LIPOH 15
15
Tsingrangba-nü Abram te Zengchotacho
1Hi khanglang, Abram-nü müngucheh khüdu ngu Abüdongba-nü abi te yo yuchicho, “Abram Tüdrü. Ihnü dhsürü lanü nüh tsungtinung ko jiyü amülah jünung.”
2Ta Abram-nü lalingcho, “O Abüdongba Tsingrang, Ih azarü mülirü tsü I khyang Nü jiyü tsü tu thsanung? I thsiking khyürü tsü Damaskasrü Eliezer du kangko. 3Nühnü I khyang tsuzarü müjü, ko I yurü khüdunü I kuthsi khyünung.”
4Hütsüde Abüdongba-nü abi te thali chota yuchicho, “Hiba ayuhbong Eliezer-nü nü kuthsi mükhyünung; nü thsiking khyürü tsü nüpu tsurükhung thsanung.” 5Abüdongba-nü abi yanglonglang nücheh yocho, “Ning chah tsü kehchü dhing ko chenghiti tsü khidhing; nü chahnü hütsü toi trahchonung.”
6 #
Ibr 11.12; Rom 4.3; Gal 3.6 Abram-nü Abüdongba chah yudsicho ko hütsü khu abi te Abüdongba künyangcho ko abi khyüchocho.
7Hütsüpü Abüdongba-nü abi te yocho, “Hiba limih Ihnü nü khyang jünung Babylon lih Ur lanü nüh norobong Ih, Abüdongba.”
8Ta Abram-nü tsingdhingcho, “O Amichahba Tsingrang, Ihnü hütsü I yoepü khüta müdhenung?”
9Abinü lalingcho, “I yanglang kang asang za misü adhsühi khüdu, miza khüdu ko mizapung khüdu ko mümüdhrü khüdu ko kuh-mümüdhrü khüdu hirung.” 10Abram-nü Tsingrangba yang kanglungrü tsü hirocho, ko phohrüp anyüh kangpü müshüm müshümta achung anyüh thsa yohpücho; ta abinü uza-lü müphorüpcho. 11Ameti chah tsü hogon jürocho, ta Abram-nü iipehcho.
12 #
Job 4.13-14
Nyü züduchide, Abram yüpsülah tsicho, ko aring-adrü arangcheh abi chah rocho. 13#Nüch 1.1-14; R. Ngu 7.6Abüdongba-nü abi te yocho, “Nü chahnü trahchochoti, shupa lih la shirü kang linung; arüh hütsüla ayurü thsanung ko kang thsih müyü arüh mütsa bichinung. 14#Job 4.13-14; Nüch 1.1-14; R. Ngu 7.6-7; Nüch 12.40-41Ta arüh nyüpmüsehba yucho tsü Ihnü khingchinung, ko arüh hütsüba shupa limih pehjüde arühnü kuthsi adrong khyünung. 15Nüpusü dee kutsüp linung, tbachi sünung ko dhrürangnung. 16Ko arüh hila shang müyüula thali ronung; tunüo Ihnü Amor-rü münyi müjengmülüm-ede arüh mütsepehnung.”
17Khode nyü tsü züducho ko marürahcho, michang füh khüdula mikhu ko mihmüle dhrongyengnü chürocho ko kanglungrü khanah yohpüba kahla tsünü tsicho. 18#R. Ngu 7.5Hütsü nyümong Abüdongba-nü Abram te azengtaba külüp yocho, “Ihnü nü majüh khyang alih hi apüm Ijip lanü Eufrates yongkhi chii, 19Ken-rü, Keniz-rü, Kadmon-rü, 20Hit-rü, Periz-rü, Refaim-rü, 21Amor-rü, Kanan-rü, Girgash-rü ko Jebus-rü lih apüm zeh jünung.”
Právě zvoleno:
LIPOH 15: SANGBSI
Zvýraznění
Sdílet
Kopírovat
Chceš mít své zvýrazněné verše uložené na všech zařízeních? Zaregistruj se nebo se přihlas
Sangtam Naga (Re-edited) Bible - AMÜSA BAIBEL
Copyright © 1995 by The Bible Society of India
Used by permission. All rights reserved worldwide.