Matiu 4
4
Jisas ile tongporumong.
(Mak 1:12-13; Luk 4:1-13)
1Lama Oni Riringa i paes a Jisas a pen polpolnga la, mo aro Satan i tongporum i. 2Na Jisas i voth nge na i an avele e nang na mlik or mule pa penel, lamako Jisas i rova ol mesipuniong. 3Na a ur e avele na Satan i es a i nge me, ma i ria i ve, “Tova ve ong ini a God Itun, aro ong ria um areke mo o eksing mo ini bret.”
4Ave Jisas i olal ile riong ve, “Na God ile erere i ri vene,
‘Toko i pavurvur aro i mimi inga nge aning avele,
ave aro i mimi nge a God ile riong alavusnga.’” Lo 8:3
5Lamako Satan i wola a Jisas ako la a rem riringa a Jerusalem ma i paesa i a Lotu Tepun a Vel, ma i pamita i roro a vel polemi. 6Ma i ria i ve, “Tova ve, ong ini a God Itun, aro ong opthou la, ke God ile erere i ri ve,
‘God aro i ria ile enselre
mo aro o theal ong.
Naro o monteta la ong nge omeni,
mo aro evom i tup nge um e avele.’” Buk Song 91:11-12
7Lama Jisas i olal ile riong ve, “Ave God ile erere i ri mun vene,
‘Mothong tova tongporum Toko Pomnga
ako ini lom God ile engenging.’” Lo 6:16
8Lamako Satan i wola mun a Jisas a tete polemi ako i roro rintet, ma i pathengalpot i nge rumrem alavusnga ake ru a ulue tomo mun nge a malmaling. 9Lama i ria mun i ve, “Aro tho sungu ur alavusnga ake ru a ong nge, tova ong koru evom na ong lotual tho.”
10Ma Jisas i olal ile riong ve, “Satan, ong lopot nge tho, eneke God ile erere i ri ve,
‘Aro ong lotual inga Toko Pomnga
ako ini lom God.
Naro ong voth inga a isa thewo.’” Lo 6:13
11Mako Satan i lopot a Jisas nge, nako enselre o es me ma o opoal ol a Jisas.
Jisas i patea ile omaing a epee a Galili.
12Lama Jisas i nongpol ako o paeso a Jon a mang a midenga lemi, mako i lo werer a Galili la. 13I velpol a Nasaret ma i losa nge na i alpo a rem a Kaperneam ako a thei a pamonlel a Galili, aken ini net Sebulun na net Naptali oa ulue. 14Na ile vothung ake i pavelpol nunganga ur ako God ile riong elnga a Aisaia i ri nge ve,
15“Ako nge a net Sebulun na net Naptali oa ulue,
totho a rua, ako a thei a Jordan wo epee,
epee a Galili i voth nge.
Ini pen ako tokokoe areko or ini Judare avele o voth nge.
16Na toko areken, o voth a mideng aolonga lemi,
aro o thepol pen lalanga aolonga.
Na areko o voth a rinong lemi,
pen lalanga i to a or nge lale.” Aisaia 9:1-2
Jisas i panongpol nge a God ile menong e nepes, na i pamimi werer toko na seng alavusnga areko ni multhanging i voth a or nge
(Vonge 4:17–9:34)
Jisas i lengpot ile wainlanga teltelngare.
(Mak 1:16-20; Luk 2:5-11; Jon 1:35-42)
17Nge wop lemi aken Jisas i patea ol ile panongpolong ma i ri ve, “Kimomu lelal nge lomu vothung kerengare, eneke God ile menong e nepes i toth me lale.”
18Jisas i es a thei a pamonlel a Galili a wonwon po, ma i thepol titeinpel aini, Saimon, ako iion aininga a Pita na iteinnga a Andru. Or paini ini silang elngare ma o rongu oa susua a thei, eneke ake ini or paini ole omaing, ako o el umtun nge. 19Mako Jisas i ria or ve, “Thomu o panes tho mo aro tho patoral thomu nge tokokoere oelnga.” 20Na a ur e avele, nako o modipdopu oa susuare, mako o panes ol i.
21Lama o espot mun lollo avele na i thepolo mun titeinpel aini, ako ini a Jems na Jon a oa wok nge, tomo nge
otema a Sebedi ako o italal oa susua minranga. Mako Jisas i lenga mun or. 22Na a ur e avele, nako o modipdopu oa wok tomo nge otema, mako o panes ol i.
Jisas i panongpol na i pasenu werer toko ni multhanginga pulua.
23Lamako Jisas i esu esa ol a pen alavusnga ako a Galili, ma i pamireal a Judare ole lotuonga a velre na i panongpol mun nge Panongpolong Sivenga nge a God ile menong e nepes, na i pasivenga mun tokokoere nge ni multhanging alavusnga ako i el or. 24Na iion i kima a pen alavusnga ako a Siria. Mako tokokoere o paes tokokoe areko ni multhanging rel relngare o velpol ol a or nge, a i nge la. O paes areko sisisong aolonga rintet i voth a oni peti, na tokokoe areko tamata kerengare o rero or, na tokokoe areko sawirong aolonga i el or ma o matu, na tokokoe areko oni peti motungtung, mo Jisas i pasivenga or. 25Na pulua pomnga ako o panes i. O es a Galili me, na pelie mun o losa a Jerusalem na epee a Dekapolis na epee a Judia na pelie mun a Jordan wo epee.
Právě zvoleno:
Matiu 4: mhb
Zvýraznění
Sdílet
Kopírovat
Chceš mít své zvýrazněné verše uložené na všech zařízeních? Zaregistruj se nebo se přihlas
© 1999, Wycliffe Bible Translators, Inc. All rights reserved.
