Yohanna 4
4
Nyikwoza Nnaɓai Ngun Atnu
1Yesu ɓei zhin aza batisma ndu Yohanna nya, nna barayi nmwa begye njesun. Afarisiyi ɓa ku kpe. 2Ama Yesu to ɓei zhin batisman, lowo abara nu ɓei zhin. 3Sai wa fa Yahudiya wa lo Galili.
4Kwo ɓo la wo zhin tile wa lo n Samariya zokwoyi. 5Wa si a Samariya yi zhi ho, ai yi kwo ge Sikar. Kwo wu vivi nna bai nu n Yakubu ɓei ga Yusufu, owo nugun ekni nyi. 6Yakubu Lizhiya ɓei gni ɓo, Yesu wa sase shi ɓo n lizhiya gbe, ntuge aɓei lawo ɓe, n zan yi. Nyipyei ɓei la pwo atukwo gun n sahi yi.
7Shi wo ɓei sase shi ɓo, nyikwoza ho wa ɓe nuwan to, Yesu wa gna wo ge, “To nuwan gami, ma sin.” 8Owo abara ɓei du zhimi ɓo si nyagyi ɓe n cei. Ntu cenu ɓa to ɓei zhin. 9Nyikoza hi wa gna Yesu ge, knihi na ye yi ɓedoʼa? Ho zhin Yahudiyi nu, ama mi zhin Samariyaiʼza nu, Knihi nu zhin hoi nya mi nuwan ɓoʼa? (Nsayi, a Yahudiyi to ɓei bmiya jem n na Samariyayi n ba.)
10Yesu wa gna wo ge, “Ho takpe Shekwoyi nyaga ye lom, hoi takpe mi ye lon. Ho ɓo kpe ye lo, hoi kpe oza ye nwo nya nuwan ɓo nyi, wo ga ho nuwan wye-wyeyi nya.”
11Nyikwozahi wa nya wo ɓo ge, “Ho gugayi shi na ha to nuwan cei a? Ai lizhiya lo-loi lo. Ho ɓa bwa nuwan wye-wyeyi nya na? 12Eyi dada Yakubu ɓo zhin oza dnagmayi nu, wa ga yi lizhiya ye. Owo, ɓedo n wa ɓi-i n wo anyakpayi ɓa sin nuwan ye. Ho du wolonu?”
13Yesu wa gna wo ge, “Lizhiya ye nuwan ta gyi za nuwan mikun, har nyalo-nyalo n. Oza n wa sin Lizhiya ye nuwan, wo ɓa je nuwan mikun wo n pye-pyei. 14Ama omi nuwan zhin kwa gyi za nuwan mikun har nyalo-nyalo. Kwa ze lizhiya wye-wyeyi nya dna nza mi. Kwoi zeya har nyalo-nyalo fi n wo mi, kwoi ga wo wye-wyeyi nyalo-nyalo nya.”
15Nyikwozahi wa ci wo ge, “Male, Gami nuwan ye ma sin. Ala mi ɓe ge mi to nuwan ye cici. To ma je ɓe ya ma to nuwan, ai ɓe min, to me je nuwan mikun won.”
16Yesu wa gna wo ge, “lo ho ɓe n ho ɓayi.”
17Nyikwozahi wa gna Yesu ge, “Mi to n ɓayi lon,” Yesu wa dna wo ɓe-gbe ge, “Ho ku gaiciya da, ho to n ɓayi lon.” 18Anu ku ho lo atnu, kwo odo n ho dna n woi n sayi ye nyi, oho ɓa nu to m. Ha da gaiciya nu.
19Ce a wo nyikwozahi nwodna, waci Yesu ge, A ɓa gye ho zhin anabi nu! 20Ofye a Yahudiyi gna ge, a ga Shekwoyi mwa-mwa dna n Urushelima nu gmanyi, ntu knibehia? Eyi adada to ɓei ga Shekwoyi mwa-mwa ɓo num, ɓa ɓo ga wo mwa-mwa n ʼpe ye nu. (Wato Gerizim pe.)
21Yesu wa ci wo ge, nyikwozaye nhohin, esa ɓe lo n na ta ga Shekwoyi mwa-mwa n ya, kwo n ʼpe ye, kwo n Urushelima m. 22Efye Asamariyayi, fye ta kpe oza ye lo nfye ga wo mwa-mwa ni, Ama eyi A Yahudiyi yi kpe oza ye lo n yi la wo tu. Ntuge gni-gni kwa gmi na Yahudiyi aba nu. 23Esa ɓe lo, kwo nsaiye kwo la ɓe, nu amwa-mwa ga yi gaiciya nya, ɓa ga Dada mwa-mwa dna n Zafun, n gaiciya yi. Azaye pya nu n Dada ye cei. 24Shekwoyi zhin Zafun nu, tile aza nɓa ɓa ga wo mwa-mwa, ɓa ga mwa-mwa dna n zafun n gaiciya yi.
25Nyikwozahi wa ci wo ge, “Mi kpe lo ge Yesu ɓe lo. Esa n wa ɓe wo ɓa wu yi anya vinya pei-pei.”
