Luka 19
19
Lada Ɓemanayi Zhin Nya
1Yesu kwa wa godiya lo Jeriko. 2Esanu wo ɓei diya lo ozaho, gadu gwoyi oɓa su ai yiwo ge Zaka. Wo ɓei zhin agyiwye da nu sosai. 3Woi cei pma ntuge a gye Yesu wye. Amma wo ɓei bwa sun kpe-kpegye nu to wa mi wa gye wo wye m, ntuge aza ɓei mwabegye. 4Ntuce nu wa busi lo n aza bye, wa gun gbayi shinwan ho ntu ge wa gye Yesu wye, gama Yesu ɓei vi zokwo yi nu.
5Esanu Yesu ɓei si shinwan yi aba, wa kpawye wu n she wa gye Zaka tu wa ciwo ge, “Zaka, kashi ɓe n pye-pye gama n ɓa dna nho puwa nu naiye.”
6Zaka kwa wa kashi n pye-pye wa zhin Yesu amabe. Ɓa lo owo puwa. 7Shi aza ɓei gye lo nu ɓa laɓa ɓai da gnunu-gnunu ɓai cige, “Ai zaye du azhiɓeyi n alaifida puwa.”
8Zaka wa lakala gni wa ci Dagayi ge, “Dna emi nyabwa vinya miɓa la tokunyi ma ga aza n ɓato n nyahoi m. Ngye mila zaho-zahoyi gyifi kwa, miɓa gbawo ta har abwa ngun anyi.”
9Yesu wa ciwo ge, “Gni-gni la ɓe puwaye naiye, gama zeye zhin Ibrahim Yawyi nu ce. 10Gama oza Nugun wato Kristi waɓe ntuge wa zan abwi-bwiyi nu shin wa gɓnia njesun.”
Koonci N Zinariya Agyiwye Yi
11Esanu aza ɓei zhi ɓai wo Yesu ɓeda wa gaɓa misali ye. Wo ɓei wo vivi n Urushelima yi aza zhi ɓai gye ge Shekwoyi ebemi la gaɓe nu.
12Nsayi wa ciɓa ge, “Arzikida ho ɓei nyi n wo ɓei lo ezhi ho n kpai ntuge wo gyibe wo zhi. 13Kafin wo lo kwa wa yi owo abara ngun awo, wa ga zaho-zahoi agyiwye, wato ngye ₦1,332 wa ciɓa ge, zaho-zahoi lo wo gni gniko n agyiwye yei, n nabai wa gye gyiba n wo ɓa bwa. 14Amma shi wo ɓei lo ezhi yi to aza ye wo m. Ɓa kun aza ya ɓa cige, ‘Yi to cei pma lo zeye wa gyi be tu n-yi tukwo m.’
15“Esanu n wo ɓei jeze zhi, wa yi owa abara yi zhi n wo ɓei gaɓa agyiwye nyi, ntuge wa kpe gyiba ye n ɓa ku bwa.
16“Oza kmisunyi wa ɓe wa cige, miku gyiba gyi har n sun ngye nya ha gami nyi abwa ngun owo.
17“Maigida ciwo ge gezhiya nhoi, ho zhin fyenu manayi nu. Shi kwa nyi ho ku gaiciya zhin n nya fyewyi ye, miɓa gaho begyi tu n azhi awa tukwo.
18“Oza bayi wa ɓe wacige miku gyiba gyi har n sun ngye nya ha ga mi nyi abwa ngun atnu.
19“Maigida kwa wa ci fyenu ye ge, ho ɓa gyi be tu azhin ngun atnu tukwo.
20“Ozaho wa ɓe wa cige, oho agyiwye shin nyi. Mi ɓei lo ma kwo so dna n shakun. 21Gama mi ɓei wodna ntuge oho hali dnaɓo. Ho zhin ha la enya nkwoto zhin oho nya m. Ho zhin ha do n aba ho to ɓei bye m. 22Maigida ci wo ge ho zhin fyenu banza nya nu, Oho ɓeda nu a wu ho. Ho kpe lo ge emi hali ɓo dnaɓo, mi la nya nkwo to zhin emi nya m, mi do aba n mi to bye m. 23To, kni nu na zhin to ha ya emi agyiwye fi n banki, n nabai esanu n ma zhi n cei mi gwo n dutun ma? 24Nsayi wa gna aza nɓa ɓei zhi ɓo nyi ge, fye gwo agyiwye ye n wo cei shi nyi, fya ga oza n wo cei lo ngun awo nyi.
25“Ɓa ciwo ge, Dagayi, ai wo ceilo ngun awo.
