Zãa 2

Abɔdɔ̃ iyi à ce Kana

1Si ajɔ minji ŋɔi à waa ce abɔdɔ̃ gɔ Kana ilɛi Galilee. Nɔ iyei Jesu í wa bɛ. 2Nɔ à kpe Jesu do mɔcɔɛ ŋa mɔ bi ku ce abɔdɔ̃u. 3Ŋɔi atɛ̃ vɛ̃ɛ nŋa í na í tã nɔ iyei Jesu í koo í sɔ̃ɔ í ni, aŋa a kù nɛ vɛ̃ɛ má. 4Nɔ Jesu í jɛaa í ni, yaayi, awɔ si aa sɔ̃m mii iyi an ce. Waatim kù to titã. 5Ŋɔi iyeu í sɔ̃ woo ce icɛ ŋau í ni, i ce bɛi í sɔ̃ ŋɛ fei.

6Wee tengi bii à waa ce abɔdɔ̃u boonyi mɛɛfa gɔ ŋa iyi à ce do kuta à wa bɛ, si bɛi Zuifu ŋau à ya kpã si inyii awala nŋa. Boonyi akã fei á yɔkɔ ku gba inyi zakai jɔlɔ jɔnka mɛɛ walakɔ mɛɛfa. 7Nɔ Jesu í sɔ̃ woo ce icɛ ŋau í ni, i kpã inyi i cuusi boonyi ŋau ku kɔ̃ ŋa. Nɔ à kpã à cuusi hee fei ndɛɛ í kɔ̃. 8Ŋɔi gbakã Jesu í ni a bu a koo a na inɛ ngboi abɔdɔ̃u, nɔ à bu à waa bɔ ku náa. 9Amma hee a maa náa, í kpaasi vɛ̃ɛ tã. Ŋɔi inɛ ngbou í tiɛɛ. Kù mà hai bii í naa, amma inɛ ŋa iyi à kpã inyiu wa ngu ŋa à mà. Iyi í tiɛɛ nɔ í kpe mɔkɔ titɔ̃u, 10í sɔ̃ɔ í ni, atɛ̃ iyi í dɔ̃ ku mɔi à ya tako a naaò wa, bii inɛ ŋa à mɔ hee à yo a bɛi a na ŋa iyi kù dɔ̃ sãa sãau. Amma awɔ, didɔ̃ui ì singa hee í to nsɛi.

11Iyi bɛi í jɛ maamaake sinte iyi Jesu í ce. Kana bɛi í coo si ilɛi Galilee. Do yaase bɛɛbɛi í nyisiò amboeɛ nɔ mɔcɔɛ ŋa à dasiɛ naanɛ.

12Si anyii nŋu nɔ i bɔ Kapɛranumu, nŋu do iyeɛ do ifɔɛ ŋa do mɔcɔɛ ŋa, amma a kù kpɛ bɛ.

Jesu í wa bantumai kpasɛ̃i Ilaaɔ̃*

(Cɔ Matie 21:12-13; Maaku 11:15-17; Luku 19:45-46)

13Jingaui Zuifu ŋa iyi à ya ni jingaui Iku ku kuau í maai wa. Ŋɔi Jesu í bɔ Zeruzalɛmu. 14Waati iyi í to bɛ, í bɔ kpasɛ̃i Ilaaɔ̃ nɔ í ba woo ta kɛtɛ do angudã do ankasiidi ŋa si bantumai kpasɛ̃u do inɛ ŋa iyi à buba à waa kpaasi fia. 15Ŋɔi í ce kolongbai ikũ nɔ í leleò aŋa fei hai bɛ, hee do angudã do kɛtɛ ŋau fei. Nɔ í fuka taabui woo kpaasi fia ŋau í nikã fia nŋa. 16Nɔ í sɔ̃ woo ta ankasiidi ŋau í ni, i fitaò mii ŋau bɛ hai ihɛ̃. I maà sinda kpasɛ̃i Baam ajà nŋɛ. 17Iyi mɔcɔɛ ŋau à gbɔ bɛɛbɛ ŋɔi à ye gigii kukɔi idei Ilaaɔ̃ iyi í ni, ǹ nɛ himma si icɛi ileɛu hee wa bi ku kpam.#2:17 Cɔ Iri ku kɔ̃ 69:10.

18Ŋɔi Zuifu ŋau à beeɛ à ni, maamaake yoomai aa yɔkɔ i ce nwa ku ba ka mà iyi ì nɛ kpãai bɛɛbɛ ku ce. 19Ŋɔi Jesu í jɛ nŋa í ni, i lɛgɛ ileu ihɛ̃ ŋa nɔ si afei ajɔ mɛɛta an dedeɛ má. 20Ŋɔi Zuifu ŋau à sɔ̃ɔ à ni, adɔ̃ ciiji do mɛɛfai à ce à bɛi à maò ileu ihɛ̃. Bɛirei aa ce i dedeɛ si afei ajɔ mɛɛta.

21Amma idei ile iyi Jesu wa fɔu, araɛi wa fãa. 22Na nŋu, waati iyi Jesu í jĩ hai si balɛ, mɔcɔɛ ŋa à ye gigi iyi í fɔ ide bɛɛbɛ wo. Nɔ à dasi kukɔi idei Ilaaɔ̃ naanɛ do ide ŋa iyi Jesu í tako í sɔ̃ ŋau.

Jesu í mà idɔi inɛ fei

23Si bɛi Jesu í wa Zeruzalɛmu si waatii jingaui Iku ku kuau, inɛ ŋa à yɛ maamaake ŋa iyi í ya maa ce nɔ inɛ nkpɔ í dasiɛ naanɛ. 24Amma Jesu kù na ŋa ara domi í mà idɔi inɛ fei. 25Kù bee hee a sisia nŋu daai amanɛ domi nŋu takaɛ í mà mii iyi í wa si idɔi amanɛ fei sãa sãa.

Právě zvoleno:

Zãa 2: MKL

Zvýraznění

Sdílet

Kopírovat