Zãa 4
4
Jesu do inaaboi Samari* gɔ
1-3 Farisi ŋa à gbɔ iyi Jesu wa ba mɔcɔ ŋa wa dasi ŋa inyi wa re Zãa. Amma kù jɛ Jesu takaɛi wa dasi inɛ ŋa inyiu, mɔcɔɛ ŋai à waa coo. Ajɔ nŋu gɔ Jesu í gbɔ iyi à waa fɔ bɛɛbɛ, ŋɔi í nɛ hai Zudee bɛ wa bɔ ilɛi Galilee. 4Wee ku bɛi ku to bɛ tilasii ku too do ilɛi Samari.
5Ŋɔi í to si ilui Samari gɔ iyi à ya kpe Sikaa, kɔkɔi iko iyi Zakɔbu í mua Zozɛfu amaɛu. 6Bɛi lɔgɔi Zakɔbuu í wa. Jesu í to bɛi zakai dasã. Ŋɔi í koo í buba si itĩi lɔgɔu si na iyi í jɔ̀ í gbɛɛji do isɛɛnɛu.
7Ŋɔi inaaboi Samari gɔ í naa inyi ku kpã. Ŋɔi Jesu í ni, muum inyi n mɔ. 8Wee mɔcɔɛ ŋa à bɔ inɔ ilu ijɛ ku ra wa. 9Ŋɔi abou í sɔ̃ Jesu í ni, awɔ Zuifu, bɛirei í ce ì waa tɔɔm inyi ku mɔ, amu inaaboi Samari. Abou í ni bɛɛbɛi si na iyi í jɔ̀ Zuifu ŋa do inɛi Samari ŋa a ci ya ce njɛ fɔɔ. 10Ŋɔi Jesu í jɛaa í ni, bii ì mà amuai Ilaaɔ̃ wo, nɔ bii ì mà inɛ iyi wa tɔɔɛ inyi ku mɔ, aa tɔɔm nii wo nɔ n muuɛ inyii kuwɛɛ.
11Ŋɔi abou í sɔ̃ɔ í ni, mɔkɔɔyi, i kù nɛ gooka. Wee lɔgɔu í jĩ isa. Bɛirei aa ce i ba inyii kuwɛɛu. 12Zakɔbu, bala nwai í tu nwa lɔgɔu ihɛ̃. Nɔ nŋu do amaɛ ŋa do mɛɛmuɛ ŋa fei ihɛ̃i à ya mɔ. Mà awɔ ì waa tamaa ì re Zakɔbu bala nwaui. 13Ŋɔi Jesu í jɛaa í ni, inɛ iyi wa mɔ inyii lɔgɔu ihɛ̃ fei, agbɛ á kpaa má. 14Amma inɛ iyi an mua inyi ku mɔ, agbɛ kaa kpa lafɛ̃ɛ má, domi inyi iyi an mua lafɛ̃ɛ á maa sɔ̃i bɛi inyii isɔ̃ nɔ á na inɛ kuwɛɛ hai tã. 15Ŋɔi abou í ni, mɔkɔɔyi, ǹ bi i muum dimii inyiu bɛ ku ba agbɛ ku maà kpam má nɔ n maà n naa inyi ku kpã ihɛ̃ má.
16Ŋɔi Jesu í sɔ̃ɔ í ni, koo kpe mɔkɔɛ wa i naa wa ihɛ̃ ŋa. 17Ŋɔi abou í jɛa Jesu í ni, n kù nɛ mɔkɔ. Ŋɔi Jesu mɔ í ni, ntɔi ì fɔ iyi ì ni i kù nɛ mɔkɔ, 18domi mɔkɔ miiui ì tako ì nɛ. Nɔ wee inɛ iyi iŋɛò ì wɛɛ si nsɛi, kù jɛ mɔkɔɛ. Inɛ nŋu ntɔi ì fɔ.
