Tongo nda ti aye 7
7
Noe ali na ya ti mangboko
1KOTA GBIA atene na Noe: “Mo na azo ti da ti mo kue, ala li na ya ti mangboko ni, ngbanga ti so, mbi baa so gi mo oko laa mo yeke zo ti mbirimbiri na popo ti azo ti ngoi ti mo. 2 Na popo ti anyama so ayeke *nzoni, fade mo mu akoli ni mbarambara, awali ni mbarambara; koli ni na wali ni. Na popo ti ala so ayeke *sioni, mo mu koli ni oko na wali ni oko. 3Na popo ti andeke ti nduzu, mo mu nga akoli ni mbarambara, awali ni mbarambara; koli ni na wali ni. Tongaso si amara ti anyama ni so angba ti du na ndö ti sese. 4Angba lango mbarambara, mbi yeke sara titene ngu-Nzapa apika na ndö ti sese na ya ti lango baleosio. Mbi yeke sara titene aye so mbi sara si ayeke na fini so ahunzi na ndö ti sese.” 5 Noe asara ye alingbi na aye so kue KOTA GBIA amu yanga na lo ti sara ni.
Ngu asuku amu ndo kue
6Noe ayeke na ngu ngbangbo omene na ndembe so ngu asuku amu ndö ti sese kue so. 7 Lo na amolenge ti lo, wali ti lo, na awali ti amolenge ti lo, ala li na ya ti mangboko ni, ti kpe sukungo ngu ni. 8Anyama so ayeke *nzoni na ala ti kodro so ayeke *sioni, andeke, na aye so kue ayeke tambula na sese, 9koli ni na wali ni, aga na tere ti Noe na ya ti mangboko ni, tongana ti so Nzapa amu yanga na lo so. 10Na peko ti lango mbarambara ni, ngu asuku amu ndö ti sese kue.
11 Na ndembe so Noe ayeke na ngu ngbangbo omene, na lango baleoko na mbarambara ti use nze ni, angu ti gbe ti sese so ali mingi alondo na ya ti adu ti ala nde nde, asigigi na ngangu; fenetere ti yayu azi kota. 12Bi na lâ, ngu-Nzapa apika na ndö ti sese na ya ti lango baleosio. 13Gi na lango ni so, Noe ali na ya ti mangboko ni, lo na amolenge ti lo Sem, Kam na Yafet, wali ti lo, na awali ti amolenge ti lo ota kue, 14nga na amara ti nyama ti ngonda na ti kodro kue, amara ti ndeke nde nde, anyama so ayeke hara harango so kue, na anyama so ayeke huru na nduzu. 15Aye so kue ayeke na fini, koli ni na wali ni, aga ali na Noe na ya ti mangboko ni. 16Ala so kue ali na ya ti mangboko ni, ayeke koli oko na wali oko ti aye so kue ayeke na fini, tongana ti so Nzapa amu yanga na Noe so. KOTA GBIA akanga yanga ti mangboko ni na ndö ti Noe.
17Ngu so asuku, amu ndö ti sese kue asara lango baleosio. Ngu ni asuku si amu mangboko ni na ndö ti sese, ague na ni na nduzu na ndö ti ngu ni. 18Ngu ni asuku ngangu amu ndö ti sese kue si mangboko ni ayeke tambula na le ti ngu. 19Ngu ni angba gi ti suku ngangu ngangu. Akota hoto kue ti ndö ti sese so ayo na nduzu mingi so, ngu ahon ndö ni kue. 20Ngu asuku ngbii ahon li ti ahoto ni metere mbarambara. 21Aye so kue ayeke na fini si ayeke tambula na ndö ti sese: andeke, anyama ti kodro, anyama ti ngonda, anyama so ayeke hara harango na sese, na azo kue akui. 22 Aye so kue ayeke wu pupu si ayeke na fini, na aye so kue ayeke na ndö ti sese akui. 23Lege so KOTA GBIA ahunzi aye so kue ayeke na fini na ndö ti sese laa: azo, anyama ti kodro, anyama so ayeke hara harango, na andeke kue. Ala kue ahunzi. Gi Noe na ala so ayeke na tere ti lo na ya ti mangboko ni laa angba.
Noe asigigi na ya ti mangboko
24Ngu ni angba na sukungo ni na ndö ti sese na ya ti lango ngbangbo oko na baleoku.
Právě zvoleno:
Tongo nda ti aye 7: MNF2010
Zvýraznění
Sdílet
Kopírovat
Chceš mít své zvýrazněné verše uložené na všech zařízeních? Zaregistruj se nebo se přihlas
© La Société Biblique de Centrafrique 2010