26“Amma wa ciɓa ge mɓa gnafye, ozaho-zahoi n wo n cei lo, to, aɓa ɓewo ɓe-ɓe nu. Amma oza n wo to n cei lo m, ko odo n wo cei bwasun lo ciwyi nyi ma a ɓei la kwo gwo wo. 27To, emi anuwuyi ye nɓa to cei pma ge ma gyibe tu nɓa tukwo nyi m, fye ɓe n ɓai fya wu ɓa zhiya.”
Vivi N Urushelima Yi
28She Yesu ɓei zo misali ye da wa go duya lo Urushelima. 29Shi wo ɓei wo vi-vi n Baitafaji ɓedo n Baitanya azhi ho n ɓa zhi vi-vi n epe hoi ai yi kwo ge Zaitun wa tnu owo abara ngun aba n wa bye.
30Wa ciɓa ge, “Fye lo ezhi ye n kwo zhi n fya bye nyi, fye ɓo gye jaki ɓi ho gniɓo n ozaho-zaho to shin kwo gun, fya loko ɓe n cei. 31N ozaho-zahoi nwa nya fye ɓo ge kwo zhin wuna fyei lokwo a? Fya ciwo ge, ‘Dagayi n kwo ɓoyi pma lo.’ ”
32Abara yi ɓalo ɓa gye nyaho-nyahoi vinya shi Yesu ɓei gnaɓa nyi. 33Shi ɓa ɓei lo jaki yi ya, anyada nyaɓa ge, “Kninu zhin fyei lo kwo a?”
34Ɓa cige, “Dagayi nu n kwo ɓei pma.” 35Ɓa lo Yesu n Jaki yi. Nsayi ɓa zhi ko sildi n ɓa aje yi, ɓa gun Yesu tu n kwo.
36Shi wo ɓei gun kwo ɓe, ɓa kma oɓa je ɓai tazhi n kni. 37Shi wo ɓei wu vi-viyi n Urushelima yi n zokwo, nkwo lo Zaitun pe nyi, aza nɓa ɓei viwo ɓe vinya ɓa la ɓai gode n Shekwoyi ɓai ga mwa-mwa bmana-bmana ntu aɓo wo-woi ɓo vinya n ɓa ɓei gye nyi. 38Ɓai cige, “Shekwoyi wo tu esu ye anabarka n wo ɓe dna n Dagayi eye nyi. Bugbafu lo n she ɓedo n mwa-mwai n Shekwoyi aba.”
39Nsayi A farisiyi ho ɓa daɓo n Yesu yi ɓa cige, “Malam, gna oha zeye n ɓa nyi nge ɓaku ce pi.”
40Yesu kwa wa ciɓa ge, “Mɓa gnafye, n a zaye ɓa ce pi akutaye ɓa lamitu nsa.”
41Yesu kwa wa ɓe vi-viyi n Urushelima yi. Esa nu wo ɓei gye ko wa cibwi kpe kwo. 42Wa cige, “Bugbafu nyalo-nyalo nya ɓei la wo vi-viyi nfyei, ammato fya ye ko m. N saiye kwa esa la lu diya. 43Esa ɓelo esanu ofye anuwuyi ɓei ye kpe n fye ganuwa ɓei she fye kna ɓai gufye fi n mi. 44Ɓa ɓei vi fyeya du nfya ɓi ɓe, nɓa fi nfye mi nyi. Ofya nuwuyi to ɓei fa kuta gmanyi ganuwa nya kwa cetu n do m. Gama fye to ɓei zhin ampani n gni-gni n Shekwoyi ɓei gafye nyi m.”
Yesu Dna Nna Duwa-Nyakun
45Yesu kwa wa lodna n aduwa nyakun wa nya aza ya n ɓa ɓei fi ɓai kun anya fi ɓo nyi. 46Wa ciɓa ge, “Akafilo n littafi ge aɓa yi emi puwa ge aduwa nyakun. Amma fye la kwo ze aba n avi bwifi.”
47Yesu kwa wawu ɓa nya dna n aduwa nyakun fyegyi-fyegyi. A prist dnagmayi kwa ɓedo n amalemi a Yahudawa nyai ɓedo n na tukwoda yi ɓeye ntuge ɓa wu wo. 48Amma to ɓa kpe shi ɓa ɓa zhin-zhin n wu m, ntuge aza ɓei kna owo ɓeda tnubua sosai, har to ɓai ye ge owo ɓeda gmanyi kwo zun ɓa tnubua gnana m.
Právě zvoleno:
Luka 19: GAW
Zvýraznění
Sdílet
Kopírovat
Chceš mít své zvýrazněné verše uložené na všech zařízeních? Zaregistruj se nebo se přihlas
Alkawali Woiwoyi
(Gbagyi New Testament)
Copyright © 1997 by Biblica, Inc.®
All rights reserved worldwide.
