LUK 19
19
Jisu tüsho Zakai
1Judüki Jisunü Jirikho ching yüzahbah tsahhode alakheah. 2Ju ching mihtsürü khülang amung Zakai, ruk-threrü atorü, tüsho alarü lakheah. 3Apinü Jisu ju sheanü akheahpü yim tüshe boto lakhinü müngükhuk, tümütüsho api leang thümamrü lakheah. 4Jumonü apinü müngühlim alihde yübah api kheahpü khubasodung kheak künkih, tümüde api ju limro tsahhode alakheah. 5Küyimki ju dangpung ching Jisu arükhea, apinü abinkih-a kheah tüsho api ngü, tüsho api ki tha, “Zakai nahnah akiang, tümüde khihni I nü yam ching binbah.” 6Jumonü apinü niokheamde aki, tüsho asühde api leangkhi. 7Tüshe küyimki arünü ju ngükheanü neangneangde tha, “Aneakrü mihtsürü khülang lung hanrü thsüpü api yüdo.” 8Judüki Zakainü zhip tüsho Atungpuh ki tha, “Atungpuh, Atungpuh, inü kukruk shihchamkhüh zhochihrü kilim jihchoh; tüsho inü arükchihnü mudode khürü kilimnü kukruk lua lasho, inü phüyi kinü alü jihlochoh.” 9Tüsho Jisunü api ki tha, “Khihni ha yam ching akhümkhit arüa lah, tümütüsho api she Abraham tsührü ah; 10#Mt 18.11tümütüsho Mihtsürü Tsührü ju adükheakkhi yimpü tüsho khümkhitpü arükheah.”
Suna Shonakbo Shihdanglimyu
(Mt 25.14-30)
11Kheakü arünü harü anichoki, apinü shihdanglimyu püpü tha, tümütüsho api Jirusalem thüninde alakheah tüsho Thrünpuh kiulongthsü ju nahnahde arübah de arünü lüm. 12Jumonü apinü tha: “Atorü khülang anihbuh kiulongthsürü kambah alode arüpü limshu lomi ching yü. 13Jumonü apinü api yamlarü 10 kilim arü abande suna shonak 1 jih, tüsho arü ki tha, ‘I arü khiungde shothsümoloang.’ 14Tüshe api mihtsürübonü anihbuh thranean, tüsho yunithsürü khülang api dunglim yüshihde tha, ‘Isanü ha mihtsürü isa kurungkheak kiulong müthsüshih.’ 15Junangde küyimki api kiulongthsürü kambah alode arükhea, apinü sho jihkhi yamlarübo thsü mihtsürü abannü shothsümolo ching küdükhüh alü thsüa lanü amükheahpü thiyukhüm jih-a api kilim jishih. 16Judüki akhuhbuhnü arübah tha, ‘Atungrü, nü yo suna shonaknü suna shonak 10 yinbudo.’ 17Tüsho apinü anihbuh ki tha, ‘Tsüde rhimodo, yamlarü atsü; tümütüsho nünü khide aninikhüh khülang ching thiyuro lado, kiuto 10 kurungkheak thiyukhüm-sühmüh ahoriang.’ 18Tüsho mahnepü arübah tha, ‘Atungrü, nü yo suna shonaknü suna shonak 5 yinbudo.’ 19Junangde apinü anihbuh ki tha, ‘Nü she kiuto 5 kurungkheak laang.’ 20Tüsho püpürünü arübah tha, ‘Atungrü, ha ching inü shokenanbe ching rama zokhi nü yo suna shonak lah. 21Inü nü trede alakheah, tümütüsho nü amüküp mihtsürü ah. Nünü tümü muzomukhungnü ju hanmukhungchoh, tüsho nünü tümü mümükheannü ju yimluchoh.’ 22Tüsho apinü anihbuh ki tha, ‘Nü mihbukmuyuk yamlarü, nü yunü nü mahkhapbah. 23Dale tümü thsükhi I arüchoki sholü bede alupü thsüde nünü I sho ju shoyam ching yuka muzokhea?’ 24Tüsho apinü ju ki zhiprü ki tha, ‘Api kheaknü suna shonak luang, tüsho suna shonak 10 labuh kilim jihang.’ 25Tüshe arünü api ki tha, ‘Atungrü, api a suna shonak 10 lah.’ 26#Mt 13.12; Mk 4.25; Lk 8.18Apinü alo, ‘Inü nüsa ki thachoh, shepü lanü alü jihlobah, tüsho shepü mülanü api lakhi ju she anihbuh kheaknü lude atsobah. 27#Mt 25.14-30Tüshe inü arü kurungkheak kiulong müthsüshihnekhi I riribo ha ching bede arang tüsho arübo I mikinü laksahang.’ ”
