LUK 22
22
Jisu azhihde Rük Yimkhi
(Mt 26.1-5; Mk 14.1-2; Jhn 11.45-53)
1Kheakü phungho-thünio de ajikhi phaüm muyukkhi yikhap thünio khiungde arü. 2Tüsho amükeam putungrübo tüsho yakzan thsangyurübonü api laksahpü rük yim, tümüde arünü mihtsürübo trede alakheah. 3Judüki thürükheak mahne bolung Iskariot de ajikhi Juda kheak Arimri yüzah. 4Judanü amükeam putungrü tüsho arüngyam aheangrü torübo kilim yü tüsho apinü künangde Jisu yinatsühbanü arü ki asukachih-a lu. 5Arünü asüh tüsho api kilim sho jihpü mulongkhit. 6Judüki apinü alokhi tüsho boto mülachoki arü kilim api yinatsühpü adükeak yim.
Phungho-thünio Thsakhamkhi
(Mt 26.17-25; Mk 14.12-21; Jhn 13.21-30)
7Judüki phungho-thünio namfimihnunu laksahpü phaüm muyukkhi nimung arü. 8Tüsho apinü Peter le Johan yüshihde tha, “Yüang tüsho isanü atsühpü thsüde phunghothünio isa thsungkheak thsakhamamg.” 9Jumonü anenü api ki tha, “Nünü ike kükheak thsakhamshihnela?” 10Apinü ane ki tha, “Kheahang, küyimki nüke kiuto ching yüzahbanü, kephüh shuhbah mihtsürü khülangnü nüke shorubah; api yüzahpung ching api dunglim yande yüzahang. 11Jushu nükenü thüyam putungrü ki thabah, ‘Thsangyurünü nü ki thachoh, “Inü I jingyanrübo bebah phungho-thünio tsühpü hanyam khiungshak küching la?”’ 12Judüki apinü nüke ki phezhingzhinga lakhi akube khiungshak ato khülang huhbah.” 13Jumonü apinü ane ki thakhi nangde anenü yü tüsho ju ngü, tüsho phungho-thünio thsakham.
Atungpuh Thünio
(Mt 26.26-30; Mk 14.22-26; 1 Kor 11.23-25)
14Tüsho küyimki kim khiungkhea, api le api lung jingyanrü thürükheak mahnenü bin. 15Judüki apinü arü ki tha, “I müthsünüyide ha phungho-thünio nüsa lung tsühpü inü mulongdaklah; 16tümüde inü nüsa ki thachoh, ha Thrünpuh kiulongthsü ching müdünjiyikia inü kheaküa mütsühlo.” 17Judüki apinü pung ju lubah makshe jih, tüsho tha, “Ha luang tüsho nüsa bolung chama luang; 18tümüde inü nüsa ki thachoh, Thrünpuh kiulongthsü arükhi khiungde inü kurungaso ke muyung.”
19Tüsho apinü yikhap lubah makshe jih tüsho ju yihnakbah arü kilim jihde tha, “Ha nüsa dünkheak jihkhi I pang ah; ha I lümkhitde rhimoang.” 20Junangde yimtsüh dunglim apinü pung ju she lubah tha, “Ha pung nüsa dünkheak bukkhi I thiyih tangzüng aso ah. 21Tüshe kheahang, I yinatsührü khah dükhüm kheak I lung lah. 22Atsütsü Mihtsürü Tsührü a akhua zokhi nangde yüchoh, tüshe api yinatsühbuh mihtsürü are!” 23Judüki ha rhimopü ju arü shepü laba de arü bolung keokhiachihpü tankih.
Ato dünkheak Atsangachihkhi
24 #
Mt 18.1; Mk 9.34; Lk 9.46 Tüshe arü bolung shepü atobe a de atsangachihkhi lakheah. 25Tüsho apinü arü ki tha, “Khiungkerü kiulongthsürübonü arü kurungkheak atungrü thsüchoh, tüsho sherünü arü kurungkheak thiyukhüm-sühmüh ahorichonü ‘arung-jihrü’ de jichoh. 26#Mt 23.11; Mk 9.35#Mt 20.25-27; Mk 10.42-44Tüshe nüsa bolung a jude yung; ju müthri, nüsa bolung shepü atobeanü akheambuh nangde, tüsho shepünü yakzan shuhchonü anihbuhnü tankihkhi nangde lashang. 27#Jhn 13.12-15Shepü atobe a, dükhüm ki binbuh a shi ahiuhakhipbuh a? Dükhüm ki binbuh yung de? Tütüshe I a nüsa lung ahiuhakhipbuh nangde lah. 28Tüshe I thsümütsü ching mutuklode I lung larü ju nüsa ah. 29Tüsho I Buhnü I kheak jihkhi nangde inü nüsa kheak kiulongthsü khülang jihchoh, 30#Mt 19.28junangde nüsanü I kiulongthsü ching I dükhüm kheak tsühyungbah, tüsho Israel trük thürükheak mahne mahkhapde kiulongthsü-binkiubo kheak binbah.”
