Zãa Kusinti
Kusinti
Si laabaau jiida mɛɛ ŋau ti Zãai í nya ikã, domi bii baai wahala ankãanyii Jesu í lɔ (iri 18-19), ide ŋa iyi à so njɛ do ti laabaau mɛɛta ŋa iyi à gbeu a kù kpɔ. Nɔ nŋu akãi í ce faajii abɔdɔ̃ iyi à ce Kana (2:1-12) do faajii Jesu do Nikodɛmu (3:1-21) do ti nŋu do aboi Samariu (4:1-12) do ti nŋu do wɛɛgɛi Bɛtizadau (5:1-18) do ti nŋu do inɛ iyi à búu fɛɛjuu (9:1-41). Bii à cɔɔ do laabaau jiida ŋa iyi à gbeu, Zãa kù fɔ ide nkpɔ si kuwɛɛi Jesu si ilɛ. Amma í fɔ aranfãanii mii nla ŋa iyi í ce. Si nkpɔ nŋa mɔm Jesu í bɛɛgɛ si í kɔò inɛ ŋa si cio ntɔ ntɔ.
Yaasei tiau wee.
1. Iri 1:1-18. Si sintei tiau Zãa í nyisi iyi Jesu idei Ilaaɔ̃i iyi kù nɛ kɔɔ, nɔ í ce araɛ amanɛ í naa ku ba amanɛ kuwɛɛ. Nŋu takaɛ í wɛɛ do amanɛ ŋa, nŋu iyi í jɛ kuwɛɛ do inya kumá do ntɔ.
2. Iri 1:19-12:50. Hee waatii Jesuu ku maà to waatɔ waatii ikuɛ.
a) Ikɔ̃ sintei tiau wa fɔ idei sɛɛda ŋa iyi à jɛ sɛɛdai Zãa woo dasi inyiu do ti Anderee mɔcɔɛ do ti Filipu do ti Nataniɛli.
b) Si anyiɛ Zãa í fɔ idei icɛ ikã ikãi Jesu si gãmɛi inɛ ŋa do maamaake mɛɛje gɔ ŋa.
c) Zãa í kpa irii ikɔ̃ sinteui do ide iyi í ko irii waazoi Jesu (12:37-50).
3. Iri 13-21. Iyi waatii Jesu waatɔ waatii ikuɛ í to.
a) Jesu í jɔ̀a mɔcɔɛ ŋa wooda ankãanyiɛ ŋa (iri 13-16).
b) Si anyiɛ, si kutɔɔ í ce sɔɔlui ikuɛ nɔ mɔcɔɛ ŋa iyi á jɔ̀u í so ŋa í daa Ilaaɔ̃ si awɔ (iri 17).
c) Zãa mɔ í kɔ idei bɛi à mu Jesu, à yɛ taaleɛ, à kpaa si jĩi ku gaau do balɛɛ iyi à koo à ba ngbɛ. Si bɛ, aŋaò laabaau jiida iyi ihɔ̃ ŋau à too si yaase akã (iri 18-20).
d) Ajɔ iyi Jesu í jĩ hai si balɛ í nyisi araɛ bi Maari inɛi Madala do bi mɔcɔɛ ŋa do bi Tomaa.
e) Iri 21 í jɛ faajii mɔcɔ mɛɛjei Jesu gɔ ŋa iyi à koo itĩ tenkui Tiberia. Piɛɛ í wa si inɔ nŋa.
Iri 20:30-31 wa fɔ mii iyi Zãa wa lele, waatɔ inɛ iyi á cio tiau ku mà iyi Jesu í jɛ Amai Ilaaɔ̃, nɔ nŋui í jɛ Woo faaba iyi Ilaaɔ̃ í bɛ wa si bɛi í ce kuwãɛ, domi Jesui í jɛ kpãa do ntɔ do kuwɛɛ si bɛi nŋu takaɛ í fɔu (14:6).
Právě zvoleno:
Zãa Kusinti: MKL
Zvýraznění
Sdílet
Kopírovat
Chceš mít své zvýrazněné verše uložené na všech zařízeních? Zaregistruj se nebo se přihlas
2021, SIM International et UEEB