26Yesu wa ci wo ge, Ai omi nmi gni mi-i daɓo nhoi nyi. Omi nu zhin Kristi hi n ho da wo ɓo nyi. 27Nsahi yi owo abara ɓa ɓe. Ce ɓa wo a nkalai shi wo gni woi daɓo n nyikwozahi. Ama ko ozaho nɓa mi wa nya wo ɓo ge, Kni nu zhin hoi daɓo n nyikwoza ye yiʼa? To a bwa za nwo nya ɓo m.
28Nyikwozahi wa ta shakun ya shi, wa busi lo ezhimi wa ci aza ge, 29“Fye ɓe fya gye oza, nwa gnami aɓo vinya n mi ku shin zhin. Kwo owo nu zhin Kristiʼa?” 30Aza kna ɓe nzhimi ɓa lo wo gye.
31Esa nu nyikwozahi ɓei bwi nnaza yi, owo abara ɓa gna wo ge male, gyi nyagyi. 32Amma Yesu wa ci ɓa ge, mi n nyagyi yi lo ma gyi, nfye ta kpe kwo ɓe ye lo m.
33Owo abara ɓa nya aje ge, “Ko zaho la ɓe wo n nyagyi yi nu woi ku gyiʼa?”
34Yesu wa ci ɓa ge, Emi nyagyi nu ge mi zhin Shekwoyi ɓeye nwa tnumi nyi ma zo kwo zhin njesun. 35Fye ta gna lo ge, apya ce ngun-anyi mikegye kwa kpe gyin? Fye dna wye zunɓa fya gye, aza awye-wyeyi ku ɓi, ɓa ku ye do. 36Oza nwo do nya, wo zhin wa bwa lada. Wo ye aza zhi nu n ɓa ɓa lo ʼshe nyi. Oza nwo do nya, nzayi nwo bye nya nyi ɓa ɓai bwa bugba bui-bui. 37Gaiciya nu ge, ozaho zhin wa bye, ozadoho wa dodo. 38Ma tnu fye ge fye lo fye do do nu. Fye nu to byem, fye zhin aza nu nɓa dodo kawai.
39Asamariyayi ɓei ku gaiciya ga nmwa ntu nyikwozahi ɓeda ɓo nwo ɓo gna ɓa nyi ge, “Wo ku aɓo gnami vinya nmi ku shin zhin.”
40Asamariyayi ɓa gna Yesu ge, Ɓe ha dna n yi-i nzhiye, Yesu wa dna ɓo anyipyeingnu-aba. 41Aza nmwa begye ɓa ku gaiciya ga ntu wo ɓeda ɓo. 42Ɓa gna nyikwozahi ge, “Yi to ga gaiciya ntu ho ɓeda ɓo num. Yi ku wo n yihin tukwoyi. Yi kpe lo ge wo nu zhin anyi Gniyi.”
43N anyipyei ngun aba avun, wa laka wa lo Galili. 44Yesu ɓei ku da ge, “Anabi ta bwa mwa-mwa dna nwo ayi m.” 45Esa nu wo ɓei si Galili, ɓa gwo wo na gmadayi, ntuge ɓa ɓo ku gye aɓo vinya nwo zhin dna n Urushelima nyi. Wato esa nu Yesu ɓei lo paska nyi.
Zadnagmayi Ho Ɓi La Kagna Bwa
46Wa lo Kana Galili nya njesun, aba n wo ɓei zhin nuwan kwa ze nuwan shu-shuyi nyi. Gwamnati tnu-tnuyi tukwoda ho ɓei dna n Kafarnahum, owo nugun ɓei san nyasan n kalai. 47Shi wo ɓo wo ge Yesu la ɓe Galili ʼkni, wa gmi n Kafarnahum wa ɓe Yesu aba, wa gyi wo wye ge, wo ɓe wa lo, wo ka owo ɓi gna, nwo shi woi fi nyi.
48Yesu wa nya wo ɓo ge, “Nfye to gye aɓo wo-woyim, fye ta ga gaiciya m kwo?”
49Tukwodayi wa gna wo ge, “Dagayi la pye nɓe yi kafin omi nugun wo fi.”
50Yesu wa ci wo ge, “Lo ho puwa, ho ɓo gye oho ɓi n lafiya yi.” Nsa-sayi wa lo api. 51Owo abara kwa ɓa shegun wo n zokwo, ɓa gna wo ge ai nyasan la ho ɓi fa wo n lafiya yi lo n sayi. 52Wa nya ɓa ɓo, esa nwo nugun wa ya lafiya bwa n cei, ɓa gna wo ge nsu nu nyipyei kwoi la bmaya n na tukwo, nyasan kwa fai wo. 53Oɓi dada wa gye nsayi nu, n Yesu ɓei gna wo ge, “Oho nugun la lafiya bwa.” Owo ɓedo n wo puwa yi vinya ɓa ku gaiciya ga.
54Deye nu ɓei zhin oɓo wowoyi bayi n Yesu ɓo zhin, esa nu wa gmi n Yahudiya wa ɓe Galili.
Právě zvoleno:
Yohanna 4: GAW
Zvýraznění
Sdílet
Kopírovat
Chceš mít své zvýrazněné verše uložené na všech zařízeních? Zaregistruj se nebo se přihlas
Alkawali Woiwoyi
(Gbagyi New Testament)
Copyright © 1997 by Biblica, Inc.®
All rights reserved worldwide.
