TAUNET 9
9
Arorutyet ak Noah
1 # Tau 1.28 Ki iberuur `Kamuktaindet Noah ak weeriikyik ak koleenji, “Osigisye ak otesage, ak onyi ng'wony! 2Iyweok ak koarageni tyony age tugul ne po ng'wony agobo okweek; agot toriit alak tugul che po parak, tugul che pendoti kochuutegei eng' ng'wony ak njireenik tugul che po nyanjet; tugul ko kaginde eunekwok. 3Egu amitwogikwok kiy age tugul ne sabei ne wendoti; kagoonok tugul ko uu ye kiga agoonok tuguuk che piitos alak tugul che nyalileen. 4#Tau 2.16-17; 17.10-14; A.La 19.26; NKNg'a 12.16,23;15.23 Ago moam panyeek kobooto saboondonyi ne nooto ko korotiik. 5Amagenok ne matiny korotiigap saboonwekwok agobo saboondap chii, eng' tyony age tugul ak eng' chii anan ko eng' ne tupcho.
6 # Tau 1.26; Kom 20.13 Chii age tugul ne tumdoi korotiigap chii,
ketumdoi chechiik agine;
amu eng' itoondonyi
ko ki yai `Kamuktaindet chii.
7 # Tau 1.28 Osigisye ak otesage
osigisye kot ochaang'e miising' eng' ng'wony.”
8Ak ki leenji `Kamuktaindet Noah ak weeriikyik, 9“Ogaso! Kaagimiit kayomisenyu kobootok ak kobooto iyoteng'wong' ne piitu let, 10ak kobooto kiy age tugul ne sabei ne mi kobootok; eng' toriitik, eng' kiyagiik ak eng' tyong'ik alak tugul che po ng'wony, ko uu ole kimang'undo eng' moinget. 11Ak agimiit kayomisennyu kobootok ale, ma kebarei kiwong'u kogeny tugul che saptos eng' peek che po maraneet, ak ma kobiitu maraneet ne ng'emei ng'wony.” 12Ki mwa Kamuktaindet kole, “Kaboorunet ni ne po kayomiset ne kagiyomiskei eng' kwenunnyo, anee ak okweek ak kiy age tugul ne sabei ne mi kobootok agobo ibinwek tugul che pwoonei: 13Kande chemng'isiryennyu poolik parak, si koek kaboorunet ne po kayomiset ne mi kwenunnyoo, anee ak ng'wony. 14Ye kabiit poolik eng' parak, ak kotook anyun chemng'isiryet eng' parak, 15abwaat anyun kayomisennyu ne mi kwenunnyoo, anee ak okweek ak kiy age tugul ne sabei. Ma kobiitu kogeny peek che marandos che iwong'u tugul che saptos. 16Ye took anyun chemng'isiryet eng' poolik, ageer ak abwaat kayomiset ne tebyei agoi koigeny, ne mi kwenutap Kamuktaindet ak kiy age tugul ne sabei ne mi ng'wony.” 17Ki leenji `Kamuktaindet Noah, “Kaboorunet ni, ne po kayomiset ne kaayai eng' kwenunnyoo anee ak tugul che saptos che mi ng'wony.”
Noah ak Weeriikyik
18Weeriigap Noah che ki mong' eng' moinget ko ki Shem, Ham ak Japhet. Ham ko ki kwandap Kanaan. 19Chuuto somok ko ki weeriigap Noah, ak ki yom ng'wony komugul iyotennywa.
20Ki toi Noah koek kabatindet, ak kimin mbareetap sabibuk. 21Ak kie maiyek ak kobogit, ak ki tep aach ngor eng' emainnyi. 22Ki keer Ham, kwandap Kanaan, kwandanyi kotebyei aach ngor, ak ki mwachi tupchosyekyik aeng' che ki mi saang'. 23Ki ng'eetyo Shem ak Japhet konem sambut, ak komure tigigoikwak icheek tuwai ak kobee patai ak kotuch kwandanywa ne ki mi aach ngor. Kibee patai si ma keer kwandanywa komi aach ngor. 24Ye kingo ng'eet anyun Noah eng' pogitennyi, ak konai tuguuk che kagoyachi weeriinnyi ne ming'in, 25ak ki le,
“Ingochubok Kanaan!
Egu otwogindetap otwogik eng' tupchosyekyik.”
26Ak ki le,
“Ingoberuurok Shem eng' Kamuktaindet ne Toroor,
ak ingoek Kanaan otwogindennyi.
27Ingobara `Kamuktaindet Japhet,
ak ingomeny koriigap Shem;
ak ingoek Kanaan otwogindennyi.”
28Ki tar Noah kenyiisyek alak pogol somok ak konom ye kingo pata maraneet. 29Kenyiisyek tugul che ki tar Noah ko pogol sogool ak konom; yeityo koolil.
Právě zvoleno:
TAUNET 9: KAPR
Zvýraznění
Sdílet
Kopírovat
![None](/_next/image?url=https%3A%2F%2Fimageproxy.youversionapi.com%2F58%2Fhttps%3A%2F%2Fweb-assets.youversion.com%2Fapp-icons%2Fcs.png&w=128&q=75)
Chceš mít své zvýrazněné verše uložené na všech zařízeních? Zaregistruj se nebo se přihlas
©Bible Society of Kenya, 2019