JOHAN 5
5
Bethesda ching Thsüngukhi
1Ju dunglim Jihudarü thünio khülang lakheah, tüsho Jisunü Jirusalem lim wutu. 2Jirusalem ching Namfimihnu Chipiripit thüninde, Ibri yunü Bethesda de ajikhi, yünshim 5 lakhi kedükim khülang lah. 3Harü ching mihtsürü tukthsürü boto, müktukrü, jingkikrü, thripshe thsürübo ke aphapkhi aleangde yapa lakheah. 4Tümüde kim kim ching yunirü khülang kedükim ching yüki tüsho ke ju abükshih; tüsho ke abük dunglim shepü akhuh yüzahbanü api tukthsü tümü lanü thsüngude la. 5Ju ching mihtsürü khülang kam samrükheak tizheah tukthsükhi lakheah. 6Küyimki Jisunü api ju ching yapde angükhea, tüsho ju ching kim ashang ju ruk lakhi mükheahkhea, apinü anihbuh ki tha, “Nü tsüde kamnela de?”
7Tukthsübuhnü api ki alo, “Atobuh, ke abükchoki kedükim ching I yüzahshihpü mihtsürü she müla; küyimki I yüzahpü mürangbanü I müngüh khürü yüzah-a lachoh.” 8Jisunü api ki tha, “Asürübah nü yapkiu hanang tüsho tsahang.” 9Tüsho zukleangnü mihtsürü ju tsüde kambah ayapkiu han tüsho tsah. Tüsho ju nimung Amuni lakheah. 10Jumonü Jihudarünü athsüngubuh ki tha, “Ha Amuni ah; nünü yapkiu hanpü yakzan müla.” 11Apinü arü ki tha, “Shepünü I thsüngukheanü I ki tha, ‘Nü yapkiu hanang tüsho tsahang.’” 12Judüki arünü api ki keokhi, “Nü yapkiu hanbah tsahang de nü ki thabuh ju shepü mihtsürü a?” 13Tüshe thsüngua labuhnü api sheanü mümükheah, tümüde ju ching lakhi boto ching tsoabah. 14Ju dunglim Jisunü arüngyam ching api ngü, tüsho tha, “Kheahang, nü tsüde kamdo, neak düyihbeaklo, jude yungsho amütsübe nü kheak arübah.” 15Mihtsürü junü chamachih tüsho api thsüngubuh ju Jisu ah de Jihudarü ki tha. 16Ha dünkheaknü Jihudarünü Jisu thsümüchipü tankih, tümütüsho apinü ju Amuni rhimo. 17Tüshe Jisunü arü ki alo, “I Buhnü kheakü khiungde rhimochoh, tüsho I she rhimochoh.” 18Jumonü Jihudarünü api laksahpü alü thsüde yim, tümütüsho apinü Amuni lang athsümünimkhi yung, tüshe Thrünpuh ju api Abuh ah de tha, tüsho api ju Thrünpuh lung rukhüh khea lu.
Atsührü Thiyukhüm-sühmüh
19Judüki Jisunü arü ki tha, “Atsütsü inü nüsa ki thachoh, atsührünü aküdahnü tümü müthsükhuk, tüsho Abuhnü tümü rhimode apinü ngüchonü ju rhimochoh; tümütüsho apinü tümü rhimochonü, atsührünü she ju ruk rhimochoh. 20Tümüde Abuhnü atsührü muzhochoh, tüsho apinü arhimokhi alala api ki huhchoh; tüsho nüsanü amüyinsahpü thsüde harü kheaknü atobe rhimobo apinü anihbuh ki huhbah. 21Tümüde Abuhnü asherü arhang kamloshihde arü ki rhangdung jikhi nangde atsührünü she apinü amulongrü ki rhangdung jihchoh. 22Tümüde Abuhnü sheshe mahmükhap tüshe mahkhap alala atsührü kilim jihdo, 23junangde arünü Abuh wüntre jihkhi nangde alalanü atsührü wüntre jihbah. Shepünü atsührü wüntre müjihbanü api thiyibuh Abuh wüntre müjihchoh. 24Atsütsü inü nüsa ki thachoh, shepünü I yu anicho tüsho I thiyibuh kheak kinchonü akheam müla rhangdung lah, tüsho mahkhap ching marü, tüshe ashe chingnü hode rhangdung lim yüdo.
