LIPOH 17
17
Azengtacho Amüdhethsa Aküp Müjüp-pehcho
1Abram kang kurepü düku azirü thsade, Abüdongba-nü chüro abi te yocho, “Ih Akohba Tsingrang, I yocho nyieng ko achomükeh lieng. 2Ihnü nüte Ih azengtacho külüpnung ko nü chahnü khütang trahchosohnung.” 3Abram-nü aromih alih la hüpkehcho ko Tsingrangba-nü yocho, 4“Ihnü nüte hiba azengtaba külüpre: Nüh yucho adrong au kangnung. 5#Rom 4.17Adelü nü neng Abram müdsinung ta Abraham#17.5 Abraham: Hi Ibr nenglanü dsichehcho; adüzü “Yucho adrong Au.” pü dsinung; tunüo Ihnü nüh yucho adrong au kangsohko.” 6Nü chahnü khütang trahchosohnung ko arüh khürü yangthsarü kangnung. Nü chahnü adrong trahchonung ko arühnü yuchoti kangnung.
7 #
Luk 1.55
“Ihnü nüte ko nü chahnü trahchochoti te aronung shang apüm la azengtacho müchangkapü yohpünung. Ih nü Tsingrang ko nü chahnü trahchochoti Tsingrang thsanung. 8#R. Ngu 7.5Ihnü nüh ko nü chahnü trahchochoti khyang ade nührü shirüthsa liba lih hi jünung. Kanan lih apüm hi lede nengdang nü chahnü trahchochoti yo kangnung, ko Ih arüh Tsingrang thsanung.”
9Tsingrangba-nü Abraham te yocho, “Nühnüsü Ite azengtaba hi yohpüng ko nü chahnü trahchochoti nüsü aronung shang apüm la yohpüng. 10#R. Ngu 7.8; Rom 4.11Nüh ko nü chahnü trahchochotinü yangthsa la ayah khüdu kyo nührü yola adhrerü apüm adhrerü yo aküp müjüp-pehnung nyengchoung. 11-12Ade tinü nührünü nyümong keh pide adhrerü akhunga atümung ko ayurü chahnü surocho ko shuparü tenü licho thsanye apüm aküp müjüp-pehng. Ko Ihjü kahla azengtaba amüdhethsa tsü hütsü linung. 13Nyitsarü müipi aküp müjüp-pehnung ko hiba shutsala amüdhethsa tsü nüte Ih azengtaba tsü müchangka linung. 14Adhrerü, sü mümüjüp-pehnang abilü I nyitsarü roh-i mükhichinung, tunüo abinü Ite azengtaba müyohbü.”
15Tsingrangba-nü Abraham te yocho, “Nühnü adelü nü nitpü te Sarai pü müdsinung ta abükyü te Sara pü dsinung. 16Ihnü abükyü müwajünung ko abükyü khu nü khyang azarü khüdu jünung. Ihnü abükyü müwajünung ko abükyü yuchoti atpa kangnung ko abükyü chahnü trahchocho lanü yangthsarü chüronung.”
17Hütsüde Abraham-nü mükhurangnü münyücho ko apu te yocho, “Kang thsih khüdu ashirünü azarü lichehnung ang? Kang kure ashilarü Sara-nü azarü linung ang?” 18Abraham-nü Tsingrangba te yocho, “Ishmael uthring I thsiking khyürü kangsohng.”
19Ta Tsingrangba-nü yocho, “Nü nitpü Sara-nü nü khyang azarü khüdu nümüsujünung ko nühnü aneng Isak dsijünung. Ihnü abi te ko abi chahnü trahchochoti te I azengtacho yohpünung. Hiba hi müchangkaba azengtaba lile. 20Ishmael nengdang kihchicho Ihnü yuchiko, hütsüeko Ihnü abi müwajünung ko abi chahnü khütang trahchonung. Abi yangthsarü dhüreanyüh au kangsohnung ko abi trah tsü Ihnü yucho arangcheh kangsohnung. 21Ta sekang hitade Sara khu suronung liba nü tsudhre Isak te Ihnü azengtaba yohpünung.” 22Khode Tsingrangba-nü Abraham te chotakacho, Abinü abi pehjüpü tsicho.
23Hütsüba nyümong tsünü Abraham-nü Tsingrangba yochonyi Ishmael ko arüh kuh la adhrerüecho atümung, arüh kuh la kulilarünü surocho ko alicho atümung müjüp-pehcho. 24Abraham müjüp-pehde abi kang kurepü düku 25ko Ishmael kang dhüreasang thsacho. 26Anyüding ko kulirüti atümung zeh, 27nyümong khüdunü aküp müjüp-pehcho.
Právě zvoleno:
LIPOH 17: SANGBSI
Zvýraznění
Sdílet
Kopírovat
Chceš mít své zvýrazněné verše uložené na všech zařízeních? Zaregistruj se nebo se přihlas
Sangtam Naga (Re-edited) Bible - AMÜSA BAIBEL
Copyright © 1995 by The Bible Society of India
Used by permission. All rights reserved worldwide.