Jon 7
7
Jises ma nadu tinen oro
1Ano badeh, Jises edek in bolo kon Galili. Iy bwalen edek ili bolo kon Judiya, tasah iri Juwis badeh, atondrok ta adai iy kimek. 2Idoh mirihik ta len tinan tiri Juwis ta amekes nyamon tinan ta asiu beleheleh.#(7:2) Iri Juwis amekes nyamon tinan ta asiu beleheleh bolo jaha mari. Moson ta aliy badeh, ta abudon tubu iri bwena mene adek ala ame are kon lomale an, atah asiu beleheleh. Iri ale adeu wurah i ta Kindrei ta nyamon badu bilin tiri tukumwi marakon ili le se. 3Nadu tinen oro ame asehek i tan i buku doh, “Ou au ala Judiya ma oro lau tam kanyolom ou amekes lahou tinan. 4Are lau iy anya lau marakon katanan iy badeh, iy winiyan batone ari lakou bwe. Buku ou amekes iri lakou doh, mwasin ta ou leheya ou ala ta lau marakon badu kon munyak.” 5Nadu tinen oro amwenen badeh, asehek sahou doh, tasah oro batehei budon toro bala tan bwe.
6Jises asehek sahou amwenen ili ta nadu tinen oro, “Len tek handru badeh, kahis le. Arile len marakon mwasin tado. 7Ndrine iri lau marakon badu kon munyak winiya bandra-i bawek tado bwe. Ndrine iri kameh andra-i eme tek, tasah jo asehek kandriyen ndra-in iri amekes. 8Abo, ado kala ta len tinan ma nyamon tinan. Jo winiyan bawek bwe le. Len tek amwenen badeh, kahis le.” 9Iy asehek sahou ili toro ano, iy udu Galili udu.
10Nadu tinen oro ndradek ndra-au ndrala ta len tinan ma nyamon tinan tiri Juwis. Ano Jises edek in hamon toro ili, tasah iy bwalen iri lau sanyolom iy. 11Udu ta len tinan ma nyamon tinan tiri doh, iri Juwis asilah iy. Iri ndremenya, “Iy ndramak doh ndraheh?” 12Loboho doh badeh, iri lau solo-an labai. Iri badeh, suburuk i tiri ta Jises. Iri rayah asehek Jises i buku doh, “Iy ndramak ari mwasin.” Iri rayah ja asehek anya, “Iy ta wendreya iri lau.” 13Arile, iri ari winiyan bales bado mada iri lau asehek ta nyala Jises bwe, tasah iri anoh iri Juwis.#(7:13) Idoh bala buku iri anoh iri Juwis ari ari bwe. Iri anoh le iri tinan o kabin nane bwale iri Jises.
Jises leheya iri udu bwele-e nyamon tinan
14Len taloh ta nyamon tinan tiri Juwis kahis le, Jises eme edek amwenen ili bolo kowah ta asiu tinan ta Kindrei, iy eme leheya iri lau. 15Iri lau tinan tiri Juwis ado aliy ale, mani iri atur, eme iri ndremenya iri, “Iy bala ari kon ta leheya bwe, arile iy akohok iri tanan doh badu heh handru?”
16Jises eme asehek i buku doh, “Saba lakou jo leheya badeh, na budon tek amwenen bwe. Kindrei suni jo eme dah, ma iy edeu iri budon tan eme tek. 17Buku are lau anya ki-in hamon ta lahou ta Kindrei iy winiyan i tanan sahou nane jo asehek, iy kameh i tanan sahou udu ta Kindrei eme, o, sahou jo asehek na le budon tek amwenen. 18Are lau iy asehek sahou na le budon tan amwenen badeh, iy ta atudun le nyaran. Arile, are lau iy anya katudun nyara ndramak nane iy suni iy eme, iy ndramak doh asehek sahou handru. Iy ta wendreya bwe. 19Bwena mene Moses edeu taha sahou batanau ta kandriyen malen. Arile aha ari ba-en hamon ta aliy bwe. Buku sah ja aha anya kadi jo kimek?”