19Ŋɔi abou í ni, mɔkɔɔyi, ǹ yɛ iyi awɔ waliii. 20To, awa inɛi Samari ŋa, bala nwa ŋa si geeteu ihɔ̃i à ya gulɛ a tɔɔ Ilaaɔ̃ wo, amma iŋɛ Zuifu ŋa, ì ni í gbe Zeruzalɛmui inɛ ku ya gulɛ ku tɔɔɛ. 21Nɔ Jesu í sɔ̃ɔ í ni, abooyi, dasi idem iyi an sɔ̃ɛ naanɛ. Awaati wa naa iyi a kaa gulɛ a tɔɔ Ilaaɔ̃ Baaba si antaii geeteu ihɔ̃ hee má jɛ Zeruzalɛmu. 22Iŋɛ inɛi Samari ŋa, ì waa gulɛa Ilaaɔ̃, amma i kù màa ŋa. Awa Zuifu ŋa à màa à bɛi à waa gulɛaò, domi idei faaba wa naai hai bi Zuifu ŋa. 23Amma awaati gɔ á na ku naa, nɔ í to wa tã mɔm de, iyi Hundei Ilaaɔ̃ á jɔ̀ inɛ ŋa a gulɛ a maa tɔɔ Ilaaɔ̃ Baaba do ntɔ. Woo gulɛaa do yaase bɛɛbɛ ŋai í bi. Inɛ bɛ ŋai à jɛ woo gulɛa Ilaaɔ̃ ntɔ ntɔ. 24Ilaaɔ̃i í jɛ Hunde, nɔ kù nɛ bɛi aa ce iyi a kù gulɛaa si Hunde do si ntɔ. 25Ŋɔi abou í sɔ̃ɔ í ni, ǹ mà inɛ iyi Ilaaɔ̃ í cica á na ku naa, nŋui à ya kpe Kirisi. Bii í naa nŋui á sisi nwa fei ndɛɛ. 26Ŋɔi Jesu í ni, amui ihɛ̃, amu iyi ǹ wa n baɛ ide ku fɔ.
27Waati bɛɛbɛ mɔcɔi Jesu ŋau à to wa. Ŋɔi ideu í mu ŋa biti ntɔ ntɔ do iyi à yɛ wa ba inaabo ide ku fɔ. Do nŋu fei, kãma nŋa gɔ kù bee abou mii iyi í bi. A kù nɔ a kù bee Jesu a kù ni, mii í ce ì waa ba abou ide ku fɔ.
28Ŋɔi abou í jilɛ bɔɔdoɛ bɛ í nyi inɔ ilu í koo í sɔ̃ inɛ ŋa í ni, 29i naa i koo i cɔ inɛ gɔ iyi í sɔ̃m mii iyi ǹ tako ǹ ce fei. Mà inɛ iyi Ilaaɔ̃ í cicau mbɛ ya. 30Nɔ inɛ ŋa à fita wa hai inɔ iluu à waa bɔ bi Jesu.
31Hee inɛ ŋau a maa to wa, mɔcɔɛ ŋa à wasi ku manteɛ à waa ni, Mɛɛtu, jɛ titã. 32Amma í sɔ̃ ŋa í ni, ǹ nɛ dimii ijɛ gɔ iyi i kù mà ŋa. 33Ŋɔi mɔcɔ ŋau à bee njɛ à waa ni, mà inɛ gɔ í naa ijɛ wai de.
34Nɔ Jesu í sɔ̃ ŋa í ni, ijɛm nŋui í jɛ n ce idɔɔbii inɛ iyi í bɛm wa nɔ n kpa irii icɛɛ iyi í dasim. 35Iŋɛ ì waa ni í gbe cukpa mɛɛ a bɛi a da iya. Amma amu ǹ wa n sɔ̃ ŋɛ, i cɔ iko ŋau, mii ku gbɛ̃ ŋau fei í jĩa í to ku da. 36Inɛ iyi wa da í wasi fiaɛ ku gba tã, nɔ amaajɛ iyi wa tɔtɔɔu ti kuwɛɛ hai tãi. Si bɛɛbɛ woo gbɛ̃ do woo da à nɛ inɔ didɔ̃ ajɔ. 37À ya kpa mɔnda gɔ a ni, inɛ gɔ wa gbɛ̃ nɔ inɛ mmu gɔ wa da. Mɔndau ntɔi wa fɔ. 38Ǹ bɛ ŋɛi i koo i da si iko bii i kù logoo ŋa. Inɛ gɔ ŋai à ce icɛ bɛ, wee nsɛi iŋɛi ì naa ì waa da mii iyi à gbɛ̃u ŋa.
