O Kandɔɔ 4
4
Kain nda Abɛl
1Mɛɛ vanapɔnɔɔ siná Hava laa ndɔ vanalanɔ, mí Hava cua folio, mó vialu Kain, mó dimi aa: «I sɔla hɔ́ɔ́ piaandoo Mɛlɛka o ba bɛngu.» 2Mó mulin vɛlɛ, mó vialu Abɛl, pɔmbɔɔ Kain pɛɛn.
Mí Abɛl siŋnun vana mandaa n'cɔloo, mí Kain ndu siŋnun vana váà. 3Telen pum hiovɔɔ, mí Kain hun a ɲɛm o kow o ciɛi ndɔɛi nin-ndon, mó solul Mɛlɛka sálàá. 4Mí Abɛl ndu hun a cɔlua tasea cɔlua ndɔa kom-nda, mó solul Mɛlɛka sálàá a visin bɛɛŋun macuɛin kɛndɛ-kɛndɔn. Mí Mɛlɛka cɛl Abɛl a sálà ndɔɔ. 5Kɛ mó kɛɛ Kain a sálà ndɔɔ. Le hee, mí Kain tambu kɔl taw-taw, mó suuma suumaa pila. 6Mí Mɛlɛka ɲuna ndu aa: «Le yɛɛ n tambu yɛ kɔl ma va suumaa? 7Taa caa pɛ kelaa, a cuanin bollen, kɛ taa cee kelaa le, hakio co nɔm o dio maa ɲɛ-vueinan, o yeema mò tiw nɔm ba, kɛ nɔm, a bɛnda ma nɔla haki kalaa.»
8Mí Kain dimul Abɛl pɔmbɔ ndɔ aa: «N fula mì n kɔɛ yondoo nin.» Mɛɛ nda fula má kɔa yondoo nin, mí Kain del Abɛl pɔmbɔ ndɔ coo, mó dii ndu.
9O kon, mí Mɛlɛka ɲuna Kain aa: «Kuɛɛ nɛ Abɛl pɔmbɔ nɔm co yɛ?» Mí Kain mulul ndu aa: «I sínà le. Mò va maa ya co kpalilnɔ pɔmbɔ nuu ni.» 10Mí Mɛlɛka dimul ndu aa: «Dɛnɛ yɛɛ n tosa yɛ hoo? I co kooma pɔmbɔ nɔmndan tueyɔɔ koŋullo lɛŋ. 11Lelan, kandɔɔ hau, dangaa co nɔm coo o lɛŋnde kooma pɔmbɔ nɔmma n soli-an ma luɛi nin-nden coo. 12Mɛ̀ɛ́-mɛ̀ɛ́ n tosa nin vallo lecoo, le lueilul-lɛnin nɔm tɔnɔ ndɔɔ le. A ve lɛnin icali o pumbú le. Le fɛɛn a fɛɛn nin, vana kelanndo n vanin o lɛŋnden coo ni.»
13Mí Kain dimul Mɛlɛka aa: «Yɔŋ vɔɔn ya tosa hoo-o hiow ya mayoomu. 14Mɛɛ n cii ya hau tovɔɔ ma faŋa ya o lɛŋnde ya va vàá len coo yɛ, i co faŋan nɔm o hɔl mì kɔ vionnun levil lándán. Kani i nɔ lɛ pumbú calaa le, i siŋnun vana kelanndo o lɛŋnden coo. Le hee, vana-vana saalun ya pɛ, o dii ya.» 15Kɛ mí Mɛlɛka mulul ndu aa: «Vana diinin nɔm te, kani vana-vana dii nɔm Kain pɛ, fɔ mi vanndacieea vi a ŋɔmmɛw malan màá nɔmndo cuu mingi o vana kon ndo.» Mí Mɛlɛka handu Kain pondalen le vaa teengen a vanaa tɔ̀a, haliko vana-vana nda bɔŋan pɛ, o díì ndu le. 16O kon, mí Kain faŋan Mɛlɛka o hɔl, mó kɔ calnun o lɛŋnde Nɔd len nin, lɛŋnde len le va lɛŋnde Edɛn-nden a ba paalen le can-ndo.
Polale Kain-nden
17Mɛɛ Kain siná laa ndɔ vanalanɔ, mó cua folio, mó vialu Henɔk. Mí Kain kandu kobio tangullo, mó ke kobi kon diola po ndɔɔ aa Henɔk. 18Henɔk kon yɔŋnun fuɲaa Irad ni, mí Irad vialu Mehuyaɛl, mí Mehuyaɛl vialu Metusaɛl, mí Metusaɛl vialu Lemɛk.
19Mí Lemɛk yil laandua nda ŋiɔn, o tasoo diolan aa Ada, o diinndɔɔ aa Silla. 20Mí Ada vialu Yabal. Yabal kon yɔŋnun fuɲa-mama vanaa mandaa n'cɔlua lɔ̀l o cɛila-kolala-toandaalan bɛngu-a ni. 21Má vilul Yabal pɔmbɔɔ diolan Yubal. Ndu yɔŋnun fuɲa-mama vanaa lɔaa labangaa a vanaa hɔŋaa masɛ̀ŋnda ni. 22Mí Silla bɛɛ vialu Tubal-Kain. Mó siŋnun sumnɔ kɛndɛ-kɛndɔɔ pila, ndóò cɔaw ɲɛm valin luɛyan tɛmtɛmndon a daɲan a á cilinndon ni. Yema laandu Tubal-Kain-ndo yɔŋnun Naama ni.
23Mí Lemɛk dimul laandaa ndɔa aa:
«Ada niaa Silla, la tuei-yɔ ɲɛ ya co niaa dimul-lo.
Laandaa Lemɛk-a, la yaŋ-ndɔ nilan.
I dii vanapɔnɔɔ o pilɛ le bolin nuu,
mí dii cɛlɛkpɔɔ o pilɛ le funkpula nilan.
24Te vanndacieea nda ŋɔmmɛw a nɔ le vuo
le màá Kain-ndo mingio ni,
le ya Lemɛk, fɔ mi vannda vi belaŋɔmmɛw a à ŋɔmmɛw
malan màá nuu cuu mingi.»
25Mí Adam sina vɛlɛ laa ndɔ vanalanɔ, mó vialu hɔ́ɔ́ piaandoo. Mí Hava ke ndu diolan aa Sɛt, kani mó dimi aa: «Hala ke ya vɛlɛ po celen o fonda Abɛl-lo, o Kain dii-o.»
26Mí Sɛt bɛɛ vialu poo, mó ke ndu diolan aa Enɔs. Boondii ken kínɛí vanndacieea kandu Hala veeloo aa Mɛlɛka o piɛilen nin ni.
Právě zvoleno:
O Kandɔɔ 4: BKG
Zvýraznění
Sdílet
Kopírovat
Chceš mít své zvýrazněné verše uložené na všech zařízeních? Zaregistruj se nebo se přihlas
© Alliance Biblique en Guinée