JOHAN 7
7
Jisu tüsho Api Keoniorübo
1Ju dunglim Jisunü Galilee ching tsah, tümütüsho Jihudarünü api laksahpü yimkhinü Judea ching tsahpü mükünde alakheah. 2Kheakü Jihudarü Arüngkhimyam Thünio thüninde alakheah. 3Jumonü api keoniorübonü anihbuh ki tha, “Nü jingyanrübonü she nünü arhimokhi ngüpü thsüde ha chingnü chamachihbah Judea ching yüang. 4Tümütüsho amikheak akhiukde amükheahshihpü yimrünü a shenü she ramde mürhimochoh. Nünü harü rhimochosho, alomi ki nü huhang.” 5Tümüde api keoniorübonü she api kheak mükinde alakheah. 6Judüki Jisunü arü ki tha, “I kim marüyi, tüshe nüsa kim a kamruhroro thsakhama lah. 7Alominü nüsa müthranean, tüshe ju rhimo amütsü lah de inü thiyumütsan thsümonü I thraneanchoh. 8Nüsa a thünio ching wutuang, I a ju thünio ching muwutu, tümüde I kim dükde mukhiungyi.” 9Küyimki apinü arü ki harü thakhea, api Galilee ching lakheah.
Arüngkhimyam Thünio ching Jisu Bekhi
10Tüshe küyimki akeoniorübo wutukhea, api she thünio ching amümürang thsüde wutu. 11Judüki Jihudarübonü thünio ching api yimde tha, “Api küching la.” 12Tüsho mihtsürü bolung api dünkheak khide phiphirarakhi lakheah. Khürünü tha, “Api tsülah”; püpürünü tha, “Yung, apinü mihtsürü rükakichoh.” 13Tütüshe Jihudarü trekhinü shenü she aleangkheak akhiukde api dünkheak masuk.
14Kheakü thünio phulung ching Jisunü arüngyam ching wutubah thsangyu. 15Tüsho Jihudarübonü müyinsahde tha, “Ha mihtsürü küyimkishe mükhele küde thsah athrütkhi mükheahla?” 16Jisunü arü ki alo tüsho tha, “I kingaün-yakzan ju I yo yung, tüshe I thiyibuh yo ah. 17Khürünü api lümkhi rhimopü mulongsho kingaün-yakzan ju Thrünpuh kilimnü a shi I thiyukhüm-sühmühnü asukchonü amükheahbah. 18Shepünü nihbuh kilimnü asukchonü nihbuh müretah yimchoh; tüshe shepünü I thiyibuh müretah yimchonü thiyuro, tüsho thiyuro mulungkikhi tümü müla. 19Mosanü nüsa kilim yakzan jihbah nüsanü yakzan muzokhi yung de? Tümüde nüsanü I laksahpü yimcho?” 20Mihtsürübonü alo tüsho tha, “Nü a amünean me lah. Shepünü nü laksahpü yimcho?” 21Jisunü arü ki alo, “Inü khülang rhimodo, tüsho nüsa alalanü müyinsahchoh. 22Jumonü Mosanü nüsa kilim tsütabahpü jih (Mosa kilimnü yung tüshe jipürü kilimnü), tüsho nüsanü Amuni athrürü tsütabahchoh. 23#Jhn 5.9Mosa yakzan müthsümünimpü thsüde mihtsürü khülang Amuni tsütabahsho, inü Amuni mihtsürü khülang tsüde akamshihpü dünkheak nüsanü I kheak bukakhiukcho de? 24Amikheaknü mahdükhap, tüshe thiyuro-lungkinü mahkhapang.”
Api Messia a shi?