39Inɛi Samari nkpɔ nkpɔi í dasi Jesu naanɛ si inɔ iluu bɛ si na iyi í jɔ̀ abou í tako í sɔ̃ ŋa í ni Jesu í sɔ̃ nŋu mii iyi nŋu í ce wo fei. 40Na nŋu, inɛi Samari ŋau à koo à ba Jesu à tɔɔɛ suuru ku gbe bi ti aŋa. Nɔ í ce bɛ ajɔ minji. 41Inɛ nkpɔi í dasi naanɛ má waati iyi à gbɔ idei Jesu, 42ŋɔi à sɔ̃ abou à ni, kù jɛ na ide iyi ì fɔu nŋu akãi í jɔ̀ à dasi Jesu naanɛ má, amma si na iyi í jɔ̀ awa taka nwa à gbɔ ideɛi nɔ à mà iyi do ntɔ nŋui í jɛ Woo faabai andunya.
Jesu í jɔ̀ amai akawe nla gɔ í ba iri
43Iyi Jesu í ce ajɔ minji bɛ ŋɔi í nɛ í bɔ ikpa ilɛi Galilee, 44domi nŋu takaɛ í fɔ wo í ni, walii ci ya nɛ bɛɛrɛ si iluɛ. 45Iyi í to Galilee ŋɔi inɛ ŋau à gbaa do inɔ didɔ̃. Tako wo à bɔ jingau Zeruzalɛmu nɔ à yɛ mii iyi í ce bɛ fei. Na ŋɔi í jɔ̀ à gbaa do inɔ didɔ̃.
46Nɔ í nyi í bɔ Kana si ilɛi Galilee má, tengi bii í tako í jɔ̀ inyi í kpaasi vɛ̃ɛu. Wee akawei ilaalu gɔ í wa Kapɛranumu, amaɛ kù waa nɛ baani. 47Ŋɔi í gbɔ iyi Jesu í nɛ hai ilɛi Zudee í naa ilɛi Galilee. Ŋɔi í dede hai Kapɛranumu í bɔ bi tɛɛ í koo í tɔɔɛ suuru ku na ku faaba amai nŋu iyi wa bi ku ku. 48Ŋɔi Jesu í jɛaa í ni, iŋɛ i ci ya dasi naanɛ ajɔ kãma ŋa bii kù jɛ ì yɛ nyinda do maamaake gɔ ŋa sisi. 49Ŋɔi akaweu í ni, mɔkɔɔyi, ǹ wa n tɔɔɛ suuru i naa wa bi tom hee amau ku maa ku. 50Ŋɔi Jesu í sɔ̃ɔ í ni, koo i nɛ, amaɛ á wɛɛ.
Nɔ inɛɛu í dasi idei Jesuu naanɛ nɔ í nɛ. 51Iyi í dasi kpãai ideɛ wa nɛ ŋɔi í ko woo ce icɛɛ ŋa à waa naa. Ŋɔi à sɔ̃ɔ à ni, amaɛ í ba iri. 52Ŋɔi í bee ŋa si waati yoomai í ba iri. Ŋɔi à ni, ana isɔ akãi bɔ̃ɔu í nya. 53Ŋɔi baai amau í ye gigi iyi waatiu bɛi Jesu í sɔ̃ɔ ideu dee dee í ni, amaɛ á wɛɛ. Nɔ nŋu do inɛi kpasɛ̃ɛ ŋa fei à dasi Jesu naanɛ.
54Isɛ gbeejisiai ihɛ̃ bɛbɛi iyi Jesu í dede hai ilɛi Zudee í naa ilɛi Galilee nɔ si kunaaɛu fei í ce maamaakei. Iyi bɛi í jɛ maamaake minjisia.
Právě zvoleno:
Zãa 4: MKL
Zvýraznění
Sdílet
Kopírovat
Chceš mít své zvýrazněné verše uložené na všech zařízeních? Zaregistruj se nebo se přihlas
2021, SIM International et UEEB
