Pédáesh 8
8
Hár o tuppánay érmóshi
1Hodáyá Nuh o hamá sajjahén wakshién haywán o dalwat yát kortant ke Nuhay hamráhiá bójigá atant. Hodáyá zeminay sará gwáté ráh dát o áp ér áyán but. 2Johlánkiáni chammag o ásmánay darig band butagatant o cha ásmáná hawráni gwárag ham band butagat. 3Áp kamm kammá cha zeminay sará kamm b ayán but. Yakk sad o panjáh róchá rand áp jahl shotagat. 4Haptomi máhay habdahomi róchá bójig Árárátay kóháni sará óshtát. 5Tán dahomi máhá áp angat kamm bayán at. Dahomi máhay awali róchá kóháni tholl záher butant.
6Chell róchá rand, Nuhá hamá darig pach kort ke áiá bójigá per kortagat. 7Gwarágé#8:7 Gwarág syáhén morgé ke báz jágahá kalág ham gwashanti, Pársiá “kalágh”. dhanná ráhi dát. Gwarágá tán hamá wahdá bál kort o gasht ke zeminay saray áp hoshk butant. 8Padá kapóté ráhi dát tán bechárit ke áp cha zeminay sará kamm butag yá na. 9Bale kapótá choshén jáhé nadist ke wati pádán ér bekant, chéá ke sajjahén zemin angat ápay chérá at. Gorhá kapót bójigá, Nuhay kerrá per tarret. Nuhá wati dast shahárt, kapóti gept o bójigá áwort. 10Nuhá dega hapt róch wadár kort o padá kapóti cha bójigá ráh dát. 11Wahdé kapót bégáhá áiay kerrá per tarret, zaytunay tázagén táké dapá ati. Nun Nuhá zánt ke cha zeminay sará áp kamm butag. 12Nuhá dega hapt róch wadár kort o padá kapóti ráh dát. É bari kapót áiay kerrá per natarret.
13Nuhay omray shash sad o yakomi sálay awali máhay awali róchá zeminay saray áp hoshk butagat. Nuhá bójigay sarpósh kasshet o disti ke zemin hoshk ent. 14Domi máhay bist o haptomi róchá zemin sarjamá hoshk at.
15Gorhá Hodáyá gón Nuhá gwasht: 16“Cha bójigá dar á, gón wati jan o chokk o neshárán. 17Hamá sajjahén sahdár ke tai hamráh ant, dhanná baresh gón, báli morg o jánwar o sajjahén lápkasshán, tánke zeminay sará romb o ramag bekanant, chokk o bar bekanant o géshá gésh bebant.” 18Gorhá Nuh gón wati jan o chokk o neshárán dar átk. 19Sajjahén jánwar o sajjahén lápkassh o sajjahén báli morg o zeminay saray sajjahén sorendah cha bójigá dar átkant, har yakké wati tahray hesábá.
20Nun Nuhá pa Hodáwandá korbánjáhé addh kort o cha helárén haywán o helárén báli morgán lahténi zort o korbánjáhá sóchagi korbánigi kortant. 21Esháni wasshén bó ke Hodáwanday kerrá sar but, wati delá gwashti: “Man cha ed o rand hechbar zeminá ensánay sawabá nálata nakanán, bell toré cha kasániá áiay delay wáhag bad ant. Cha ed o dém hechbar sajjahén sahdárán é paymá hórigá gár o gomsára nakanán ke annun kortagon.
22Tán hamá wahdá ke zemin hastent
kesht o keshár o rón o móshay#8:22 Rón o mósh, bezán kesháray ronag o moshag, kesháray baray dar árag. wahd,
sárti o garmi,
garmág o zemestán o
róch o shapa naóshtant.”
Právě zvoleno:
Pédáesh 8: HPKB
Zvýraznění
Sdílet
Kopírovat
Chceš mít své zvýrazněné verše uložené na všech zařízeních? Zaregistruj se nebo se přihlas
© 2015-2022, Wycliffe Bible Translators, Inc. and the Balochi Bible Translation Team. All rights reserved.