Luku 21

Idei fia iyi abo jaaɔ̃ gɔ í dasi

(Cɔ Maaku 12:41-44)

1Iyi Jesu í fɔ bɛɛbɛ í tã ŋɔi í wu iju wa cɔ bɛi ilu fia ŋa à waa dasi fia si kpakoi kɔlɛtiu. 2Nɔ í yɛ abo jaaɔ̃ ilu are gɔ mɔ í sɔsi kpɛkɛlɛ keeke minji gɔ. 3Ŋɔi í ni, ntɔ ntɔ, jaaɔ̃ ilu areu ihɛ̃ í dasi fia í re inɛ ŋa iyi à gbe fei. 4Inɛ ŋa iyi à gbe ŋau fei, iyi í lesi antaii fia nŋa ŋai à dasi, amma abou, baa do iyi í jɛ ilu are, andi iyi í nɛ feii í dasi bɛ, nkãma kù gbea iyi á maa wɛɛò má.

Jesu wa fɔ idei kpasɛ̃i Ilaaɔ̃* ku lɛgɛ

(Cɔ Matie 24:1-2; Maaku 13:1-2)

5Ajɔ nŋu gɔ inɛ gɔ ŋa à fɔ à waa ni kpasɛ̃i Ilaaɔ̃u í sĩa do kutaɛ ŋa fei do amua ŋa iyi à na Ilaaɔ̃ à ceaò booda. Iyi Jesu í gbɔ bɛɛbɛ ŋɔi í ni, 6mii ŋau bɛ iyi ì waa yɛ fei ŋa ajɔ akã á kpa iri. Kuta baa akã kaa na ku maa lesi njɛ bɛ má, aa kɛkɛɛ mbɛ fei.

Wahala iyi á naa si waatii ankãanyi

(Cɔ Matie 24:3-14; Maaku 13:3-13)

7Ŋɔi à beeɛ à ni, Mɛɛtu, waati yoomai inɛ nŋu á to wa. Nyinda yoomai aa ka tako ka yɛ.

8Ŋɔi Jesu í sɔ̃ ŋa í ni, i ce laakai ŋa i maà jɔ̀ inɛ gɔ ku dĩ iju nŋɛ, domi inɛ ŋa iyi aa na a maa naa akã akã a maa ni aŋai à jɛ inɛ iyi Ilaaɔ̃ í cicau aa kpɔ. Nɔ aa nyi a sɔ̃ ŋɛ má a ni, waatiu í maai wa mbɛ. Amma i maà too ŋa ŋa. 9Bii ì gbɔ à waa fɔ laabaaui igũ ŋa do ija ŋa, i maà jɔ̀ zigi nŋɛ ku da, domi nŋu ŋau bɛi á tako ku to wa. Amma kù jɛ iri ku kpai andunyau bɛ titã. 10Ŋɔi í sɔ̃ ŋa má í ni, dimi gɔ ŋa aa ya na a maa ja do dimi mmu ŋa, nɔ ilaalu gɔ ŋa mɔ aa maa ja do ilaalu mmu ŋa. 11Ilɛ á yaya bii gɔ ŋa nla nla, nɔ si ilɛ gɔ ŋa mɔ ari á ce do bɔ̃ɔ laalɔ ŋa iyi á kpa inɛ nkpɔ. Aa na i yɛ maamaake laalɔ ŋa do nyinda nla nla ikpa lele hee zigi nŋɛ ku da.

12Amma hee nŋu ŋau bɛ fei ku maa ce aa mu ŋɛ a kpã ŋɛ iju. Aa dasi ŋɛ awɔi woo kiiti ŋa ile bii à ya ce kutɔtɔɔ ŋa, aa dasi ŋɛ piisɔ̃ɔ, nɔ a bɔò ŋɛ bi amanlu ŋa do bi ilu ilɛ ŋa na irim. 13Nŋu ŋau bɛi á mu nŋɛ kpãa i jɛò sɛɛdam ŋa. 14Na nŋu, i jilɛ idɔ nŋɛ i maà ya biti do ide iyi aa fɔ i nyaò ara nŋɛ ŋa. 15I maà biti ŋa domi an mu nŋɛ ide do bisi iyi mbɛɛ nŋɛ ŋa kãma nŋa a kaa yɔkɔ a jã ŋɛ hee má jɛ a kɔ̀. 16Baa iyeò baa nŋɛ ŋa do igbã nŋɛ ŋa do ifɔ nŋɛ ŋa do nyaanze nŋɛ ŋa do kpaasi nŋɛ ŋa, aa zamba ŋɛ nɔ a jɔ̀ a kpa inɛ nkpɔ si inɔ nŋɛ. 17Inɛ fei á cé ŋɛi na irim. 18Amma baa ntoi iri akã nŋɛ kaa da ku nyɔ. 19I temua ŋa, aa ba faabai hunde nŋɛ.