25Judüki Jirusalem ching khürünü tha, “Ha arünü alaksahpü yimbuh thsü yung de? 26Tüshe kheahang! Apinü mulong tode thachoh, tüsho arünü api ki tümü mütha. Ha atsütsü Khrista ah de yakzanshuhrübonü mükheahla shi? 27Judüalalashe, ha mihtsürü küchingnüanü isanü mükheahlah, tüshe küyimki Khrista arübanü, api küchingnüanü shenü mümükheah.” 28Judüki Jisunü arüngyam ching thsangyude alachoki zhi, “Nüsa chidonü I mükheahlah, tüsho I küchingnüanü nüsanü mükheahlah; I küdahnü I arükhi yung, tüshe nüsanü mümükheahkhi I thiyibuh thiyuro lah. 29Tüshe inü api mükheahlah, tümüde I api kilimnü ah, tüsho apinü I thiyikheah.” 30Judüki arünü api rampü yim; tüshe shenü api kheak khah muchung, tümütüsho api kim marüyide alakheah. 31Tüsho mihtsürü ahihkhühnü api kheak kinde tha, “Küyimki Khrista arübanü ha mihtsürünü arhimokhi kheaknü apinü khinthiyinbe alü rhimoba shi?”
Jisu Rampü Aheangrü Thiyikhi
32Botonü api dünkheak phiphirarakhi sobah Pharisirü le amükeam putungrübonü api rampü atorübo yüshih. 33Judüki Jisunü arü ki tha, “I nüsa lung anükhüh ruhde alabah, tüsho I thiyibuh kilim yübah. 34Nüsanü I yimbah tüshe I müngü, tüsho I küching lanü nüsanü marükhuk.” 35Judüki Jihudarübonü arü bolung thaachih, “Api küching yüpü lümkhi isanü api müngüpü? Api ju isa mihtsürü lapung Greekrü lung yübah Greek thsangyupü lümla shi? 36Apinü ha tümü thacho, ‘Nüsanü I yimbah, tüshe I müngü, tüsho I küching lanü nüsanü marükhuk’?”
Rhangdung Ke Ayung
37Thünio ato akheam nimung Jisunü zhipbah zhide tha, “Khürü kethürisho, api I kilim arübah yungshang. 38Shepünü I kheak kinbanü amüsühyunü athakhi nangde api mulong chingnü rhangdung ke ayungbo bukbah.” 39Tüshe ha api kheak kinrübonü aleangkhipü me dünkheak apinü athakheah; tümüde Jisu müretah mülayikhinü Amüsüh Me müjihyide alakheah.
Mihtsürü bolung Achamnak
40Jumonü boto ching ahihkhühnü ha thakhi sobah tha, “Atsütsü ha wukihrü ah.” 41Püpürünü tha, “Ha Khrista ah,” tüshe khürünü tha, “Galilee chingnü Khrista arüba de? 42Khrista ju David tsühsoniuso chingnü tüsho David lapung Bethlehem kiuto chingnü arübah de amüsühyunü thachoh yung de?” 43Jumonü api dünkheaknü mihtsürü bolung achamnak lakheah. 44Kheakü khürünü api rampü lüm, tüshe shenü she api kheak khah muchung.
Jihudarü Limberübonü Abahyukkhi
45Küyimki atorübo arükheanü amükeam putungrübo le Pharisirübonü arü ki keo, “Tümü thsükhi nüsanü api bede marükhea?” 46Atorübonü alo, “Mihtsürü shenü she ha mihtsürü ruk masuk!” 47Judüki Pharisirünü arü ki tha, “Nüsa she bephülapa la de? 48Yakzanshuhrü yungsho Pharisirü khürünü api kheak kinkhea de? 49Tüshe harü botonü yakzan mümükheahkhinü muthrumüneana lah.” 50#Jhn 3.1,2Arü bolung kheyukrü, akhuhlim Jisu ki yübuh Nikodemanü arü ki tha, 51“Api musoyide tüsho api tümü rhimochonü mümükheahyide isa yakzannü mihtsürü khülang mahkhapcho de?” 52Arünü api ki alo tüsho tha, “Nü Galilee chingnü a de? Yimang tüsho kheahang, Galilee chingnü wukihrü sheshe masürü.” 53Tüsho mihbüm abannü nihbuh yam lim yü.
Právě zvoleno:
JOHAN 7: YIMCBSI
Zvýraznění
Sdílet
Kopírovat
Chceš mít své zvýrazněné verše uložené na všech zařízeních? Zaregistruj se nebo se přihlas
Yimkhiung Naga CL Bible - AMÜSÜH HÜM
Copyright © 2008 by The Bible Society of India
Used by permission. All rights reserved worldwide.