Peternü Jisu Malokhipü Thakhi
(Mt 26.31-35; Mk 14.27-31; Jhn 13.36-38)
31Tüsho Atungpuhnü tha, “Simon, Simon! Arimrinü wheat nangde nü ayipü keokhikheah. 32Tüshe nü akin mayopü thsüde inü nü thsungkheak tamkhüntamnü; tüsho küyimki nü I kilim rholobanü nü keoniorü reangzahshang.” 33Tüshe anihbuhnü api ki tha, “Atungpuh, rihyam tüsho ashepü ching I nü lung yüpü thsakhambah lah.” 34Judüki apinü tha, “Inü nü ki thachoh Peter, nünü I mükheahpü thsüde, nünü mahsam ki malokhiyikia ha nimung thununü mukhung.”
Shoyukpung, Qiuqiu tüsho Nukshang
35 #
Mt 10.9,10; Mk 6.8,9; Lk 9.3; 10.4 Tüsho apinü arü ki tha, “Küyimki inü nüsa shoyukpung, qiuqiu, tüsho jingkhümpü mulude ayüshihkheanü, nüsa tümükhüh mülakhea shi?” Jumonü arünü alo, “Tümü müla.” 36Judüki apinü arü ki tha, “Tüshe kheaküa shepü shoyukpung tüsho qiuqiu lanü apinü lushang; tüsho shepü nukshang mülanü apinü nihbuh khimmih yinbah khülang thuloshang. 37Tümütüsho ha thrüta lakhi ju I kheak dünjibah de inü nüsa ki thachoh: ‘Tüsho api ju athsümünimrü lung kheyuk.’ Tümüde I dünkheaknü thrüta lakhibo adünjipü lah.” 38Judüki arünü tha, “Atungpuh, kheahang, ha kheak nukshang mahne lah.” Apinü arü ki tha, “Ju suhdo.”
Jisunü Oliv Müzüng kheak Tamkhüntamnükhi
(Mt 26.36-46; Mk 14.32-42)
39Apinü akhiuk, tüsho apinü rhimode alakhi nangde Oliv Müzüng lim yü, tüsho ajingyanrübonü api dunglim yü. 40Küyimki api ju dangpung ching arükhea, apinü arü ki tha, “Rükaki ching müyüzahpü thsüde nüsanü tamkhüntamnüang.” 41Tüsho apinü arü kheaknü lunghit 1 bande yübah khukning tüsho tamkhüntamnü, 42“Abuh, ha nü lümkhi thsüsho, ha pung I kheaknü luakhinjang; tütüshe I lümkhi yung, tüshe nü lümkhi thsang.” 43Judüki yinmi chingnü yunirü khülang api ki akhiukbah anihbuh reangzahshih. 44Tüsho küpkhuk ching, apinü khide mushude tamkhüntamnü. Tüsho api shoke ju alo kheak thiyih ato atsamkhikhi nangde kam. 45Küyimki apinü tamkhüntamnükhi chingnü asürübah ajingyanrübo ki arükhea, arü mulong rozhakde yapa apinü ngü. 46Judüki apinü arü ki tha, “Tümüde nüsanü yapcho? Asürang tüsho tamkhüntamnüang, jude yungsho nüsa rükaki ching yüzahbah.”
