Luka 14
14
1-2 Nwyihoi n Satiwyi woi dna n Ayahudiyi zadnagmayi puwa a Farisiyi zhi ɓai shi wa wye, ɓa gye kwo wa ka za gna n wo ɓo dna n kpo-kpo nyasan yi nyi.
3Yesu kwa wa ciɓa ge, “Owa ku da ge a kaza gna n Satiwyi ko kwo to da ma?”
4To ɓa dna wo ɓe gbe m. Nsayi Yesu wa shi nyasayi n bwa wa kawo gna wa ciwo ge wo lo.
5Nsayi wa je ɓa nya ge, “Nyika lo n fye n wo ta zhin tnu-tnu n Satiwyi ma?” 6To ɓa dna wo ɓe gbe m.
Fye To Zan Mwa-Mwa Shin M
7Sanu wo ɓei gye aza ye ɓa sase kpe n aba dnagmai n anyagyi ʼba wa gaɓa shawara ye. 8“N ʼza yi fye na mula ba, ko to bmiya lo fya sase n aba nɓa gna bmiya m. Ntuge n za ɓe nwo du ho, 9to wo ɓei shan ho aba wo tu zayi. Oho kwa hoi lo buzu-buzu n vinyi-kwoyi.
10“Amma ko bmiya lo n ya ɓe dina ba ha kni akujera nukwoyi ha sase. Sanu mula ɓa gye ho tu lo nu, sai wa ɓe wa gaho akujera manayi. To nsayi nu n ho ɓei lo n mwa-mwa kpe. 11Gama zaho-zahoyi n wo cei pma wa mwa wohin, to, aɓa gba wo. Amma zaho-zahoyi nwa gba wohin, to, a ɓa gawo mwa-mwa.” 12Nsayi wa ci oza n wa yi aza nyagyi nyi ge, “Sanu ha yi aza nyagyi to yi a nugundo n amado yi n ho abye yi n agyiwye-dayi nu kadai m. Gama ɓa ɓei kaho yi ce.
13“Maimako ho zhin lo nu, yi aza nu n ɓa to n agyiwyei m, azagmazhi n na wyebuayi. 14Nnabai wyi yi n Shekwoyi ɓei ku azafi kala nyi, woi gaho lada ntu aza ɓo n ɓa to mi ɓa gbaho nyi m.”
15Ozaho n wo ɓei tu woi wo Yesu ɓeda wa ci Yesu ge, “Ai oza wa lo Shekwoyi bemi wo ku saʼa dnagmayi zhin.”
16Yesu wa gawo amsa n misali yeyi “Oza ho ɓei zhin agmada dnagmai har wa yi aza mwa n na nyagyi ba. 17Sanu wo ɓei ku ɓoho-ɓohoi zo zhin, wa tnu owo bara woi gna aza ge esa la si. 18Amma ɓa gawo a dalili gbo-gbo. Za knayi wa cige, ‘Mi la ofwasi n ha ye mi cei pma mi gyekwo. Ntuce nu, mi tami ma ɓe anyagyi ba m.’ 19Zaho wa cige, ‘Mila anakwo si ngun awo n fwanu ɓo, Mi cei pma mi gye ɓa.’ 20Zaho wa cige, woi bwa nyikwo la nu, ntu ce nu wo tami wa ɓe m.
21“Bara yi wajeze lo wa da nya ɓa gna wo vinya. Owo maigida gyi minagyi wa cige, lo bwaho-bwahoi ho yi a nyaɓai na zabmazhi yi ɓedo na wyebuai. 22Amma shi azaye pya ɓei ku ɓe aba dudu ɓa ce. 23Nsayi owo maigida ciwo ge, ‘Lo hoi dnawye vinya aba ha gye oza gni ha gna wo ge wo ɓe, n nabai puwa ye kwa nu. 24Gama aza ma yiɓa na bye nyi, ɓa tabwa enya n mila shirya ntu ɓa ɓo m.’ ”
25Aza ɓo viwo n mwa. Wa zegni wa ci ɓa ge: 26“Oza wo cei pma wa vimi dole wa yemi n du owo dada, owo ya, owo nyikwo, owo aɓi, owo amaje, owo amapwi, Har ndu wohin wye-wyeyi. Nto lo num, wo ta mi wa vi mi m. 27Njesun oza nwo to la wohin zundu wa vi mi m, wo ta mi wa ze emi bara m.
28“Amma oza wo cei pma wa vi mi, To, sai wa zhin nubo kpa sosai, gama zaho-zahoi wo cei pma wa mi nyakun, wo zhin wa shi wa kpa agyiwye zhi wa gye she kwo ɓa la nsun, kafin wo ya nyakun mi. 29Kada wo bwa nyakun nu shi kawai, nsayi agyiwye zowo har ha gye aza ɓai mawo san. 30Ɓo cige, ‘Fye gye zayi n wo nu, wo to mi woi zo nyakun mi m, ntuge agyiwye ku wo zo.’
31“Ko kwa kni esu yi nu ɓa lo okun, to woi zhin shawara n wa azai ko owo asoa 10,000, ɓa mi ɓa sukun n azai 20,000?
32“Nwo tamin, sai wa tnu na zai ɓa gyi esu deyi wye, tunyi woye nyin nkpayi, kadawo ɓe wa wu owo aza vinya. 33Ntuce nu zaho-zaho ta mi wa ze mi bara m, akpege wa shi wa zhin nubo kpa, wa gye wahala n wo ɓa sin n anabarka yi n wo ɓa gwo, n sayi wa gye kwo wo ɓa mi wa vi mi.
34“Sankpegye n ampani yi, kvoi la dada gmiya? 35Sankpegye nkwo to da m, ko to n ampani hoi m, atalni a zhin taki n koi ma. Azhin a ze koya aza kpe ko apita kawai. Fye kna tnubua sosai ngye fye cei pma fya gane nɓei n mi da nyi.”
Právě zvoleno:
Luka 14: GAW
Zvýraznění
Sdílet
Kopírovat
Chceš mít své zvýrazněné verše uložené na všech zařízeních? Zaregistruj se nebo se přihlas
Alkawali Woiwoyi
(Gbagyi New Testament)
Copyright © 1997 by Biblica, Inc.®
All rights reserved worldwide.
