດ້ພັກຢູ່ກັບພຣະອົງ (ເພາະໃນຂະນະນັ້ນເປັນເວລາສີ່ໂມງແລງແລ້ວ).
40ອັນເດອາ ນ້ອງຊາຍຂອງຊີໂມນເປໂຕເປັນຜູ້ໜຶ່ງໃນສອງຄົນນີ້ ທີ່ໄດ້ຍິນໂຢຮັນເວົ້າ ແລະຍ່າງຕິດຕາມພຣະເຢຊູເຈົ້າໄປ. 41ອັນເດອາໄດ້ໄປຫາຊີໂມນອ້າຍຂອງຕົນກ່ອນ ຈຶ່ງບອກລາວວ່າ, “ເຮົາໄດ້ພົບພຣະເມຊີອາແລ້ວ.” (ແປວ່າ, “ພຣະຄຣິດ”) 42ແລ້ວລາວກໍພາຊີໂມນໄປຫາພຣະເຢຊູເຈົ້າ.
ເມື່ອພຣະເຢຊູເຈົ້າເບິ່ງລາວແລ້ວ ຈຶ່ງກ່າວວ່າ, “ເຈົ້າຊື່ ຊີໂມນລູກຂອງໂຢຮັນ ແຕ່ເຈົ້າຈະໄດ້ຊື່ໃໝ່ວ່າ ເກຟາ.” (ທີ່ແປວ່າ “ເປໂຕ” ແລະໝາຍຄວາມວ່າ, “ຫີນ”).
ພຣະເຢຊູເຈົ້າເອີ້ນເອົາຟີລິບ ແລະ ນະທານາເອັນ
43ວັນຕໍ່ມາອີກ ພຣະເຢຊູເຈົ້າໄດ້ຕັດສິນໃຈໄປແຂວງຄາລີເລ ພຣະອົງໄດ້ພົບຟີລິບ ແລະກ່າວແກ່ລາວວ່າ, “ຈົ່ງຕາມເຮົາມາ.” ( 44ຟີລິບເປັນຄົນມາຈາກເບັດສາອີດາເປັນເມືອງທີ່ອັນເດອາ ແລະ ເປໂຕຢູ່). 45ຟີລິບໄດ້ໄປຫານະທານາເອັນ ແລະບອກລາວວ່າ, “ຂ້ອຍໄດ້ພົບຜູ້ທີ່ໂມເຊໄດ້ຂຽນເລື່ອງຂອງເພິ່ນ ໃນໜັງສືກົດບັນຍັດແລ້ວ ແລະທັງພວກຜູ້ທຳນວາຍກໍໄດ້ຂຽນໄວ້ເໝືອນກັນ ເພິ່ນແມ່ນເຢຊູ ລູກຂອງໂຢເຊັບໄທນາຊາເຣັດ.”
46ນະທານາເອັນຖາມຟີລິບວ່າ, “ມີສິ່ງດີອັນໃດ ມາຈາກນາຊາເຣັດບໍ?”
ຟີລິບຕອບວ່າ, “ໃຫ້ມາເບິ່ງເອົາ.”
47ເມື່ອພຣະເຢຊູເຈົ້າຫລຽວເຫັນນະທານາເອັນ ກຳລັງມາຫາພຣະອົງ ຈຶ່ງເວົ້າຕໍ່ລາວວ່າ, “ຜູ້ນີ້ແຫຼະ ເປັນຄົນອິດສະຣາເອນແທ້ ໃນຕົວລາວບໍ່ມີກົນອຸບາຍເລີຍ.”
48ນະທານາເອັນ ຈຶ່ງຖາມພຣະອົງວ່າ, “ທ່ານຮູ້ຈັກຂ້ານ້ອຍໄດ້ຢ່າງໃດ?”
ພຣະເຢຊູເຈົ້າຕອບວ່າ, “ເຮົາໄດ້ເຫັນເຈົ້າແລ້ວ ຕອນທີ່ເຈົ້າຢູ່ກ້ອງຕົ້ນເດື່ອ ກ່ອນທີ່ຟີລິບເອີ້ນເຈົ້າ.”
49ນະທານາເອັນ ຕອບພຣະອົງວ່າ, “ພຣະອາຈານເຈົ້າເອີຍ, ທ່ານເປັນພຣະບຸດຂອງພຣະເຈົ້າ ທ່ານເປັນກະສັດຂອງຊາດອິດສະຣາເອນ.”
50ພຣະເຢຊູເຈົ້າໄດ້ຕອບລາວວ່າ, “ເຈົ້າໄດ້ເຊື່ອເພາະເຮົາບອກເຈົ້າວ່າ ເຮົາໄດ້ເຫັນເຈົ້າຢູ່ກ້ອງຕົ້ນເດື່ອນັ້ນບໍ? ເຈົ້າຍັງຈະໄດ້ເຫັນເຫດການອັນຍິ່ງໃຫຍ່ກວ່ານີ້ອີກ.” 51ພຣະເຢຊູເຈົ້າກ່າວຕື່ມວ່າ, “ເຮົາບອກພວກເຈົ້າຕາມຄວາມຈິງວ່າ ພວກເຈົ້າຈະເຫັນທ້ອງຟ້າໄຂອອກ ແລະຝູງເທວະດາຂອງພຣະເຈົ້າ ກໍຂຶ້ນໆລົງໆເທິງບຸດມະນຸດ.”
Právě zvoleno:
ໂຢຮັນ 1: ພຄພ
Zvýraznění
Sdílet
Kopírovat
Chceš mít své zvýrazněné verše uložené na všech zařízeních? Zaregistruj se nebo se přihlas
@ 2012 United Bible Societies. All Rights Reserved.
