THRÜNTAN 6
6
Mihtsürü Mihbukmuyukkhi
1Küyimki alomi ching mihtsürü wüh bupü tankihde aliberübo zübekhea, 2Thrünpuh tsührübonü mihtsürü tsührü liberübo jaktsüde ngü; tüsho arünü amürühkhi yamkhün thsü. 3Tüsho Atungpuhnü tha, “Inü mihtsürü lünnü alapü mümülüjih, tümüde api shih ah; api kam 120 labah.” 4Judüki alomi ching Nephilimrübo lakheah, tüsho ju dunglim Thrünpuh tsührübonü mihtsürü tsührübebo kheak müyam tüsho arü kilim tsührübo zübejih. Jurübo adüsonü athrungrü tüsho mungkhung mihtsürübo lakheah.
5Judüki alomi ching mihtsürü mihbukmuyuk tode alakhi Atungpuhnü ngü, tüsho api mulong ching lümkhi alala mutuklode amütsü lakheah. 6Tüsho apinü alomi kheak mihtsürü thrünkhi dünkheak Atungpuhnü mulong ashide lüm, tüsho api mulong rozhakde alakheah. 7Jumonü Atungpuhnü tha, “Inü athrünkhi mihtsürü tüsho shiwüh, alo ching tsahbe lorilokobo tüsho thüning wuhnubo alomi chingnü adükheakshihbah, tümüde inü arü thrünkhi lakshi thsüdo.” 8Tüshe Noa a Atungpuh miki amüthsüm ngü.
Noa
9Ha Noa lün ah. Noa ju api lünbo ching thiyuro-lungki, khiukdahkhi mihtsürü lakheah, tüsho apinü Thrünpuh lung tsah. 10Tüsho Noa tsührü 3 lakheah: Shem, Ham, tüsho Japheth. 11Alomi ju Thrünpuh miki amütsü tüsho athsümünimnü mide alakheah. 12Junangde Thrünpuhnü alomi thsümünima ngü; tümüde mihtsürü alalanü alomi kheak arü lalim athsümünim lakheah.
13Thrünpuhnü Noa ki tha, “Mihtsürü alala kheampü I miki arüdo, tümüde alomi ju arü hode athsümünimnü mia lah; tüsho kheahang, inü arübo alomi chingnü adükheakshihbah. 14Nü thsungkheak gofer sangnü sangkung khülang thsang; sangkung ching akhiungshakbo thsang, tüsho alunglim le aleanglim dükhühnü müjimdoang. 15Tüsho nünü hanangde athsübah: sangkung ayunglim khahnap 300, atolim khahnap 50, tüsho achanglim khahnap 30 labah. 16Nünü sangkung thsungkheak ayinripit khülang thsang, tüsho ju akulim khahnap 1 dükeaknü thsang; tüsho ju rheang lim sangkung khimdopü yukang. Nünü abobe, aphulungbe tüsho akube khinkihde thsang. 17Inü thüning bukkhüp rhangdung sheak lakhi loriloko alala dükheakshihpü alomi kheak keking arüshihbah; alomi kheak lüpdükhi ashebah. 18Tüshe inü nü kheak tangzüng zobah; tüsho nü tsührübo, nü niube, tüsho nü tsührübo niuberübo nü lung sangkung ching yüzahbah. 19Tüsho rhangdung lakhi lüpdükhi nü lung arhang lapü thsüde mungji aban mahnene nünü sangkung ching beyukang; arübo pung tüsho dre labah. 20Wuhnu mungji, shiwüh mungji, tüsho alo ching abüde atsahbe mungji aban arhang lashihpü mahnene nü kilim arübah. 21Atsühpü thsüde tsühyungbe mungji aban nünü lubah nü tüsho arübo thsungkheak tsanglunga zoang.”
22Thrünpuhnü api ki thiyukhüm jihkhi nangde Noanü lüpdükhi rhimo.
Právě zvoleno:
THRÜNTAN 6: YIMCBSI
Zvýraznění
Sdílet
Kopírovat
Chceš mít své zvýrazněné verše uložené na všech zařízeních? Zaregistruj se nebo se přihlas
Yimkhiung Naga CL Bible - AMÜSÜH HÜM
Copyright © 2008 by The Bible Society of India
Used by permission. All rights reserved worldwide.