LUKA 24
24
Jesu o tsoga bahung, o bonwa ke basadi le barutiwa ba Emause. Thotogelo
1Ka letšatši la pele la beke, meso e sa nkga, ba tla lebitleng ba di swere, dinoko tšeo ba di lokišitšego, ba na le ba bangwe. 2Ba hwetša leswika le pshikološitšwe le tlošitšwe lebitleng. 3Ba tsena ba hwetša mmele wa Morena Jesu o se gona. 4Ya re ba sa belaela ge go le bjalo, ba bona banna ba babedi ba tšwelela go bona ba apere diaparo tše di phadimago. 5Ba tšhoga ba inamela fase ka difahlogo. Banna bao ba bolela ba re: E a phelago le mo nyakelang mo bahung? 6Ga a mo, o tsogile. Gopolang tše a le boditšego tšona a sa le kua Galilea, 7ge a re: Morwamotho o swanetše go gafelwa matsogong a batho ba badiradibe, a bapolwe sefapanong, mme a tsoge ka letšatši la boraro.
8Ba elelwa dipolelo tšeo tša gagwe. 9Ba tloga moo lebitleng, ba ya ba botša ba lesome le motšo o tee le ba bangwe bohle ditaba tšeo ka moka. 10Basadi bao e be e le Maria Magdalena, le Johana, le Maria mmago Jakobo, le ba bangwe ba bego ba na le bona. Ke bona ba ba boditšego baapostola ditaba tšeo. 11Fela, dipolelo tšeo tša bona, go bao tša ba bjalo ka eke ke metlae, mme ba se ba dumele. 12Petro a nanoga a kitima a ya lebitleng a ukamela; a bona mašela a beilwe thoko; a boa a tlabegile ka tše di diregilego.
13Ka lona tšatši leo gwa tsoga ba babedi ba bona, ba ya motsaneng o mongwe, wo motho, a etšwa Jerusalema, a sepela tsela e kago lekana bophara bja mašemo a masome a selelago. Leina la motsana woo ke Emause. 14Ba tšama ba botšana ditaba tšeo ka moka tše di diregilego. 15Ba re ba sa ya ba boledišana, yena Jesu a batamela a sepela le bona. 16Fela mahlo a bona a širetšwa, ba se ke ba mo tseba. 17Yena a ba botšiša a re: Ke dife ditaba tše le tšamago le botšana le nyamile?
18Gwa fetola e mongwe wa bona, ke Kleopa, a re: A mo gare ga baeng ba fa Jerusalema ke wena o nnoši o sa tsebego tše di diregilego mehleng yeno?
19Jesu a re: Ke dife?
Bona ba re: Ke tša Jesu wa Natsaretha yo e bego e le Moporofeta yo maatla medirong le dipolelong tša gagwe pele ga Modimo le pele ga batho bohle. 20Ka mo baperisita ba bagolo le babuši ba rena ba mmegilego, a ahlolelwa go bolawa, mme ba mmapola sefapanong. 21Ge e le rena re be re holofetše ra re ke yena a tlogo phološa Isiraele. Gomme la lehono ke tšatši la boraro ge ditaba tšeo ka moka di phethegile. 22Fela, basadi ba bangwe ba gešo ba re tlabile. Ba ile lebitleng e sa le ka meso. 23Ba hloka mmele wa gagwe; ba tla ba re: Re bone pono ya barongwa ba ba itšego: O a phela. 24Ba bangwe ba rena ba na ba ya lebitleng, ba hwetša go le ka mo basadi ba boletšego ka gona; yena ba se ke ba mmona.
25Ke mo yena a fetotšego a re: Aowii, a batho ba go se hlaologanye le ba dipelo tše di tšwafago go dumela tšohle tše di boletšwego ke baporofeta. 26A Kriste o be a sa swanela go tlaišwa ka mokgwa woo, a kgono tsena letagong la gagwe? 27A thoma ka Moshe, a iša go baporofeta ka moka, a ba hlathollela tša mo mangwalong ka moka, tše a boletšwego ka tšona.
28Ba ba ba tla motsaneng woo ba yago go wona; yena a swara tsela bjalo ka eke o fetela pele. 29Bona ba mo phegelela ba re: A nke o dule le rena, gobane e šetše e le mantšiboa, mme letšatši le a dikela. -- Gomme a tsena a dula le bona. 30Ya re ge a dutše dijong le bona, a tšea bogobe, a leboga, a bo ngwathaganya a ba nea. 31Ke mo mahlo a bona a bonešwago ba napa ba mo tseba; fela a širela ba sa mo lebeletše.
32Ba šala ba botšana ba re: Dipelo tša rena a ga tša ka tša swa ka mo go rena mola a bolela le rena tseleng, ge a re hlathollela mangwalo?
33Ba tsoga ka lona lebaka leo, ba boela Jerusalema; ba hwetša ba lesome le motšo o tee ba phuthegile le ba ba nago le bona, 34Ba re: Ruri, Morena o tsogile; o bonwe ke Simone.
35Le bona ba ba anegela tše di ba diregetšego tseleng, le ka mo ba mo tsebilego ge a ngwathaganya bogobe.
36Ba sa bolela tšeo, yena Jesu a ema gare ga bona, a re: Khutšo a e be le lena!
37Mme ba tšhoga ba boifa, ba re ba bona seriti. 38Yena a bolela le bona a re: Le tšhogang? Ke ka baka lang ge dipelong tša lena go tsoga pelaelo? 39Bonang diatla tša ka le maoto a ka; le bone ge e le nna ka sebele. Nkgwatheng le bone, gobane seriti ga se na nama le mašapo, tše le mponago ke na natšo.
40A realo a ba bontšha diatla le maoto. 41Bona ba sešo ba dumela ka go thaba le ka go kgotsa, yena a re: A le na le sejonyana? 42Ba mo nea seripa sa hlapi le lemapo la dinose. 43A di tšea a di ja ba mo lebeletše.
44A tsebo bolela le bona a re: Ke tšona tše ke le boditšego tšona, mola ke sa na le lena, ka re, go swanetše go phethega tšohle tše di mpolelago di ngwadilwe Molaong wa Moshe le go baporofeta le dipsalome.
45A ba bulela tsebo, gore ba kwešiše mangwalo. 46A re: Mangwalo a re Kriste o tlo tlaišwa, a tlo tsoga bahung ka letšatši la boraro. 47Gore ditšhabeng ka moka ka leina la gagwe go tsebatšwe tshokologo le go lebalelwa dibe, gwa tlo thongwa ka Jerusalema. 48Lena le dihlatse tša ditaba tše. 49Gomme le tsebe gore nna ke tlo le romela se Tate a le holofedišitšego, sa tlo le tlela. Le dule motseng wa Jerusalema, go fihla ge le tlo hlamišwa maatla a tšwago godimo.
50A tšwa le bona a ba iša kgauswi le motse wa Bethania; a emiša diatla tša gagwe, a ba šegofatša. 51A re a sa ba šegofatša, a tloga mo go bona, a rotošetšwa legodimong. 52Bona ba mo khunamela; ba kgona ba boela motseng wa Jerusalema ba thabile gagolo. 53Ka mehla ba hlwa ba le Ntlongkgethwa ba reta Modimo.
Právě zvoleno:
LUKA 24: NSO51
Zvýraznění
Sdílet
Kopírovat
Chceš mít své zvýrazněné verše uložené na všech zařízeních? Zaregistruj se nebo se přihlas
© Bible Society of South Africa 1986. Used with permission. All rights reserved.
