LUKA 15
15
Nku e timetšego. Šeleng e timetšego. Morwa e a timetšego
1Ba lekgetho le badiradibe bohle, e be e le bona ba ba bego ba mmatamela ba mo kwa. 2Bafarisei le bamangwalo ba tsota ba re: Šo, o amogela badiradibe; o ja le bona. 3Jesu a ba botša seswantšho a re:
4Ke mang motho mo go lena e a nago le dinku tše lekgolo; gomme ge a timelelwa ke e tee ya tšona, a ka se kego a tlogela tše masome a senyane a metšo e senyane gare ga naga, a ya a nyaka ye e timetšego, go be go tle a e hwetše? 5Gomme ge a e hweditše, a e bae magetleng a gagwe a thabile; 6ge a fihla gae a bitša bagwera ba gagwe le baagišani, a re: Thabang le nna, gobane nku ya ka e bego e timetše, ke e bone. 7Ke a le botša ka mokgwa o bjalo kua legodimong lethabo ka modiradibe o tee e a sokologago e tlo ba le le fetago la ge go thabelwa ba masome a senyane a metšo e senyane ba ba sa nyakego tshokologo.
8Le gona mosadi ke mang e a nago le mašeleng a lesome, ge a timelelwa ke e nngwe ya tšona, a ka se kego a gotetša lebone, a swiela ngwako, a e tsomeša gagolo, go be go tle a e bone? 9Gomme ge a e bone, a bitša bagwera ba gagwe le baagišani, a re: Thabang le nna, gobane šeleng yela e bego e ntimeletše, ke e bone. 10Ke a le botša, ka mokgwa o bjalo le barongwa ba Modimo ba thabela modiradibe o tee e a sokologago.
11A buša a re: Motho e mongwe o be a na le barwa ba babedi. 12E monyenyane wa bona a bolela le tatagwe a re: Tata, abaganya thoto o mphe kabelo ya ka. -- Tatabo a ba aroganyetša leruo. 13Ge go fetile mehla e sego mekae, morwa wa gagwe e monyenyane eo a kgobela dilo ka moka, a tloga a ya nageng e kgole; a le moo a tšitlanya lehumo la gagwe ka bojato. 14Ge a le feditše ka moka, naga yeo ya welwa ke tlala e thata; mme a thoma go hloka. 15A ya a thwalwa ke motho e mongwe wa naga yeo; yena eo a mo iša merakeng ya gagwe, a mo dišiša dikolobe. 16Moo a phela ka go raka tlala ka mekgatša e lewago ke dikolobe, le yona a hloka wa go mo fa yona. 17Ke mo a thomilego go ikgopola a re: Tate bahlanka ba gagwe ke ba bantši; ba patlwa ke bogobe; mme nna ke hwa ka tlala. 18Ke tlo tsoga ka ya go Tate, ka bolela le yena ka re: Tata, ke senyetše legodimo le pele ga gago. 19Mme ga ka swanela go hlwa ke bitšwa morwa wa gago. A nko ntire e mongwe wa bahlanka ba gago. 20A tsoga a ya go tatagwe.
Ya re a sa le kgole, tatagwe a mmona, a mo kwela bohloko; a kganyela a mo gokarela, a mo atla. 21Morwa wa gagwe a bolela a re: Tata! Ke senyetše legodimo le pele ga gago; mme ga ka swanela go hlwa ke bitšwa morwa wa gago. 22Tatagwe a laela bahlanka ba gagwe a re: Akgofang le tliše kobo; le hlaole e botse ya tšona, le mo apeše, le mo rweše palamonwana seatleng, le dieta dinaong tša gagwe. 23Gomme le yo gapa namane e nonnego, le e hlabe, re tle re je re thabe. 24Gobane morwa wa ka yo o be a hwile, gomme o boetše o a phela; o be a lahlegile, mme a bonala. -- Ke moka ba thoma go thaba.
25Mogolwagwe o be a le tšhemong. Ge a boa a etla kgauswi le ngwako, a kwa diletšo le dikoša. 26A bitša e mongwe wa bahlanka, a mmotšiša a re: Tšeo ke tša go reng? 27Eo a re: Monnago o tlile. Tatago o hlabile namane e nonnego ka ge a bile a mmone a sa phela.
28Mogolwagwe a befelwa, a gana go tsena. Tatagwe a ba a tšwa a mo rapela. 29Yena fetola a bolela le tatagwe a re: O ko bone; nna ke feditše nywaga e makaakaa ke go direla. Ga go mo ke setšego molao wa gago; gomme ga o ešo wa ba wa mpha le ge e ka ba pudi ya gore ke thabe le bagwera ba ka. 30Gomme bjale, morwa e wa gago, a tla a meditše maruo a gago e le segwahla; mme a sa fihla, wa mo hlabela namane e nonnego. 31Tatagwe a re: Ngwanaka! O na le nna ka mehla; mme dilo tšaka ka moka ke tša gago. 32Go swanetše ge re thaba ra hlalala, gobane monnago e o be a hwile, gomme o boetše o a phela; o be a lahlegile, mme a bonala.
Právě zvoleno:
LUKA 15: NSO51
Zvýraznění
Sdílet
Kopírovat
Chceš mít své zvýrazněné verše uložené na všech zařízeních? Zaregistruj se nebo se přihlas
© Bible Society of South Africa 1986. Used with permission. All rights reserved.