25“Atsütsü inü nüsa ki thachoh, kim arüchoh, tüsho kheakü asherünü Thrünpuh tsührü düsheak sopü lah; tüsho sherünü asobanü rhangdung labah. 26Tümüde Abuh ju anihbuh kheak rhangdung lakhi nangde, api kheak rhangdung lapü atsührü ki mülüjihdo, 27tüsho api kilim mahkhappü she thiyukhüm-sühmüh jihdo, tümütüsho api ju Mihtsürü Tsührü ah. 28Ha kheak dümüyinsah; tümüde kiuyukbo ching larü alalanü api düsheak sopü kim arüchoh 29tüsho akhiukbah–sherünü atsü rhimokheanü arhang kamlobah rhangdung labah, tüsho sherünü amütsü rhimokheanü arhang kamlokhi ching bahyukbah.
Jisu Thiyumütsanbo
30“I küdahnü tümü müthsükhuk. Inü asokhinü mahkhapchoh; tüsho I mahkhapkhi ju thiyuro-lungki, tümütüsho inü I lümkhi müyim tüshe I thiyibuh I Buh lümkhi yimchoh. 31Inü I küdah thsüde thiyumütsan thsüsho, I thiyumütsan ju thiyuro yung. 32I thiyumütsan thsürü püpürü lah, tüsho apinü I thiyumütsan thsükhi thiyuro ah. 33#Jhn 1.19-27; 3.27-30Nüsanü Johan kilim yüshih, tüsho apinü thiyuro thiyumütsan thsü. 34Tütüshe inü mihtsürü kilimnü thiyumütsan müleangkhichoh; nüsa khümkhitpü thsüde inü harü thachoh. 35Api ju takde tüsho yinde alakhi tsün lakheah, tüsho nüsanü api ayinatrüm ching asühachihpü mulongde alakheah. 36Tüshe Johan kheaknü I thiyumütsan atobe lah; tümüde abanshihpü I Buhnü ajihkhi rhimo, tüsho inü rhimode alakhinü Abuhnü I thiyikheah de thiyumütsan thsüchoh. 37#Mt 3.17; Mk 1.11; Lk 3.22Tüsho I Buh shepünü I thiyikheanü I thiyumütsan thsüchoh, nüsanü küyimkishe api düsheak muso yungsho api pang müngü. 38Tüshe nüsa kheak api yu müla, tümütüsho apinü athiyibuh kheak nüsanü mükin. 39Nüsanü amüsühyubo yimchoh, tümüde jurü ching akheam müla rhangdung lah de nüsanü lümchoh; tüsho harünü I thiyumütsan thsüchoh. 40Tüshe nüsa rhangdung lapü thsüde nüsanü I kilim arüpü mümulong. 41Mihtsürü kilimnü inü wüntre müleangkhichoh. 42Tüshe nüsa kheak Thrünpuh amuzho müla de inü mükheahlah. 43I Buh mung chingnü I arükheah, tüshe nüsanü I müleangkhi; khürünü nihbuh mung ching arükhülaa, nüsanü api leangkhibah. 44Nüsa khülangnü khülang wüntre luachihchoh tüshe Thrünpuh kilimnü arükhi wüntre müyimde nüsanü küde thsah akinpü? 45I Buh miki inü nüsa müdambah de dülüm; nüsa müdampü khülang nüsanü mulonglamkhi Mosa lah. 46Tümütüsho nüsanü Mosa kinkhülaa, nüsanü I kinbah; tümüde apinü I dünkheak thrüt. 47Tüshe apinü athrütkhi nüsanü mükinsho, küde thsah I yubo kinpü?”
Právě zvoleno:
JOHAN 5: YIMCBSI
Zvýraznění
Sdílet
Kopírovat
Chceš mít své zvýrazněné verše uložené na všech zařízeních? Zaregistruj se nebo se přihlas
Yimkhiung Naga CL Bible - AMÜSÜH HÜM
Copyright © 2008 by The Bible Society of India
Used by permission. All rights reserved worldwide.
