KO SĒNESI Ko e Talateu
Ko e Talateu
Ko e ‘uhinga ‘o e Sēnesí ko e “tupu‘anga”. ‘Oku fakamatala ‘a e tohí ki he fakatupu ‘o e ‘ūnivēsí, mo e tupu‘anga ‘o e fa‘ahinga ‘o e tangatá, mo e kamata‘anga ‘o e angahalá mo e mamahí ‘i māmani, pea mo e founga ‘a e ‘Otuá ki he‘ene fefāinga mo e fa‘ahinga ‘o e tangatá. ‘E lava ke vahevahe ‘a Sēnesi ki he konga lalahi ‘e ua: 1) Ko e vahe 1-11: Ko hono fakatupu ‘o māmaní mo e kamata‘anga ‘o e fa‘ahinga ‘o e tangatá. Ko e ngaahi fakamatala ‘eni ‘o kau kia ‘Ātama mo ‘Ivi, Keini mo ‘Ēpeli, Noa mo e Lōmakí, pea mo e Taua ‘o Pēpelí. 2) Ko vahe 12-50: Ko e hisitōlia ‘o e ngaahi kui ‘i mu‘a ‘a e kakai ‘Isilelí. Ko e ‘uluakí ko ‘Epalahame, ‘a ia na‘e ‘iloa koe‘uhí ko ‘ene tuí mo ‘ene talangofua ki he ‘Otuá. Pea ‘oku hoko mai ki ai ‘a e talanoa ki hono foha ko ‘Aisaké, mo hono mokopuna ko Sēkopé (‘a ia na‘e toe ui ‘aki ‘a e hingoa ko ‘Isileli), mo e ngaahi foha ‘e toko hongofulu mā ua ‘o Sēkopé, ‘a ia ko kinautolu ia ‘a e kamata‘anga ‘o e ngaahi matakali ‘e hongofulu mā ua ‘o ‘Isilelí. ‘Oku ‘i ai ‘a e tokanga makehe ki he foha ‘e taha ‘o Sēkope, ko Siosifa, pea mo e ngaahi me‘a na‘e hoko ‘o ‘omi ai a Sēkope mo e toenga ‘o hono ngaahi fohá ke nofo ‘i ‘Isipité.
Neongo ‘oku fakamatala ‘a e tohi Sēnesí ki he kakai, ka ‘oku ‘amo ange ‘ene fakamatala ki he ‘Otuá. ‘Oku kamata ‘aki ia ‘a e fakamo‘oni ki hono fakatupu ‘e he ‘Otuá ‘a e ‘ūnivēsí, pea faka‘osi ‘aki ‘a e tala‘ofa ‘a e ‘Otuá te ne hokohoko atu ‘ene fakahaa‘i ‘ene tokanga ki hono kakaí. Mei mu‘a ‘o a‘u ki ki mui, ko e ‘Otuá ‘a e tokotaha ‘oku fai ki ai ‘a e talanoá, ‘a ia ‘okú ne fakamaau mo kinisi ‘a kinautolu ‘oku faihalá, pea ‘oku ne tākiekina mo tokoni‘i hono kakaí, mo ne fatufatu honau hisitōliá. Ko e tohi eni na‘e fa‘u ‘i ono‘aho ko hono fakamatala‘i e tui ‘a e ki‘i kakai, mo hono tokoni‘i ai ai pē ‘enau tui ko iá ke mo‘ui.
Ko e Kakano ‘o e Tohí
Ko hono fakatupu ‘o e ‘ūnivēsí mo e fa‘ahinga ‘o e tangatá (1.1–2.25)
Ko e kamata‘anga ‘o e angahalá mo e mamahí (3.1-24)
Meia ‘Ātama kia Noa (4.1–5.32)
Ko Noa mo e Lōmakí (6.1–10.32)
Ko e Taua ‘o Pāpiloné (11.1-9)
Meia Semi kia ‘Epalame (11.10-32)
Ko e kau pēteliaké: ko ‘Epalahame, ‘Aisake mo Sēkope (12.1–35.29)
Ko e ngaahi hako ‘o ‘Īsoa (36.1-43)
Ko Siosifa mo hono fanga tokouá (37.1–45.28)
Ko e kakai ‘Isilelí ‘i ‘Isipite (46.1–50.26)
Právě zvoleno:
KO SĒNESI Ko e Talateu: TMB
Zvýraznění
Sdílet
Kopírovat
Chceš mít své zvýrazněné verše uložené na všech zařízeních? Zaregistruj se nebo se přihlas
Tongan Moulton Bible © Bible Society of the South Pacific, 2011.