Luku 17
17
Idei dulum
(Cɔ Matie 18:6-7, 21-22; Maaku 9:42)
1Jesu í sɔ̃ mɔcɔɛ ŋa í ni, kù nɛ bɛi á ce iyi kulɛlɛ iyi á dasi amanɛ laalɔ kù waa ce, amma ijuukpãi á jɛ ti inɛ iyi í naaò wa. 2Á tia a dĩa lafɛ̃ɛ alɔ si kɔ̃ɔ a sɔsiɛ inɔ tenku do iyi á lɛlɛ ama akã ku dasiɛ dulum. 3I ya ce laakaii njɛ ŋa.
Bii kpaasiɛ gɔ í na í ce kurara bi tɛɛ, sɔ̃ɔ ide do laakai i nyisiɛ taaleɛ. Bii í kpaasi idɔ, kpa idei kuraraɛ. 4Baa bii isɛ gbɛɛjei wa raraɛ si ajɔ akã, nɔ isɛ gbɛɛjeu fei wa tuuba, awɔ mɔ ceaa suuru.
Naanɛ ku dasi
5Woo bɛ ŋau à sɔ̃ Lafɛ̃ɛ à ni, kɔ̃ɔsi naanɛ ku dasi nwa. 6Ŋɔi Lafɛ̃ɛ í ni, baa bii naanɛ ku dasi nŋɛ í mungaò ijui iyaku, aa yɔkɔ i sɔ̃ jĩi nɔu ihɛ̃ i ni ku wu hai bɛ, koo lɔ araɛ si tenku, á nɔ ku ceò ide nŋɛ icɛ.
Icɛ iyi aru í nɛ ku ce
7Jesu í ni má, inɛ kãma nŋɛ bii í nɛ aru iyi wa logoo walakɔ wa degbea kɛtɛ ŋa, bii í baa kpasɛ̃ kaa sɔ̃ɔ ku ni, naa i buba nsɛi i jɛ. 8Amma á sɔ̃ɔi ku ni, ceem ijɛ, kpaasi jaaɛ ŋa, i naam ijɛ wa hee n jɛ n mɔ. Si anyiɛ, awɔ mɔ aa jɛ nɔ i mɔ. 9Amma kaa saabu aruu si na iyi í jɔ̀ í ce bɛi í sɔ̃ɔ. 10Bɛɛbɛ mɔi bii iŋɛ taka nŋɛ ì ce mii iyi à dasi ŋɛ ku ce fei í sĩa i ni ŋa, à jɛ amaacɛ ŋa iyi a kù nɛ saabu. Iyi à dasi wa ku ce nŋu akãi à ce.
Jesu í jɔ̀ dintɛ mɛɛwa í ba iri
11Si waati iyi Jesu wa bɔ ikpa ilui Zeruzalɛmu, í too si afei ilɛi Galilee do ilɛi Samari. 12Ŋɔi í maai ilu gɔ. Waati iyi wa bi ku lɔ inɔ iluu, ŋɔi dintɛ mɛɛwa gɔ ŋa à koo à kòo amma à leekĩ à jĩòɛ keeke. 13Ŋɔi à dɔ̃ anu hee lele à ni, Jesu, Mɛɛtu, ce araare nwa.
14Iyi í yɛ ŋa ŋɔi í ni, i koo i nyisi ara nŋɛ bi woo weei Ilaaɔ̃ ŋa. Ŋɔi à waa koo. Si bɛi à waa nɛu, ŋɔi à ba iri. 15Iyi inɛ akã nŋa í yɛ nŋu í ba iri, ŋɔi í sinda wa baa wa saabuò Ilaaɔ̃ hee lele. 16Waati iyi í to wa bi Jesu nɔ í sɛɛbata si wajuɛ wa saabuɛ. Wee mɔkɔu inɛi Samarii. 17Ŋɔi Jesu í ni, amanɛ mɛɛwa si ǹ jɔ̀ í ba iri ba. To, iwoi amanɛ mɛɛsã iyi à gbe ŋau à wa. 18Isɛ mmuu ihɛ̃ nŋu akãi í sinda wa ku saabu Ilaaɔ̃?
19Ŋɔi í sɔ̃ mɔkɔu í ni, dede i nɛ, naanɛ ku dasiɛi í faabaɛ.
