KEYUM KERO 22
22
Shédíke Isaakme Koname
1Sikepe irongem, Shédíbí Abrahamme ikangpe gogto, “Abraham.” Delo bí, “Sina ngo,” emyansuto.
2Delo Shédíbí bím poto, “Nok uem laalangka, nokke ayasunam oo atel, Isaakme gíbola Moriah amolo, ngokke díítum polík kolo, no bím ngok legape romnam amanpe ipaklíklangka.”
3Depe pokolok rokomope, Abraham gerepla romnam aman ipak legape esingem natala, gadolo éélíkla, Isaak mela béérang annyiko gíbola, Shédíke políknam mooloppe gílento. 4Longum nana longe delo Abraham mootepe políknam among dem kaato. 5Delo béérang annyidem Abraham poto, “Gado sim kaabomla, nonyi lekope so dooya langka. Koo sila ngo, mooteng elo gíla, ngonyi kumsupala aalat suyéku.”
6Delo Abraham ipaklo romnana esingdem, Isaak kíng joolíkla, bí yoksik kola emem bomla, bínyi gíbosuto. 7Gíbo sudungem Isaak abudem lupoto, “Yayi,”
Abraham poyansuto, “E ingkoko, ngok ue.”
Isaak poto, “kaatola eme lang esinge kadung, idola ingkoloda ipaklo romlík penam mére?”
8Abraham poyan suto, “Shédíbí agísue ipaklo romlík penam mérem bilenyé,” dekepe manbosula, bínyi enbosuto.
9Edílo bínyi, Shédíke poko moolop delo pííbo sutodí, delo Abraham rungguko mola, esingdem runggu teyong delo paalíkla, Isaakme yééla esing teyong delo melíkto. 10Delo Abraham bí bíkke yoksik dem laasatsula níkpetpe idoem, 11Ruutum ke kotoki kone teyong among telok, “Abraham, Abraham,” emla gogto.
“Sina ngo,” emla Abraham poyan suto.
12Bí pokai, “Koo dem tarí moketla demangkom atí imapeka. Supak ngo kénkai, no Shédíme pesonako, kapeila no agíke oo atel emte ngok keralok mesiisumato.”
13Delo Abraham kanggo sula méélam danlo kaatoname, mérboko pasum kolo bíkke areng delok yéksula dagdupe kaato. Delo bí gíla dem laala, bíkke oo ayanpe runggu delo romnam amanpe ipakpe ilíkto. 14Depeila moolop dem, Abraham bí Ruutum Bí Bisune, emla amín mínlíkto. Silo pete, “Ruutum ke Díítumlo Bí Bisune” emla mandung.
15Teyong among telok lennyinape Ruutum ke kotokide bím 16potoku, “Ngo agísulok pésudung, no agíke oo atelsuem ngok keralok mesiisumape ila, sikepe ikolok, 17nokke teyolo arope utepooroem rulíkla, siyéng robeng lokke sulli kísa pelang taleng telokke takar kísape, nok otíng-oyinem, ngo parmoyé. Delokke nok otíng oyine buluke miru kídíemkom ikumyé. 18Ngok lulígem tatnam legape, nokke otíng-oyin lok tani amo sokke opín kídíe buluke teyolo utepooro ruunamem paayinyé.” 19Dekepe irongem Abraham bí, béérang kídí delo aalangkula bulu Beershebalo gíbo sulang kula delo duutoku.
Nahorke Otíng Kídíe
20Sikepe irongem, bík bíro Nahor kíng Milkahbí oo píínyiko obito emnamem tatto: 21Uj obíng yalume, Buj bík bíroe, Kemuel bí Aram, 22Khesad, Hajo, Pildash, Jidlaph delokke Bethuel buluke abue. 23Bethuelbí Rebekahke abupe ito. Abrahamke bíro Nahorme Milkahke obiname si bíro kumsu píínyisi. 24Sok teyong loote Nahorke éémé Reumahbí, Tebah, Gaham, Tahash delokke Maakahme obito.
Právě zvoleno:
KEYUM KERO 22: adiBSI
Zvýraznění
Sdílet
Kopírovat
Chceš mít své zvýrazněné verše uložené na všech zařízeních? Zaregistruj se nebo se přihlas
Adi (Re-edited) Bible - Deena Baibél
Copyright © Bible Society of India, 2012.
Used by permission. All rights reserved worldwide.