Jisu Ramkhi
(Mt 26.47-57; Mk 14.43-50; Jhn 18.3-11)
47Api thiyu thade alachoki boto khülang arü; tüsho thürükheak mahne bolung khülang Juda de ajikhi arü müngüh yü tüsho api müthsüppü Jisu thüninde yü. 48Tüshe Jisunü api ki tha, “Juda, nünü Mihtsürü Tsührü müthsüpde yinatsühcho de?” 49Küyimki api jingyanrübonü adünjipü lakhi ngükhea, arünü api ki tha, “Atungpuh, isanü nukshangnü akiuba shi?” 50Tüsho arü khülangnü achangbe amükeambuh yamlarü nuku thsüpkhijih. 51Tüshe Jisunü tha, “Ju lang thsang!” Tüsho apinü mihtsürü nuku ju qiu tüsho api thsüngujih. 52Judüki Jisunü api ki arürü amükeam putungrübo, arüngyam wühkenorübo, tüsho azothsürübo ki tha, “Nukshangbo tüsho shitsobo shuhbah jangkhijangrarü azhihpü nangde nüsa arükhea de? 53#Lk 19.47; 21.37Küyimki I arüngyam ching nimung aban nüsa lung lakhea, nüsanü I rampü mümürang. Tüshe ha nüsa kim, tüsho amiting wu lah.”
Peternü Jisu Malokhikhi
(Mt 26.57-58,69-75; Mk 14.53-54,66-72; Jhn 18.12-18,25-27)
54Judüki api rambah arünü achangbe amükeambuh yam ching bedarü. Tüsho Peternü limshu chingnü thsütde yü. 55Küyimki arünü wungdo ching mo thsübah rukhüh binkhea, Peternü arü bolung bin. 56Api mo ki binchoki, yamlaberü khülangnü api kheak kheahkihbah tha, “Ha mihtsürü she api lung lakheah.” 57Tüshe apinü reanglode tha, “Aliberü, inü api mümükheah.” 58Tüsho anükhüh labah püpürünü api ngübah tha, “Nü she arü lung belah.” Tüshe Peternü tha, “Mihtsürü, I a yung!” 59Jushu kimkhü hobah, püpürübonü mütsande tha, “Tsükjide ha buh she api lung lakheah, tümüde api Galileerü ah.” 60Tüshe Peternü tha, “Mihtsürü, nünü tümü thachonü inü mümükheah!” Tüsho api thiyu thade alachoki zukleangnü thununü khung. 61Tüsho Atungpuhnü rholobah Peter kheak kheah. Tüsho Peternü apinü anihbuh ki thakhi yu lümkhit, “Thununü mukhungyiki nünü I mahsam ki reanglobah.” 62Judüki Peternü wukhiuk tüsho düsüknimde trip.
Jisu Mükhemükimkhi tüsho Alakkhi
(Mt 26.67-68; Mk 14.65)
63Kheakü mihtsürü sherünü Jisu aheangkheanü api mükhemükim thsü tüsho lak. 64Tüsho amük rümdojihbah, arünü amiro kheak lakde keokhi, “Müchitang! Nü lakcho ha shepü a?” 65Tüsho arünü api azhihde ahihdo tha.
Jisu Kiuthsü-binkiu Miki
(Mt 26.59-66; Mk 14.55-64; Jhn 18.19-24)
66Ayinkhi akede, mihtsürü azothsürübo, amükeam putungrübo tüsho yakzan thsangyurübo rukhüh arübah arü kiuthsü-binkiu ching beyukbah tha, 67“Nü Khrista a de, isa ki thaang.” Tüshe apinü arü ki tha, “Inü nüsa ki thatha she nüsanü akinpü lapü yung. 68Tüsho inü nüsa ki keokhikhi she nüsanü I ki malojih yungsho I tsoshihpü yung. 69Ha dunglim Mihtsürü Tsührü ju Thrünpuh wu khah tsülim binbah.” 70Judüki arü alalanü tha, “Nü ju Thrünpuh tsührü a de?” Tüsho apinü arü ki alo, “Nüsanü I sheanü dükde thachoh.” 71Tüsho arünü tha, “Kheaküshe thiyumütsan isanü tümü yihnüpü la? Tümütüsho anihbuh mün chingnü isanü sodo.”
Právě zvoleno:
LUK 22: YIMCBSI
Zvýraznění
Sdílet
Kopírovat
Chceš mít své zvýrazněné verše uložené na všech zařízeních? Zaregistruj se nebo se přihlas
Yimkhiung Naga CL Bible - AMÜSÜH HÜM
Copyright © 2008 by The Bible Society of India
Used by permission. All rights reserved worldwide.