20Iri lau asehek sahou i tan i buku doh, “Ou kede-eh balik udu bwele-em. Are lau handru anya kidi ou amak?”
21Jises tiye i tiri i buku doh, “Jo bwidi lahou tinan ari, eme mani aha atur ta aliy. 22Moses mene tiye i taha ta sani ku-i nadu aha iri. (Kandriyen doh basahan ta Moses bwe. Kandriyen doh udu ndra bada tubu aha iri.) Arile aha asan ku-i nadu aha iri udu bolo len ta amunyau. 23Buku sani ku-i nah mwan udu bolo len ta amunyau, taha tanan, kandriyen malen ta Moses bandra-i bwe. Taha kede-eh an hamon le ta kandriyen handru ta Moses. Ya buku sah ja aha abolosen eme tek ta jo bwidi ndramak ari amwenen ja udu bolo len ta amunyau? 24Aha ka-iy seleya lakou na mada aha le. Aha kaseleya iri lakou marakon ki-in san ta kandriyen mwasin.”
Jises kede-eh iy are lau handru?
25Lau rayah badu Jerusalem lelen, “Sebwe iy ndramak kede-eh iri anya kadi iy kimek a nadeh? 26Iy ales, iri ndranyolom iy, ma iri ndranuhun iy leheya iri lau. Ma iri kabin tiri Juwis basehek ari sahou bala tan bwe. Kora-on iri kabin ndratanan iy ndramwenen, ma iri anya, iy ndramak kede-eh Mesaya handru. 27Arile bwe, ahi tanan iy badu heh handru. Arile, len ta Mesaya handru ta eme hamon kameh ari ndramak winiya bala tanan, iy udu heh eme, bwe.”
28Jises leheya iri kahis le udu ndra bolo asiu tinan ta Kindrei. Iy asehek sahou bohon a tinan i loken, “Ya, aha tanan jo ma aha tanan jo badu heh handru. Jo bame dah na boto-on tek amwenen bwe. Tama suni jo eme, ma iy badeh, handru. Aha tanan tama bwe, 29arile jo tanan iy, tasah jo badu hawen. Iy le adeh suni jo eme.”
30Jises asehek sahou le badeh, eme iri lau rayah ame anya kateu iy. Arile ari ndramak batehei minen bala badan bwe, tasah idoh bamwenen ta len tan bwe le. 31Arile, iri lau solo-an labai atehei budon tiri ili ta Jises. Iri suburuk i buku doh, “Buku Mesaya keme, iy kameh amekes iri lahou tinan ma kalem solo-an. Arile, iy Jises kede-eh ja, iy amekes iri lahou tinan ma kalem solo-an labai ja. Sebwe iy Jises kede-eh, iy Mesaya nadeh?”
Iri Juwis rayah none ta ateu Jises
32Iri Parasi ndranuhun iri lau rayah nane suburuk ta nyala Jises. Eme iri ala hawe iri tinan tiri pris, suni iri lau ta atondrok asiu tinan ta Kindrei kala katawi Jises.
33Jises eme asehek i tiri i buku doh, “Jo kameh bado hawe aha luluwen bwe. Jo kameh iu ili hawe are lau iy nane suni jo eme. 34Aha kameh asilah jo, arile aha winiyan basilahei jo bwe. Ma aha kameh winiyan bame kon kameh jo ilih aliy bwe.”
35Iri Juwis rayah asehek amunum le ili tiri ari ari i buku doh, “Iy ndramak kede-eh anya iy kameh ili kon rakon doh, kameh taha winiyan basilahei iy bwe. Iy kameh ilih saba kon handru? Kora-on iy ki-iu kili bolo kon tinan tiri Grik, iri lau tataha rayah ado aliy? Kora-on iy kili kaleheya iri nadeh? 36Iy ndramak kede-eh asehek i buku doh: Taha kameh asilah iy, arile taha winiyan basilahei iy bwe. Ma taha kameh winiyan bala kon iy ilih aliy doh bwe. Kati sahou tan kede-eh, tasah handru?”