Kunaai bommai Ilaaɔ̃
(Cɔ Matie 24:23-28, 37-41)
20Ŋɔi Farisi ŋau à bee Jesu à ni, ajɔ yoomai Ilaaɔ̃ á na ku jɛ bommaɛ. Ŋɔi í jɛ nŋa í ni, Ilaaɔ̃ kaa jɛ bommaɛ do yaase bɛi inɛ ŋa aa yɔɔ. 21Inɛ gɔ kaa fɔ ku ni, Ilaaɔ̃ í jɛ bommaɛ ikpa ihɛ̃, walakɔ ikpa ihɔ̃. Aawo, domi wee Ilaaɔ̃ í jɛ bommaɛ tã si idɔi inɛ ŋa#17:21 Ilaaɔ̃ í jɛ bommaɛ tã si idɔi inɛ ŋa Si tia nwo gɔ ŋa à ya nii Ilaaɔ̃ í jɛ bommaɛ tã si anini nŋɛ. Iyi bɛ mɔ ntɔi, si na iyi í jɔ̀ Jesu ilaaluu í wa anini nŋa..
22Nɔ í sɔ̃ mɔcɔ ŋau í ni, awaati wa naa iyi amu Amai Amanɛ an nyi wa do amboem. Hee ajɔu ku maa to wa awaati wa naa iyi aa bi i yɛm ŋa baa ajɔ akã, amma i kaa yɛm ŋa. 23Inɛ gɔ ŋa aa sɔ̃ ŋɛ a ni, í wa ihɛ̃ walakɔ í wa ihɔ̃. I maà sɛi i koo ŋa. 24Ǹ wa n sɔ̃ ŋɛi, bɛi kuŋɔi ijĩ í ya má inya hai nunui daakɔ hee koo kã nunui alɛ anu akãu bɛ, bɛɛbɛ mɔi kubaai amu Amai Amanɛ á yɛ. 25Amma sinte titã kù nɛ bɛi an ce iyi n kù yɛ ijuukpã ntɔ ntɔ nɔ inɛi nsɛi ŋau ihɛ̃ aa kɔ̀sim. 26Mii iyi í ce si waatii Noweeu, bɛɛbɛ mɔi á ce si waati iyi amu Amai Amanɛ an nyi wa. 27Inɛ ŋa à jɛ à waa mɔ, à waa ce abɔdɔ̃ ŋa, à ya maa mua ama nŋa ŋa mɔkɔ hee í koo í to ajɔ iyi Nowee í lɔ akɔi inyiu. Nɔ ijĩ nlau í naa í jɛ aŋa fei. 28Á nyi ku cei má bɛi waatii Lɔtuu. Inɛ ŋa à jɛ à waa mɔ, à ra à waa ta, à waa gbɛ̃, nɔ à waa ma ile. 29Amma si ajɔ iyi Lɔtu í fita hai Sodomu, ina do fainwita wa wɔ wai hai lele nɔ aŋa fei à ce nfe. 30Nɔ bɛɛbɛ mɔi á yɛ ajɔ iyi amu Amai Amanɛ an faata wa.
31Si ajɔ nŋu, inɛ iyi í wa antaii ile sikifa nɔ nyauɛ ŋa à wa inɔ ile, ku maa bɔ ku so ŋa má. Inɛ mɔ iyi í wa iko kaa ba ku baa ide má. 32I ye gigii aboi Lɔtu. 33Inɛ iyi í bi ku jɛ kuwɛɛɛ do idɔɔbiɛ á na ku kuaɛ. Amma inɛ iyi í kɔ̀si kuwɛɛɛ lafɛ̃ɛ á báa ntɔ ntɔ. 34An sɔ̃ ŋɛ si idũ ajɔ nŋu, amanɛ minji á maa sũ si daayi akã, aa so inɛ akã a jɔ̀ inɛ akã. 35Inaabo minji á maa lɔlɔ, aa so inɛ akã a jɔ̀ inɛ akã. [ 36Inɛmɔkɔ minji á wa iko, aa so inɛ akã a jɔ̀ inɛ akã.]
37Ŋɔi mɔcɔ ŋau à beeɛ à ni, ikpa iwoi ideu bɛ á ce ya Lafɛ̃ɛ. Ŋɔi í jɛ nŋa do mɔndau ihɛ̃ í ni, tengi bii iku í wa, bɛi yembeeku ŋa à ya tɔtɔɔ.
Právě zvoleno:
Luku 17: MKL
Zvýraznění
Sdílet
Kopírovat
Chceš mít své zvýrazněné verše uložené na všech zařízeních? Zaregistruj se nebo se přihlas
2021, SIM International et UEEB