Jirusalem ching Akuk Ngüde Yüzahkhi
(Mt 21.1-11; Mk 11.1-11; Jhn 12.12-19)
28Tüsho küyimki apinü ha thakheanü Jirusalem lim khuhlangbah wutu. 29Küyimki api Oliv Müzüng ching Bethphage tüsho Bethani phünide arükhea, apinü ajingyanrü mahne thiyide tha, 30“Nüke müngüh lakhi kiulong ching yüzahang, tüsho nüke yüzahchoki, shenü she mübinkhi donki nunu khülang chinga zokhi ngübah. Ju trünang tüsho ha ching bede arang. 31Tüsho khürünü nüke ki, ‘Tümü thsükhi nükenü ju trüncho’ de keokhisho, nükenü api ki hade athabah, ‘Tümütüsho Atungpuhnü ha yihnüpü lah.’ ” 32Junangde sherü thiyikheanü chamachih tüsho apinü ane ki thakhi nangde ju ngü. 33Tüshe anenü donki nunu tründe alachoki, atungrünü ane ki tha, “Tümü thsükhi nükenü donki nunu trüncho?” 34Tüsho anenü tha, “Atungpuhnü ha yihnüpü lah.” 35Jushu anenü ju Jisu kilim bedarü. Tüsho arünü donki nunu kheak arü khimbo phukihbah ju kheak Jisu binshih. 36Tüsho api yüde alachoki arünü limro kheak arü khimbo khima zojih. 37Api Oliv Müzüng koyu thüninde alachoki, jingyanrü boto alalanü arünü wuto rhimo ngükhi dünkheak asühachihpü tankih tüsho düsheak achangnü Thrünpuh shijihde tha, 38“‘Atungpuh mung chingnü arükhi kiulongthsüpuh müngühmühi!’ Yinmi ching mungtsü tüsho achangbe ching müretah lashang!” 39Tüsho Pharisirü khürünü boto chingnü api ki ji, “Thsangyurü, nü jingyanrübo thürühang.” 40Tüshe apinü arü ki alo tüsho tha, “Inü nüsa ki thachoh, harünü zhikde lasho, lungbonü azhibah.”
Jisunü Jirusalem dünkheak Tripkhi
41Kheakü api thüninde alachoki kiuto kheah tüsho ju dünkheak trip, 42tüsho tha, “Khihni ha nü kilim tümünü mungtsü hande arübanü nünü mükheahkhülaa! Tüshe jurü nü mükbo kinü jika lah. 43Nü riribonü nü mükamde chipi ayünde tüsho thrip aban zündopü nimungbo arübah, 44tüsho nü lung nü tsührübo alo kheak arih-a yapbah; tüsho nü kheak lung khülangnü khülang kheak kheangkihkhi maningshih, tümütüsho Thrünpuh nü kilim arüpü kim nünü mümükheahde lado.”
Jisunü Arüngyam ching Yükhi
(Mt 21.12-17; Mk 11.15-19; Jhn 2.13-22)
45Judüki apinü arüngyam ching yüzah tüsho shothsümolorü yankhitpü tankihde, 46arü ki tha, “Ha thrüta lah, ‘I yam ju tamkhüntamnü yam ah, tüshe nüsanü jangkhijangrarü jikpung kamshihdo.’ ”
47 #
Lk 21.37
Tüsho apinü nimung aban arüngyam ching thsangyude alakheah. Tüshe amükeam putungrübo, yakzan thsangyurübo, tüsho mihtsürü limberübonü api laksahpü yim, 48tütüshe arünü tümü müthsükhuk; tümütüsho mihtsürü alalanü khide mulong jide api ki anide alakheah.
Právě zvoleno:
LUK 19: YIMCBSI
Zvýraznění
Sdílet
Kopírovat
Chceš mít své zvýrazněné verše uložené na všech zařízeních? Zaregistruj se nebo se přihlas
Yimkhiung Naga CL Bible - AMÜSÜH HÜM
Copyright © 2008 by The Bible Society of India
Used by permission. All rights reserved worldwide.