Jesu wa fɔ idei iri kulɛgɛi Zeruzalɛmu*

(Cɔ Matie 24:15-21; Maaku 13:14-19)

20Ajɔ iyi ì yɛ woo ja igũ ŋa à to wa Zeruzalɛmu à buu koe, i mà ŋa iyi kulɛgɛɛ í maai wa mbɛ. 21Waati bɛɛbɛ inɛ ŋa iyi à wa ilɛi Zudee a sa a bɔ iri kuta ŋau. Inɛ ŋa mɔ iyi à wa inɔ ilu Zeruzalɛmu takaɛ a sa a fita, inɛ ŋa mɔ iyi à wa iko ku sũ a maà bɔ inɔ ilu má. 22Ntɔ ntɔ, waatiu á jɛ waati iyi Ilaaɔ̃ á kpã inɛ ŋa iju ku sã gbese ku ba mii iyi à fɔ si kukɔi ideɛ ku kɔ̃. 23Waati bɛɛbɛ wahalai bãasĩ ŋa do ayawo ŋa á caa. Ijuukpã nla nlai á wa si ilɛu si na iyi í jɔ̀ Ilaaɔ̃ á sã idɔɔkɔ̃ɛ si inɛ ŋau. 24Aa maa kpa ŋa do taakuba, nɔ a mu ŋa aru si ilɛ ŋa fei. Dimi mmu ŋa aa tɛɛsɛ Zeruzalɛmuui hee waatiu koo kpaò iri.

Kubaai Amai Amanɛ*

(Cɔ Matie 24:29-31; Maaku 13:24-27)

25Aa yɛ nyinda si inunu do si cukpa do si leleaɔ̃ ŋa. Nɔ si ilɛ ibai tenku do kucãi inyiu á jɔ̀ dimi ŋa a biti hee a kaa mà baa bɛi aa ce. 26Baa njo alála á jɔ̀ inɛ ŋa a kasãm na mii ŋa iyi á na ku ce si andunyau ihɛ̃, domi gbugbãi lele ŋa aa maa yayai. 27Waati bɛɛbɛi inɛ ŋa aa yɛ amu Amai Amanɛ n faata wa si kudũi ijĩ do gbugbã nla nla do amboe. 28Bii iyi bɛ ŋa à sinti ku ce, i leekĩ i mu ara nŋɛ ŋa, domi faaba nŋɛi í maai wa.

Mii iyi jĩi ndii figi wa kɔ inɛ ŋa si

(Cɔ Matie 24:32-35; Maaku 13:28-31)

29Nɔ Jesu í kpa nŋa mɔnda gɔ í ni, i cɔ jĩi ndii figi do jĩi ŋa iyi à gbe fei. 30Bii ì yɛ í sinti ku wu wua ŋa, iŋɛ taka nŋɛ ì ya mà ŋa iyi atɛ í maai wai. 31Bɛɛbɛ mɔi bii iŋɛ mɔ ì yɛ mii ŋau bɛ wa ce, i mà ŋa iyi bommai Ilaaɔ̃i í maai wa. 32Ntɔ ntɔ ǹ wa n sɔ̃ ŋɛi, inɛi nsɛi ŋa, kù jɛ aŋa feii aa ku ideu ihɛ̃ ku bɛi ku ce. 33Lele do ilɛ fei á na ku tã amma idem ŋa a kaa tã pai.

I ce laakaii ara nŋɛ ŋa

34I ce laakaii ara nŋɛ ŋa ku ba i maà na i jɛ hai nɛ laakai ŋa na atɛ̃ ku mɔ do ijɛ ku bi do lasabui mii ndii andunya ŋa. Bii kù jɛ bɛɛbɛ ajɔu á na ku boe ŋɛi bɛi cɛkũm, 35domi á na ku ba inɛ ŋa iyi à wa si andunyau ihɛ̃ fei. 36Na nŋu, i cɔ kpãa i maa ceò kutɔɔ ŋa waati kãma fei ku ba i ba gbugbã i gbã si mii iyi wa naa fei ŋa, nɔ i yɔkɔ i leekĩ si wajui amu Amai Amanɛ ŋa.

37Ajɔ fei Jesu í ya kɔ inɛ ŋa si cio kpasɛ̃i Ilaaɔ̃, alɛ nɔ koo sũ geetei Olivie. 38Bii iju í má inɛ fei í ya naa kpasɛ̃i Ilaaɔ̃ bɛ ku gbɔò ideɛ iyi wa fɔ.

Právě zvoleno:

Luku 21: MKL

Zvýraznění

Sdílet

Kopírovat