Jises asehek nyala gwa kohan handru udu le buku doh
37Mirihik ta len tinan tiri Juwis ta nyamon tinan tiri anya kano. Jises eme suri iy ere loken, ma iy asehek sahou i tinan i buku doh, “Buku are lau balen asamar, iy keme hawek ka-un gwa. 38Buku are lau iy atehei budon tan mara-ei eme tek, idah kameh gwa kaloh udu bolon amou eme len. Idah i buku buk ndrabun ndrasehek.” 39Jises asehek nyala Malawin Ndrabun. Buku are lau iri atehei budon tiri in tan, hamon kameh iri akohok Malawin Ndrabun. Udu ndra bada len doh Jises bala hamon bala kandrah, ta Kindrei leheya lomadan i tan bwe le. Eme ma Malawin Ndrabun bame andri bwe.
Iri lau andra-i manyuwa Jises
40Iri lau anuhun sahou badu bohon eme ma iri rayah asehek, “Handru labai, iy ndramak kede-eh badeh, propet.”
41Iri lau anya, “Iy ndramak kede-eh Mesaya.” Iri rayah ndremenya ja, “I buku sah handru Mesaya udu Galili eme? 42Buk ndrabun ndrasehek, Mesaya kameh asahan boho kamen ta Debit. Ma buk ndrabun asehek ale ta Mesaya kameh asahan Betlehem kon tinan ta Debit bwena mene udu aliy.” 43Eme ta Jises le badeh, bwidi iri lau apou iri. 44Iri lau rayah badeh anya kateu iy, arile mine iri bala se badan bwe.
Iri lau tinan tiri Juwis batehei budon tiri bala ta Jises bwe
45Iri lau ta atondrok asiu tinan ta Kindrei ala hamon hawe iri pris ma iri Parasi. Iri ame ndremenya oro, “Buku sah handru ado batawi Jises bame bwe?”
46Oro lau ta atondrok asiu tinan ta Kindrei anya, “Ei, ari ndramak basehek sahou bala buku iy ndramak doh asehek bwe!”
47Iri Parasi tiye ili toro i buku doh, “Sebwe iy ndrawendreya ado ale nadeh? 48Ya, ado ndranyolom, iri Parasi ma iri pris badeh, batehei budon tiri handru bala tan bwe. 49Arile, iri lau laleyah badeh, tanan kandriyen malen ta Moses mene bwe. Idah kameh losen ta Kindrei udu bwele-e iri.”
50Nikodemus badeh, ndrala bwena ndratou Jises. Iy badu hawe iri ale. Iy eme ndremenya iri i buku doh, 51“Buku sah, kandriyen malen tataha kede-eh winiyan atehei ari ndramak i ta mada sahou, buku taha banuhun iy bwe, ma taha bala tana taha ta saba lakou handru, iy bwidiy andra-i?” 52Iri ame tiye sahou i tan i buku doh, “Neh? Ou badu Galili ale? Buku ou anyolom bolo buk ndrabun amwenen badeh, ari propet winiyan bame loboho Galili bwe-en.”
[Iri lau ta tanan solo-an abudon anya Jon 7:53–8:11 bado bolo tarou ta Jon torowenei bwena mene bwe.]
Bolo tasou ta badih ari bamwenen bwe
[ 53Ano le badeh, iri lau marakon au ala hamon ala kon tiri amwenen.
Právě zvoleno:
Jon 7: lidNTpo
Zvýraznění
Sdílet
Kopírovat
Chceš mít své zvýrazněné verše uložené na všech zařízeních? Zaregistruj se nebo se přihlas
© 2001, Wycliffe Bible Translators, Inc. All rights reserved.
